sunday special

కాంట్రవర్సీ ‘షో’!

Updated By ManamSun, 08/12/2018 - 02:32

imageసాహసమే పెట్టుబడిగా సాగుతున్న టీవీ రియాల్టీ షోల సంఖ్య మనదేశంలో ఒక్కసారిగా పెరుగుతోంది. ఓ వైపు వీక్షకాదరణ లభిస్తుండడం, మరో వైపు ఇందులో పాల్గొన్నవారికి మంచి పాపులారిటీ వస్తుండడంతో అడ్వెంచరస్ రియాల్టీ షోలపై నిర్మాతలు దృష్టి పెడుతున్నారు. ఈ తరహా షోలకు యాంకరింగ్ చేయడమంటే కత్తి మీద సాము. అయినా కూడా రొటీన్ సినీ లైఫ్ నుంచి రిలీఫ్ కోసం ఇలాంటి బాధ్యతలను చేపట్టేందుకు సెలబ్రిటీలు ఉత్సాహంగా ముందుకొస్తున్నారు.

గొడవలే ప్రధానం
image
సాధారణంగా వివాదాలు లేని, రాని రియాల్టీ షో అంటూ ఏదీ ఉండదు. ఏ షో అయినా వివాదాల పుట్టగానే మారుతున్న ప్రస్తుత తరుణంలో తెరమీద లేదా తెరవెనుక ఇలాంటి అడ్వెంచరస్ రియాల్టీ షోలు కాంట్రవర్సీలకు కేరాఫ్‌గా నిలుస్తున్నాయి. ముఖ్యంగా అఫైర్లు ఇందులో భాగంగా మారాయి. బిగ్‌బాస్, రోడీస్, ఇండియన్ ఐడల్,  ఇండియాస్ గాట్ ట్యాలెంట్, కౌన్ బనేగా కరోడ్‌పతి, సారేగామా, డ్యాన్స్ ఇండియా డ్యాన్స్, గ్రేట్ ఇండియన్ లాఫ్టర్ చాలెంజ్, మాస్టర్ షెఫ్.. ఇలా మనదేశంలో టాప్ టెన్ రియాల్టీ షోల్లో వివాదాలు వస్తూ పోతూ ఉంటాయి. ‘కామెడీ నైట్స్’ వంటి షోల్లో అయితే ఏకంగా చెప్పులతో కొట్టుకున్న సందర్భాలు అనేకం ఉన్నాయి. దీంతో షో చేసేవారి మధ్య గొడవలు తారస్థాయికి చేరి షో ఆగిపోయింది కూడా. ఇక ‘ఇండియన్ ఐడల్’లో దక్షిణాది పార్టిసిపెంట్స్ లేకపోతే ఈ రియాల్టీ షోకు రేటింగ్స్ చాలా తక్కువ వస్తాయన్న కారణంతో మన దక్షిణాది రాష్ట్రాల వారికి ఇటీవల కాలంలో విపరీతంగా ప్రాధాన్యం ఇస్తూ ఆఖరుకి విన్నర్స్ లేదా రన్నర్స్‌గా ప్రకటిస్తున్నారన్న ఆరోపణలు బలంగానే ఉన్నాయి. ‘బిగ్ బాస్’ పార్టిసిపెంట్స్ మధ్య ప్రేమలు, వివాదాలు చినికి చినికి గాలివానలా మారి బాహాటంగానే పంచాయితీలు జరుగుతూ వస్తున్నాయి. ఇక మాస్టర్ షెఫ్ పోటీల్లో పార్టిసిపెంట్స్‌ను ఇష్టానుసారం తిట్టే షెఫ్‌లు సృష్టించే భయానక వాతావరణంతో సాగిన ‘హెల్స్ కిచెన్’ ఇప్పటికీ అందరికీ గుర్తుండే ఉంటుంది. రామ్‌సే గార్డన్‌ను ఈ షో ద్వారా అసహ్యించుకునే వారు ఎంతమంది ఉన్నారో ఇష్టపడి షో చూసేవారు అంతేమంది ఉన్నారు.

బాలు కూడా..
‘పాడుతా తీయగా’ వంటి రియాల్టీ షోల్లో ఎస్పీ బాలసుబ్రమణ్యం చక్కగా పాడిన వారిని అభినందిస్తూనే మరో వైపు పాడటంలో ఉన్న తప్పులను ఎత్తిచూపే విధానం కూడా మొద ట్లో బాగా విమర్శలపాలైంది. ఇక ‘నేటి సింగర్లు ఇలా.. మా కాలంలో అలా’ అంటూ బాలు చెప్పే ఉదాహరణలు ప్రోగ్రామ్‌కు హాజరైన జడ్జిలను కూడా పలు సందర్భాల్లో బాధించడంతో కొందరు మ్యూజిక్ డైరెక్టర్లు, సింగర్లు ఈ కార్యక్రమానికి డుమ్మా కొట్టేలా చేస్తోంది. 

నానిపై సెటైర్లు
తెలుగు ‘బిగ్ బాస్ 2’కు హోస్ట్‌గా వ్యవహరిస్తున్న హీరో నానిపై నెట్‌లో నడుస్తున్న సెటైర్లు, ట్రాలింగ్‌లు అన్నీ ఇన్నీ కావు. ఇక షోలో పాల్గొన్న తేజస్వి, భానుశ్రీల వివాదాలు షోను కాస్త అన్‌పాపులర్ చేసినా వివాదాలు లేని రియాల్టీ షోలు సాధ్యం కావని మరోమారు తేల్చిచెప్పాయి. ‘కౌశల్ ఆర్మీ’ పేరుతో నటుడు కౌశల్ ఫ్యాన్స్ నానితో సహా ఇతర పార్టిసిపెంట్స్‌పై నిత్యం ఇంటర్నెట్ వేదికగా చేస్తున్న వివాదాలు అందరి దృష్టినీ ఆకర్షిస్తున్నాయి. ఆఖరుకి ఈ షోను నడిపిస్తోంది కౌశల్ ఆర్మీనే అనేలా సాగుతోంది సరికొత్త వివాదం.
- భార్గవి కరణం
 

image

 



లైట్ తీస్కోకు భయ్యా..!

Updated By ManamSun, 08/12/2018 - 02:05

imageభారతదేశంలో బిట్ కాయిన్, మోనెరో వంటి డిజిటల్ కరెన్సీలకు సంబంధించిన సైబర్ బెదిరింపుల అవగాహన బొత్తిగా లేదు. కానీ అంతర్జాలంలో సంచరించే వాళ్లలో 77 శాతం మందికి డిజిటల్ కరెన్సీ అనేది ఉందని తెలుసు. అయినా కూడా సైబర్ బెదిరింపుల విషయంలో వాళ్లు లైట్ తీసుకుంటున్నారు. తమ వ్యక్తిగత, స్మార్ట్ హోమ్ పరికరాలకు 
హాని కలిగించే క్రిప్టోమైనింగ్ మాల్‌వేర్ గురించి చాలా మంది వినియోగదారులు పట్టించుకోవట్లేదు. వినియోగదారులపై దృష్టిపెట్టే సైబర్ సెక్యూరిటీ సాఫ్ట్‌వేర్ కంపెనీ ‘అవస్త్’ విడుదల చేసిన ఓ నివేదిక ఈ విషయూన్ని వెల్లడించింది. క్రిప్టో కరెన్సీతో తమకెలాంటి సంబంధం లేదు కాబట్టి, క్రిప్టోమైనింగ్ మాల్‌వేర్ తమ వస్తువులకు హాని కలిగించే అవకాశమే లేదని చాలా మంది నమ్ముతున్నారు. 
ఇది పొరపాటు.

వాస్తవమేమంటే, క్రిప్టోమైనింగ్ మాల్‌వేర్ లేదా క్రిప్టోకరెన్సీ మైనింగ్ మాల్‌వేర్ అనేది మన కంప్యూటర్ లేదా స్మార్ట్‌ఫోన్‌లోని సాఫ్ట్‌వేర్ ప్రోగ్రామ్స్‌ని చదివేసి, ఆ పరికరంలోని డాటానంతా తన స్వాధీనంలోకి తెచ్చుకోవడానికి మాల్‌వేర్ భాగాల్ని డెవలప్ చేస్తుంది. వినియోగదారుడి అనుమతితో నిమిత్తం లేకుండానే క్రిప్టోకరెన్సీ మైనింగ్ కోసం ఆ మాల్‌వేర్‌ను ఉపయోగిస్తుంది. ఈ హానికర క్రిప్టోమైనింగ్ విషయంలో మనవాళ్లు ఉదాసీన వైఖరిని అవలంబిస్తున్నారని అవస్త్ నివేదిక తెలిపింది. దాని ప్రకారం క్రిప్టోకరెన్సీలను మైనింగ్ చేసే మాల్‌వేర్ లేదా మాల్‌వేర్ సోకిన వెబ్‌సైట్ల గురించి 66 శాతం మంది వినియోగదారులు వినివున్నారు కానీ, ఆ మాల్‌వేర్‌పై వాళ్లకు సమగ్ర అవగాహన లేదు.

అక్రమ క్రిప్టోమైనర్స్
ఒక అధ్యయనం ప్రకారం 2018లో ఇప్పటివరకూ రాన్సమ్‌వేర్ ఆధారిత దాడుల కంటే క్రిప్టోమైనర్ ఆధారిత దాడులేimage ప్రమాదకరంగా మారాయి. తొలి త్రైమాసికంలో మెుత్తం 30 కోట్ల మాల్‌వేర్ ఘటనలు చోటు చేసుకోగా, వాటిలో క్రిప్టోమైనర్ ఘటనలు 2.89 కోట్లు! అంటే దాదాపు 10 శాతం. జనవరి నుంచి మార్చి వరకు ఈ ఘటనలు క్రమేణా పెరుగుతూ వచ్చాయిు. అదే సమయంలో రాన్సమ్‌వేర్ ఘటనల్లో తగ్గుదల కనిపించింది. రాన్సమ్‌వేర్ దాడి జరిగినప్పుడు సిస్టమ్‌లోని వనరులన్నీ కరప్ట్ అయినట్లు స్క్రీన్ మీదే తెలిసిపోతుంది. సిస్టమ్‌ను ఆన్ చేయగానే అందులోని ఫైల్స్ అన్నీ ఎన్‌క్రిప్ట్ అయ్యూయనే విషయం స్క్రీన్ మీద ప్రత్యక్షమవుతుంది. ఆ సమస్యకు పరిష్కారంగా డబ్బును డిమాండ్ చేస్తుంది. అయిుతే క్రిప్టోమైనర్ మాల్‌వేర్ అలా చేయదు. మనం ఏదైనా సైట్‌ను సర్ఫింగ్ చేస్తున్నప్పుడే, మనకు తెలీకుండానే ఒక క్రిప్టోమైనర్ సిస్టమ్‌లో ఇన్‌స్టాల్ అయిుపోతుంది. దాని ద్వారా ఆ కంప్యూటర్‌లోని వనరులన్నింటినీ తన స్వాధీనంలోకి తెచ్చుకొని, క్రిప్టోకరెన్సీ కోసం మైనింగ్ చేస్తుంది. మనకు విషయం తెలిసేసరికే చాలా నష్టపోతామన్న మాట!

సైబర్ నేరగాళ్లు రాన్సమ్‌వేర్ కంటే క్రిప్టోమైనర్స్ మీద ఎందుకు ఇంటరెస్ట్ చూపుతున్నట్లు? రాన్సమ్‌వేర్ ద్వారా తాము అనుకున్న ఫలితాల్ని నేరగాళ్లు సాధించలేక పోతున్నారు. 2017లో రాన్సమ్‌వేర్ దాడులు ఉధృతమవడంతో కంపెనీలు యూంటీ-రాన్సమ్‌వేర్ ప్రమాణాలు తీసుకోవడం మెుదలుపెట్టాయి. వీటిని అధిగమించడం రాన్సమ్‌వేర్‌కు కష్టమవుతూ వస్తోంది. అదొక కారణమైతే, ప్రధాన కారణం మాత్రం, క్రిప్టోకరెన్సీల విలువ చాలా ఎకువ కావడం! రాన్సమ్‌వేర్ డిమాండ్లకు మనం తలొగ్గవచ్చు, తలొగ్గకపోవచ్చు కానీ, క్రిప్టోమైనర్లకు డిజిటల్ కరెన్సీని కంటిన్యూగా సమర్పించుకోక తప్పదు. 

‘మోనెరో’ మహిమ
imageప్రపంచవ్యాప్తంగా ఉన్న సైబర్ నేరగాళ్లు ఇవాళ ఆనందంతో తబ్బిబ్బవుతున్నారు. ఎందుకంటే వాళ్లు హాయిగా నిద్రపోతున్నప్పుడు కూడా డబ్బు వచ్చిపడుతోంది. డిజిటల్ కరెన్సీ విషయూనికొస్తే, సైబర్ నేరగాళ్లు బిట్‌కాయిన్ కంటే కూడా ‘మోనెరో’నే ఎక్కువగా ఎంచుకుంటున్నారు. కారణం, బిట్‌కాయిన్ ట్రాన్‌సాక్షన్స్‌ను ట్రాక్ చేయవచ్చు, దాని వాలెట్లను బ్లాక్ చేయవచ్చు లేదంటే బ్లాక్‌లిస్ట్‌లో పెట్టొచ్చు. కానీ ఒక నిర్దిష్ట వ్యక్తికి సంబంధించి మోనెరోను ట్రాక్ చేయలేం, బ్లాక్ చేయలేం, ట్రేస్ చేయలేం. అంతే కాకుండా, బిట్‌కాయిన్ బ్లాక్స్‌ను సగటున పది నిమిషాలకోసారి మాత్రమే ఉత్పత్తి చేసే వీలుంటే, మోనెరో బ్లాక్స్‌ను పతి రెండు నిమిషాలకోసారి ఉత్పత్తి చేయెుచ్చు. కాబట్టి దాడి చేయడానికి మరిన్ని ఎక్కువ అవకాశాల్ని మోనెరో కల్పిస్తోందన్న మాట! మోనెరో రాకతో సైబర్ నేరగాళ్లకు గన్‌పౌడర్ దొరికినట్టయింది. విండోస్ సర్వర్స్.. ల్యాప్‌టాప్స్.. ఆండ్రాయిడ్ వస్తువులు.. ఆఖరుకి ఐఓటీ (ఇంటర్నెట్ ఆఫ్ థింగ్స్) ఎండ్‌పాయింట్స్.. ఎవైనా కానివ్వండి, యథేచ్ఛగా అక్రమ మోనెరో మైనర్స్‌ను ఇన్‌స్టాల్ చేస్తూ ఎలాంటి అనుమానాలకూ అవకాశం ఇవ్వకుండా ప్రపంచవ్యాప్తంగా వాటిని ఆక్రమించేస్తున్నారు సైబర్ గజదొంగలు. వీటి ద్వారా ప్రతి నిమిషం, రేయింబవళ్లు డబ్బు దొంగిలించేస్తున్నారు. ఈ నేరగాళ్లలో ఎక్కువ మంది రష్యా, చైనా దేశాలకు చెందిన ఆర్గనైజ్డ్ క్రైమ్ సిండికేట్స్‌గా గుర్తించారు. అయితే బిట్‌కాయిన్ తర్వాత బ్లాక్‌చెయిన్ నెట్‌వర్క్‌తో నడుస్తోన్న అతి పెద్ద వ్యవస్థ ఎథీరియమ్. స్విట్జర్లాండ్‌లో ప్రారంభమైన ఈ నెట్‌వర్క్‌ను గూగుల్ సహ వ్యవస్థాపకుడు సెర్గీ బ్రిన్, ఆయన కొడుకు కూడా మైనింగ్ చేస్తున్నారు! ఎథర్ అనేది క్రిప్టోకరెన్సీ కాదు, క్రిప్టో ఫ్యూయెల్, క్రిప్టో సామగ్రి (కమొడిటీ). అందువల్ల కరెన్సీకి ప్రత్యామ్నాయంగా దీన్ని వాడుతున్నారు. బిట్‌కాయిన్ కంటే తక్కువ ధరకే ఎథీరియమ్ దొరుకుతుండటం వల్ల కూడా దీనికి పాపులారిటీ పెరుగుతోంది.

దేన్నీ వదలట్లేదు
సాధారణంగా మనం ఏదైనా సైట్ ఓపెన్ చేస్తే యూడ్స్ ప్రత్యక్షమై, మనం చూడాలనుకుంటున్న సమాచారాన్ని సరిగా చూడనివ్వకుండా డిస్టర్బ్ చేస్తుంటాయి. యూడ్స్‌లేని ఆన్‌లైన్‌ను ఎక్స్‌పీరియన్స్ చేసేందుకు వినియోగదారుల్లో సగం మంది క్రిప్టోమైనింగ్‌ను ఎంచుకుంటున్నారు. అవస్త్ ఏప్రిల్‌లో నిర్వహించిన ఒక పోలింగ్‌లో పాల్గొన్నవాళ్లలో 19 శాతం మందికి క్రిప్టోకాయిన్స్‌ ఉన్నాయి. లేదంటే వాటిలో పెట్టుబడి పెట్టారు. క్రిప్టోకాయిన్స్‌లో పెట్టుబడి పెట్టాలనే ఆలోచనతో 37 శాతం మంది ఉన్నట్లు తేలింది. 

‘‘సైబర్, వ్యక్తిగత భద్రతకు క్రిప్టోజాకింగ్ అనేది అంతకంతకూ ప్రమాదకర స్థాయిలో పెరుగుతోంది. ఇళ్లల్లోని పర్సనల్image కంప్యూటర్స్ నుంచి పెద్ద పెద్ద డాటా సెంటర్ల దాకా ప్రతిదాన్నీ సైబర్ నేరగాళ్లు క్రిప్టోమైనింగ్‌కు గురిచేస్తున్నారు’’ అని తరుణ్ కౌరా చెప్పారు. ఆయన ఎంటర్‌ప్రైజ్ సెక్యూరిటీ ప్రొడక్ట్స్ మేనేజ్‌మెంట్ (ఏషియూ పెసిఫక్ అండ్ జపాన్)కు డెరైక్టర్‌గా వ్యవహరిస్తున్నారు. 2017 చివరి త్రైమాసికంలో ఎండ్‌పాయింట్ కంప్యూటర్స్‌లో కాయిన్‌మైనర్స్ ఘటనలు నమ్మశక్యం కాని రీతిలో 8,500 శాతం పెరిగాయని ఆయన తెలిపారు.

ఈ నేపథ్యంలో ఆన్‌లైన్ అమ్మకాలు, మైక్రో ఏటీఎంలు, ఎలక్ట్రానిక్ వాలెట్లు, ఆన్‌లైన్ బ్యాంకింగ్, స్మార్ట్ ఫోన్లు, యునిఫైడ్ పేమెంట్ ఇంటర్‌ఫేస్, సిమ్‌కార్డులు, వైర్‌లెస్ యూక్సెస్ రూటర్లు, ఆధార్‌తో అనుసంధానించిన పేమెంట్ సిస్టమ్‌లు వంటివాటికి భద్రత కల్పించేందుకు భారత కంప్యూటర్ ఎముర్జెన్సీ రెస్పాన్స్ టీమ్ (సీఈఆర్‌టి-ఇన్) 21 సూచనలను విడుదల చేసింది. సైబర్ నేరాల్ని, బెదిరింపుల్ని ఎప్పటికప్పుడు తనిఖీ చేసేందుకు అనేక చట్టపర, విధాన, సంస్థాగత చర్యలు తీసుకుంటున్నట్లు హోమ్ మంత్రిత్వ శాఖ చెబుతోంది. ‘‘సైబర్ నేరాలపై పరస్పర సమాచార మార్పిడికై పదిహేను దేశాలతో భారత్ ద్వైపాక్షిక సహకారం కోసం కృషి చేస్తోంది. తాజా సైబర్ బెదిరింపుల్ని అరికట్టడానికి సీఈఆర్‌టీ-ఇన్ సైతం క్రమం తప్పకుండా హెచ్చరికలు జారీ చేస్తోంది’’ అని ఓ అధికారి చెప్పారు.

అయితే దేశంలో పెద్ద నోట్ల రద్దు తర్వాతే సైబర్ నేరాలు మరింత పెరిగాయని నిపుణులు అంటున్నారు. ‘‘నోట్ల రద్దు అనంతరం సైబర్ నేరాల్ని అడ్డుకోవడానికి చట్టంలో కొత్తగా నిబంధనలేవీ పొందుపరచలేదు. ఇవాళ సైబర్ నేరాలపై భారతీయ సమాచార సాంకేతిక చట్టం మృదువుగా వ్యవహరిస్తోంది. సైబర్ టెర్రరిజం, చైల్డ్ పోర్నోగ్రఫీని మినహాయిస్తే, ఇతర అన్ని సైబర్ నేరాలకు బెయిల్ లభిస్తోంది. దానర్థం నేరానికి పాల్పడ్డ వ్యక్తి బయటకు వచ్చి, సాక్ష్యాన్ని తుడిచేయడానికి ఆస్కారం కల్పిస్తున్నట్లే’’ అంటారు పవన్ దుగ్గల్. ఆయన సుప్రీంకోర్టులో సైబర్ చట్ట నిపుణుడు. 

imageసైబర్ బెదిరింపులనే సమస్య ఆర్థిక నేరాలతోనే ముడిపడి లేదు. అది టెర్రరిజాన్ని కూడా వ్యాప్తి చేస్తోంది. ఇంటర్నెట్‌ను ఉపయోగించుకుంటూ తీవ్రవాదాన్ని ప్రేరేపిస్తున్న కనీసం 20 ఇస్లామిక్ స్టేట్ (ఐఎస్) సంబంధిత కేసుల్ని జాతీయ దర్యాప్తు సంస్థ (ఎన్‌ఐఏ) పరిశోధిస్తోంది. ‘‘ప్రజల్ని తీవ్రవాదం వైపు ప్రేరేపిస్తున్నవాళ్లు మనదేశంలో లేరు. వాళ్లు దేశంలో ఇప్పటికే ఉనికిలో ఉన్న మాడ్యూల్స్‌ను ఆపరేట్ చేస్తుంటారు. త్వరగా ప్రభావితమయ్యే యువతను గుర్తించి తమ పనుల్లోకి దించే టాస్క్‌లను వాళ్లకు అప్పగిస్తుంటారు’’ అని ఒక సీనియర్ ఎన్‌ఐఏ అధికారి తెలిపారు.

బ్యాంకుల సైబర్ భద్రత నిమిత్తం భారతీయ రిజర్వ్ బ్యాంక్ కొన్ని మార్గదర్శకాల్ని విధించగా, హోమ్ మంత్రిత్వశాఖ సైతం వివిధ డ్రైవ్‌లను ప్రారంభించింది. ‘‘సైబర్ భద్రత విషయంలో ఐదేళ్ల కాలానికి సాంకేతిక సామర్థ్యాన్ని మెరుగు పర్చేందుకు రూ. 100 కోట్లతో ఒక ప్రత్యేక పరిశోధన, అభివృద్ధి నిధిని ఏర్పాటు చేశారు. ‘సైబర్ క్రైమ్ ప్రివెన్షన్ ఫర్ విమెన్ అండ్ చిల్డ్రన్’ అనే కేంద్ర సెక్టార్ ప్రాజెక్ట్ కింద సైబర్ నేరాల్ని అరికట్టేందుకు అవసరమైన మౌలిక సదుపాయూల్నీ, సామర్థ్యాన్నీ కల్పించేందుకు మెుత్తం రూ. 195.83 కోట్ల అంచనా వ్యయూన్ని ఆమోదించాం.’’ అని కేంద్ర దేశీయ వ్యవహారాల సహాయమంత్రి హంసరాజ్ అహిర్ తెలియజేశారు.

బ్లాక్‌చెయిన్ నేరాలు
2017తో పోలిస్తే ఈ ఏడాది బ్లాక్‌చెయిన్ టెక్నాలజీ సంబంధిత సైబర్ నేరాలు 629 శాతం పెరిగాయని సైబర్ భద్రతా సంస్థ మెకాఫీ విడుదల చేసిన ఓ నివేదిక తెలిపింది. హానికర మైనర్స్, క్రిప్టోజాకింగ్ సంఖ్యలో వృద్ధి ఆధారంగా ఈ నివేదికను రూపొందించారు. 2017 చివరి త్రైమాసికంలో 4 లక్షలున్న ఈ కేటగిరి సైబర్ క్రైమ్ శాంపిల్స్ ఈ ఏడాది తొలి త్రైమాసికంలో 2.9 మిలియన్లకు మించి పెరిగాయి. దీనికి కారణం ఫైనాన్స్, రిటైల్, హెల్త్‌కేర్, ఆటోమోటివ్ వంటి అన్ని రకాల రంగాలు బ్లాక్‌చెయిన్ టెక్నాలజీని విస్తృతంగా ఉపయోగిస్తుండటం. రికార్డుల్ని బ్లాక్స్ రూపంలో నిల్వచేసి, క్రిప్టోగ్రఫీని ఉపయోగిస్తూ ఒకదానికొకటి అనుసంధానం చేయడమే బ్లాక్‌చెయిన్ టెక్నాలజీ. దీన్ని క్రిప్టోకరెన్సీలకు విస్తృతంగా వినియోగిస్తున్నారు. అందుకే సైబర్ క్రిమినల్స్ వీటిని తరచూ లక్ష్యంగా చేసుకుంటున్నారు.

నేరగాళ్లకు నిరంతర ఆదాయం
అప్పుడప్పుడూ సిస్టమ్ పర్ఫార్మెన్స్ నెమ్మదించడం, ఎలక్ర్టిక్ బిల్లులు ఎక్కువగా రావడం వంటివి మినహాయిస్తే, మన సిస్టమ్ హ్యాక్‌కు గురైన విషయమే మనకు తెలీదు. రాన్సమ్‌వేర్ నోట్స్ ఉండవు. పాస్‌వర్డ్ లేదా క్రెడిట్ కార్డ్ నంబర్లను దొంగిలించిన ఫైల్స్ ఉండవు. మీ సిస్టమ్‌లో ఎక్కడ సమస్య ఉందో మంచి టెక్నీషియన్ కూడా కనిపెట్టలేడు. రాన్సమ్‌వేర్ ప్రొటెక్షన్‌ను సైబర్ సెక్యూరిటీ కంపెనీలు అందిస్తుండటంతో, దాని స్థానాన్ని అక్రమ క్రిప్టోమైనింగ్ చాలా వేగంగా రీప్లేస్ చేస్తోందని సైబర్ నిపుణులు చెబుతున్నారు. అక్రమ క్రిప్టోమైనింగ్ విషయంలో ప్రతి నోడ్ స్వతంత్రంగా పనిచేస్తుంది. క్రిమినల్స్ చేయూల్సిందల్లా పలు మైనర్స్‌ను ఇన్‌స్టాల్ చేయడమే. ఇది చాలా సులువైన పని. ఇవాళ మిలియన్ల సంఖ్యలో సిస్టమ్స్ క్రిప్టోమైనింగ్ ఇన్‌ఫెక్షన్‌కు గురయ్యూయని గుర్తించారు. అంటే ఏడాదికి 100 మిలియన్ డాలర్ల కంటే ఎక్కువ ఆదాయూన్ని ఈ సిస్టమ్స్ నేరగాళ్లకు అందిస్తున్నాయి. తొలిసారి ఇన్‌ఫెక్షన్‌కు గురయ్యూక, తక్కువ ఎఫర్ట్‌తోటే ఇది సాధ్యమవుతుంది. మరింత ముఖ్యమైన విషయం క్రిప్టోమైనింగ్‌కు గురైన విషయం తెలుసుకొనే అవకాశం చాలా తక్కువ కావడంతో, వీటి ద్వారా నిరంతరం నేరగాళ్లకు ఆదాయం లభిస్తుంటుంది. ‘‘మన స్మార్ట్ డివైస్‌లో రహస్యంగా మాల్‌వేర్ రన్ అవుతూ ఉండొచ్చు - మనం క్రిప్టో కరెన్సీ వినియోగదారులమా, కాదా అనేది అప్రస్తుతం. అక్రమ క్రిప్టోమైనర్‌తో మన వ్యక్తిగత సమాచారం మెుత్తం చౌర్యానికి గురయ్యే అవకాశం ఉంది’’ అంటారు ‘అవస్త్’లో సెక్యూరిటీ రీసెర్చర్‌గా పనిచేస్తున్న మార్టిన్ హ్రాన్. క్రిప్టోమైనర్ల దాడిని అడ్డుకోవడానికి సైబర్ సెక్యూరిటీ సంస్థలు ప్రభావవవతమైన టెక్నిక్స్‌ను డెవలప్ చేయగలిగితే, సైబర్ నేరగాళ్లు తిరిగి రాన్సమ్‌వేర్‌కు మళ్లే అవకాశం ఉంది.

ప్రపంచంలో మూడో స్థానంలో..
సైబర్ బెదిరింపుల విషయంలో ప్రపంచంలోనే ప్రస్తుతం భారత్ మూడో స్థానంలో ఉందంటే.. మనవాళ్లు ఇంకెంత మాత్రమూ ఉపేక్షించకూడదని అర్థమవుతోంది. 2017లో ప్రపంచంలోని బెదిరింపుల్లో 5.09 శాతం భారతీయులు ఎదుర్కొన్నవే. ‘ఇంటర్నెట్ సెక్యూరిటీ థ్రెట్ రిపోర్ట్’ ప్రకారం 26.61 శాతంతో అమెరికా, 10.95 శాతంతో చైనా.. మనదేశానికంటే ముందున్నారు. మాల్‌వేర్, స్పామ్, ఫిషింగ్, బాట్స్, నెట్‌వర్క్ ఎటాక్స్, వెబ్ ఎటాక్స్, రాన్సమ్‌వేర్, క్రిప్టోమైనర్స్ అనే ఎనిమిది అంశాలపై ఈ గ్లోబల్ థ్రెట్ ర్యాంకింగ్‌ను నిర్ధారించారు. మనదేశం.. స్పామ్, బాట్స్ విషయంలో రెండో స్థానంలో, నెట్‌వర్క్ దాడుల్లో మూడో స్థానంలో, రాన్సమ్‌వేర్ విషయంలో నాలుగో స్థానంలో నిలుస్తోంది. దేశంలో కొత్తగా అక్రమ కాయిన్‌మైనింగ్ పెరుగుతోందని ఈ రిపోర్ట్ వెల్లడించింది.

పోనీ స్టీలర్
కొమొడో సైబర్‌సెక్యూరిటీ థ్రెట్ రీసెర్చి ల్యాబ్స్ జరిపిన అధ్యయనంలో ఇంకో విషయం కూడా వెల్లడైంది. దాని ప్రకారం ‘పోనీ స్టీలర్’ వంటి అధునాతన, ప్రమాదకర పాస్‌వర్డ్ దొంగలు బాగా పెరిగారు. పోనీ స్టీలర్ అనేది చాలా హెచ్చు స్థాయిలో డాటాను దొంగిలిస్తుంది. అది 36 క్రిప్టోకరెన్సీ వాలెట్లను లక్ష్యంగా చేసుకోగలదు. ఇది తమ సమాచారాన్ని దొంగిలిస్తోందనే విషయం బాధితులకు తెలీదు! యూంటీ వైరస్‌లకు చిక్కకుండా కొత్త కొత్త మాల్‌వేర్‌లను సైబర్ దొంగలు సృష్టిస్తున్నారు. ఈ ఏడాదే 241 దేశాల డొమైన్ కోడ్‌లతో ఉన్న 18 మాల్‌వేర్ రకాలను కొమెుడో కనిపెట్టింది!

మూల్యం చెల్లించుకుంటున్నాం
దేశంలో సగటు డాటా ఉల్లంఘటనలు 2017-18 ఆర్థిక సంవత్సరానికి 7.9 శాతం మేర పెరిగి, రూ. 11.9 కోట్ల మూల్యాన్ని సమర్పించుకున్నాయి. 42 శాతం ఉల్లంఘనలకు వైరస్, క్రిమినల్ దాడులే మూల కారణం. ఏడాదిలో 219 రోజుల్లో సైబర్ దాడులు జరిగాయి. గడచిన ఐదేళ్ల కాలంలో ఈ డాటా ఉల్లంఘనలు దాదాపు రెట్టింపయ్యాయి. 2013లో 9 మిలియన్ల రికార్డులు మాయమవగా, 2016 నాటికి 16 మిలియన్ల రికార్డులు కనిపించకుండా పోయాయి. 1 మిలియన్ రికార్డులు కోల్పోవడం వల్ల్ల సగటున జరిగే నష్టం 4 కోట్ల మిలియన్ డాలర్లు! 50 మిలియన్ రికార్డులు మాయమయ్యాయంటే, దానికి మనం చెల్లించిన మూల్యం 35 కోట్ల డాలర్లు! వీటిలో అత్యధిక శాతం వైరస్‌లు, క్రిమినల్ ఎటాక్‌ల వల్ల జరిగినవే.



సినిమాపై చెరగని మచ్చలు

Updated By ManamSun, 07/29/2018 - 04:25

ఒకవైపు వాణిజ్యపరంగా ఎల్లలు దాటిన తెలుగు సినిమా పశ్చిమాన కూడా తన జెండాను రెపరెపలాడిస్తోంది. అమెరికా, ఆస్ట్రేలియా వంటి దేశాల్లో బాలీవుడ్‌పై టాలీవుడ్ పైచేయి సాధిస్తోంది. మరోవైపు ఒకదాని తర్వాత ఒకటిగా పడుతున్న మచ్చలు దేశీయంగా తెలుగు సినిమా ఖ్యాతిని మసకబారుస్తున్నాయి. మొన్నటికి మొన్న డ్రగ్స్ వ్యవహారం.. నిన్నటికి నిన్న క్యాస్టింగ్ కౌచ్ దుమారం.. ఇప్పుడు అమెరికాలో జరిగిన సెక్స్ రాకెట్ ఉదంతం.. తెలుగు చిత్రసీమను ఉక్కిరిబిక్కిరి చేశాయి, ఇంకా చేస్తూనే ఉన్నాయి. ఈ రోజు ఇది బయటకు వచ్చింది, రేపు ఇంకే విషయం వెలుగులోకి వస్తుందోనని సినీ జనాలు గుండెలుగ్గబట్టుకొని చూస్తున్నారు. సరిగ్గా ఏడాది వ్యవధిలో చోటు చేసుకున్న మూడు భిన్న స్కాండల్స్ టాలీవుడ్‌ను డిఫెన్స్‌లో పడేశాయి. ఎవరో కొద్దిమంది చేస్తున్న పనులకు మొత్తం పరిశ్రమనే వేలెత్తి చూపడం కరెక్టేనా?.. అనే ప్రశ్న వస్తున్నా, గ్లామర్ వరల్డ్ కావడమే దానిపై ఫోకస్‌కు కారణమని విశ్లేషకులు అంటున్నారు.
 

image

షాక్ 1: డ్రగ్స్ అండ్ టాలీవుడ్
ఈ మధ్య కాలంలో అటు సినీ వర్గాల్నీ, ఇటు సినీ ప్రియుల్నీ షాక్ చేసిన అతి పెద్ద కుదుపు డ్రగ్ కేసులు. డ్రగ్ పెడ్లర్స్‌గా పోలీసు రికార్డుల్లోకి ఎక్కిన కెల్విన్ అండ్ గ్యాంగ్‌తో సంబంధాలు కలిగి ఉన్నారంటూ పన్నెండు మంది టాలీవుడ్ సెలబ్రిటీల పేర్లు బయటకు రావడం తెలుగు రాష్ట్రాల్లో పెను సంచలనాన్నీ, దేశీయంగా దిగ్భ్రమనూ కలిగించింది. 2017 జూలైలో చోటు చేసుకున్న ఈ ఘటనలు తెలుగు సినిమా ప్రతిష్ఠకు మచ్చగా నిలిచాయి. ఎక్సైజ్ శాఖ ఎన్‌ఫోర్స్‌మెంట్ డైరెక్టర్ అకున్ సభర్వాల్ నేతృత్వంలో తెలంగాణ ప్రభుత్వం ఏర్పాటుచేసిన కమిటీ విచారించిన imageవాళ్లలో రవితేజ, పూరి జగన్నాథ్, ఛార్మి వంటి పేరుపొందిన వాళ్లతో పాటు నవదీప్, తరుణ్, తనీశ్, నందు వంటి హీరోలు, ఐటమ్ సాంగ్స్‌కు పేరుపొందిన ముమైత్‌ఖాన్, నటుడు సుబ్బరాజు, సినిమాటోగ్రాఫర్ శ్యామ్ కె. నాయుడు వంటి వాళ్లు ఉండటం హాట్ టాపిక్ అయింది. మీడియా అటెన్షన్ మొత్తం అటువైపే పడటంతో, దానికి మించిన విషయం మరోటి లేనంతగా రచ్చరచ్చ అయింది. దీనిపై ఎవరికి తోచినట్లు వాళ్లు కథనాలు రాశారు, కథలు అల్లారు. సెలబ్రిటీలను అకున్ సభర్వాల్ గంటల తరబడి విచారించడం, కొందరి నుంచి రక్త నమూనాలను సైతం సేకరించడం అనేది అప్పట్లో జాతీయ స్థాయిలో సెన్సేషనల్ న్యూస్. విచారణ పూర్తయింది. త్వరలోనే దోషుల్ని తేల్చేస్తామన్నారు సభర్వాల్. డ్రగ్స్ ఉచ్చు ఏయే సెలబ్రిటీల మెడకు చుట్టుకుంటుందోనని అందరూ గుండెలు ఉగ్గబట్టుకొని చూశారు.

నెల, రెండు నెలలు.. ఏకంగా సంవత్సరం గడిచింది. ఇప్పటి వరకూ ఈ కేసు పురోగతి గురించిన సమాచారం లేదు. ఇంత కాలమైనా సెలబ్రిటీల్లో ఒక్కరు కూడా డ్రగ్స్ కేసులో దోషులుగా ఉన్నట్లు తేలలేదు. ఇప్పుడు అందరిలోనూ మెదులుతున్న ప్రశ్న.. ఏ ఆధారాలతో చిత్రరంగంలో పేరు ప్రఖ్యాతులున్నవాళ్లను డ్రగ్స్ వ్యవహారంలో విచారించారు? ఆ వ్యవహారానికి ఎందుకంత ప్రచారం కల్పించారు? కెల్విన్ గ్యాంగ్ వద్ద లభ్యమైన పేర్ల ఆధారంగానే సెలబ్రిటీలను విచారించవచ్చా? అంతకు మించిన బలమైన ఆధారాలు ఉండాల్సిన అవసరం లేదా? సినీ సెలబ్రిటీలను ఈ వ్యవహారంలోకి లాగడమంటే దానికి ఎక్కడలేని ప్రచారం వస్తుందనే విషయం కానీ, గట్టి ఆధారాలు లేకుండా వారిని విచారించడం వల్ల సమాజానికి ఎలాంటి సూచనలు వెళ్తాయనే విషయం కానీ ప్రభుత్వానికి తెలీకుండా ఉంటుందా?

నిజానికి ఈ పన్నెండు మంది సెలబ్రిటీల పేర్లే కాకుండా కొంతమంది రాజకీయ ప్రముఖులు, సినీరంగానికే చెందిన ఘన చరిత్ర కలిగిన ప్రముఖుల పిల్లల పేర్లు కూడా కెల్విన్ లిస్టులో ఉన్నాయనీ, ముందుగానే విషయం లీకవడంతో వాళ్లు తమ పేర్లు బయటకు పొక్కకుండా మేనేజ్ చేశారనీ, ఎలాంటి పెద్దతలకాయలు లేనివాళ్లే తెరపైకి వచ్చారనీ ఆరోపణలు వచ్చాయి. మొత్తానికి కేసు ఏకపక్షంగా మారింది. ఇప్పుడైతే ఆ కేసు వ్యవహారం బుట్టదాఖలైనట్లే కనిపిస్తోంది.

షాక్ 2: క్యాస్టింగ్ కౌచ్
హాలీవుడ్‌లో పేరుపొందిన సీనియర్ ప్రొడ్యూసర్ హార్వే వీన్స్ తమను లైంగికంగా వేధించాడని అక్కడి పలువురుimage తారలు బాహాటంగా ప్రకటించడంతో క్యాస్టింగ్ కౌచ్ దుమారం పెద్ద ఎత్తున చెలరేగింది. ఐశ్వర్యారాయ్ సైతం హార్వే నుంచి త్రుటిలో తప్పించుకున్న వైనం కూడా వెలుగు చూసిన నేపథ్యంలో సోషల్ మీడియాలో ‘మీటూ’ అనే హ్యాష్‌ట్యాగ్‌తో అనేకమంది తమ అనుభవాలను షేర్ చేసుకోవడంతో ప్రపంచవ్యాప్తంగా ఈ ఉదంతం చర్చనీయాంశమైంది. ఆ గొడవ సద్దుమణుగుతున్న దశలో శ్రీరెడ్డి అనే ఎవరికీ పెద్దగా తెలీని తార పేల్చిన క్యాస్టింగ్ కౌచ్ బాంబు టాలీవుడ్‌ను అతలాకుతలం చేసేసింది. మహామహులనుకున్నవాళ్లే ఆమె దెబ్బకు బెంబేలెత్తారు.

జాతీయ స్థాయిలో కీర్తి ప్రతిష్ఠలున్న నిర్మాణ సంస్థ సురేశ్ పొడ్రక్షన్స్ అధినేత డి. సురేశ్‌బాబు చిన్న కుమారుడు, రానా తమ్ముడు అభిరామ్‌తో అతి సన్నిహితంగా ఉన్న ఫొటోలను మీడియా ముఖంగా శ్రీరెడ్డి బహిర్గతం చేయడంతో కేవలం చిత్రసీమే కాకుండా తెలుగు ప్రజానీకమంతా దిగ్భ్రాంతికి గురైంది. సినిమాల్లో అవకాశాలిస్తామని చాలామంది తనను వాడుకొని, వదిలేశారంటూ శ్రీరెడ్డి ఆరోపించారు. హీరోయిన్లు కానీ, క్యారెక్టర్ ఆర్టిస్టులైన స్త్రీలు కానీ సినిమాల్లో అవకాశం రావాలంటే తమ శరీరాన్ని పణంగా పెట్టాల్సిందేనని ఆమె చేసిన వ్యాఖ్యలు తీవ్ర దుమారాన్ని రేపాయి. మూవీ ఆర్టిస్ట్స్ అసోసియేషన్ (మా) తనకు సభ్యత్వం ఇవ్వకుండా ఇబ్బంది పెడుతోందనీ ఆమె ఆరోపించారు. తనకు న్యాయం చేయాలంటూ ఫిల్మ్‌చాంబర్ సమీపంలో రోడ్డుపైనే ఆమె చేసిన అర్ధనగ్న ప్రదర్శన సమస్యను మరింత వేడెక్కించింది. క్యాస్టింగ్ కౌచ్ వ్యవహారంలో ప్రత్యక్షంగా పేర్లు ప్రస్తావించకుండా హీరో నాని, డైరెక్టర్ కొరటాల శివ, రైటర్ కోన వెంకట్‌లను ఉద్దేశించి శ్రీరెడ్డి వ్యాఖ్యలు చేశారు. రకుల్‌ప్రీత్ సైతం క్యాస్టింగ్ కౌచ్ ద్వారానే హీరోయిన్ అవకాశాలు పొందిందని ప్రకటించిన ఆమె, ఆ తర్వాత రకుల్‌కు సారీ చెప్పారు. శ్రీరెడ్డి ఆరోపణలపై మొదట మౌనంగా ఉండిపోయిన నాని, కొరటాల, కోన.. ఆరోపణల దాడి అంతకంతకూ ఎక్కువవుతుండటంతో పెదవి విప్పారు. ఆమెతో తమకు ఏమాత్రం సంబంధం లేదనీ, తమ పరువు ప్రతిష్ఠలకు భంగం కలిగించిన ఆమెపై న్యాయపరంగా చర్యలు తీసుకుంటామనీ చెప్పారు. నాని అయితే శ్రీరెడ్డికి నోటీసులు కూడా పంపారు.

శ్రీరెడ్డికి మద్దతు
క్యాస్టింగ్ కౌచ్‌కు సంబంధించి శ్రీరెడ్డికి పెద్ద తలకాయలెవరూ మద్దతు తెలపలేదు కానీ, కొంతమంది మహిళా సహాయimage ఆర్టిస్టులు ఆమెవైపు నిలిచారు. సినిమా అవకాశాల విషయంలో తాము ఎదుర్కొన్న అనుభవాలను టీవీ చానళ్ల ద్వారా పంచుకున్నారు. మెగా కుటుంబానికి దగ్గరైన ఓ కో డైరెక్టర్ తమను లైంగికంగా వేధించాడనీ, అతనికి పదహారేళ్ల అమ్మాయిలే కావాలంటూ ఆరోపించడం కలకలం రేపింది. ఈ సమయంలోనే శ్రీరెడ్డితో డైరెక్టర్ తేజ నేరుగా మాట్లాడి, ఆమెకు తన రెండు సినిమాల్లో అవకాశం ఇస్తానని చెప్పారు. సీనియర్ సహాయ నటి అపూర్వ సైతం శ్రీరెడ్డికి మద్దతు ప్రకటించారు. అయితే టాలీవుడ్‌లో క్యాస్టింగ్ కౌచ్ అనేది లేదని కరాటే కల్యాణి వంటి మరో సహాయ నటి స్పష్టం చేశారు. రకుల్, మమతా మోహన్‌దాస్ వంటి తారలు తమకు క్యాస్టింగ్ కౌచ్ అనుభవాలు ఎదురవలేదని చెప్పగా, మరో హీరోయిన్ రాధికా ఆప్టే తనను ఓ టాలీవుడ్ హీరో ఇబ్బంది పెట్టగా, అతడికి తను గట్టిగా బుద్ధిచెప్పానని ప్రకటించి సంచలనం సృష్టించారు. బాలీవుడ్‌లో సీనియర్ డాన్స్ కొరియోగ్రాఫర్ అయిన సరోజ్‌ఖాన్ అయితే క్యాస్టింగ్ కౌచ్‌లో తప్పేమీ లేదన్నట్లు మాట్లాడటం వివాదాల్ని సృష్టించింది.

ఇండస్ట్రీలో ఎవరూ బలవంతపెట్టరనీ, ఇష్టం ఉన్నవాళ్లే అందుకు సిద్ధపడుతున్నారనీ ఆమె చెప్పారు. ఆమె వ్యాఖ్యలపై భిన్నాభిప్రాయాలు వ్యక్తమయ్యాయి. శ్రీరెడ్డి అర్ధనగ్న ప్రదర్శన చేయడం నటీనటుల సంఘమైన ‘మా’ (మూవీ ఆర్టిస్ట్స్ అసోసియేషన్)కు తలనొప్పిగా మారింది. నడిరోడ్డుపై అర్ధనగ్న ప్రదర్శన వంటి చర్య ద్వారా సినీ ఇండస్ట్రీ పరువును శ్రీరెడ్డి మంటగలుపుతోందన్న ‘మా’.. మొదట ఆమెకు సభ్యత్వం ఇవ్వకూడదని నిర్ణయించుకున్నట్లు చెప్పింది. కానీ శ్రీరెడ్డి ఆరోపణలకు గురవుతున్న వాళ్ల సంఖ్య అంతకంతకూ పెరుగుతుండటం, వాళ్లలో పేరుపొందిన సినీ కుటుంబాల వాళ్లూ ఉండటంతో ఆమెకు సభ్యత్వం ఇస్తున్నామని ప్రకటించింది ‘మా’. దీంతో దాని ద్వంద్వ వ్యవహారశైలిపై విమర్శలు రేగాయి. 

శ్రీరెడ్డి ఆరోపణలపై స్పందించిన పవన్‌కల్యాణ్.. ఆమె ఆరోపణలు చేయడం కాకుండా నేరుగా ఆధారాలతో పోలీసులకు imageఫిర్యాదు చేయాలని సలహా ఇచ్చారు. దీంతో ఆమె పవన్‌తో పాటు, ఆయన తల్లినీ కూడా దూషించారు. దీనిపై దుమారం చెలరేగడంతో, ఆమెతో అలా మాట్లాడించింది తానేననీ, పవన్‌ను దూషిస్తే ఈ వ్యవహారంపై మరింతగా అటెన్షన్ పెరుగుతుందనే ఉద్దేశంతోనే ఆమెకు సలహా ఇచ్చానంటూ డైరెక్టర్ రామ్‌గోపాల్‌వర్మ తెరపైకి వచ్చారు. దీంతో ఈ వ్యవహారంలో ఫిల్మ్‌చాంబర్ ఏం చేస్తోందని ప్రశ్నిస్తూ పవన్‌కల్యాణ్ చాంబర్ కార్యాలయానికి వచ్చి హడావిడి చేశారు. తెలుగుదేశం పార్టీవాళ్లే తనను టార్గెట్ చేసి, వెనుక ఉండి శ్రీరెడ్డి చేత అలా మాట్లాడించారని ఆయన ఆరోపిస్తే, వైసీపీ పార్టీ నాయకులే తనను అలా చేయమన్నారని శ్రీరెడ్డి జరిపిన ఫోన్ సంభాషణ సోషల్ మీడియాలో చక్కర్లు కొట్టింది. ఇలా ఈ క్యాస్టింగ్ కౌచ్ వ్యవహారం కాస్తా రాజకీయ రంగు కూడా పులుముకుంది.

శ్రీరెడ్డి ఆరోపణలు చేస్తున్న క్యాస్టింగ్ కౌచ్ సమస్య భవిష్యత్తులో మళ్లీ తలెత్తకుండా దీనిని డీల్ చేయడానికి ‘క్యాష్’ (కమిటీ ఎగనెస్ట్ సెక్సువల్ హెరాస్‌మెంట్)ను ఏర్పాటు చేయనున్నట్లు సినీ పెద్దలు ప్రకటించారు. ఇందులో సినిమావాళ్లతో పాటు, బయటి నుంచి కూడా కొంతమంది వ్యక్తులు ఉంటారన్నారు. కానీ ఇంతవరకు ఈ ‘క్యాష్’ విషయం ఎంతవరకొచ్చిందో వెల్లడి కాలేదు. 

షాక్ 3: అమెరికాలో సెక్స్ రాకెట్
డ్రగ్స్, క్యాస్టింగ్ కౌచ్ కథలింకా పూర్తిగా సద్దుమణగనే లేదు. జనం వాటిని తలచుకోవడం పూర్తిగా మాననే లేదు.. imageఅంతలోనే వచ్చిపడింది మరో ఉపద్రవం. అదీ సెక్స్ రాకెట్ రూపంలో! గతంలో ‘హోటల్‌లో వ్యభిచరిస్తూ పట్టుబడిన సినీతార’, ‘అపార్ట్‌మెంట్‌లో తారల హైటెక్ వ్యభిచారం’ అనే వార్తలు అప్పుడప్పుడూ కనిపించడం మనకు తెలుసు. కొన్నాళ్ల కిత్రం తొలి తెలుగు చిత్రంతోటే ప్రేక్షకుల హృదయాలను గెలుచుకున్న వర్థమాన తార హెదరాబాద్‌లోని పార్క్ హ్యాత్ అనే ఫైవ్‌స్టార్ హోటల్‌లో వ్యభిచరిస్తూ పట్టుబడిందన్న వార్త పతాక శీర్షికలకు ఎక్కడమూ మనకు తెలుసు. కానీ ఇది వాటన్నింటికంటే మించిన సెక్స్ రాకెట్. తెలుగు సినీ, టీవీ తారల ప్రమేయమున్న ఈ సెక్స్ రాకెట్‌కు అమెరికా వేదికవడంతో సహజంగానే ఈ ఉదంతం దేశం దృష్టిని ఆకర్షించింది. కృష్ణ మోదుగుముడి అనే దళారీ, అతని భార్య కలిసి ఏదో ఒక కార్యక్రమంలో అమెరికాకు వచ్చే తెలుగు తారలతో వ్యభిచారం చేయిస్తున్న వ్యవహారాన్ని అక్కడి పోలీసులు ఛేదించి, వెలుగులోకి తెచ్చారు. వాళ్లు ఒక తార విషయంలో లాగిన తీగతో డొంక కదిలింది. కృష్ణ నివాసంలో తనిఖీలు చేయడంతో విస్తుపోయే సెక్స్ రాకెట్ బయటపడింది. అమెరికన్ పోలీసులు పేర్లు వెల్లడి చేయలేదు కానీ, ఈ రాకెట్‌లో కొంతమంది తెలుగు తారలున్నారని స్పష్టం చేశారు. ఈ ఉదంతంపై జాతీయ, అంతర్జాతీయ పత్రికల్లో వచ్చిన కథనాలు తెలుగు చిత్ర పరిశ్రమ ఒక మురికి కూపమనే భావనను కలిగించాయి. అతి కొద్దిమంది చేసిన తప్పులకు మొత్తం పరిశ్రమను నిందించడం న్యాయమా?.. అనేవాళ్ల ఆవేదనను పట్టించుకున్నవాళ్లు లేరు.

అసలు అమెరికాలో సినీ తారలు, యాంకర్లు వ్యభిచరించడమేమిటనేది అందర్నీ ఆశ్చర్యానికి లోను చేసిన విషయం.image కృష్ణ, అతని భార్య విటులతో కేవలం వెయ్యి, రెండు వేల డాలర్లకే డీల్ కుదుర్చుకొని తారలను వాళ్ల వద్దకు పంపిస్తున్నారనే విషయం మరింత ఆందోళన కలిగించింది. మన ప్రాంతాన్ని విడిచి అమెరికాలో నివాసముంటున్న వాళ్లు సంఘాలుగా ఏర్పడి, అప్పుడప్పుడూ కార్యక్రమాలు ఏర్పాటు చేసుకుంటూ, అతిథులుగా సినీ తారలను, యాంకర్లను పిలవడం మామూలే. ఒకటికి మించి తెలుగు సంఘాలు ఏర్పడి, వాటి మధ్య నెలకొన్న పోటీ కారణంగా కార్యక్రమాల్ని ఘనంగా చేశామని చెప్పుకోడానికి తారల్ని పిలవడం ఆనవాయితీ కావడంతో, తారలకూ ఇది ఆటవిడుపుగానూ, లాభదాయకంగానూ తయారైంది. సాధారణంగా ఈ కార్యక్రమాల్లో పాల్గొనేందుకు పిలిచినప్పుడు తారలు షూటింగ్‌లతో బిజీగా ఉంటారు. అలాంటి సందర్భాల్లో ఖాళీగా ఏ తారలున్నారనే విషయం తెలుసుకోడానికి దళారీలు అవసరమయ్యారు. అమెరికా వెళ్లే తారలకు ఫ్లైట్ టికెట్లు బుక్ చేయడం దగ్గర్నుంచి, అమెరికాలో ఉండేందుకు వసతులు ఏర్పాటు చేయడం వరకూ చూసుకునే దళారీలు పుట్టుకొచ్చారు. ఈ సందర్భంలో తెలుగు తారలతో గడపడానికి ఆసక్తిచూపే అమెరికాలోని డబ్బున్న కొంతమంది తెలుగువాళ్లకు ఇది బాగా పనికొచ్చింది. దళారీలకు కావాల్సింది డబ్బు. దానితో ఇక్కడి తారలతో అక్కడ సెక్స్ రాకెట్ నిర్వహిస్తూ వస్తున్నారనేది తాజాగా బయటపడిన భయంకర నిజం.

imageఅలా అని ప్రవాసాంధ్రుల కార్యక్రమాలకు వెళ్లే తారలందరినీ ఒకే గాటన కట్టడం తప్పు. ఇటీవలే తెలుగు చిత్రసీమలో అడుగుపెట్టి, పేరు తెచ్చుకోవాలని ప్రయత్నిస్తున్న ఒక హీరోయిన్‌ను ఇలాంటి పనులు చేయడానికి సంప్రదించినప్పుడు, ఆమె దాన్ని తిరస్కరించడమే కాకుండా, పోలీసులను ఆశ్రయించారు. దాంతో ఈ భాగోతం బయటపడింది. తనతోనూ ఇలాంటి పని చేయించడానికి కృష్ణ మోదుగుమూడి ఫోన్‌లో సంప్రదించాడనీ, తాను తిరస్కరించడంతో సరిపెట్టకుండా తిట్టిన తిట్టు తిట్టకుండా తిట్టాననీ ఒక పేరుపొందిన యాంకర్ వెల్లడించారు. తమ కార్యక్రమాల్లో పాల్గొనేందుకు వచ్చిన తారలతో సెక్స్ రాకెట్ నిర్వహిస్తున్నారనే విషయం తెలియడంతో అక్కడి తెలుగువాళ్లలో చాలామంది దిగ్భ్రాంతికి గురయ్యారు. దీంతో తమకు అతిథులుగా వచ్చే తారల విషయంలో జాగ్రత్తగా వ్యవహరించాలని వాళ్లు భావిస్తున్నారు.

సాఫ్ట్ టార్గెట్!
యాజమాన్యం కారణంగా ఒక కార్మికుడు ఇబ్బందులు ఎదుర్కొంటే, అతడిని కాపాడ్డానికి కార్మిక సంఘం రంగంలోకి దిగుతుంది. ఒక రాజకీయ నాయకుడు సమస్యల్లో చిక్కుకుంటే, అతడిని పార్టీ కాపాడుకుంటుంది. మరి సినిమా వ్యక్తి కష్టాల్లో పడితే? ఆదుకోవడానికి ఎవరూ రారనేది సాధారణాభిప్రాయం. సినీ రంగమనేది సాఫ్ట్ టార్గెట్‌గా మారిపోతోందని చాలా కాలం నుంచే సినిమావాళ్లు ఆవేదన వ్యక్తం చేస్తూ వస్తున్నారు. డ్రగ్స్ వ్యవహారంలో కానీ, క్యాస్టింగ్ కౌచ్ విషయంలో కానీ, ఇప్పుడు సెక్స్ రాకెట్ ఉదంతంలో కానీ.. సినిమా రంగాన్నంతా బోనులో నిలబెట్టినట్లు సమాజం వ్యవహరిస్తోందని వాళ్లు వాపోతున్నారు. ఇండస్ట్రీలోని వ్యక్తుల మధ్య ఐకమత్యం లోపించడంతో, ఒక్క గొంతుకగా మారలేక పోతున్నారు, నినదించలేక పోతున్నారు. సినిమావాళ్లు నోరు మెదపలేక పోవడం వల్లే డ్రగ్స్ కేసు రచ్చకెక్కిందనేది విశ్లేషకుల అభిప్రాయం. శ్రీరెడ్డి ఉదంతంలోనూ చిత్రసీమ ఒక్కతీరుగా వ్యవహరించలేక పోయింది. ఇప్పుడు సెక్స్ రాకెట్ వ్యవహారంపైనా నిమ్మకు నీరెత్తినట్లు ఉండిపోయింది. ఇలా దేనికీ పట్టనట్లు ఉన్నంత కాలం టాలీవుడ్ సాఫ్ట్ టార్గెట్ అవుతూనే ఉంటుందనడంలో సందేహం లేదు. ఇకనుంచైనా తన తీరును టాలీవుడ్ మార్చుకుంటుందా, సమస్యలను ఎదుర్కొనే విషయంలో ఒక్కతాటిపై నిలుస్తుందా?

కోలీవుడ్ కూడా..
పరిస్థితి అదుపు తప్పుతున్నదని భావించిన సినీ పెద్దలు టీవీ చానళ్లతో చేసిన సంప్రదింపుల ఫలితంగా శ్రీరెడ్డి వ్యవహారం కొద్ది రోజుల పాటు సద్దుమణిగినట్లు కనిపించింది. పేరున్న చానళ్లన్నీ ఆమెను దూరం పెట్టేశాయి. సోషల్ మీడియాలో శ్రీరెడ్డి ఏవో రాయడం మినహా ఆమెపై ఎవరూ పెద్దగా దృష్టి పెట్టలేదు. అంతలోనే ఆమె మరో బాంబు పేల్చారు. తమిళ చిత్రసీమకు చెందిన ప్రముఖ దర్శకులు ఎ.ఆర్. మురుగదాస్, లారెన్స్, సి. సుందర్ (ఖుష్బూ భర్త), నటుడు శ్రీకాంత్ (శ్రీరామ్) వంటి వాళ్లు తనకు అవకాశాలిస్తామని చెప్పి వాడుకొని వదిలేశారని ఆమె ఆరోపించడం కలకలం రేపింది. దీనిపై స్పందించాలని మరో సీనియర్ డైరెక్టర్ టి. రాజేందర్ డిమాండ్ చేయడంతో సి. సుందర్ స్పందించారు. తనపై అసత్య ఆరోపణలు చేసిన శ్రీరెడ్డిపై లీగల్‌గా చర్యలు తీసుకోనున్నట్లు ప్రకటించారు. హీరో కార్తి స్పందిస్తూ, శ్రీరెడ్డి ఆధారాలతో న్యాయపోరాటం చేస్తే బావుంటుందని సూచించారు. ఈ వ్యవహారంపై హీరో విశాల్ తనను బెదిరించారని ఆరోపించిన శ్రీరెడ్డి, ఆ తర్వాత విశాల్‌కు క్షమాపణలు చెప్పారు. కోలీవుడ్‌లో ఈ రగడ ఇంకా నడుస్తూనే ఉంది.


 



అసలు సిసలు బిగ్‌బాస్

Updated By ManamSun, 07/29/2018 - 04:05

imageసినిమా ఇండస్ట్రీలో నంబర్ వన్ హీరో ఎవరు? నంబర్ వన్ హీరోయిన్ ఎవరు?.. అనేవి సహజంగా ఎప్పుడూ చర్చకు వస్తూనే ఉంటాయి. కానీ ఇటీవలి కాలంలో నయా ట్రెండ్ వచ్చి చేరింది. అదే ‘బుల్లితెర రారాజు ఎవరు?’ అనే ప్రశ్న. చాలా కష్టమైన ప్రశ్న కదూ! సినిమాలైతే అభిమానుల సంఖ్య, బ్లాక్‌బస్టర్ హిట్స్, కలెక్షన్స్, రెమ్యూనరేషన్ వగైరాలను పరిగణనలోకి తీసుకుంటారు. అదే టీవీలో అయితే ఇదంతా ఉండదు. సింపుల్.. జనాల నోటి మాట.. రేటింగ్స్! ఇవి చాలు వారం రోజుల్లో టీవీని ఏలే సత్తా ఉన్న హీరో ఎవరో తేల్చేందుకు. టీవీ తెరపైకి వచ్చేందుకు పెద్ద ీహ రోలు సాధారణంగా జంకుతారు. కానీ జూనియర్ ఎన్టీఆర్ అలా కాదు. తన ఫ్యాన్స్‌కు పండగ తెస్తారు! అంతే కాదు.. ప్రోగ్రామ్‌ను అమాంతంగా పరిగెత్తిచ్చి, ఎంటర్‌టైన్‌మెంట్‌లో ముంచేస్తారు. గెస్టులు, పార్టిసిపెంట్లు, యాంకర్లు, వీక్షకులు అందరినీ ప్రోగ్రామ్‌లో ఇన్వాల్వ్ అయ్యేలా చేసే సత్తా ప్రస్తుత హీరోల్లో ఒక్క తారక్‌కే ఉందని మరోసారి ‘ఢీ 10’ గ్రాండ్ ఫినాలే తేల్చేసింది.

‘ఢీ 10’ పైనే చూపు
ఓ వైపు వీకెండ్ మాటీవీలో నాని ప్రయోక్తగా వ్యవహరిస్తోన్న ‘బిగ్ బాస్’ టెలికాస్ట్ అవుతుంటే మరోవైపు ‘ఢీ 10’image ఫైనల్స్ అదరగొట్టాయంటే అదంతా తారక్ క్రెడిట్! ఈ రియాల్టీ షోలో తారక్ చేసిన సందడి అంతా ఇంతా కాదు. ‘బిగ్ బాస్’ తొలి సీజన్ ప్రెజెంటర్‌గా బుల్లితెరపై అందరికీ మరింత చేరువైన యంగ్ టైగర్, ‘ఢీ’ ఫైనల్స్‌తో మరోసారి తనకు తిరుగులేదని చాటుకున్నారు.  వీకెండ్ ‘బిగ్‌బాస్ 2’ బాగా అలరించిందా? లేక ‘ఢీ 10’  గ్రాండ్ ఫినాలేతో ఎంజాయ్ చేశారా?.. అనడిగితే, ‘‘తారక్ ‘స్వింగ్ జరా..’ సాంగ్ డ్యాన్స్ చూసి ఫిదా అయ్యాం’’ అన్నవారే అత్యధికులంటే మ్యాటర్ ఏంటో అర్థమైపోతుంది.

హైజాక్ చేసిన యంగ్ టైగర్
మరోవైపు తారక్ ఫ్యాన్స్ ఏకంగా పూనకం వచ్చేసినట్టు నెట్‌లో పోస్టులతో ఒకటే సందడి చేశారు. ఇంకా చేస్తూనే imageఉన్నారు. ‘‘సింహాల మధ్య అదిరిపోయిన సింగమలై ఎంట్రీ’’ అంటూనే.. సుడిగాలి సుధీర్‌తో తారక్ ఫన్నీగా మాట్లాడి నవ్వించిన విధానం, అక్సాఖాన్‌తో మాట్లాడి, ఆడి పాడిన తీరు ‘వావ్..’ అనిపించేసిందంటూ చిన్నా పెద్దా అందరూ తారక్‌ను అభినందిస్తున్నారు. 2010లోనూ ‘ఢీ 2’ ఫైనల్స్‌కు చీఫ్ గె స్ట్‌గా వచ్చిన తారక్ మరోసారి ఎంట్రీ ఇచ్చి టీవీ ఇండస్ట్రీలో తనకు తానే పోటీ అని చాటుకున్నట్టు షోలో హంగామా సాగింది.  పార్టిసిపెంట్లతో ముచ్చటించిన స్టార్ హీరో మాటలు ఎంత ముచ్చటగా ఉన్నాయో అనుకుంటూ లివింగ్ రూమ్‌లోని టీవీసెట్లకు ప్రేక్షకులు అతుక్కుపోయారు. వినోదం పంచుతూ, తన మాటలతో ఆకట్టుకున్న యంగ్ టైగర్ తన కరిష్మాతో ప్రైమ్‌టైమ్‌ను భలేగా హైజాక్ చేసేశాడే!.. అనుకుంటూ సగటు ప్రేక్షకుడు తేరుకునేలోగా ప్రోగ్రాం అయిపోయింది. ఎన్టీఆర్ సత్తాను బుల్లితెరపై రుచి చూసిన ప్రేక్షకులు తమకు తెలీయకుండానే ఇతర ఏ హీరో టీవీ షోల్లో కనిపించినా ‘‘తారక్ అయితే.. తారక్‌తో పోల్చితే.. ‘బిగ్ బాస్’ సీజన్ 1లో ఫలానా సందర్భంలో జూనియర్ ఇలా అన్నాడు.. అలా అన్నాడు’’ అంటూ పోల్చి చూడటం చాలా సహజంగా మారింది. అంటే టీవీ తెరపై ‘బిగ్ బాస్’గా తారక్ ఎస్టాబ్లిష్ అయ్యారు. అందుకే ఏ హీరో ప్రెజెంటేషన్, యాంకరింగ్‌నైనా తనతో కంపేర్ చేసి మార్కులు వేసేలా తారక్ బెంచ్‌మార్క్‌ను సెట్ చేశారన్న మాట!

భార్గవి కరణం



కంటి నిండా.. నిద్ర!

Updated By ManamSun, 07/29/2018 - 03:46

image‘కంటి నిండా నిద్రపోవాలి.. కడుపునిండా తినాలి’ అంటారు. కొత్త టెక్నాలజీ పుణ్యం కొంత, ఉద్యోగాలలో ఒత్తిడి మరికొంత కలిపి ఈ రెండూ కష్టమే అవుతున్నాయి. మొబైల్ ఫోన్ లేదా ట్యాబ్, కాదంటే ఐప్యాడ్ పట్టుకుని నిద్రపోయే ముందు గంట.. గంటన్నర పాటు చూస్తూ కూర్చుంటే దాన్నుంచి వచ్చే నీలిరంగు కాంతి మన నిద్రను మొత్తం పాడు చెయ్యడమే కాదు.. కళ్లను కూడా దెబ్బ తీస్తుందని నిపుణులు హెచ్చరిస్తున్నారు.
image

పాత రోజుల్లో అయితే సాయంత్రం 5-6 గంటలకల్లా ఇళ్లకు చేరుకునేవారు. రాత్రి 7.30 లోపు అన్నం తినేసి, కాసేపు ఇంటిల్లిపాదీ కూర్చుని కబుర్లు చెప్పుకుని, పిల్లలు స్కూలుకు సంబంధించిన హోమ్‌వర్క్ పూర్తి చేసి 9.30 గంటల లోపు నిద్రపోయేవారు. పొద్దున్నే 5-6 గంటల లోపు నిద్ర లేచేవారు. దానివల్ల కావల్సినంత ఆరోగ్యం కూడా ఉండేది. రాత్రిపూట తిన్న తర్వాత ఒకటి రెండు గంటల విశ్రాంతి ఉండటం, ఆ తర్వాత  నిద్రపోవడం మంచిదని ఇప్పుడు కొత్త డైటీషియన్లు కూడా చెబుతున్నారు. ఎర్లీ డిన్నర్ చేస్తే చాలావరకు వ్యాధులు నివారించవచ్చని అంటున్నారు. దానికితోడు.. రాత్రి 10 గంటల లోపు నిద్రకు ఉపక్రమించి, ఆ తర్వాత అసలు ఎలాంటి గాడ్జెట్ల వైపు చూడకుండా ఉంటే హాయిగా కంటినిండా కావల్సినంత నిద్ర దొరుకుతుందనడంలో ఎలాంటి అనుమానం లేదు. కానీ, గుండెల మీద చెయ్యి వేసుకుని చెప్పండి.. నిజంగా మీరు అలా కంటినిండా నిద్రపోయి ఎన్ని సంవత్సరాలు అయ్యింది? ఆఫీసుల నుంచి వచ్చేసరికే కొంతమందికి 8, మరికొందరికి 10 దాటుతుంది. ఆ తర్వాత కాస్త ఫ్రెషప్ అయ్యి, ఫోన్లు మాట్లాడుకుంటూ తినేసి, మంచం మీద నడుం వాల్చడం.. అప్పుడు వాట్సాప్ మెసేజిలు, ఫేస్‌బుక్ చాటింగులు, ఈ రెండూ కాదంటే యూట్యూబ్‌లో తాము మిస్సయిన రియాల్టీ షోల ఎపిసోడ్లు... దాదాపు రెండు మూడు గంటల పాటు ఇవన్నీ అయిన తర్వాత మాత్రమే పక్కమీదకు వెళ్తున్నారు.   

నీలికాంతితో ప్రమాదం
ప్రధానంగా స్మార్ట్ ఫోన్లు, టాబ్లెట్లు, ల్యాప్‌టాప్‌లు, ఈ-రీడర్లు, ఇతర ఎలక్ట్రానిక్ పరికరాల నుంచి వెలువడే నీలిరంగు imageకాంతి వల్ల మనకు వచ్చే నిద్ర పాడవ్వడమే కాక, నిద్రపట్టిన తర్వాత కూడా అది చాలావరకు కలత నిద్రగానే ఉంటుంది తప్ప పూర్తిగా నిద్రపోవడం దాదాపు ఉండదట. సాధారణంగా చీకటి పడిందంటే విశ్రాంతి తీసుకోవాలని ప్రకృతి సహజంగానే చెబుతుంది మన శరీరం. కానీ, మనం మాత్రం సూర్యుడు పడమటి కొండల్లో వాలిన తర్వాత కూడా కృత్రిమ కాంతిని ముఖం మీద వేసుకుంటూ గంటల తరబడి అవిశ్రాంతంగా గడిపేస్తున్నాం. దానివల్ల నిద్ర సరిగా పట్టకపోవడం, పొద్దున లేచిన తర్వాత కూడా అలసట, బడలికగా ఉండటం మనం అనుభవిస్తున్నాం. దీన్నుంచి బయటపడేందుకు, కంటినిండా సుఖంగా నిద్రపోయేందుకు చాలా మార్గాలున్నాయి. వాటిని అవలంబించేవాళ్లు తక్కువే గానీ.. అమలు చేస్తే మాత్రం బోలెడన్ని ఉపయోగాలుంటాయి. 

నీలిరంగు కాంతి కళ్ల మీద పడుతుంటే, ఇంకా నిద్రపోయే సమయం ఆసన్నం కాలేదని మెదడు మన శరీరానికి చెబుతుందని నిపుణులు వివరిస్తున్నారు. కంటిలోపల సుమారు 30 వేల కణాలుంటాయని, అవన్నీ నీలిరంగు కాంతి తరంగదైర్ఘ్యానికి స్పందిస్తాయని డాక్టర్ మైఖేల్ జె. బ్రూస్ చెబుతున్నారు. నీలిరంగు దాదాపు 460 నానోమీటర్ శ్రేణి వరకు వెళ్తుందని, ఈ రకం కాంతి కణాలను ఢీకొని, మెదడులో సుప్రాచియాస్మాటిక్ కేంద్రకం వద్దకు వెళ్లి, అక్కడి నుంచి మెలటోనిన్ ఉత్పత్తిని ఆపేయిస్తుందని ఆయన వివరించారు. మెలటోనిన్ అనేది మనం నిద్రపోడానికి కావల్సిన అత్యంత ముఖ్యమైన పదార్థం. 

మన శరీరంలో ఒక రకమైన గడియారం పనిచేస్తుంటుంది. దాన్నే బాడీ క్లాక్ అంటారు. సాధారణంగా మనం రాత్రి నిద్రపోయే ముందు పొద్దున్నే నాలుగు గంటలకు లేచి ఫ్లైట్ అందుకోవాల్సి ఉంటుందని అనుకుంటే, మనం అలారం పెట్టుకున్నా కూడా ఐదు నిమిషాల తక్కువ నాలుగు గంటలకు అలారం మోగకముందే ఠక్కుమని మెలకువ వస్తుంది. అదీ బాడీక్లాక్ మహిమ. కానీ, నీలికాంతి మన శరీరంలో ఉండే బాడీక్లాక్ పనితీరును కూడా స్తంభింపజేస్తుందని శాస్త్రవేత్తలు ఆందోళన వ్యక్తం చేస్తున్నారు. కొంతమందికి నిద్ర సరిగా పట్టనపుడు ఎవరైనా వైద్యుల వద్దకు వెళ్తే, వారి నిద్ర సమయాలను సరిగా ఫిక్స్ చేసేందుకు బ్లూలైట్ థెరపీనే ఉపయోగిస్తారు. దాని ద్వారా వారు సరిగ్గా ఫలానా సమయానికి ప్రతిరోజూ పడుకునేలా శిక్షణ ఇస్తారు. ఆ సమయానికి వారికి సమీపంలో ఎక్కడా కాంతి.. ముఖ్యంగా నీలిరంగు కాంతి అన్నది లేకుండా చూస్తారు. దానివల్ల మెదడు నిద్రపోవాలన్న సంకేతాలను పంపడంతో పాటు.. నిద్రపోయేందుకు శరీరాన్ని కూడా సిద్ధం చేస్తుంది.

ఈ-రీడర్‌ను పక్కన పెట్టాలి 
గడిచిన 50 ఏళ్లలో క్రమంగా నిద్రపోయే సమయం, నిద్ర నాణ్యత రెండూ తగ్గిపోయాయని హార్వర్డ్ మెడికల్ స్కూలుకు చెందిన పరిశోధకులు బల్లగుద్ది మరీ చెబుతున్నారు. ఇలా నిద్రపోయే సమయం, నాణ్యత తగ్గడం వల్ల సాధారణ ఆరోగ్యం కూడా బాగా దెబ్బతింటోందట. సాయంత్రం పూట కాంతిని ఎక్కువగా వెదజల్లే ఈ-రీడర్లను ఉపయోగించడం వల్ల నిద్ర మీద చాలా దుష్ప్రభావం పడుతుందని, తర్వాతి రోజు ఉదయం అప్రమత్తత కూడా తగ్గుతుందని వివరించారు. అదే సాధారణంగా ఉండే ముద్రించిన పుస్తకాలు చదివితే అంత ఎక్కువ ప్రభావం ఉండదట. మోయడానికి వీలుగా ఉండటం, ఎక్కువ బరువు, స్థలం అవసరం లేకుండానే కావల్సినన్ని పుస్తకాలను అందులో లోడ్ చేసుకుని చదువుకునే వీలుండటం వ ల్ల చాలామంది ఈ-రీడర్ల వైపు మొగ్గు చూపుతున్నారు. కానీ, ఒకే సమయం పాటు పుస్తకం చదివినవారు, ఈ-రీడర్ చదివిన వారిని చూస్తే నడుం వాల్చిన తర్వాత నిద్ర పట్టడానికి ఈ- రీడర్ చదివేవాళ్లకు పది నిమిషాల సమయం ఎక్కువ పట్టడంతో పాటు, నిద్రపోయిన తర్వాత కూడా లోపల కనుగుడ్లు అటూ ఇటూ వేగంగా తిరుగుతుండ టాన్ని శాస్త్రవేత్తలు గమనించారు. అంతేకాదు, ఈ-రీడర్లలో చదివిన వాళ్లు సాయంత్రం అయ్యేసరికి బాగా అలసటగా ఉందని చెప్పడం, ఉదయం కూడా అది కొనసాగడం లాంటి లక్షణాలు కనిపించాయి. 

తగినంత నిద్ర లేకపోతే చాలా దుష్ప్రభావాలు ఉంటాయని శాస్త్రవేత్తలు చెబుతున్నారు. గుండెపోటు, ఊబకాయం, మధుమేహం, కొన్ని రకాల కేన్సర్లు కూడా నిద్రలేమి వల్ల వస్తాయట. ఎక్కువ కాలం పాటు రాత్రి షిఫ్టులలో ఉద్యోగాలు చేసేవారికి లేదా తీవ్రంగా నిద్రలేమితో బాధపడేవారికి ఇవి వచ్చే అవకాశం ఎక్కువగా ఉంటుందని అంటున్నారు. ఇవే కాదు.. సరిగా నిద్రపోకపోతే మూడ్ పాడవ్వడం, ఆందోళన, డిప్రెషన్ ఎక్కువై.. చివరకు డ్రైవింగ్‌లో ప్రమాదాలకు గురయ్యే అవకాశాలు కూడా ఎక్కువే అవుతాయట. 

మెలటోనిన్ తగ్గిపోతోంది
ఎక్కువ కాలం పాటు నీలిరంగు కాంతి కళ్ల మీద పడుతుంటే కాటరాక్ట్ త్వరగా రావడంతో పాటు చివరకు అంధత్వం కూడా సంభవించే ప్రమాదం ఉందని లండన్‌లోని ఇన్‌స్టిట్యూట్ ఆఫ్ ఆఫ్తమాలజీకి చెందిన ప్రొఫెసర్ జాన్ మార్షల్ వివరించారు. సాధారణంగా వయసుతో పాటు మాత్రమే వచ్చే కాటరాక్ట్ (కంటిలో శుక్లాలు) నీలికాంతిని ఎక్కువగా చూసేవాళ్లకు 5 నుంచి 10 సంవత్సరాలు ముందుగా వస్తాయని ఆయన అన్నారు. 460 నానోమీటర్ల తరంగదైర్ఘ్యంతో వచ్చే నీలికాంతి మెలటోనిన్ ఉత్పత్తిని పూర్తిగా ఆపేస్తుందని ఆయన చెప్పారు. సాధారణంగా మొబైల్, ఐప్యాడ్ లాంటి వాటి స్క్రీన్ల వైపు చూసినపుడు దాని నుంచి వచ్చే బహుళరంగులతో కూడిన ఇమేజి మన రెటీనా మీద పడుతుందని, అది ఫేడ్ అవ్వడానికి చాలా ఎక్కువ సమయం తీసుకుంటుందని వివరించారు. గదిలో వేసుకునే లైట్లు, ఎల్‌ఈడీ బల్బులు కూడా దాదాపు ఇలాంటి ప్రభావాన్నే కలిగిస్తాయట. పడుకోడానికి ముందు ఎక్కువ సేపు లైట్లు వేసుకుని ఉంటే మెలటోనిన్ ఉత్పత్తి తగ్గుతుందని, 99% మందిలో ఇది కనిపించిందని అన్నారు. ట్యూబ్ లైట్ల వల్ల అయితే ఇలాంటి ప్రభావం ఉండదని, కానీ ఎల్‌ఈడీలతో మాత్రం ఇబ్బంది ఎక్కువని ప్రొఫెసర్ మార్షల్ చెప్పారు. 

చేయకూడనివి ఇవే..
ట్యూబ్‌లైట్లు, టీవీ స్క్రీన్లు చేసే చేటు కంటే ఎల్‌ఈడీ బల్బులుimage, స్మార్ట్‌ఫోన్లు, టాబ్లెట్లు, ల్యాప్‌టాప్‌లు చేసే కీడు ఎక్కువ. అందువల్ల కావాలంటే టీవీ చూడచ్చు గానీ ఇవి చూడకూడదని అంటున్నారు. అంతేకాదు, ఇలాంటి కాంతి కంటికి ఎంత దగ్గర నుంచి పడితే అంత చేటు చేస్తుంది. అందుకే దగ్గర నుంచి ఫోన్, ట్యాబ్ చూడటం కంటే దూరం నుంచి టీవీలు చూడటం మంచిదని చెబుతున్నారు.

ఉదయాన్నే ఏం చేయాలి..
మన బాడీక్లాక్ సరిగ్గా పనిచేయాలంటే రాత్రి ఒకవేళ నిద్ర సరిగా పట్టినా, పట్టకపోయినా ఉదయం లేచిన తర్వాత పావుగంట సేపు సూర్యకాంతి మన మీద పడేలా చూసుకోవాలి. ప్రతిరోజూ ఉదయాన్నే బయటకు వెళ్లి పావుగంట పాటు సూర్య నమస్కారాల లాంటివి చేస్తే శరీరానికి వ్యాయామంతో పాటు జీవక్రియలన్నీ కూడా సక్రమంగా జరుగుతాయి. కంటికి కూడా ఉదయపు సూర్యకాంతి తగలడం చాలా మంచిదని యోగా బోధకులు చెబుతున్నారు. శరీరంలో ప్రతి ఒక్కరికీ అంతర్గతంగా ఉండే బాడీక్లాక్‌ను రీసెట్ చేయడానికి పావుగంట సేపు ఉదయపు సూర్యకాంతిని మించిన ఔషధం లేద ని డాక్టర్ బ్రూస్ చెప్పారు.
 
తప్పనిసరైతే.. 
ఒకవేళ ఫోన్లు చూడటం తప్పనిసరైతే అప్పుడు కొన్ని ప్రత్యేకమైన అద్దాలు మార్కెట్లో దొరుకుతున్నాయి. వాటికి రంగు అద్దాలుంటాయి. అవి నీలిరంగు కాంతిని నేరుగా కళ్లకు తగలకుండా ఫిల్టర్ చేస్తాయి. మనకు కళ్లజోడు ఉంటే ఆ పవర్ ఉన్న అద్దాలకు కూడా ఇలాంటి కోటింగ్ వేయించుకోవచ్చు. గాస్ గ్లాసులు అనే మరో రకం లెన్సుల మీద అనేక లేయర్లుగా కోటింగ్ ఉంటుంది. అది 440 నానోమీటర్ల కాంతిని కూడా ఫిల్టర్ చేస్తుంది. ఇవి పెట్టుకుని చూస్తే కళ్లమీద అంత ప్రభావం ఉండదని, దానివల్ల నిద్ర కూడా సరిగానే పడుతుందని చెబుతున్నారు. 
- రఘురామ కామేశ్వరరావు పువ్వాడ



ధూమపానంతో దృష్టి దోషం!

Updated By ManamSun, 07/29/2018 - 03:29

imageపొగతాగే వాళ్లలో శ్వాసకోశ వ్యాధులు, ఊపిరితిత్తులు, గొంతు, నోటి కేన్సర్లు, గుండె జబ్బులు వస్తాయని చాలా మందికి తెలుసు. అయితే శరీరంలోని మిగతా అవయవాలు కూడా ధూమపానం వల్ల ప్రభావితమవుతాయని నిపుణులు హెచ్చరిస్తున్నారు. సిగరెట్లు తాగడం వల్ల కళ్లకీ, దృష్టికీ కూడా నష్టమనే విషయం చాలా మందికి తెలియదు. చూపు కోల్పోవడానికీ, శుక్లాలకూ పొగతాగడం నేరుగా కారణమవుతుందని పరిశోధనలు స్పష్టం చేస్తున్నాయి. పిల్లలు, పెద్దలనే తేడా లేకుండా ఇటు పొగ తాగేవాళ్లలోనూ, అటు పొగ పీల్చేవాళ్లలోనూ ఒక స్థాయిలో కంటి సమస్యలు తలెత్తుతున్నాయని అనేక అధ్యయనాల్లో వెల్లడైంది. పొగతాగే అలవాటున్న స్త్రీలు గర్భం దాల్చినట్లయితే నెలలు నిండకుండానే ప్రసవించడానికి ఆస్కారం ఎక్కువవుతుందనీ, అలా పుట్టిన పిల్లల్లో రెటినోపతి ఆఫ్ ప్రిమెచ్యూరిటీ అనే వ్యాధి పెరిగే అవకాశం ఉంటుందనీ వైద్యులు హెచ్చరిస్తున్నారు. సరైన చికిత్స చేయించకపోతే దీని వల్ల పిల్లలు చూపును కోల్పోయే ప్రమాదముంది. 

సిగరెట్ పొగలో తారు, పాలీసైక్లిక్, కార్బన్ మోనాక్సైడ్, ఫార్మల్‌డీహైడ్, భార లోహాల వంటి నాలుగు వేల క్రియాశీలక విషపూరిత పదార్థాలు ఉంటాయి. ఈ పదార్థాలు.. శుక్లాలు, డయాబెటిక్ రెటినోపతి, పొడి కన్ను, ఆప్టిక్ న్యూరోపతి వంటి వయసు సంబంధిత కంటి సమస్యల్ని పెంచుతాయి. అరవై ఐదేళ్లు పైబడిన వృద్ధుల్లో అంధత్వం కలగడానికి వయసు సంబంధిత మాక్యులార్ డిజనరేషన్ (ఏఎండి) ప్రధాన కారణం. కేవలం ధూమపాన ప్రియుల్లో మాత్రమే కాదు, వాళ్లు పొగ తాగుతున్నప్పుడు దగ్గరగా ఉన్నవాళ్లలోనూ పొగ కారణంగా కళ్ల మంటలు, దురదలు వస్తాయి. పొగాకు వినియోగానికీ, అనేక ఆరోగ్య సమస్యలకీ నేరుగా సంబంధం ఉంది. ధూమపానాన్నీ, పొగాకు వినియోగాన్నీ విడనాడితే కేవలం వాళ్లకే కాకుండా, వాళ్లు ప్రేమించేవాళ్లకూ ప్రయోజకరమే.

కంటి చూపును రక్షించుకోవాలంటే..
- ధూమపానం విడిచిపెట్టాలి.
- ఆరోగ్యకరమైన ఆహారాన్ని తీసుకోవాలి.
-  ప్రధానంగా ఆకుపచ్చ కూరలు, సి, ఇ విటమిన్లు, బేటా కెరోటీన్
   అధికంగా ఉండే పళ్లు తీసుకోవాలి.
- క్రమం తప్పకుండా వ్యాయామం చేయాలి.
- బీపీ, కొలెస్టెరాల్ స్థాయిలు నార్మల్‌గా ఉండేట్లు చూసుకోవాలి.



ఒక గుహ.. వెయ్యి చేయూతలు

Updated By ManamMon, 07/23/2018 - 06:37

ప్రమాదం సంభవించినప్పుడు భయం ఆవహిస్తుంది. కానీ ఆ భయాన్ని తోసిరాజంటూ దాన్ని అధిగమించే అవకాశం కోసం వెదకడమే సిసలైన గుండె ధైర్యం. అదిగో.. ఆ గుండె ధైర్యం వల్లే పదమూడు జీవితాలు పునర్జన్మించాయి. 
ఆ పన్నెండు మంది పిల్లలు సహా, వారి గురువు కూడా తిరిగి పుట్టారు. 
 

image

23 జూన్ 2018, శనివారం.. ఎడతెరపి లేని వర్షం. 
ఆ రోజే పీరాపట్ సోంపియాంగై అనే కుర్రాడికి 17వ పుట్టినరోజు. అతని ముద్దు పేరు ‘నైట్’. యవ్వనంలో అడుగుపెట్టే ముందు ప్రతి యువకునికి ఈ 17వ పుట్టిన రోజు అపురూపమైంది. ‘నైట్’ కుటుంబం కుర్రాడి పుట్టిన రోజు కోసం ప్రత్యేకమైన కేక్‌ను తయారు చేసింది. ఆత్మీయులందరూ రంగురంగుల బహుమతుల్ని తెచ్చారు. ఉదయమే నైట్ ఇంటి నుంచి బయలుదేరాడు. 

అతనొక ఫుట్‌బాల్ క్రీడాకారుడు. స్థానిక ఫుట్‌బాల్ క్లబ్ ‘మూపా’ (వైల్డ్‌బోర్స్)లో నైట్ కూడా సభ్యుడు. ఆ రోజు తన స్నేహితులతో కలిసి ఫుట్‌బాల్ కోర్టులో ప్రాక్టీస్ చేయడానికి వెళ్ళాడతను. మిత్రుడి పుట్టిన రోజున ఏదైనా సాహసం చేయాలని అనుకున్నారంతా. ప్రాక్టీస్ పూర్తవగానే నైట్ సహా పన్నెండు మంది పిల్లలు, తమ ఫుట్‌బాల్ కోచ్ ఎక్పోల్ చాంటావోంగ్ (25)తో కలిసి థామ్ లాంగ్ పర్వతప్రాంతంలోని ఒక కొండగుహ దగ్గరికి వెళ్లారు. అంతే..! నైట్ కుటుంబం అతని కోసం రాత్రంతా ఎదురు చూసింది. అతనితో పాటు వెళ్లిన పిల్లలు, కోచ్ కూడా తిరిగి ఇళ్ళకు చేరుకోలేదు. ఆ రోజు నుంచి దాదాపు రెండు వారాలకు పైగా ప్రపంచమంతా ఆ పిల్లల కోసం ఆతృతగా ఎదురు చూసింది.

imageథాయ్‌లాండ్‌లో పన్నెండు మంది పిల్లలు, వారి కోచ్ ప్రమాదవశాత్తు ఒక కొండగుహలో చిక్కుకుపోవడం ప్రపంచంలో అందరి హృదయాల్ని కలచి వేసింది. ప్రమాదాలు జరగని రోజు, జరగని చోటు ఈ భూమ్మీద దాదాపు ఉండనే ఉండదు. కానీ ఈ ప్రమాదం మాత్రం దేశపుటెల్లల్ని చెరిపేసి, ప్రతి ఒక్కరిలోని మాతృత్వాన్ని నిద్రలేపింది. పదమూడు మంది సురక్షితంగా ప్రాణాలతో బయటపడినప్పుడు ప్రపంచమంతా ‘హమ్మయ్య!’ అంటూ ఊపిరి తీసుకుంది. ఇంతటి సంచలనానికి వేదికైన థామ్‌లాంగ్ పర్వతగుహను ఒక స్మృతిచిహ్నంగా అభివృద్ధి చేస్తామని థాయ్‌లాండ్ ప్రభుత్వం ప్రకటించిందంటే, మానవీయ విలువల రీత్యా ఈ సంఘటన ఎంతటి స్పందనకు కేంద్రబిందువుగా మారిందో అర్థం చేసుకోవచ్చు. థామ్‌లాంగ్ కొండగుహలో పిల్లలు చిక్కుకుపోయిన తరువాత వారిని రక్షించడం దాదాపు అసాధ్యమనే మాటలే ఎక్కువగా వినిపించాయి. ఆ అసాధ్యాన్ని సుసాధ్యం చేసిన గుండె నిబ్బరపు కథనం ఇది.

ఏం జరిగింది?
‘నైట్’ పుట్టినరోజునాడు పిల్లలంతా కలిసి, ఫుట్‌బాల్ ప్రాక్టీస్ పూర్తయిన తరువాత సైకిళ్ళ మీద, పంటపొలాల వెంట షికారుకెళ్లారు. వారితో పాటు కోచ్ చాంటావోంగ్ కూడా వెళ్లాడు. అలా సైకిళ్ళ మీద వెళుతూ, వెళుతూ కొండప్రాంతానికి చేరుకున్నారు. అప్పటికే మేఘావృతమైన ఆకాశం వర్షించడం మొదలు పెట్టింది. సన్నటి జల్లుల్లో తడుస్తూ అనుకున్న గమ్యానికి చేరాలన్న ఉత్సాహం మరింత బలపడింది. వారి గమ్యం థామ్‌లాంగ్ గుహ. థాయ్‌లాండ్‌లో సాహసికులందరికీ అదొక స్వప్నసీమ. 

తనలోని లోయల రహస్యాల్ని, శిఖరాల సందేశాల్ని ఆకాశానికి వినిపిస్తూ ఎదురుగా మాయ్‌సీ పర్వతం నిటారుగా imageనిలబడి ఉంది. పర్వతప్రాంతంలోని థామ్‌లాంగ్ గుహ దగ్గరికి రాగానే పిల్లలందరిలో కట్టలు తెంచుకున్న ఆనందం. సైకిళ్ళని, ఫుట్‌బాల్ షూలని, వెంట తెచ్చుకున్న అదనపు వస్తువుల్ని గుహ వాకిట్లోనే పడేసి, పొలోమని గుహలోకి ఒకటే పరుగు. గుహ లోపల ఎనిమిది కిలోమీటర్ల వరకు సజావుగా నడిచి వెళ్లిపోయారు. పోతూ పోతూ గుహ గోడల మీద కొత్తగా తమ టీమ్‌లోకి చేర్చుకోవాలనుకున్న ఫుట్‌బాల్ నేస్తాల పేర్లని చెక్కుకుంటూ వెళ్లారు. మసక చీకటి తెరలు జారుతున్నాయి. గుహలో చీకటి నెమ్మదిగా పేరుకుంటోంది. చేతుల్లో టార్చిలైట్లకి పని చెప్పాల్సిన తరుణం ఆసన్నమైంది. గుహలో ఎక్కువ సేపు గడపాలని వాళ్ళు అనుకోలేదు, మహా అయితే ఒక్క గంట..! అలా అనుకున్న ఆ ఒక్క గంట.. రెండు వారాల వరకు తన పొడవైన చీకటి చేతుల్ని చాచి, వాళ్ళని కమ్మేసింది. నైట్ ఇంట్లో పుట్టినరోజు కేక్‌ను ఎవరూ ముట్టుకోలేదు. పిల్లవాడి కోసం ఎదురు చూస్తూనే ఉన్నారు.

‘వైల్డ్‌బోర్స్’కి ఏమైంది?
థాయ్‌లాండ్, మయన్మార్‌ను వేరుపరుస్తూ పది కిలోమీటర్ల వరకు పరచుకున్న పర్వతశ్రేణి అది. థాయ్‌లాండ్‌లోని నాలుగవ అతిపెద్ద గుహల సముదాయం థామ్‌లాంగ్. విశ్రమించిన ఒక స్త్రీ ఆకారంలో ఉండే ఈ పర్వతశ్రేణి పూర్తి పేరు థామ్‌లాంగ్ కున్‌నామ్ నాంగ్నన్. ఎన్నో థాయ్ జానపద కథలు ఈ ‘విశ్రమించిన మహిళ’ చుట్టూ అల్లుకుని ఉన్నాయి. ఎన్నెన్నో జలధారలు ఈ పర్వతసానువుల మీద మోకరిల్లుతుంటాయి. అందం ఎంత ప్రమాదకరమైందో చెప్పడానికి ఈ థామ్‌లాంగ్ గుహలే ఉదాహరణ. ఎందరెందరో ఇప్పటికే ఈ పర్వత గుహల్లో కనుమరుగయ్యారు, కన్నుమూశారు. ముఖ్యంగా వర్షాకాలం ఈ గుహలు మరింత ప్రమాదకరంగా మారతాయి. వర్షాకాలంలో గుహలో పదహారు అడుగుల మేరకు వరద నీరు ఉప్పొంగుతుంది. నవంబర్ నుంచి ఏప్రిల్ వరకు మాత్రమే గుహలోకి వెళ్లడానికి వీలుగా ఉంటుంది. అలాంటిది ఈ పిల్లలు జూన్ నెలలో ‘సరదా’ పడ్డారు. 

‘‘గుహలో నీరు నిరంతరాయంగా ప్రవహిస్తూనే ఉంది. ఆ నీరు చాలా మడ్డిగా ఉంది. గుహలో చిమ్మచీకటి అలముకుంది’’ అని స్థానిక గైడ్ జాషువా మోరిస్ చెప్పాడు. గుహలో నీటి చుక్క కనబడనంత వరకే ఎవరి ప్రాణాలకైనా హామీ. ఒక్కసారి వరదపోటు మొదలైందంటే, గజ ఈతగాళ్లకు కూడా ప్రాణాలు నిలబెట్టుకోవడం సాధ్యం కాదు. ఈ గుహలోకి సాహస యాత్ర చేయాలన్న ఆలోచన చాలా రోజుల నుంచే ఉన్నట్టుంది ఈ పిల్లలకి. వాళ్ళ వాట్సాప్ మెసేజ్‌లలో దీని మీద చర్చ కూడా సాగినట్టు తెలుస్తోంది. పిల్లలు గుహలో చిక్కుకు పోయిన విషయం తెలిసిన వారి కుటుంబాలు గుహముఖం దగ్గరికి చేరుకున్నాయి. అక్కడ వాళ్ళకి తమ పిల్లల సైకిళ్ళు, ఫుట్‌బాల్ షూలు, సంచులు దొరికాయి. తమ కలలపంటల క్షేమం కోసం కళ్ళు కాయలు కాసేలా వాళ్ళు ఎదురు చూడడం ప్రారంభించారు. 

‘ధ్యానమే’ ప్రాణదాత?
గుహలో లోతుకు వెళ్ళే కొద్దీ పిల్లలు ప్రమాదంలో చిక్కుకున్న సంకేతాల్ని పసిగట్టారు. అప్పటికే కొద్దిరోజులుగా కొండమీద కురుస్తున్న వర్షపు నీరంతా ఏదో ఒక మార్గం గుండా కిందికి ప్రవహించాలి. ఆ మార్గమే థామ్‌లాంగ్ గుహ. గుహలో వరదపోటు అంతకంతకూ పెరుగుతోంది. బయటికి వెళ్లిపోతేనే మంచిదని వాళ్ళకి అనిపించింది. తక్షణం బయటికి వెళ్లడానికి ఉద్యుక్తులయ్యారు. కానీ ఆ తొందరలో వాళ్ళు దారితప్పి మరింత లోపలికి వెళ్లిపోయారు. చుట్టూ చీకటి, ఎముకలు కొరికే చలి, ‘కాలం’తో సంబంధం తెగిపోయింది. గుహలోపల ఒక రాతి మీద అందరూ ఒకరినొకరు కౌగిలించుకుని ఉండిపోయారు. ఆ కౌగిలిలో జీవితేచ్ఛ తప్ప మరో ప్రాణస్పందన లేదు. భయం ఆవరించింది. అయినా బతికి తీరాలన్న పట్టుదల పెరుగుతూనే ఉంది. తాము కూర్చున్న రాయి పక్కన ఉన్న గుహ గోడలో ఐదు మీటర్ల లోతుకు రాళ్ళతోనే చెక్కారు. ఒక అరలా తయారైందది. అందులో దాక్కున్నారు. ఫుట్‌బాల్ కోచ్ ఎక్పోల్ నిజజీవితంలో ఒక బౌద్ధ సన్యాసి కూడా! పిల్లలకు అప్పటికప్పుడు ‘ధ్యానం’ (మెడిటేషన్)లోని మెళకువల్ని నేర్పించాడు. గుహలో ఉన్న కొద్దిపాటి ప్రాణవాయువును పొదుపుగా వాడుకోవడమెలాగో, మానసికంగా ధృఢంగా ఉండడమెలాగో వారికి నేర్పించాడతను. ఆహారం లేదు. గుహ గోడల నుంచి బొట్టుబొట్టుగా కారుతున్న నీటితో దాహం తీర్చుకున్నారు. చేతిలో టార్చిలైట్లు వారికి చీకటి నుంచి రక్షణనిచ్చాయి. గుహగోడల్లో సున్నపురాయి ఎక్కువగా ఉండడం వల్ల ప్రాణాలు నిలబెట్టుకోవడానికి అవసరమైన గాలి కూడా లభించింది. తీరని కష్టంలో కూడా అనుకూలమైన పరిస్థితుల్ని గుర్తించడమంటే ఇదే. ఎవరైనా కాపాడకపోతారా అన్న ఆశే మినుకుమినుకుమంటోంది!

‘ఎవరైనా ఉన్నారా, కాపాడతారా?’
గుహ లోపల జీవన్మరణ పోరాటం జరుగుతుండగానే, గుహ బయట పిల్లల్ని రక్షించే ప్రయత్నాలు మొదలయ్యాయి. ‘థాయ్ నేవీ సీల్స్’ అనే ఉన్నత థాయ్ పోలీసు బృందాలు, ఇతర రక్షక బృందాలు, స్థానిక స్వచ్ఛంద కార్యకర్తలు అవిశ్రాంతంగా పిల్లల ఆచూకీ కోసం ప్రయత్నాలు చేస్తున్నారు. ఒకానొక గుహలోపల పిల్లలు నడచి వెళ్లిన ఆనవాళ్ళు దొరికాయి. కానీ వాళ్ళు సజీవంగా ఉన్నారా, లేరా అన్నది తెలియలేదు. వాతావరణం తన కాఠిన్యాన్ని కొనసాగిస్తూనే ఉంది. మెలికలు తిరిగిన గుహమార్గం గుండా వెళ్లి పిల్లల ఆచూకీని వెదకడం ప్రాణాలతో చెలగాటమాడడమే. పైగా పొంగుతున్న వరద.. గుహలోపలి వరద ఉధృతి థాయ్ గజ ఈతగాళ్ళకు కూడా పెనుసవాలే! ఏం చేయాలో ఎవరికీ తోచడం లేదు. నీటిని తోడడానికి పైపుల్ని, గుహని తొలిచేందుకు ఉలుల్ని, ఇంకా ఎన్నెన్నో ఉపకరణాల్ని పోగు చేసుకుని ప్రయత్నిస్తున్నారు. అయినా ఫలితం శూన్యం! పిల్లల స్నేహితుల్లో ఒకరికి తన స్నేహితులంతా కలిసి గుహలో వెళ్లాలనుకున్న చోటు గురించి మాట్లాడుకోవడం జ్ఞాపకం వచ్చింది. ఆ చోటే, పట్టాయా బీచ్. గుహలోపల ఉన్న ఒక చిన్న ఇసుకమేట. పిల్లలు అక్కడ దొరుకుతారా?

ప్రార్థనల వెల్లువ
గుహలోపల చావును చావుదెబ్బ కొట్టేందుకు అన్ని దారుల అన్వేషణ సాగుతుండగా, గుహ బయట పిల్లల కుటుంబాలు వారి కోసం ప్రతి రోజూ పడిగాపులు కాశాయి. ఫుట్‌బాల్ కోచ్ చాంటావోంగ్ నాయనమ్మ తుమ్ కాంటావోంగ్ ప్రతిరోజూ గుహ ముంగిట కొవ్వొత్తులు వెలిగించి, పండ్లని, ఫలహారాల్నీ ఉంచి, చేతులు జోడించి ప్రార్థించేది. ‘‘పిల్లల్ని ప్రాణాలతో మాకు అప్పగించాలని నేను ఈ గుహను పాలిస్తున్న దైవశక్తుల్ని ప్రార్థిస్తున్నా’’ అంటూ ఆమె కన్నీటితో చెప్పింది. క్రమంగా ఆ పిల్లలు చదువుతున్న పాఠశాలలకు చెందిన విద్యార్థులు, ఉపాధ్యాయులు గుహ ముందు గుమికూడి, సామూహిక ప్రార్థనలు చేయడం మొదలైంది. పిల్లల బంధువులకు, సహాయక చర్యల్లో పాల్గొంటున్న వారికి స్థానికులు విరాళాలు పోగు చేసి, అన్నపానీయాల్ని అందించడం ప్రారంభించారు. 

అంతర్జాతీయ సాయం
image28 జూన్,
గురువారం నాడు థాయ్‌లాండ్ గుహలో చిక్కిన పిల్లల్ని రక్షించేందుకు గుహ ముందు అంతర్జాతీయ సాయం అడుగు పెట్టింది. అమెరికా, బెల్జియం, స్కాండినేవియా, చైనా, ఆస్ట్రేలియాలకు చెందిన వైమానిక, సైనిక నిపుణులు పిల్లల్ని కాపాడే బృహత్తర కార్యక్రమంలో పాలుపంచుకున్నారు. జూలై ఒకటో తేదీన.. అంటే, పిల్లలు తప్పిపోయిన వారం రోజులకు వాళ్ళని కాపాడే పనిలో ఒక ముందడుగు పడింది. గుహలోపల ఒక అతిపెద్ద బొరియలోకి రక్షక నిపుణులు ప్రవేశించగలిగారు. ఇద్దరు బ్రిటిష్ డైవర్లు జాన్ వొలాంథెన్, రిక్ స్టాంటన్‌లు వరదకు ఎదురొడ్డి గుహలోకి ప్రయాణించారు. సహాయక బృందాలకు మార్గదర్శకంగా నిలిచి, ఎట్టకేలకు పట్టాయా బీచ్‌కు చేరుకున్నారు. అక్కడ కూడా చీకటిగానే ఉంది. కానీ గాలి చొరబడే ప్రాంతమది. ఎక్కడ అలాంటి అవకాశం కనిపించినా వాళ్ళిద్దరూ అక్కడి గాలిని వాసన చూసే వాళ్ళు. పిల్లల ఆచూకీని కనిపెట్టేందుకు అదొక మార్గం. పిల్లల కోసం అరిచే వాళ్ళు. అలా కొన్ని వందల మీటర్ల దూరం ముందుకు వెళ్లాక, వాళ్ళ ప్రయత్నం ఫలించింది. పిల్లల ఉనికిని కనిపెట్టారు. కానీ అప్పటికే వారి టార్చిలైట్లు మొరాయించడం మొదలెట్టాయి. పిల్లల్ని లెక్కించారు.. కోచ్ సహా పదమూడు మంది! వాళ్ళిద్దరూ పిల్లలతో కాసేపు గడిపారు. వాళ్ళకి ధైర్యం చెప్పారు. తమతో తెచ్చుకున్న లైట్లని వారికి ఇచ్చేశారు. తిరిగి మళ్ళీ వస్తామని, ఆహారాన్ని తెస్తామని మాట ఇచ్చారు. పిల్లలతో తాము గడిపిన క్షణాల్ని కెమెరాల్లో బంధించారు. 

ఫలించిన ‘డాక్టర్’ వ్యూహం
పిల్లల్ని విజయవంతంగా కాపాడడంలో ఆస్ట్రేలియన్ డాక్టర్ రిచర్డ్ హారిస్ చేసిన సూచన ప్రధాన పాత్ర పోషించింది.image పిల్లల ఉనికిని గుర్తించిన తరువాత పంపుల సహాయంతో నీటిని తోడడం మొదలుపెట్టారు. అయినప్పటికీ పిల్లల్ని బయటికి తీసుకురావాలంటే, వాళ్ళని నీటి మధ్య నుంచే తేవలసి ఉంటుంది. అందుకే మొదటి 1.7 కిలోమీటర్ల దూరం వరకు పిల్లల్ని గజ ఈతగాళ్ళే మోసుకు రావలసి ఉంటుంది. తరువాత ఒకటిన్నర కిలోమీటర్ల దూరాన్ని పిల్లల్ని కర్రల మీద మోసుకు రావచ్చునన్న పథకం సిద్ధమైంది. ఈలోగా థాయ్ సైన్యం పిల్లల్ని రక్షించేందుకు అవసరమైన వెట్‌సూట్లు, ఫుల్‌ఫేస్ స్క్యూబా మాస్క్‌లు, అండర్ వాటర్ లైట్లు తదితర వస్తువుల్ని సిద్ధం చేశారు. వీటిలో ఫుల్‌ఫేస్ స్క్యూబా మాస్కుల్ని అమర్చడం క్లిష్టతరమైన పని. ఎందుకంటే అవి చిన్నపిల్లలకు సరిపోయేవి కావు. అలాంటివి థాయ్‌లాండ్‌లో ఉండవు కూడా! గుహలో చిక్కుకున్న పిల్లల్లో అత్యంత పిన్నవయస్కుడైన చానిన్ విబూన్‌రంగ్యుయోంగ్‌కి పదకొండేళ్ళు.

 ఈ పిల్లవాడిని రక్షించడమే కష్టం. నిజానికి థాయ్ అధికారులు వర్షాలు తగ్గేంతవరకు పిల్లల్ని గుహలో ఉంచడం తప్ప మరో మార్గం లేదని భావించారు. కానీ చాలా మంది నిపుణులు ఈ ఆలోచనను తిరస్కరించారు. అప్పటి దాకా గుహలో ఆక్సిజన్ పరిమాణం ప్రాణాల్ని నిలబెట్టుకునేందుకు చాలదు. అంతేగాక జూలై 7న గుహలో పెద్దయెత్తున వరద తాకిడి ఉంటుందని వాతావరణ శాఖ హెచ్చరించింది. అటు తరువాత పిల్లల్ని రక్షించడం అన్న మాటే ఉండదు. ఇంత ప్రమాదంలోనూ పిల్లలు పిల్లలే! వాళ్ళకి ఈ సమస్యలేమీ తెలియవు. ‘‘నేను డైవింగ్ చేయబోతున్నాను..’’ అంటూ ఉత్సాహంగా కేకలు పెట్టారు. పిల్లలకు ఈ లోగా మానసిక ఆందోళనను తగ్గించే మందుల్ని సరఫరా చేశారు. సహాయక చర్యల్లో పాల్గొన్న ఆస్ట్రేలియన్ డాక్టర్ రిచర్డ్ హారిస్ బలహీనంగా ఉన్న పిల్లల్ని మొదట తరలించాలని సూచించారు. ఎవర్ని ముందుగా తరలించాలో సూచిస్తూ కోచ్ ఎక్పోల్ ఒక జాబితా తయారు చేశారు. ముందుగా చానిన్ విబూన్‌రంగ్యుయోంగ్‌తో పాటు, మరో పిల్లవాణ్ణి తరలించారు. సహాయక చర్యల్లో ప్రధాన భూమిక నిర్వహించిన డానిష్ గజ ఈతగాడు క్లాస్ రాస్మూస్సేన్, థాయ్ గజ ఈతగాడు రూన్‌గ్రెట్ చాంగ్ వాన్యూన్‌లు పట్టాయా బీచ్‌కి చేరుకుని, మరో గజ ఈతగాని సహాయంతో పిల్లల్ని తరలించే కార్యక్రమాన్ని పర్యవేక్షించారు.

ఆదివారం మధాహ్నం 2.30 గంటలకు ఒక గజ ఈతగాడు మొదటగా ఇద్దరు పిల్లల్ని పట్టాయా బీచ్‌కు చేర్చాడు. అక్కడి నుంచి ఏటవాలుగా, బురద మట్టితో కూడిన దారి వెంట కర్రల మీద వారిని గుహముఖ భాగానికి చేర్చే పని సవాలుగా మారింది. అయినా విజయం సాధించారు. సోమవారం అర్ధరాత్రికి పిల్లలందర్నీ విజయవంతంగా గుహ నుంచి బయటకు తీసుకు వచ్చారు. పిల్లలందర్నీ ఇలా బయటకు తెచ్చారో, లేదో.. గుహలో నీటి ప్రవాహ ఉధృతి కళ్ళముందే పెరిగి పోయింది. గుహ మొత్తం నీటిమయమై పోయింది. దీనికి దైవ సంబంధమైన కారణాన్ని ఎవరూ చెప్పక పోయినప్పటికీ, అందరి మనసులు ‘ధన్యవాదాల’తో నిండిపోయాయి. 

బలిదానం
imageఇంతటి అపాయకరమైన సందర్భంలో అందరి మనసుల్ని తేలిక పరుస్తూ, పిల్లలు సురక్షితంగా బయటికి వచ్చారు. కానీ వారిని రక్షించడం కోసం ఒకరు తన ప్రాణాల్ని బలిపెట్టక తప్పలేదు. ఆ వ్యక్తి థాయ్ మాజీ నేవీ సీల్ సార్జంట్ మేజర్ సమన్ గునన్ ఈ సహాయక చర్యల్లో ప్రాణాలు కోల్పోయి, విషాదాన్ని మిగిల్చారు. ముప్ఫై ఎనిమిదేళ్ళ గునన్ సైన్యం నుంచి పదవీ విరమణ చేసినప్పటికీ, పిల్లల్ని కాపాడేందుకు స్వచ్ఛందంగా సహాయక చర్యల్లో పాల్గొన్నారు. గుహలో తగినంత మోతాదులో ఆక్సిజన్‌ను నింపడానికి ఎయిర్ ట్యాంకుల్ని చేరవేస్తూ, పరుగెత్తి, పరుగెత్తి, శ్వాస అందక ఆయన కన్నుమూయడం అందరినీ కలచి వేసింది. గునన్ భౌతికకాయాన్ని అంత్యక్రియల నిమిత్తం సత్తాబ్ జిల్లాలోని సైనిక శిబిరానికి తరలించారు. అక్కడ ఆయనకు గౌరవ లాంఛనాలతో అంత్యక్రియలు జరిపించాల్సిందిగా థాయ్‌లాండ్ రాజు ఆదేశించారు.
 
పిల్లల్ని గుహ నుంచి నేరుగా
స్థానిక ఆసుపత్రికి తరలించి, వైద్యసహాయాన్ని అందించారు. వారిలో కొంతమందికి ఘనimage ఆహారాన్ని ఇవ్వకుండా, ద్రవాహారాన్నే ఇచ్చారు. కొందరు మాత్రం మొదటిరోజే బ్రెడ్, చాక్లెట్‌లు తిన్నారు. గుహలో చిక్కుకున్న పన్నెండు మంది పిల్లలు, వారి కోచ్‌ను సురక్షితంగా బయటకు తెచ్చే ఈ ఆపరేషన్‌లో ప్రపంచవ్యాప్తంగా దాదాపు వెయ్యిమందికి పైగా పాల్గొన్నారు. రష్యాలో జరుగుతున్న వరల్డ్‌కప్ ఫైనల్‌లో పాల్గొనాల్సిందిగా ‘ది వరల్డ్ సోకర్ ఫెడరేషన్’ పిల్లల్ని ఆహ్వానించింది. కానీ పిల్లలు ఇంకా తేరుకోలేదు. అందుకే ఈ వరల్డ్ కప్ ఫైనల్‌కి వాళ్ళని పంపడం లేదు. థాయ్ గుహలో జరిగిన ఈ సంఘటన ఆధారంగా హాలీవుడ్ చిత్రాన్ని నిర్మించే ప్రయత్నాలు మొదలయ్యాయి. ఇప్పుడు ప్రపంచవ్యాప్తంగా ఈ పిల్లలందరూ ‘థాయ్ కేవ్‌బాయ్స్’గా ప్రసిద్ధులయ్యారు!



అందరికీ ఆత్మబంధువు

Updated By ManamMon, 07/23/2018 - 06:25

imageపశ్చిమ గోదావరి జిల్లా తాళ్లపూడి మండల కేంద్రమైన తాళ్లపూడి గాంధీబొమ్మ వీధిలో మా ఇల్లు ఉంది. కరణంగారిల్లుగా ఊరిలో మా ఇంటికి గుర్తింపు ఉంది. అమ్మమ్మకి అమ్మ ఒకే ఒక్క కూతురవడం వల్ల అమ్మ దగ్గరే ఉండేది. ఆ విధంగా మా చిన్నప్పటి నుంచి అమ్మమ్మ సర్వస్వం అయింది. అమ్మమ్మే మాకు జీవన విలువలు నేర్పింది.

imageఅయిదుగురు మనవలు, ఇద్దరు మనవరాళ్లు.. మొత్తం ఏడుగురు పిల్లల పెంపకంలో అమ్మకి అమ్మమ్మ ఎంతో సాయం చేసింది. ఇంటికి వచ్చే బంధువుల తాకిడి కూడా ఎక్కువగా ఉండేది. ఎప్పుడు లేచోదో తెలియదు గాని ఉదయం ఆరు గంటలకల్లా వేడినీళ్లు సిద్ధంగా ఉంచేది. ఏడు గంటలకల్లా వేడి వేడి టిఫిన్ సిద్ధం చేసేది. పూజలు, నైవేద్యాలు కూడా అయిపోయేవి. పండగలప్పుడు తలంటు స్నానాల హడావిడి చెప్పడానికి మాటలు చాలవు.

అమ్మమ్మ మనసు అమృతం అని చెప్పాలి. ఎందుకంటే రకరకాల వంటకాలు ఎంతో రుచిగా చేసేది. విసుగు విరామం లేకుండా రోజూ పదిహేను మందికి వంటలు వండేది. అప్పుడప్పుడు వచ్చే రెవెన్యూ అధికారులకు మా ఇంటి నుంచే భోజనం ఏర్పాటు అయ్యేది. బొబ్బట్లు, చక్కెర పొంగలి, సాంబారు, పెరుగావడ వంటి వంటకాల రుచిని అందరూ పదే పదే మెచ్చుకునేవారు. అమ్మమ్మ మరణించి ముప్పై యేళ్లు దాటినా ఆవిడ వంటల రుచిని చుట్టాలు ఇప్పటికీ గుర్తు చేసుకుంటూ ఉంటారు.

మడి, ఆచార సాంప్రదాయాలకు అమ్మమ్మ ఎంత ప్రాధాన్యం ఇస్తుందో, అంతకంటే మిన్నగా మానవతా విలువలు పాటించేది. కాలంతో వచ్చిన మార్పులని స్వాగతించేది. మా జీవన విధానంలో మార్పులకి అభ్యంతరం చెప్పేది కాదు. అదే సమయంలో తన వ్యక్తిత్వాన్నీ, ఆత్మాభిమానాన్నీ నిలబెట్టుకునేది. గౌరవంగా బ్రతకడం నేర్పింది. తలదించుకునేలా జీవించకూడదనే సిద్ధాంతం అమ్మమ్మది. ఆ విధంగానే మమ్మల్ని తీర్చిదిద్దింది. వేసవి సెలవుల్లో అందరూ అమ్మమ్మ ఊరు వెళ్తుంటే మాకు ఎక్కడకి వెళ్లాలో తెలిసేది కాదు. అమ్మమ్మకు అయిదుగురు అన్నదమ్ములున్నారు. అమ్మమ్మ వాళ్లింటికి తీసుకెళ్లేది. చాలా పెళ్లిళ్లకి అమ్మమ్మ వెళ్లేది. వచ్చేటప్పుడు ఆటవస్తువులు, స్వీట్లు తెచ్చేది.

తాళ్లపూడిలో పురాతన మదన గోపాలస్వామి ఆలయం, శివాలయంకు, గోదావరి స్నానాలకు అమ్మమ్మ తీసుకువెళ్లేది. ఆ విధంగా భక్తిభావాన్ని పెంచింది. ఉన్నంతలో నలుగురికి సాయం చెయ్యడం, అన్నం పెట్టడం, మంచిగా మాట్లాడడం.. అన్నీ అమ్మమ్మ నుంచి మాకు సంక్రమించాయి. గొప్పలు చెప్పుకోవడం, బిగ్గరగా అరవడం, తన పెద్దరికాన్ని ప్రదర్శించడం వంటివి అమ్మమ్మ ఏనాడూ చెయ్యలేదు. అందుకే అమ్మమ్మ అందరికీ ఆదర్శమూర్తిగా నిలిచింది. అమ్మమ్మ ఇంటి పేరు అవసరాల అవడం కూడా ఒక విశేషం. ఎందుకంటే ఆవిడ అవసరం లేకుండా ఆ రోజుల్లో ఏ కార్యక్రమమూ జరిగేది కాదు.

బంధువుల గృహాల్లో జరిగే వేడుకలకి పది రోజుల ముందుగా అమ్మమ్మను తీసుకువెళ్లి పర్యవేక్షణా స్థానం ఇచ్చేవారు. అనుకోకుండా వంట మనుషులు రాని సందర్భాలు ఏర్పడేవి. అప్పటికప్పుడు ఏమి చెయ్యాలో తెలియని పరిస్థితుల్లో అమ్మమ్మ ఆత్మబంధువుగా మారేది. బంధువుల్లో కొంతమంది ఆడవారిని చైతన్యపరిచి తన నాయకత్వంలో వందమందికి వంట అద్భుతంగా చేసి కార్యక్రమం గట్టెక్కించేది.

శాంతంగా, నిర్మలంగా కనిపించే అమ్మమ్మ మితిమీరిన అల్లరి చేసి నిర్లక్ష్యంగా వ్యవహరిస్తే మాత్రం వీపు విమానం మోత ఎక్కించేది. ఆవిడ కొట్టింది అంటే కచ్చితంగా తప్పు చేసినట్లే లెక్క. మాకు పంచడానికి అమ్మమ్మ దగ్గర ఆస్తులు ఏమీ లేవు. కానీ అంతకంటే గొప్పవైన మంచి మార్గదర్శకత్వం, వ్యక్తిత్వం, శీలసంపద, ఆత్మాభిమానం, సహనం, శాంతం, భక్తితత్వం, ప్రేమాభిమానాలు వంటి సుగుణ సంపదను మాకు అందించింది.

అమ్మమ్మ పెద్దగా చదువుకోకపోయినా జీవితానుభవం ఎక్కువ గడించింది. చుట్టుపక్కలవారితో మర్యాదగా, మంచిగా ప్రవర్తించడం వంటి ఎన్నో సుగుణాలు అమ్మమ్మ ద్వారా అలవడ్డాయని చెప్పవచ్చు. అందుకే ఆవిడ మాకు గొప్ప మార్గదర్శి, ఆదర్శమూర్తి. అమ్మమ్మకు వేరే ఊరు లేకపోయినా ఆమే మా బాల్యంలో గురువుగా నిలిచి క్రమశిక్షణ నేర్పి మాకు సర్వస్వం అయింది. అందరికీ సేవలు చేసి, తాను మాత్రం ఎవరిచేతా, ఎలాంటి సేవలూ చేయించుకోకూడదని భావించేది. అమ్మమ్మ కోరికను భగవంతుడు తీర్చాడు. సునాయాసంగా ప్రాణాలు విడిచింది. మా మనసుల్లో శాశ్వతంగా నిలిచింది.

- పరస రాధాకృష్ణ
సెల్: 9490832190



నన్ను చావనివ్వండి

Updated By ManamTue, 03/27/2018 - 01:54

మా ఊళ్లో సూర్యనారాయణ రాజుగారంటే తెలియని వాళ్లు లేరు. ఆజానుబాహుడు అంటే ఏంటో మాకు తెలిసింది ఆయన్ని చూసిన తర్వాతే. ఆరడుగులకు పైన మూడు నాలుగు అంగుళాల పొడవుంటారు. అప్పట్లో ఆయన ఎర్రటి ఎన్‌ఫీల్డ్ బండి మీద వెళ్తుంటే.. ఆ బండి ఆయన ముందు ఎలక పిల్లలా కనిపించేది. వాళ్లబ్బాయి శ్రీనివాసరాజు మా క్లాస్‌మేట్.

imageఅలాంటి రాజుగారు వెంటిలేటర్ మీద ఉన్నట్లు మా ఇద్దరి కామన్ ఫ్రెండ్ మోహన్ చెప్పడంతో శ్రీనుని పలకరిద్దామని ఊరు వెళ్లా. నరసాపురంలో అది పెద్ద ఆస్పత్రే. వైద్యులు బాగా నిపుణులు. నాకు తెలిసిన కొద్దిపాటి వైద్య పరిభాష ఉపయోగించి వాళ్లని సమస్య ఏంటని అడిగా. ‘పల్మనరీ ఎడిమా’ అని చెప్పారు. నయం కావడానికి ఎన్నాళ్లు పట్టొచ్చని అడిగితే.. ఏమీ చెప్పలేమన్నారు. రాజుగారు కాల్చిన సిగరెట్లు ఆయన ఊపిరితిత్తులను పూర్తిగా నాశనం చేశాయట. ‘మిగిలిన ఆర్గాన్లు కూడా సపోర్ట్ చేయాలి కదా, అప్పటివరకు వెంటిలేటర్ మీదే’ అని డాక్టర్లు చెప్పారు. బయటికొచ్చి శ్రీనుని కదిలిస్తే వాడు పూర్తి నిర్వేదంలో ఉన్నాడు. ‘‘ఇప్పటికే 15 రోజులైందిరా.. బెడ్ సోర్ కూడా వచ్చేలా ఉంది. నాన్నని ఇలా చూడటం కంటే ఆ డాక్టర్లకే చెప్పి ఏదైనా మందుంటే ఇచ్చి..’’ ఆ తర్వాత వాడి గొంతు పెగల్లేదు. 

మీరైనా చెప్పండి..
మాకు బాగా తెలిసిన ఒక లెక్చరర్ ఉండేవారు. కొడుకు పెళ్లికి కొద్ది రోజుల ముందు ఆయనకు కడుపులో బాగా నొప్పి వచ్చింది. డాక్టర్ దగ్గరకు వెళ్తే ఏం చెబుతారోనన్న అనుమానం.. కొత్త కోడలి గురించి ఎవరైనా ఏమైనా అనుకుంటారేమోనని మరోవైపు ఆలోచన రావడంతో అసలు డాక్టర్ దగ్గరకే వెళ్లలేదు. కొడుకు పెళ్లి అయిన రెండు నెలలకే ఆయనకు కేన్సర్ బయటపడింది. ఏడాది తిరిగేలోపే అది బాగా ముదిరిపోయింది. ఎంత ట్రీట్‌మెంట్ చేసినా ప్రయోజనం లేదు. చివరి రోజుల్లో ఆయన నరకయాతనimage అనుభవించారు. విపరీతమైన నొప్పి, ఒళ్లంతా మంటలు.. దానికి ఏ మందులు వాడినా ప్రయోజనం లేకపోవడం.. అలాంటి సమయంలో ఆయనను పలకరించడానికి వెళ్లాను. ఒకసారి నాతో ఒంటరిగా మాట్లాడాలని చెప్పి ఆస్పత్రిలో అందరినీ బయటకు పంపేశారు. ‘‘సార్.. మీరైనా డాక్టర్లకి చెప్పండి.. నేనీ నరకం భరించలేకపోతున్నాను. ఏదైనా ఇంజెక్షన్ ఇస్తే హాయిగా వెళ్లిపోతాను. ఇక్కడి నుంచి నేను సజీవంగా ఇంటికి వెళ్లనని నాకూ తెలుసు, వాళ్లకూ తెలుసు. అదేదో నేను ఇంత నరకం అనుభవించకుండా ముందే ఇస్తే నాకూ ప్రశాంతంగా ఉంటుంది.. నాకు చేయలేక ఇబ్బంది పడే వాళ్లకూ కాస్త రిలీఫ్ దొరుకుతుంది.. ప్లీజ్.. డాక్టర్లని ఏదోలా ఒప్పించండి’’ అని చేతులు పట్టుకుని చిన్న పిల్లాడిలా ఏడ్చేశారు. నాకూ కళ్లమ్మట ధారలా నీళ్లు కారిపోయాయి గానీ ఏమీ చేయలేని నిస్సహాయ స్థితిలో అక్కడి నుంచి వచ్చేశాను. డాక్టర్లు ఏమీ చేయాల్సిన అవసరం లేకుండానే మూడో రోజున ఆయన ప్రాణాలు వదిలేశారు. ఇలాంటి సందర్భాలలోనే సరిగ్గా కారుణ్య మరణం అన్న విషయం గుర్తుకొస్తుంది. కానీ మన దేశంలో ఉన్న చట్టాల కారణంగా అది సాధ్యం కావడం లేదు. ఇలాంటి పరిస్థితుల్లో చాలామంది ఉంటారు. వాళ్లంతా కూడా కారుణ్య మరణం కోసం ఎదురు చూసేవారే.

కారుణ్య మరణం గురించి అప్పటివరకు పేపర్లలో చదవడమే తప్ప, నిజంగా అలా ఎవరైనా కోరుకుంటారని మొదటిసారి తెలిసింది నాకు రాజుగారిని చూసిన తర్వాతే. ఆయన దగ్గరకు వెళ్లినపుడల్లా.. కళ్ల వెంట నీళ్లు కారుస్తూ, ఏదో చెబుదామని అనుకుంటున్నట్లుగా కనిపించేవారు. మాట్లాడదామంటే.. వెంటిలేటర్ అడ్డు. అది తీస్తే ప్రాణం నిలబడటం కష్టం. నోరారా తినడానికి లేదు. లేచి బండి నడపడం సాధ్యమే కాదు. ఇంకా ఎందుకిలా బతకడం అనే ఆయనకూ అనిపిస్తున్నట్లుంది. 

సరిగ్గా అప్పుడే పాసివ్ యుథనేషియా (పరోక్ష కారుణ్య మరణం)ను ఆమోదిస్తూ సుప్రీంకోర్టు తీర్పు చెప్పినట్లు పేపర్లలో వచ్చింది. అందులో ప్రత్యక్షం, పరోక్షం కూడా ఉంటాయా అని అనుమానం తలెత్తింది. అవునట.. వెంటిలేటర్ లాంటి లైఫ్ సపోర్ట్ మిషన్ల ఆధారంగా మాత్రమే బతుకుతూ, అది కూడా జీవితం అత్యంత దుర్భరంగా ఉన్నవాళ్లకు ఆ మిషన్లు తీసేస్తే ప్రాణం పోతుందనుకుంటే అది పరోక్ష కారుణ్య మరణం అవుతుంది. కేవలం మిషన్ సపోర్ట్ ఉండబట్టి కొన ప్రాణం నిలబడుతుంది తప్ప శరీరంలో ఏ అవయవమూ సక్రమంగా పనిచేయదు. కళ్లు తెరిచి ఉన్నట్లుంటారు గానీ ఏమీ మాట్లాడలేరు. మనం చెప్పింది వాళ్లకు వినపడిందో లేదో.. అర్థమయ్యిందో లేదో కూడా తెలియదు. అలాంటప్పుడు బతికి ప్రయోజనం ఏంటన్న ప్రశ్న సహజంగానే తలెత్తుతుంది. సరిగ్గా ఇలాంటి సందర్భాలలోనే గౌరవం లేని బతుకు బతకడం కంటే కనీసం గౌరవంగా చస్తేనైనా బాగుంటుందని అనిపిస్తుంది. సరిగ్గా సుప్రీంకోర్టు కూడా ఇదే అభిప్రాయపడింది. ‘జీవించే హక్కు’ అంటే.. అందులో గౌరవంగా మరణించే హక్కు కూడా ఉంటుందని ‘కామన్ కాజ్’ అనే స్వచ్ఛంద సంస్థ వాదించింది. నిజమే మరి.. రోగాల బారిన పడి, శరీరం సహకరించక నానా ఇబ్బందులు పడుతూ, మన పని మనం చేసుకోలేని పరిస్థితుల్లో బతకడం కంటే.. హాయిగా చావడమే మేలని అనిపిస్తుంది. బతికినన్నాళ్లూ రాజాలా బతకాలి, సమయం అయిపోయిందనుకున్నప్పుడు ప్రశాంతంగా తనువు చాలించాలి. అంతే తప్ప జీవచ్ఛవంలా ఆస్పత్రి మంచం మీద పడుకుని కట్టె మాత్రమే ఉందనుకుంటే ప్రయోజనం ఏంటి? కారుణ్య మరణం గురించి కొన్ని దశాబ్దాలుగా ప్రపంచవ్యాప్తంగా అనేక చర్చలు జరుగుతున్నాయి. రకరకాల సందర్భాలలో కారుణ్యమరణాన్ని ప్రసాదించమని కోరుకునేవాళ్లు ఉంటారు. ఇలా కోరుకునేవారిలో నిస్సహాయ స్థితిలో ఉన్నవాళ్లు కొందరైతే.. దుర్భర పరిస్థితిలో ఉండేవాళ్లు మరికొందరు. సుప్రీంకోర్టు చెప్పిన వాటిలో రెండు ప్రధానాంశాలున్నాయి. ఒకటి పాసివ్ యుథనేషియా.. అంటే పరోక్ష కారుణ్య మరణం, మరోటి సజీవ వీలునామా. ఇందులో మనం అంతా బాగా ఉండగానే భవిష్యత్తులో ఏదైనా తీవ్ర అనారోగ్యం వస్తే.. అప్పుడు వెంటిలేటర్ మీద పెట్టి నెలల తరబడి ఉంచకుండా మన చావు మనల్ని చావనివ్వాలని ముందుగానే ఒక వీలునామా రాసుకోవడం. మన శరీరం మీద మనకు పూర్తి హక్కులు ఉంటాయని చెప్పడం దీని ప్రధాన ఉద్దేశం. ఇందుకు కూడా సుప్రీంకోర్టు తన ఆమోదం తెలిపింది. ఒకవేళ ఎవరైనా ఇలా బాగున్న సమయంలో వీలునామా రాసి ఉండకపోతే, ఆ తర్వాత వాళ్లు చెప్పలేని పరిస్థితిలో ఉన్నప్పుడు బాగా దగ్గరి బంధువులు.. అంటే సొంత కొడుకులు, కూతుళ్లు గానీ తల్లిదండ్రులు గానీ సంబంధిత రాష్ట్ర హైకోర్టును ఆశ్రయించి తమ వాళ్లను బలవంతంగా బతికించొద్దని కోరే అవకాశం కూడా ఉంటుందట. 

42 ఏళ్లు కోమాలోనే..
arunaఅరుణా షాన్ బాగ్.. ముంబైలోని కేఈఎం (కింగ్ ఎడ్వర్డ్ మెమోరియల్) ఆస్పత్రిలో నర్సుగా పనిచేసేవారు. అదే ఆస్పత్రిలో ఒక డాక్టర్ ఆమెను పెళ్లి చేసుకుంటానని చెప్పారు. మరి కొన్నాళ్లలో పెళ్లి ఉందనగా.. ఒకరోజు రాత్రి డ్యూటీ ముగించుకుని యూనిఫాం మార్చుకుంటున్న సమయంలో వార్డుబాయ్ ఆమెపై అత్యాచారం చేసి, అరవకుండా మెడకు ఒక చైన్ కట్టేశాడు. ఎనిమిది గంటల పాటు మెదడుకు ఆక్సిజన్ అందకపోవడంతో ఆమె కోమాలోకి వెళ్లిపోయారు. అప్పటినుంచి 42 ఏళ్ల పాటు అదే ఆస్పత్రిలో కోమాలో ఉన్న ఆమెను ఆస్పత్రి సిబ్బంది, నర్సులు కంటికి రెప్పలా కాపాడుకున్నారు. ఆమెకు కారుణ్య మరణం ప్రసాదించాలంటూ పింకీ విరానీ అనే జర్నలిస్టు కోర్టును ఆశ్రయించినా.. అది సాధ్యం కాలేదు. చివరకు 42 ఏళ్ల తర్వాత అరుణ న్యుమోనియాతో మరణించారు. ఈ కేసు కారుణ్య మరణం గురించి దేశవ్యాప్త చర్చకు కారణమైంది. 
శ్రీకమల

శ్రుతిహాసన్‌కు మరణం ప్రసాదించండి..
ఆంధ్రప్రదేశ్‌లోని చిత్తూరు జిల్లాలో ఒక కేసు వచ్చింది. న్యూరోఫైబ్రోమా అనే వ్యాధితో బాధపడుతున్న తమ కూతురు శ్రుతిహాసన్‌కు కారుణ్య మరణం ప్రసాదించాలని ఆమె తల్లిదండ్రులు కోర్టును ఆశ్రయించారు. తమ కూతురు పడుతున్న నరకయాతనను కన్న తల్లిదండ్రులుగా తాము చూడలేకపోతున్నామని వాళ్లు కోర్టుకు మొరపెట్టుకున్నారు. తెట్టు గ్రామానికి చెందిన చినరెడ్డెప్ప, సునీతలకు శ్రుతితో పాటు మరో ఇద్దరు పిల్లలు కూడా ఉన్నారు. కూలి చేస్తే తప్ప పూటగడవని ఆ కుటుంబం తమ కూతురి చికిత్సకు రూ. 3 లక్షలకు పైగా ఖర్చుపెట్టింది. అయినా ఫలితం లేదు. తమ కూతురికి కారుణ్య మరణం ప్రసాదించమని కోరుతూ చిత్తూరు జిల్లా మదనపల్లి రెండో అదనపు జిల్లా న్యాయమూర్తి కేవీ మహాలక్ష్మికి వాళ్లు అర్జీ పెట్టుకున్నారు.

డిప్రెషన్ కూడా కారణమే
కారుణ్య మరణం కోరుకునేవారిలో రకరకాల వాళ్లుంటారు. కేన్సర్‌తో తీవ్రంగా బాధపడేవారు, కేవలం వెంటిలేటర్ మీద ఉండి ఫ్లూయిడ్లతోనే బతికేవారు, టెర్మినల్ కేసులలో మాత్రమే పరోక్ష కారుణ్య మరణానికి అనుమతి ఉంటుంది. పరోక్ష కారుణ్య మరణం అంటే అప్పటివరకు అందిస్తున్న చికిత్స ఆపేసి, వెంటిలేటర్ డిస్కనెక్ట్ చేసి, ఆక్సిజన్ కూడా తీసేస్తారు. ఆ తర్వాత రోగి పరిస్థితిని బట్టి కొన్ని గంటల నుంచి రోజుల్లోపు మరణం సంభవిస్తుంది. అదే ప్రత్యక్ష కారుణ్య మరణంలో అయితే.. ముందుగా పేషెంటు అనుమతి తీసుకుని.. మెడికల్ బోర్డుకు రిఫర్ చేస్తారు. ఆ వ్యాధికి చికిత్స లేదని, ఎంత చేసినా ప్రయోజనం లేదని వాళ్లంతా నిర్ధారించి.. రోగి కూడా బాధ భరించలేకపోతున్నానని చెబితే అప్పుడు ఒక ఇంజెక్షన్ ఇవ్వడం ద్వారా రోగికి మరణాన్ని ప్రసాదిస్తారు. కానీ ఇది ప్రస్తుతం మన దేశంలో అమలులో లేదు. ఒక రకంగా ఇది చట్టపరమైన హత్యే అవుతుంది. నిజంగా తీవ్రమైన వ్యాధులతో బాధపడేవాళ్లు కొంతమంది ఇలా కారుణ్య మరణాన్ని కోరుకుంటే.. ఇంకా చాలామంది పరిస్థితులను ఎదుర్కోలేక కోరుకుంటారు. తమను ఎవరూ పట్టించుకోవడం లేదన్న ఫ్రస్ట్రేషన్ కారణంగా వాళ్లు డిప్రెషన్‌లోకి వెళ్లిపోయి మరణాన్ని కోరుకుంటారు. అలాంటి వారు కోర్టుకు వెళ్లినా సాధారణంగా కోర్టులు వాళ్లను మానసిక వైద్యుల వద్దకు చికిత్సకు పంపుతాయి తప్ప వారికి కారుణ్య మరణాన్ని ఆమోదించవు. కారుణ్య మరణం కోరుకునేవారి మానసిక స్థితిని ముందుగా అంచనా వేసిన తర్వాత మాత్రమే అప్పుడు వైద్యపరంగా కూడా అన్ని అవకాశాలూ పరిశీలించి, ఇక మార్గాంతరం లేదనుకుంటే అప్పుడు ఆలోచిస్తారు. 
image

 

 

 

 

డాక్టర్ వెంకట సురేష్
సైకియాట్రిస్టు



ఒంపుల కెంపులు!

Updated By ManamSat, 03/17/2018 - 08:01

imageరత్నాలు, వజ్రాల కోసం రాజ్యాలను కోల్పోయిన రాజులు చాలా మంది ఉన్నారు. సహజ కాంతిని నలుమూలలకూ ప్రసరింపజేసి, ఒంటిమీద ధరించగానే శరీరానికో ప్రత్యేక వెలుగునిచ్చే ఈ మేలిరకపు ఆభరణాలు వేల సంవత్సరాల నుంచే నానుడిలోకి, వాడుకలోకి వచ్చాయి. రాచరికపు ఆనవాళ్లగా మిగిలిపోయాయి. ఆభరణాల్లో ఇప్పటికీ వజ్రాలే అత్యంత మేలిమివని  చెప్పుకునేందుకు ఆధారాలు కనిపిస్తున్నా, రెండో స్థానం మాత్రం కెంపులదే. ఆడవారి నవ్వును కెంపులతో పోలుస్తారు. ప్రపంచ చరిత్రలో కెంపులదెప్పుడూ సమున్నతమైన స్థానమే. కెంపులను ఇంగ్లీషులో రూబీలంటారు. ఇవి రెండువేల ఐదొందల సంవత్సరాల క్రితమే పుట్టాయని చరిత్ర  చెబుతోంది. నవరత్నాల్లో నేనూ ఒకదాన్నంటూ ఎప్పటికీ వెలుగుతూనే ఉన్న కెంపులను ఎన్నో దేశాల మహారాజులు తమ కిరీటాల్లోనూ, ప్రియురాళ్లకు ప్రేమకానుకగా ఇచ్చే ఉంగరాల్లోనూ వాడేవారు. 

వీటి జన్మస్థలం చాలామందికి బర్మా (మయన్మార్) అని మాత్రమే తెలుసుగానీ శ్రీలంక, ఆఫ్రికాలు కూడా అని చాలా తక్కువ మందికి తెలుసు. బర్మాలో ఎక్కువగా దొరుకుతాయనీ, అయితే అవి అంత కాంతివంతంగా వుండవనీ ఓ వాదన కూడా ఉంది. స్వచ్ఛమైన కెంపులు శ్రీలంకలో మాత్రమే దొరుకుతాయని అంటారు. ఇక దక్షిణాసియాలో వీటి స్థావరాలు బాగా ఉన్నాయంటారు. సైబీరియన్ రూబీ, అమెరికన్ రూబీ, కేప్ రూబీ, మోంటానా రూబీ, రాక్ మౌంటెన్ రూబీలను అసలైన కెంపులుగా చెప్పుకోవాలి. కెంపుల్లో స్వచ్ఛమైన వాటిని గుర్తించేందుకు వాటి గూర్చి కొద్దిగా తెలుసుకుని ఉండడం మంచిది. పూర్తిగా ధరించే స్థాయికొచ్చిన కెంపులు గొప్ప కాంతిని వెదజల్లుతూ ఉంటాయి. అందులోనూ నక్షత్రాకారపు కాంతిని ప్రసరింపచేయడంలో కెంపులకు మరేవీ సాటిరావు. నునుపైన వాటి ఉపరితలంపై మన చేయి తగిలితే మన వేళ్ల నీడ ఆ కాంతిలో స్పష్టంగా కన్పిస్తుంది. అందుకే ఎక్కువ నునుపుగా ఉండి కాంతినిచ్చే కెంపులే అసలైనవని తెలుసుకోవచ్చు.
   

కెంపు అనగానే చాలామంది ఎరుపురంగు కెంపునే గుర్తు పట్టేస్తారు. మిలమిలా మెరిసే ఈ ఎర్రటి కెంపులు బంగారంలో ఒదిగితేimage పాలూ నీళ్లలా కలిసి పోతాయనేది ప్రతీతి. ముదురు ఎరుపు రంగు కెంపులు స్వచ్ఛమైనవిగానే ఇప్పటికీ కీర్తిని పొందుతున్నాయి. భూ పొరల్లో జరిగే మార్పుల వల్ల ఈ కెంపుల రంగుల్లో తేడాలొస్తుంటాయి. నూరు డిగ్రీల కంటే ఎక్కువ మోతాదులో ఉష్ణోగ్రత చర్యలు జరిగితే ముదురు ఎరుపురంగుల కెంపులు ఏర్పడుతాయి. కాగా విపరీతమైన లావా లాంటి ఉష్ణోగ్రత చర్యలు ఏర్పడితే మాత్రం ఆకుపచ్చ కెంపులు ఏర్పడుతాయి. ఇలా నీలం, పింక్, ఆరెంజ్ రంగుల్లో కూడా కెంపులు వస్తున్నాయి. ఈ కెంపుల్లో కూడా క్యారెట్స్ ఆధారంగా ప్రమాణాల్ని చెప్పుకోవచ్చు. ఇంతవరకూ ప్రపంచంలో అత్యంత విలువైనదిగా, అందమైనదిగా చెప్పుకునే 162 క్యారెట్ల ఎడ్వర్డ్ కెంపు బ్రిటన్ మ్యూజియంలో ఉంది. దీని ఖరీదు కోట్లలోనే ఉంటుందని అంచనా. దీని తర్వాత 105 క్యారెట్ల కెంపు ప్యారిస్ మ్యూజియంలో అలరారుతోంది. చాలామంది ఇప్పుడు తిథి, నక్షత్రాల ఆధారంగా పగడం, గోమేధికం, పచ్చ, కెంపు వంటి ఆభరణాలను ధరిస్తున్నారు. ఇలా జన్మ నక్షత్రాలను బట్టి ధరించే ఆభరణాల్లో కెంపుది ఎప్పటికీ అగ్రస్థానమే. 
   

image1987 నుంచి సింథటిక్ కెంపులు కూడా తయారు చేయడం మొదలెట్టారు. కొన్ని రసాయనాలను కలిపి ఈ కెంపులను సృష్టిస్తారు. కానీ ఒరిజినల్ కెంపులకు ఎప్పటికీ ఇవి సాటిరావు. ఒరిజనల్ కెంపుల తయారీకి ఎన్నో జాగ్రత్తలుంటాయి. వంద టన్నుల ముడి పదార్ధాన్ని తీస్తే కనీసం రెండొందల యాభై గ్రాముల బరువుండే కెంపులు దొరకడం అతికష్టం. ఒక్కోసారి అవి కూడా లభించక పోవచ్చు. ఇలా ముడి పదార్ధంగా వచ్చిన కెంపురాయిని ప్రాసెసింగ్ యూనిట్లకు పంపిస్తారు. దాన్ని మొదట కొన్ని రసాయనాల్లో వేడి చేసి సున్నితంగా తీర్చిదిద్దుతారు. అలా తయారైన ఈ కెంపురాయి కటింగ్ మిషన్లకు వెళుతుంది. ఆకారాన్ని బట్టి, సైజునిబట్టి కటింగ్ చేసే పరికరాలుంటాయి. తరువాత కటింగ్ యూనిట్ల నుంచి ఫినిషింగ్ యూనిట్ల కెళతాయి. అక్కడే కెంపులు ఒక ఆకారానికి వస్తాయి. ఇలా వజ్రాలు, కెంపుల ప్రాసెసింగ్ యూనిట్ల ద్వారా వేలాది మంది ఉపాధి పొందుతున్నారు. 
   

కెంపులను ప్రత్యేకంగా సంరక్షించుకునే పద్ధతులేమీ లేవు కానీ బంగారు నగలను భద్రపరచుకున్నట్లే కెంపులను కూడా భద్రపరచుకోవాలి. దాదాపుగా శుభ్రపరచడమూ బంగారంలాగానే. అయితే వీటిని కిందపడకుండా చూసుకోవడం మంచిది. స్త్రీలు మనసారా ప్రేమించే వాటిలో వజ్రం తర్వాత స్థానం కెంపులదే. మెరిసే ముదురు రంగు కెంపును నెక్లెస్‌లో అమర్చుకుంటే అందానికి ఆమే చిహ్నమనిపిస్తుంది. వేల సంవత్సరాలు గడిచినా కెంపుల ఒంపులు, మెరుపులూ ఇప్పటికీ తగ్గలేదు. అంతెందుకు కెంపుల వెలుగులు, సొగసులు మగువల మనసులకే తెలుసు! 
సువర్ణ





Related News