లాభాల ట్రెండ్‌కు ముగింపు

stock market
  • సెన్సెక్స్ 100 పాయింట్లకు పైగా డౌన్

  • 36,000 మార్క్‌కుపైనే నిలిచిన ఇండెక్స్

  • 10,800 స్థాయిని కాపాడుకున్న నిఫ్టీ

ముంబై: దేశీ స్టాక్ మార్కెట్ నాలుగు రోజుల లాభాలకు గురువారం బ్రేకులు పడ్డాయి. లాభాల్లో ప్రారంభమైన బెంచ్‌మార్క్ ఇండెక్స్‌లు తర్వాత ఆ లాభాలను నిలుపుకోలేకపోయాయి. చివరకు సెన్సెక్స్ 106 పాయింట్ల నష్టంతో36,106 వద్ద, నిఫ్టీ 34 పాయింట్ల నష్టంతో 10,821 వద్ద క్లోజయ్యాయి. నిఫ్టీ 50లో టైటాన్, టాటా మోటార్స్, ఐషర్ మోటార్స్, బజాజ్ ఆటో, ఎన్‌టీపీసీ, సిప్లా, ఎంఅండ్‌ఎం, యూపీఎల్, యస్ బ్యాంక్, భారతీ ఎయిర్‌టెల్ షేర్లు లాభాల్లో ముగిశాయి. అదేసమయంలో హెచ్‌పీసీఎల్, ఇండస్‌ఇండ్ బ్యాంక్, గ్రాసిమ్, భారతీ ఇన్‌ఫ్రాటెల్, మారుతీ సుజుకీ, కోటక్ మహీంద్రా బ్యాంక్, ఐఓసీ, బీపీసీఎల్ షేర్లు నష్టపోయాయి. ఇండస్‌ఇండ్ బ్యాంక్ షేరు 2 శాతానికి పైగా పడిపోయింది. టైటాన్, టాటా మోటార్స్, ఐషర్ మోటార్స్, బజాజ్ ఆటో షేర్లు 1 శాతానికి పైగా లాభపడ్డాయి. ఆసియా మార్కెట్లు బలహీనంగా ఉండటం, ఐరోపా మార్కెట్ నుంచి ప్రతికూల సంకేతాలు అందటం వంటి అంశాలు మన మార్కెట్‌పై ప్రభావం చూపాయి. అలాగే డిసెంబర్ క్వార్టర్ ఫలితాల వెల్లడి సీజన్ ప్రారంభం కావడంతో ఇన్వెస్టర్లు జాగ్రత్తగా వ్యవహరిస్తున్నారు. ఇంట్రాడేలో నిఫ్టీ 10,801 పాయింట్ల కనిష్ట స్థాయిని, 10,859 పాయింట్ల గరిష్ట స్థాయిని తాకింది. ఇక సెన్సెక్స్ 36,070- 36,269 పాయింట్ల శ్రేణిలో కదలాడింది. సెక్టోరల్ ఇండెక్స్‌లు మిశ్రమంగా ముగిశాయి. నిఫ్టీ ఆటో, నిఫ్టీ మీడియా, నిఫ్టీ ఫార్మా, నిఫ్టీ పీఎస్‌యూ బ్యాంక్ ఇండెక్స్‌లు మినహా మిగతావి నష్టోల్లోనే ముగిశాయి. ఫైనాన్షియల్ షేర్లు ఎక్కువగా పడిపోవడం ఇండెక్స్‌లపై ఒత్తిడిని పెంచాయి. 

సంబంధిత వార్తలు