గవర్నర్‌తో సీఎం కేసీఆర్ భేటీ

Updated By ManamThu, 08/23/2018 - 20:31
CM KCR, Governor Narasimhan, Raj Bhavan, Telangana Assembly

CM KCR, Governor Narasimhan, Raj Bhavan, Telangana Assemblyహైదరాబాద్‌: తెలంగాణ సీఎం కేసీఆర్ గవర్నర్ నరసింహన్‌‌తో సమావేశమయ్యారు. గురువారం సాయంత్రం రాజ్ భవన్‌కు కేసీఆర్ వెళ్లారు. ఈ సందర్భంగా ఆయన గవర్నర్‌తో భేటీ అయ్యారు. ఈ భేటీలో తాజా పరిణామాలపై చర్చకు వచ్చినట్టు తెలిసింది. రాష్ట్ర ప్రభుత్వం అమలు చేస్తున్న ‘కంటి వెలుగు’ కార్యక్రమంపై కేసీఆర్ గవర్నర్‌కు వివరించినట్లు తెలిసింది.

ఇటీవల రైతు కుటుంబాలకు రైతుబీమా కింద వెంటనే పరిహారం చెల్లిస్తున్నట్లు ప్రకటించిన సీఎం.. సంబంధిత వివరాలను గవర్నర్‌కు చెప్పినట్లు సమాచారం. అదేవిధంగా శాసనసభ సమావేశాల నిర్వహణ అంశం కూడా చర్చలో ప్రస్తావనకు వచ్చినట్లు సమాచారం. 

సీఎం ఆదేశం మేరకే ఎన్నికల కమిషనర్‌తో భేటీ..
రాష్ట్ర పురపాలక, ఐటీ శాఖ మంత్రి కేటీఆర్, ప్రభుత్వ సలహాదారు రాజీవ్‌శర్మలు ఎన్నికల ప్రధాన కమిషనర్‌తో గురువారం భేటీ అయ్యారు. సీఎం కేసీఆర్ ప్రగతి భవన్‌లో బుధవారం మంత్రులతో సమావేశం జరిగిన మరుసటి రోజే.. కేటీఆర్ ఎన్నికల కమిషనర్‌తో సమావేశం కావడమనేది ముందస్తు ఎన్నికలకు సూచనగా నిలిచింది. సీఎం కేసీఆర్ ఆదేశం మేరకు కేటీఆర్, రాజీవ్ శర్మలు ఎన్నికల కమిషనర్‌తో సమావేశమయ్యారని టీఆర్‌ఎస్ పార్టీకి చెందిన కీలక నేత ఒకరు చెబుతున్నారు. ఆ భేటీలో ప్రధానంగా జమిలి ఎన్నికలపైనే చర్చ జరిగినట్టు తెలుస్తోంది. ఈసారి ఎట్టి పరిస్థితుల్లోనూ జమిలి ఎన్నికలు జరిగే అవకాశం ఉండదని, దేశవ్యాప్తంగా ఒకేసారి ఎన్నికలు నిర్వహించాలంటే.. రాజ్యాంగ సవరణ చేయాల్సిన అవసరం ఉంటుందన్న విషయాన్ని ఎన్నికల కమిషనర్ వారికి వివరించినట్టు సమాచారం. ఈ దశలో అసెంబ్లీ ఎన్నికలను ఎలాంటి అనుమానం లేకుండా ముందస్తుగా నిర్వహించుకోవచ్చనే నిర్ధారణకు వచ్చారు.

సెప్టెంబర్ మొదటివారంలోనే అసెంబ్లీ రద్దు..
ఇదిలావుంటే.. లోక్‌సభ, అసెంబ్లీ ఎన్నికలు 2019, ఏప్రిల్- మే నెలల్లో నిర్వహించాల్సి ఉంది. కానీ సీఎం కేసీఆర్ అసెంబ్లీని ముందస్తుగానే రద్దు చేసే యోచనలో కన్పిస్తున్నారు. అయితే ముందస్తు ఎన్నికలకు వెళ్లాలంటే.. సాంకేతిక పరంగా ఆరు నెలలకు ముందుగానే శాసనసభను రద్దు చేయాలి. అంటే ఈ లెక్కన రాష్ట్ర శాసనసభను సెప్టెంబర్ మొదటి, రెండో వారంలో రద్దు చేయాల్సి ఉంది. లేనిపక్షంలో ఆ ఎన్నికలను ముందస్తు ఎన్నికలుగా పరిగణించే అవకాశం ఉండదు. ఈ విషయాలన్నింటినీ పరిగణనలోకి తీసుకున్న సీఎం కేసీఆర్ సెప్టెంబర్ మొదటి వారంలోనే శాసనసభను రద్దు చేయనున్నట్టు తెలుస్తోంది. సెప్టెంబర్ రెండో తేదీన కొంగర కలాన్ బహిరంగ సభలో ముందస్తు ఎన్నికలకు వెళ్లనున్నట్టు ప్రకటిస్తారని సమాచారం. ఆ సభ అనంతరం రెండుమూడు రోజుల్లో శాసనసభను రద్దు చేయాలని గవర్నర్‌ను కోరనున్నట్టు విశ్వసనీయంగా తెలుస్తోంది. అనంతరం డిసెంబర్‌లో ఎన్నికలు వచ్చే అవకాశముంది.

ప్రతిపక్షాలను మట్టికరిపించేందుకే..
రాష్ట్రంలో ఇటీవల ప్రధాన ప్రతిపక్షమైన కాంగ్రెస్.. రాజకీయంగా తన యాక్టివిటీని క్రమక్రమంగా పెంచుతోంది. ముందస్తు ఎన్నికలు వస్తాయనే ఉద్దేశంతో కాంగ్రెస్ శ్రేణులు.. ఆ పార్టీ అధినేత రాహుల్ గాంధీని సైతం రాష్ట్రానికి రప్పించుకున్నారు. అవకాశం పోతే మళ్లి రాదన్న ఉద్దేశంతో ఒకటీ రెండు బహిరంగ సభలను భారీగానే నిర్వహించారు. కాంగ్రెస్ శ్రేణులు సైతం ఊహించని విధంగా ఆ సభలకు కార్యకర్తలు, ప్రజలు తరలివచ్చారని, ఆ సభలో రేవంత్‌రెడ్డి, ఉత్తమ్, రాహుల్ ప్రసంగాలకు అద్భుత స్పందన వచ్చిందనే సమాచారం సీఎం కేసీఆర్‌కు విశ్వసనీయ వర్గాలు పూసగుచ్చినట్టుగా వెల్లడించాయి. ఈ నేపథ్యంలోనే కాంగ్రెస్ సభలను తలదన్నేలా.. టీఆర్‌ఎస్ బహిరంగ సభను ఎవరూ ఊహించని రీతిలో నిర్వహించాలని కేసీఆర్ నిర్ణయించారు. ఆ సభతోనే ముందస్తు ఎన్నికలకు శంఖారావం ఊదాలని భావిస్తున్నారు.

ఎన్నికల శంఖారావంగా కొంగరకలాన్ ప్రగతి నివేదన సభ...
రాష్ట్రంలో ముందస్తు ఎన్నికలకు అధికార టీఆర్‌ఎస్ పార్టీ తొలి బహిరంగ సభగా కొంగర కలాన్ సభ నిలవనుంది. ఎవరూ ఊహించని రీతిలో 1600 ఎకరాల విస్తీర్ణంలో ఈ సభకు ఏర్పాట్లు చేస్తున్నారు. కొంగర కలాన్ సభ.. జనసంద్రాన్ని తలపించేలా.. రాష్ట్రవ్యాప్తంగా 25 లక్షల మంది జన సమీకరణ చేసేలా జిల్లాలు, నియోజకవర్గాల వారీగా బాధ్యతలు అప్పగించారు. ఒక్కో నియోజకవర్గం నుంచి 40 వేల మందిని సేకరించాలని లక్ష్యంగా పెట్టుకున్నారు. అయితే పార్టీ ప్రాబల్యం అంతగా లేని నియోజకవర్గాల్లో 25 వేలకు తక్కువ కాకుండా జనసేకరణ ఉండాలని సూచించారు. అందుకు సంబంధించి జిల్లాల్లోని అందరి ఎమ్మెల్యేను సమన్వయం చేసుకుంటూ జనసమీకరణ చేపట్టాలని మంత్రులను ఆదే శించారు. జిల్లాలవారీగా మంత్రులను కేటాయించి ఆ జిల్లాలోని ఎమ్మెల్యేలు, నియోజకవర్గ ఇన్‌చార్జులను పూర్తిస్థాయిలో సహకరించాలని చెప్పారు. దీంతో పాటు శుక్రవారం టీఆర్‌ఎస్ భవన్‌లో నిర్వహించే పార్టీ సమావేశంలో నేతలకు బహిరంగ సభ ఏర్పాట్లపై దిశానిర్దేశనం చేయనున్నారు. వచ్చే ఎన్నికల్లో టీఆర్‌ఎస్ గెలుపు ఖాయమని.. ఇప్పుడు కష్టపడిన నేతలకే.. నామినేటెడ్ పదవులతో పాటు పార్టీలను పెద్దపీట వేస్తారని చెప్పనున్నట్టు తెలుస్తోంది.

కాంగ్రెస్ పట్టు ఉన్న ప్రాంతాలపై ప్రత్యేక దృష్టి..
రాష్ట్రంలో నేటికీ కాంగ్రెస్‌కు కంచుకోటగా ఉన్న ప్రాంతాలపై పూర్తిస్థాయిలో దృష్టి సారించాలని ఆయా ప్రాంతాల మంత్రులు, ఎమ్మెల్యేలు, నియోజకవర్గ బాధ్యులను ఆదేశించారు. గత ఎన్నికల్లో కాంగ్రెస్ అభ్యర్థి చేతుల్లో ఓడిపోయిన టీఆర్‌ఎస్ అభ్యర్థికి అండదండలు అందించాలని మంత్రులతో పాటు పక్క నియోజకవర్గాల్లోని ఎమ్మెల్యేకు ఇప్పటికే సూచించారు. ప్రధానంగా మహబూబ్‌నగర్, నల్లగొండ జిల్లాల్లోని కొన్ని నియోజకవర్గాలను వచ్చే ఎన్నికల్లో ఏలాగైనా కైవసం చేసుకోవాలని, అందుకు తగిన విధంగా పార్టీ శ్రేణులను సంసిద్ధులను చేయాలని అక్కడి ప్రజాప్రతినిధులకు సూచించారు. నల్లగొండ జిల్లాకు సంబంధించి హుజూర్‌నగర్, నల్లగొండ, కోదాడ అసెంబ్లీ నియోజకవర్గాలను కైవసం చేసుకోవడంతో పాటు టీఆర్‌ఎస్ ఎమ్మెల్యేలుగా గెలిచినా.. బలహీనంగా ఉన్న నియోజకవర్గాలపైనా దృష్టి పెట్టాలని ఆ జిల్లా మంత్రిని ఆదేశించారు.

బలంగా మారనున్న ప్రభుత్వ పథకాలు..
దేశంలో ఎక్కడా లేని ప్రజాసంక్షేమ పథకాలు తెలంగాణలో అమలవుతున్నాయనడంలో ఎలాంటి సందేహం లేదు. మిషన్ కాకతీయ మొదలుకుని.. కంటి వెలుగు పథకం వరకు దాదాపు ప్రజలందరూ హర్షిస్తున్న పథకాలుగానే కొనసాగుతున్నాయి. రైతు బంధు, రైతు బీమా, 24 గంటల ఉచిత విద్యుత్, కంటి వెలుగు, పాడి బర్రెల పంపిణీ, సబ్సిడీ గొర్రెలు, ఉచితంగా చేప పిల్లల పంపిణీ వంటి పథకాలు రాష్ట్ర ప్రభుత్వ ప్రతిష్టను ఇనుమడింపజేశాయి. ప్రధానంగా రైతు బంధు పెట్టుబడి పథకానికి సంబంధించి రైతులకు ప్రభుత్వాన్ని మరింత దగ్గరకు చేశాయి. రైతు బీమా పథకం.. వ్యవసాయరంగంలో ఓ నూతన శకానికి నాంది పలికిందనే చెప్పాలి. అయితే ఈ పథకాల పై ప్రతిపక్షాలను నుంచి భారీగానే విమర్శలు వస్తూనే ఉన్నాయి. ప్రతిపక్షాల ఆరోపణల్లో నిజం ఏంత ఉందనే విషయం పక్కనబెడితే.. కేసీఆర్ కిట్ వంటి పథకంతో ప్రభుత్వ వైద్యాలయాలు పూర్వవైభవాన్ని సంతరించుకున్నాయనే చెప్పొచ్చు. ప్రభుత్వ పథకాల బలంగా సీఎం కేసీఆర్ ముందస్తు ఎన్నికలకు రెడీ అవుతున్నారని విశ్వసనీయవర్గాలు సైతం వెల్లడిస్తున్నాయి. ఇంతకు ముందస్తు ఎన్నికల ప్రకటన.. సెప్టెంబర్ రెండో తేదీన జరిగే.. కొంగర్‌కలాన్ బహిరంగ సభతో తేటతెల్లమవుతుందా? లేక శుక్రవారం జరిగే పార్టీ రాష్ట్ర కమిటీ సమావేశంతో తెలనుందా? వేచిచూడాల్సిందే మరీ..

నేడు ఢిల్లీకి కేసీఆర్
సీఎం కేసీఆర్ రాష్ట్ర ఉన్నతాధికారులతో కలిసి శుక్రవారం సాయంత్రం ఢిల్లీకి బయలుదేరి వెళ్లనున్నారు. రాష్ట్రానికి సంబంధించి కేంద్ర ప్రభుత్వం వద్ద పెండింగ్‌లో ఉన్న అంశాలపై ప్రధానమంత్రి నరేంద్రమోదీతోపాటు, ఇతర కేంద్ర మంత్రులను కలుస్తారు. రాష్ట్ర ప్రభుత్వం ఎన్నిసార్లు వినతులు చేసినా, కేంద్రం నుంచి ఆశించిన స్పందన రావడం లేదని కేసీఆర్ భావిస్తున్నారు. తానే స్వయంగా వెళ్ళి అవసరమైతే ఢిల్లీలోనే రెండు, మూడు రోజులుండి, ప్రధాని, ఇతర మంత్రులతో మాట్లాడి సమస్యలను పరిష్కరించుకోవాలని సీఎం నిర్ణయించారు. ముఖ్యంగా తెలంగాణ రాష్ట్రంలో కొత్తగా ఏర్పాటు చేసుకున్న జోనల్ వ్యవస్థకు కేంద్ర ప్రభుత్వం నుంచి ఆమోదం లభించాల్సి ఉంది. కొత్త జోనల్ వ్యవస్థకు ఆమోదం లభించకపోవడంతో పంచాయతీ కార్యదర్శుల నియామకంతోపాటు మరికొన్ని నియామకాల్లో జాప్యం జరుగుతోందని, జోనల్ వ్యవస్థకు తక్షణం ఆమోద ముద్ర వేయించే విషయంలో ప్రధాని చొరవ చూపాలని కేసీఆర్ కోరనున్నారు. ఇప్పటికే రాష్ట్ర ప్రభుత్వ ముఖ్య సలహాదారు రాజీవ్ శర్మ ఢిల్లీలోనే ఉండి రాష్ట్రానికి సంబంధించిన అంశాలపై సమీక్షిస్తున్నారు. అయినా ఆశించిన ఫలితం రావడం లేదు. దీంతో సీఎం స్వయంగా ఢిల్లీ వెళ్లాలని నిర్ణయించారు. జోనల్ వ్యవస్థతో పాటు తెలంగాణ రాష్ట్రానికి రావాల్సిన అదనపు ఎఫ్.ఆర్.బి.ఎం. నిధుల విడుదల, వెనుకబడిన జిల్లాల అభివృద్ధి కోసం ఇవ్వాల్సిన రూ.450 కోట్ల నిధుల విడుదల, మహిళా సంఘాలు, రైతులకు ఇచ్చే రుణాలపై ఇచ్చే వడ్డీ రాయితీలో కేంద్ర ప్రభుత్వ వాటా విడుదల, హైకోర్టు విభజన, రీజనల్ రింగు రోడ్డుకు నిధులు, సెక్రటేరియట్ నిర్మాణానికి రక్షణ శాఖ స్థలాల కేటాయింపు తదితర అంశాలపై ప్రధానితో పాటు కేంద్ర మంత్రులతో మాట్లాడి రావాలని కేసీఆర్ నిర్ణయించారు. ఈ సారి రాష్ట్రానికి సంబంధించిన అంశాలపై కేంద్ర ప్రభుత్వం అనుసరిస్తున్న నిర్లక్ష్యాన్ని ప్రధాని వద్ద ప్రస్తావించాలని సీఎం భావిస్తున్నారు. వెంటనే రాష్ట్రానికి సంబంధించిన అంశాలప పరిష్కారానికి పిఎంఓ చొరవ చూపాలని ప్రధానిని కేసీఆర్ కోరనున్నారు. కేసీఆర్  వెంట ప్రభుత్వ ప్రధాన కార్యదర్శి ఎస్.కె.జోషి, ముఖ్య కార్యదర్శి నర్సింగ్ రావు, ఆర్థిక శాఖ కార్యదర్శి రామక ష్ణ రావు, ఇతర ఉన్నతాధికారులు ఢిల్లీకి వెళ్లనున్నారు. అయితే బుధవారం ప్రగతి భవన్ వేదికగా సీఎం కే సీఆర్ మంత్రి వర్గ సమావేశం ఏర్పాటు చేసిన విషయం తెలిసిందే. ఈ సమావేశంలో ముఖ్యంగా ముందస్తు ఎన్నికల చుట్టూనే చర్చ జరిగిందని సమాచారం. దీనికి తోడు గురువారం రాజ్‌భవన్‌లో గవర్నర్ నరసింహన్ కూడా కలిశారు. ఈ సందర్భంగా గవర్నర్‌తో మంత్రి వర్గ సమావేశంలో చర్చించిన అంశాలతోపాటు ముందస్తు ఎన్నికల విషయంపై కూడా చర్చించినట్టు సమాచారం. ఇటీవల గవర్నర్ ఆంధ్ర ప్రదేశ్ సీఎం చంద్రబాబు నాయుడుతో అమరావతిలో భేటీ అయ్యారు. ఈ సమావేశంలో ముందస్తు ఎన్నికలపై ప్రస్తావన వచ్చిందని, సీఎం కేసీఆర్ ముందుస్తుకు సిద్ధంగా ఉన్నారని చంద్రబాబుతో నరసింహన్ చెప్పినట్టు సమాచారం. ఈనేపథ్యంలో గవర్నర్‌తో చర్చించిన గంటల వ్యవధిలోనే ఢిల్లీకి వెళ్లి ప్రధానిని కలిస్తానని కేసీఆర్ ప్రకటించడంతో ముందస్తు ఎన్నికలపై సర్వత్రా ఆసక్తి నెలకొంది. దీంతోపాటు గురువారమే తెలంగాణ రాష్ట్ర ముఖ్య సలహాదారు రాజీవ్ శర్మ ఢిల్లీకి వెళ్లి ఎన్నికల కమిషన్ అశోక్ లావాసాతో భేటీ అయి చర్చించారు. రాజీవ్ శర్మ ఢిల్లీలో ఉండగానే సీఎం కేసీఆర్ ఉన్నతాధికారులతో కలిసి ఢిల్లీకి వెళ్లడం చర్చనీయాంశమవుతుంది. 

హైదరాబాద్‌లో పెరిక భవనం..
హైదరాబాద్ నగరంలో పెరిక కులస్తులకు భవనం నిర్మించడానికి అవసరమైన స్థలం, నిధులు కేటాయించాలని సీఎం కేసీఆర్ ఆదేశించారు. ఎమ్మెల్సీ బోడకుంట వెంకటేశ్వర్లు ప్రగతి భవన్‌లో గురువారం కేసీఆర్‌ను కలిశారు. ఖైరతాబాద్ చౌరస్తాలో తమ కులానికి అత్యంత విలువైన స్థలం, భవనం ఉండేదని, కానీ రోడ్డు వెడల్పులో చాలా భాగం కోల్పోయామని వెంకటేశ్వర్లు వివరించారు. తమ కులస్థుల సామాజిక, విద్య రంగాల్లో పురోగతికోసం కార్యకలాపాలు చేపట్టడానికి హైదరాబాద్‌లో భవనం అవసరమని ఆయన వినతి పత్రం సమర్పించారు. దీనికి సీఎం సానుకూలంగా స్పందించారు. పెరిక కులస్తులకు వెంటనే స్థలం, నిధులు కేటాయించాలని చెప్పారు. దీనికోసం అవసరమైన ఏర్పాట్లు చేయాలని మంత్రి ఈటెల రాజేందర్‌ను కోరారు.

బీసీ ఫైనాన్స్ కార్పొరేషన్ చైర్మన్‌గా పూజారుల శంభయ్య
తెలంగాణ రాష్ట్ర బీసీ ఫైనాన్స్ కార్పొరేషన్ చైర్మన్‌గా నల్గొండ జిల్లా నకిరేకల్‌కు చెందిన పూజారుల శంభయ్యను నియమించాలని సీఎం కేసీఆర్ నిర్ణయించారు. వెంటనే ఉత్తర్వులు జారీ చేయాలని సీఎస్‌ను ఆదేశించారు.

English Title
CM KCR meets Governor Narasimhan at Raj Bhavan




Related News