నవంబర్‌లో ఎన్నికలు?

Updated By ManamMon, 09/10/2018 - 23:54
Election Commission to Telangana
  • నేడు తెలంగాణకు ఎన్నికల కమిటీ 

  • గుర్తింపు పొందిన పార్టీలతో చర్చలు

  • 12న కలెక్టర్లు, ఎస్పీలు, సీఎస్, డీజీపీతో భేటీ

  • ఓటర్ల జాబితా ముసాయిదా విడుదల

electionsహైదరాబాద్: నవంబర్  రెండో వారంలో రాష్ట్రంలో ఎన్నికలు జరుగనున్నట్లు తెలుస్తోంది. తెలంగాణ ప్రభుత్వం అసెంబ్లీని రద్దు చేసి ముందస్తు ఎన్నికలకు సిద్ధమవడంతో కేంద్ర ఎన్నికల సంఘం ఎలక్షన్ నిర్వహణపై దృష్టి సారించింది. ఇప్ప టికే కసరత్తు షురూ చేసింది. నాలుగు ఉత్తరాది రాష్ట్రాలతోపాటు తెలంగాణ లోనూ ఎన్నికలు నిర్వహించనున్నట్లు సమాచారం. ఈ నేపథ్యంలోనే తెలం గాణలో ఎన్నికలకు అవసరమైన ఈవీ ఎంలు, వీవీప్యాట్లు, సిబ్బంది... తదితర వివరాలను అందజేయాలని సీఈసీ రాష్ట్ర ఎన్నికల సంఘాన్ని ఆదేశించారు. దీనితో వివరాలు అందించడానికి సోమవారం సీఈఓ రజత్‌కుమార్ కేంద్ర ఎన్నికల ప్రధానాధికారితో భేటీ అయ్యారు. సీఈసీ ఓపీ రావత్‌తో భేటీ అనంతరం రజత్‌కుమార్ మాట్లాడుతూ... సీఈసీతో సుదీర్ఘంగా చర్చించామని, తెలంగాణలో ఎన్నికల నిర్వహణ, సంసిద్ధత వంటి అంశాలపై కేంద్ర ఎన్నికల సంఘానికి వివరించినట్టు తెలిపారు. వివిధ వివరాలతో కూడిన లిఖిత పూర్వక నివేదికను ఈసీకి ఇచ్చినట్టు చెప్పారు. కేంద్ర ఎన్నికల బృందం మంగళవారం రాష్ట్రానికి రానున్న నేపథ్యంలో ఆ ఏర్పాట్లపైనా చర్చించినట్లు పేర్కొన్నారు. ఢిల్లీలో ఉన్న తెలంగాణ  ఎన్నికల విభాగానికి చెందిన ఉన్నతాధికారులను కూడా కలిశామన్నారు.

నేడు  రానున్న ఎన్నికల కమిటీ..
అయితే కేంద్ర ఎన్నికల సంఘం హైదరాబాద్‌లో పర్యటించేందుకు ఒక ఉన్నతస్థాయి బృందాన్ని పంపిస్తున్న విషయం విదితమే. సీనియర్ డిప్యూటీ సీఈసీ ఉమేష్ సిన్హా నేతృత్వంలోని టీమ్ మంగళవారం నగరానికి చేరుకోనుంది. పర్యటనలో భాగంగా పలువురితో భేటీ అయి రాష్ట్రంలో ఎన్నికల నిర్వహణకు గల అవకాశాలను పరిశీలించి, చీఫ్ ఎలక్షన్ కమిషన్‌కు నివేదిక రూపంలో అందించనుంది. మంగళవారం సాయంత్రం 4 గంటలకు హైదరాబాద్‌కు చేరుకోనున్న కేంద్ర ఎన్నికల బృందం తాజ్‌కృష్ణ హోటల్‌లో బస చేయనున్నారు. అదేరోజు సాయంత్రం 6.30 గంటల నుంచి 8.30 వరకు తెలంగాణలో గుర్తింపు పొందిన పొలిటికల్ పార్టీలతో భేటీ కానున్నట్టు సమాచారం. గుర్తింపు పొందిన 9 పార్టీల (టీఆర్‌ఎస్, కాంగ్రెస్, బీజేపీ, టీడీపీ, వైసీపీ, సీపీఐ, సీపీఎం, ఎంఐఎం, బీఎస్పీ) నాయకులతో సమావేశమయి ఎన్నికల నిర్వహణ, ఓటర్ల జాబితాపై చర్చించనున్నారు. చర్చలో ఈవీఎం, వీవీప్యాట్లు, బ్యాలెట్ పేపర్స్‌పై అభిప్రాయాలను సేకరించనున్నారు. రాత్రి 8.30 నుంచి 9.30 పోలీస్‌లు, ఆబ్కారీ శాఖ, సీఈఓలతో సమావేశం నిర్వహిస్తారు. 12వ తేదీన జలమండలి కార్యాలయంలో కలెక్టర్లు, జిల్లా ఎస్పీలతో భేటీ అయి జిల్లాల వారీగా ఎన్నికల నిర్వహణ, సిబ్బందికి శిక్షణ, తీసుకోవాల్సిన చర్యలపై చర్చించనున్నట్టు తెలుస్తోంది. అదేరోజు సాయంత్రం 5 గంటల నుంచి 6.30 వరకు సీఎస్, డీజీపీతో సమావేశమయి ఎన్నికల ఏర్పాట్లపై కూలంకషగా చర్చించి నిర్ణయం తీసుకోనున్నట్టు సమాచారం. అనంతరం సాయంత్రం 6.30 గంటలకు మీడియా సమావేశం నిర్వహించి వివరాలు వెల్లడిస్తారు. ఉమేష్ సిన్హా నేతృత్వంలోని బృందం రాష్ట్రంలో సేకరించిన వివరాలతో కూడిన నివేదికను కేంద్ర ఎన్నికల సంఘానికి అందిస్తారు. రాష్ట్రంలో ఎన్నికలు ఎప్పుడు నిర్వహించాలనేదానిపై సిన్హా రిపోర్టును బట్టే కేంద్ర ఎన్నికల సంఘం నిర్ణయం తీసుకుంటుంది. ఇక ఇప్పటికే రాష్ట్రంలో కలెక్టర్లు, డిప్యూటీ కలెక్టర్లుకు ఎన్నికల నిర్వహణపై అవగహన కల్పించారు ఎన్నికల స్పెషల్ ఆఫీసర్స్. ఎన్నికల నిర్వహణ కోసం రూ. 308 కోట్లను కేటాయించారు. ఎన్నికల నిర్వహణపై కొన్ని పార్టీలు ఈవీఎంలు సరైనవి అంటే...కొన్ని పార్టీలు మాత్రం బ్యాలెట్  పెడితే మంచిదన్న అభిప్రాయాన్ని వ్యక్తం చేస్తున్నాయి. ఈ నేపథ్యంలో కేంద్ర ఎన్నికల కమిటీ నివేదిక సమర్పించిన తర్వాత ఎన్నికలు ఎలా నిర్వహించాలన్నది ఈసీఐ నిర్ణయిస్తుంది. ఈసీఐ ఆదేశాలకు అనుగుణంగా రాష్ట్ర ఎన్నికల సంఘం నడుచుకుంటుంది. అయితే నవంబర్ మూడో వారం వరకే ఎన్నికలు నిర్వహించే అవకాశం ఉన్నట్టు సమాచారం. మిగిలిన రాష్ట్రాల కంటే నెల ముందే తెలంగాణలో ఎన్నికలు నిర్వహించాలని ఈసీఐ నిర్ణయించినట్టు తెలుస్తోంది. ఈ సమావేశాలన్నీ నామమాత్రంగానే నిర్వహిస్తున్నట్టు పలువురు అభిప్రాయపడుతున్నారు. తెలంగాణ ఎన్నికల నిర్వహణ తేదీలను ముందే నిర్ణయించినట్టు సమాచారం. దీని బట్టి చూస్తే డిసెంబర్ రెండో వారం వరకు తెలంగాణలో కొత్త ప్రభుత్వం అధికారం చేపట్టబోయేటట్టుంది. 

కలెక్టర్లతో సీఎస్, డీజీపీ వీడియో కాన్ఫరెన్స్..
ఎన్నికల నిర్వహణ అంశంపై నివేదిక ఇచ్చేందుకు కేంద్ర ఎన్నికల బృందం రాష్ట్రానికి రానున్న నేపథ్యంలో ప్రభుత్వ ప్రధాన కార్యదర్శి ఎస్.కే. జోసి, డీజీపీ మహేందర్‌రెడ్డి అన్ని జిల్లాల కలెక్టర్లతో వీడియో కాన్ఫరెన్స్ నిర్వహించారు. ఎన్నికల నిర్వహణ, సిబ్బందికి శిక్షణ, ఈవీఎం, వీవీప్యాట్ల వాడకం వంటి అంశాలపై కలెక్టర్లతో చర్చించారు. తీసుకోవాల్సిన జాగ్రత్తలు సూచించారు.

డిప్యూటీ కలెక్టర్లకు అవగాహన..
ఇటీవల కేంద్ర ఎన్నికల సంఘం ప్రతినిధులు, తెలంగాణ సీఈవో రజత్‌కుమార్ అన్ని జిల్లాల కలెక్టర్లకు ఈవీఎంలు, వీవీప్యాట్ల వాడకంపై అవగాహన కల్చించారు. మంగళవారం డిప్యూటీ కలెక్టర్లకు డిప్యూటీ సీఈవో సత్యవాణి అవగాహన కల్పించారు. ఈవీఎంలు, వీవీప్యాట్ల వాడకం, ప్రజలకు అవగాహన కల్పించడానికి తీసుకోవాల్సిన చర్యలను సూచించారు. 

ఓటర్ల జాబితా ముసాయిదా విడుదల..
ముందస్తు ఎన్నికల నేపథ్యంలో ఎన్నికల సంఘం వేగంగా ఏర్పాట్లు చేస్తోంది. ఎన్నికల నిబంధనల మేరకు జిల్లాల్లో సమాచార సేకరణ పూర్తయింది. గడువుకు ముందే ఎన్నికలు జరగనున్న తరుణంలో ఓటర్ల జాబితాల సవరణపై దృష్టి పెట్టింది. ఈ నేపథ్యంలోనే ఓటర్ల జాబితా ముసాయిదాను తాజాగా రాష్ట్ర ఎన్నికల సంఘం విడుదల చేసింది. 2018 మార్చిలో ప్రకటించిన ఓటర్ల జాబితాకు ఎన్నికల సంఘం సవరణ చేపట్టనుంది. అభ్యంతరాలు, వినతుల స్వీకరణకు 15 రోజులపాటు గడువు విధించింది. ఈనెల 25 వరకు అభ్యంతరాలు, వినతులకు అవకాశం ఇచ్చింది. వచ్చే నెల 8వ తేదీ వరకు తుది ఓటర్ల జాబితాను విడుదల చేయనున్నారు. 

ఢిల్లీలో సీఈసీ సమావేశంలో చర్చించిన అంశాలు..
రాష్ట్రంలో ఎన్నికల నిర్వహణ కోసం ఎలక్ట్రోరల్ ఏర్పాటు
అవసరమైన ఈవీఎంలను అందుబాటులో ఉంచడం
వీవీప్యాట్ల వినియోగం
ఎన్నికల సిబ్బంది సన్నద్ధత
శాంతి భద్రతలకు విఘాతం కలుగకుండా జాగ్రత్తలు
మౌలిక వసతుల అంశాలపై చర్చ
ఏడు మండలాల ఓటర్ల అంశం
ప్రతి పక్షాలు లెవనెత్తుతోన్న అభ్యంతరాలు,
కోర్టుల నుంచి ఎదురయ్యే చట్టపరమైన అంశాలపై చర్చ

elections

English Title
Elections in November?




Related News