odisha

ఒడిశాలో 3వేల కోట్లు ఇన్వెస్ట్ చేయనున్న రిలయన్స్ 

Updated By ManamMon, 11/12/2018 - 22:29

Odisha-MUKESH-AMBANIభువనేశ్వర్:  ఒడిశాలో వచ్చే మూడేళ్ళలో సంస్థకు చెందిన ‘‘కొత్త వ్యాపారాలలో’’ అదనంగా రూ. 3,000 కోట్లు ఇన్వెస్ట్ చేయనున్నట్లు రిలయన్స్ ఇండస్ట్రీస్ చైర్మన్, మేనేజింగ్ డైరెక్టర్ ముకేశ్ అంబానీ సోమవారం ప్రకటించారు. వివిధ రంగాల పరిశ్రమల సమ్మేళనమైన ఈ సంస్థ ఒడిశా రాష్ట్రంలో ఇప్పటికే రూ. 6,000 కోట్ల పెట్టుబడులు పెట్టింది. ‘‘గత కొద్ది సంవత్సరాలలో రాష్ట్రంలో భారీయెుత్తున పెట్టుబడులు పెడుతూ వచ్చిన సంస్థల్లో  రిలయన్స్ ఒకటిగా ఆవిర్భవించింది. ఒడిశాలో మా నూతన వ్యాపారాలలో అదనంగా రూ. 3,000 కోట్లు ఇన్వెస్ట్ చేస్తామని నేను ఈరోజు మాట ఇస్తున్నాను’’ అని భువనేశ్వర్‌లో నిర్వహించిన మేక్ ఇన్ ఒడిశా సదస్సు 2018లో ఆయన అన్నారు. ‘‘రిలయన్స్‌కి జియో కేవలం మరో వ్యాపారం కాదు. భారతదేశాన్ని రూపాంతరీకరించడానికి చేపట్టిన బృహత్తర కార్యక్రమం. రాష్ట్రంలో 30,000 మందికి పైగా మేం ప్రత్యక్షంగా, పరోక్షంగా స్థిరమైన నూతన ఉద్యోగావకాశాలను సృష్టించగలిగాం’’ అని ఆయన చెప్పారు. రిలయన్స్ జియో కార్యకలాపాలు ప్రారంభించి రెండేళ్ళకు కొద్ది పైచిలుకు అవుతోంది. అప్పటి నుంచి మొబైల్ బ్రాడ్‌బ్యాండ్ వ్యాప్తిలో ఇండియా 155వ ర్యాంక్ నుంచి తన స్థితిని మెరుగుపరచుకుంది. మొబైల్ డాటా వినియోగంలో ప్రపంచంలోనే నంబర్ వన్ దేశంగా అవతరించిందని ఆ పరిశ్రమల అధిపతి చెప్పారు. డిజిటల్ భవిష్యత్తులోకి ఒడిశాను మరింతగా ముందుకు తీసుకెళ్ళేందుకు రిలయన్స్ గ్రూప్ మరో అడుగు వేస్తోందని ఆయన అన్నారు. ‘‘జియోగిగాఫైబర్‌తో ఫైబర్-టు-ద-హోమ్ ద్వారా ఫిక్సెడ్ బ్రాడ్‌బ్యాండ్‌లో మేం ఒక ఆశావహమైన ప్రయత్నాన్ని మొదలుపెట్టాం. వచ్చే మూడేళ్ళలో ఫిక్సెడ్ బ్రాడ్‌బ్యాండ్‌లో ఇండియా ఇప్పుడున్న 135వ ర్యాంక్‌ను మెరుగుపరచుకుని మొదటి మూడు స్థానాల్లో చోటు సంపాదించుకునేట్లు చేయాలన్నది మా లక్ష్యం. సంకల్పం’’ అని ముకేశ్ అన్నారు. 



ఎన్‌కౌంటర్: ఐదుగురు మావోల మృతి

Updated By ManamMon, 11/05/2018 - 09:48

Maoistsభువనేశ్వర్: ఒడిశాలోని మల్కన్‌గిరి జిల్లా బెజ్జింగ్‌వాడలో ఎన్‌కౌంటర్ జరిగింది. భద్రతా బలగాలు, మావోయిస్టులకు మధ్య జరిగిన ఈ కాల్పుల్లో ఐదుగురు మావోలు మృతి చెందారు. ఘటనా స్థలం నుంచి భారీగా ఆయుధాలను స్వాధీనం చేసుకున్నారు. ఇంకా కొంతమంది మావోలు అక్కడ నక్కి ఉన్నారన్న సమాచారంతో కూంబింగ్‌ను నిర్వహిస్తున్నారు. దీనికి సంబంధించిన మరింత సమాచారం తెలియాల్సి ఉంది.



ఏపీలో తిత్లీ బీభత్సం, 8మంది మృతి

Updated By ManamThu, 10/11/2018 - 16:20
Cyclone Titli

శ్రీకాకుళం : రాష్ట్రంలో ‘తిత్లీ’ తుఫాను బీభత్సంలో ఎనిమిదిమంది మృతి చెందారు. శ్రీకాకుళం, విజయనగరం జిల్లాల్లో ఇప్పటివరకూ ఎనిమిదిమంది మృత్యువాత పడినట్లు అధికారులు ధ్రువీకరించారు. మృతి చెందినవారిలో శ్రీకాకుళం జిల్లాకు చెందిన ఐదుగురు, విజయనగరం జిల్లాకు చెందిన ముగ్గురు ఉన్నారు. వీరిలో సముద్రంలో వేటకు వెళ్లి ఆరుగురు చనిపోగా, ఇల్లు కూలి ఒకరు, చెట్టు కూలి మరొకరు మృతి చెందారు. ఓ వైపు ప్రాణ నష్టంతో పాటు మరోవైపు రెండు జిల్లాల్లోనూ తిత్లీ తుఫానుతో భారీ ఎత్తున ఆస్తినష్టం సంభవించింది. 

 Palasa railway station in Srikakulam district as  Cyclone Titli

ఇక కాకినాడ నుంచి సముద్రంలో వేటకు వెళ్లిన మొత్తం 67 బోట్లలో రెండు మినహా మిగతా బోట్లు అన్ని సురక్షితంగా వెనక్కి వచ్చాయి. సముద్రంలో చిక్కుకున్న మిగిలిన రెండు బోట్లను సురక్షితంగా ఒడ్డుకు చేర్చేందుకు అధికార యంత్రాంగం ప్రయత్నిస్తోంది. శ్రీకాకుళం జిల్లాలోని వివిధ మండ‌లాల్లో ఇప్పటివ‌ర‌కు న‌మోదైన‌ వ‌ర్షపాతం వివరాలు  ఈ క్రిందివిధంగా ఉన్నాయి.

వ‌ర్షపాతం వివరాలు:
ప‌లాస‌, వ‌జ్ర‌పుకొత్తూరు, నందిగాం -28.02 సెం.మీ
కోట‌బొమ్మాళి- 24.82 సెం.మీ
సంత‌బొమ్మాళి 24.42సెం.మీ
ఇచ్ఛాపురం  -  23.76 సెంమీ
టెక్క‌లి- 23.46 సెం.మీ
సోంపేట‌, మంద‌స - 13.26సెం.మీ
క‌విటి - 12.44 సెం.మీ
పొలాకి- 9.74 సెం.మీ
జ‌లుమూరు 9.06సెం.మీ
ఎల్ఎన్‌పేట‌-8.92సెం.మీ
న‌ర‌స‌న్న‌పేట -6.04సెం.మీ
పొందూరు -5.8 సెం.మీ
లావేరు -4.94సెం.మీ
శ్రీకాకుళం- 4.62సెం.మీ
ర‌ణ‌స్థ‌లం-4.58 సెం.మీ
ఎచ్చెర్ల -4.48 సెం.మీ
బూర్జ‌- 4.28సెం.మీ
సరుబుజ్జులి-3.48సెం.మీ
గార -4.02సెం.మీ
ఆముదాల వ‌ల‌స -3.36 సెం.మీ
జి.సిగ‌డాం- 2సెం.మీ



మరో 24 గంటల్లో భారీ వర్షాలు

Updated By ManamTue, 10/09/2018 - 09:23

Rainsతూర్పు మధ్య బంగాళాఖాతంలో ఏర్పడిన వాయుగుండం తుఫానుగా మారనుంది. దీని ప్రభావంతో ఉత్తరాంధ్ర, ఒడిశాలలో భారీ వర్షాలు కురుస్తాయని వాతావరణ శాఖ అధికారులు వెల్లడించారు. ప్రస్తుతం వాయుగుండం కళింగ పట్నానికి 500కిలో మీటర్ల దూరంలో కేంద్రీకృతమై ఉండగా.. గంటలకు 10కిలోమీటర్ల వేగంతో వాయుగుండం పశ్చిమ వాయువ్య దిశగా కదులుతోంది. తీరం వెంబడి భారీగా ఈదురుగాలులు వీస్తున్నాయి. ఈ నేపథ్యంలో తీరప్రాంతాలను ఆంధ్ర, ఒడిశా ప్రభుత్వాలు అప్రమత్తం చేయగా.. మత్స్యకారులు వేటకు వెళ్లొద్దని అధికారులు సూచనలు జారీ చేశారు.

మరోవైపు తమిళనాడు, కేరళలలో భారీ వర్షాలు కురుస్తున్నాయి. అరేబియా సముద్రంలో ఏర్పడ్డ అల్పపీడనం వాయుగుండంగా మారడంతో తీర ప్రాంతంలోని జిల్లాల్లో ఎడతెరిపి లేకుండా వర్షాలు కురుస్తున్నాయి. ఆ రెండు రాష్ట్రాల్లోని పలు ప్రాంతాలు జలమయం అయ్యాయి.



ఒడిశాలో కమీషన్ల సర్కారు

Updated By ManamSat, 09/22/2018 - 22:54
  • నిర్ణయాలు తీసుకోవడంలో జాప్యం.. మందగమన సర్కారుగా చెడ్డపేరు

  • నవీన్‌పట్నాయక్ సర్కారుపై మోదీ ధ్వజం.. జార్సుగూడలో విమానాశ్రయం ప్రారంభం

  • తాల్చేర్‌లో ఎరువుల ఫ్యాక్టరీకి శంకుస్థాపన.. నేడు జార్ఖండ్‌లో ఆయుష్మాన్ భవకు శ్రీకారం

narendra modiజార్సుగూడ: ఒడిశాలో సీఎం నవీన్ పట్నాయక్ నేతృత్వంలోని ప్రభుత్వం పర్సంటేజీల ప్రభుత్వంగా మారిందని ప్రధాని నరేంద్రమోదీ ధ్వజమెత్తారు. ఒడిశా కేబినెట్ ఎంతసేపూ పీసీ (పర్సంటేజీ కమిషన్) గురించే ఆలోచిస్తుందని మండిపడ్డారు. నిర్ణయాలు తీసుకోవడంలో తీవ్ర జాప్యం కారణంగా రాష్ట్ర ప్రభుత్వానికి చెడ్డపేరు వస్తోందని, మందగమన ప్రభుత్వంగా అవతరించిందని అన్నారు. ఒడిశాలోని జార్సుగూడలో నూతన విమానాశ్రయాన్ని ప్రారంభించిన అనంతరం నిర్వహించిన బహిరంగ సభలో మోదీ పాల్గొన్నారు. లంచాలు ముట్టజెప్పందే కేంద్ర ప్రభుత్వ సంక్షేమ పథకాలు ఒడిశా వాసులకు అందట్లేదని మోదీ అన్నారు. టాయిలెట్ నిర్మాణం మొదలుకుని నీటిపారుదల ప్రాజెక్టుల వరకూ పరిస్థితి ఇలాగే ఉందన్నారు. అవినీతికి మారుపేరుగా నవీన్ పట్నాయక్ ప్రభుత్వం నిలుస్తోందని, కీలక నిర్ణయాలు తీసుకోవడంలో తీవ్ర జాప్యం వహిస్తోందని అన్నారు. ఇప్పుడు కొన్ని ప్రాజెక్టులకు తాను ప్రారంభోత్సవాలు, శంకుస్థాపనలు చేశానని, మళ్లీ మూడేళ్ల తర్వాత కూడా ఇలాగే చేస్తానని అన్నారు. తద్వారా పరోక్షంగా వచ్చే అసెంబ్లీ ఎన్నికల్లో బీజేపీ ఘన విజయం సాధిస్తుందని సంకేతాలు ఇచ్చారు.  వచ్చే లోక్‌సభ ఎన్నికల్లో రాష్ట్ర ప్రజలు గొప్ప మార్పును స్వాగతించాలని, అభివృద్ధి చేసే పార్టీలకు పెద్దపీట వేయాలని అన్నారు.

గుజరాత్‌లో కచ్‌లో ఐదు విమానాశ్రయాలు ఉండగా, ఒడిశాలో ఒకే ఒక విమానాశ్రయం ఉండటం దారుణమని అన్నారు. అపార సహజ వనరులతో అలరాడే ఒడిశా అభివృద్ధిలో ఇంకా వెనుకంజలోనే ఉందని అన్నారు. కొత్త ఎయిర్‌పోర్టుతో ఒడిశా ఆర్థిక పరిస్థితుల్లో గుణాత్మక మార్పులు వస్తాయని, ఇతర ప్రాంతాలతో అనుసంధానత పెరుగుతుందని అన్నారు. ఒడిశా పర్యటనలో భాగంగా ప్రధాని నరేంద్రమోదీ తాల్చేరులో రూ.13,000 కోట్ల వ్యయంతో నిర్మించనున్న ఫెర్టిలైజర్ ఫ్యాక్టరీకి శంకుస్థాపన చేశారు. 36 నెలల్లోగా ఈ ఫ్యాక్టరీ నిర్మాణం పూర్తిచేసి ఉత్పత్తిని ప్రారంభిస్తామని ప్రధాని చెప్పారు. ఈ ఫ్యాక్టరీలో దేశంలోనే తొలిసారిగా బొగ్గును గ్యాస్‌గా మార్చి యూరియాను ఉత్పత్తి చేస్తారని, ఉత్పత్తిలో వెలువడే ఉప ఉత్పత్తులు పశువుల దాణాగా ఉపయోగించవచ్చునని చెప్పారు.  ఏడాదిలో ఈ ఫ్యాక్టరీ ద్వారా 12 లక్షల టన్నుల నీమ్ కోటింగ్ యూరి యా ఉత్పత్తి అవుతుందని, 4,500 మంది ప్రత్యక్షంగా ఉపాధి లభిస్తుందని వెల్లడించారు.  ఈ ఫ్యాక్టరీని 2002లో విద్యుత్ కొరత కారణంగా మూసివేయగా.. 2011లో ఈ ఫ్యాక్టరీని తిరిగి తెరవాలని మోదీ నిర్ణయించారు. అందులో భాగంగా ఈ ఫ్యాక్టరీని పునర్‌నిర్మాణానికి శంకుస్థాపన చేశారు.

నేడు ఆయుష్మాన్ భవకు శ్రీకారం
కేంద్ర ప్రభుత్వం అత్యంత ప్రతిష్ఠాత్మకంగా భావిస్తున్న ‘ఆయుష్మాన్ భవ’ పథకానికి ప్రధాని నరేంద్రమోదీ ఆదివారం జార్ఖండ్‌లో లాంఛనంగా ప్రారంభించనున్నారు. ఈ పథకం కింద దేశవ్యాప్తంగా 10 లక్షల కుటుంబాలకు ఏడాదికి ఐదు లక్షల బీమా సౌకర్యాన్ని కల్పించనున్న విషయం తెలిసిందే. ఈ పథకం లబ్ధిదారులు ప్రభుత్వంతోపాటు ఎంపిక చేసిన ప్రైవేటు ఆస్పత్రుల్లో ఉచితంగా చికిత్స అందిస్తారు. ఈ పథకం వల్ల గ్రామీణ ప్రాంతాల్లో 8.03 కోట్లు, పట్టణ ప్రాంతాల్లో 2.33 కోట్ల మందికి లబ్ధి చేకూరనుంది. 



దయో తుపాన్: ఉత్తరకోస్తాలో భారీ వర్షాలు

Updated By ManamFri, 09/21/2018 - 09:32

Daye Cycloneవిశాఖపట్నం: పశ్చిమ మధ్య బంగాళాఖాతంలో ఏర్పడిన తీవ్ర వీయుగుండం గురువారం రాత్రికి మరింత బలపడి తుపానుగా మారింది. దీనికి దయో తుపాన్‌ అని పేరు పెట్టగా.. శుక్రవారం ఉదయం ఆ తుపాను కళింగపట్నం, పూరిల మధ్య తీరం దాటింది. భవానీపట్నానికి తూర్పు ఆగ్నేయ దిశగా 130 కి.మీ దూరంలో ఈ తుపాను కేంద్రీకృతమై ఉండగా.. తీరం దాటిన అనంతరం దయె తుపాన్‌ క్రమంగా బలహీనపడుతుంది. తీరం వెంబడి గంటకు 70 కి.మీ వేగంతో ఈదురుగాలులు వీస్తున్నాయి.

దీంతో శ్రీకాకుళం, విజయనగరం, విశాఖపట్నం జిల్లాలతో ఒడిశాలోని పలు జిల్లాలో భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ అధికారులు తెలిపారు. తెలంగాణలో కూడా ఒకట్రెండు చోట్ల భారీ వర్షాలు కురిసే అవకాశం ఉందని వారు తెలిపారు. తుపాను ప్రభావంతో చెట్లు, ఇళ్లు కూలిపోయే ప్రమాదం ఉందని, విద్యుత్‌ సరఫరాకు అంతరాయం ఏర్పడుతుందని, రోడ్లు దెబ్బతింటాయని, తీరం వెంబడి ఉన్న లోతట్టు ప్రాంతాలను సముద్రపు నీరు ముంచెత్తవచ్చని ఐఎండీ హెచ్చరించింది. మరోవైపు సముద్రం తీవ్ర అలజడిగా ఉంటుందని, అలలు సాధారణంకంటే మీటరు ఎత్తు వరకు ఎగసి పడతాయని వాతావరణ శాఖ తెలిపింది. ఈ నేపథ్యంలో విశాఖపట్నం, గంగవరం, కళింగపట్నం, భీమునిపట్నం పోర్టుల్లో మూడో నంబరు ప్రమాద హెచ్చరికలు జారీ చేశారు. అలాగే కాకినాడ, మచిలీపట్నం, కృష్ణపట్నం, నిజాంపట్నం పోర్టుల్లో రెండో నంబర్‌ ప్రమాద హెచ్చరికను జారీ చేశారు. 



ట్రాఫిక్ కంట్రోల్ చేస్తూ హోంగార్డు డ్యాన్స్.. వైరల్.. 

Updated By ManamTue, 09/11/2018 - 16:13

home guard personnel, coolest thing, Odisha, Pratap Chandra Khandwal, Michael Jacksonభువనేశ్వర్: ఒడిసాలో ఓ హోంగార్డు రోడ్డుపై డ్యాన్స్ చేస్తూ టాక్ ఆఫ్ ది టౌన్‌గా నిలిచాడు. ట్రాఫిక్ పోలీసుగా విధుల్లో చేరిన ప్రతాప్ చంద్ర ఖంద్వాల్ (33) అనే హోంగార్డు తనదైన శైలిలో రోడ్డుపై స్టేపులేస్తూ చూపురులను ఆకర్షిస్తున్నాడు. ప్రపంచ పాప్ స్టార్ మైకేల్ జాక్సన్‌ అన్నా.. డ్యాన్స్ అన్నా.. ఇతగాడికి ఎంతో పిచ్చి. మైకేల్ జాక్సన్‌ను అనుకరిస్తూ డ్యాన్స్ చేస్తుంటాడు. ట్రాఫిక్ పోలీసుగా విధుల్లో ఉండగానే రోడ్డుపై వెళ్లే వాహనాలను డ్యాన్స్ వేస్తూ కంట్రోల్ చేస్తున్నాడు. ‘‘నా డ్యాన్స్ ద్వారా ప్రజలకు సందేశాన్ని తెలియజేయాలనుకున్నాను. మామూలుగా ట్రాఫిక్ నిబంధనలు పాటించమంటే ఎవరూ వినరు.

కానీ, ఇలా డ్యాన్స్ చేస్తూ కంట్రోల్ చేస్తే అందరూ ఆకర్షితులవుతారు. ట్రాఫిక్ రూల్స్ పాటిస్తారు.’’ అని ఖంద్వాల్ జాతీయ మీడియాకు తెలిపారు. గత ఏడాదిలో మధ్యప్రదేశ్‌లోని ఇండోర్‌లో రంజిత్ సింగ్ అనే ట్రాఫిక్ పోలీసు కూడా మైకేల్ జాక్సన్ మూన్ వాక్ స్టెప్పులతో ట్రాఫిక్‌ను కంట్రోల్ చేస్తూ అందరిని ఆకట్టుకున్నారు. రంజిత్ సింగ్‌ను గుర్తు చేసేలా ఇప్పుడు హోంగార్డు ప్రతాప్ చంద్ర కూడా అదే శైలిలో మూన్‌వాక్ చేస్తూ హుషారెత్తిస్తు్న్నాడు. ప్రతాప్ డ్యాన్స్ స్టెప్పులతో ట్రాఫిక్ కంట్రోల్ చేస్తున్న వీడియో సోషల్ మీడియాలో వైరల్ అవుతోంది. ఇదే ఆ వీడియో.. 



వీడియో: 11 ఉల్లిగడ్డలు మింగిన నాగుపాము!

Updated By ManamTue, 07/03/2018 - 17:42

Caught On Camera, Cobra Swallows, Throws Up, 11 Onions, Odishaభువనేశ్వర్: ఇప్పటివరకూ పాములు గుడ్లు మింగడమే చూశాం.. కానీ, ఉల్లిగడ్డలను కూడా మింగుతాయని తెలుసా? అయితే ఇప్పుడు ఈ వీడియో చూస్తే అవుననే అంటారు. బాగా ఆకలితో ఉన్న నాగుపాము ఒకటి ఏకంగా 11 ఉల్లిగడ్డలను మింగేసింది. ఈ ఘటన ఒడిసాలోని అంగుల్ జిల్లా, చెండిపాడ గ్రామంలో చోటుచేసుకుంది. సుశాంత్ బెహారా అనే వ్యక్తి ఇంటి ఆవరణంలో నాగుపామును గుర్తించిన వెంటనే స్థానికులు స్నేక్ హెల్ప్‌లైన్ వాలంటీర్ హిమాన్షు శేఖర్ దెహురికి సమాచారం అందించారు. అక్కడికి చేరుకొన్న హిమాన్షు నాగుపామును రక్షించాడు. అప్పటికే పదకొండు ఉల్లిగడ్డలతో పాటు ఓ కప్పను కూడా మింగిన నాగుపాము వాటిని జీర్ణించుకోలేక బయటకు నెమ్మదిగా కక్కేసింది.

చివరిగా రెండు ఉల్లిగడ్డలను నాగుపాము బయటకు కక్కుతుండగా వీడియోను తీసి సోషల్ మీడియాలో పోస్టు చేయడంతో వైరల్‌గా మారింది. దీనిపై స్నేక్ హెల్ప్‌లైన్ హిమాన్షు స్పందిస్తూ.. ‘‘నాగుపాము మింగిన ఉల్లిగడ్డలను కక్కడం చూశాను. ఇలాంటి అరుదైన దృశ్యాన్ని ఫోన్లో వీడియో తీయమని నా స్నేహితుడికి చెప్పాను. చివరిగా నాగుపాము కక్కిన రెండు ఉల్లిగడ్డలను మాత్రమే వీడియో తీయగలిగాం’’ అని హిమాన్షు చెప్పారు. 

ప్రపంచంలో ఇదే తొలి కేసు.. 
నాగుపాము ఏకంగా 11 ఉల్లిగడ్డలను మింగేసిన కేసు నమోదు కోవడం ప్రపంచంలో ఇదే తొలిసారిగా స్నేక్ హెల్ప్‌లైన్ జనరల్ సెక్రటరీ సుభేందు మల్లిక్ పేర్కొన్నారు. ఈ ఏడాది ఏప్రిల్‌లో కేరళలో ఓ నాగుపాము ఏకంగా ఏడు గుడ్లను మింగిన అనంతరం వాటిని జీర్ణించుకోలేక గుడ్లను బయటకు కక్కిన వీడియో వైరల్ అయిన సంగతి తెలిసిందే. 



ఆ ఇంట్లో 111 పాము పిల్లలు!

Updated By ManamMon, 06/25/2018 - 11:51

భువనేశ్వర్ : పది కాదు.. ఇరవై కాదు.. ఏకంగా 111 పాము పిల్లలు! ఒడిశాల్లోని శ్యాంపూర్ గ్రామంలో భుయాన్ అనే వ్యవసాయ కూలీ ఇంట్లో 111 పాము పిల్లలు శనివారం వెలుగుచూశాయి.  రెండు మూడు రోజుల వయస్సు గల పాము పిల్లలు భారీ మొత్తంలో ఒకే ఇంట్లో కనబడటంతో గ్రామస్థులు భయాందోళనకు గురయ్యారు.

అటవీ అధికారులు, ఎన్‌జీవో ప్రతినిధులు అక్కడికి చేరుకుని 111 పాము పిల్లలు అక్కడికి ఎలా వచ్చాయో తెలుసుకునే ప్రయత్నం చేశారు. వారికి అక్కడ 26 పగిలిన పాము గుడ్లు మాత్రమే కన్పించడంతో వాస్తవాలు తెలుసుకోవడానికి ప్రయత్నిస్తున్నారు. తల్లి పాముల గురించి వెతకడం ప్రారంభించారు.snakes

పాముల సంరక్షకులు షేక్ మీర్జా మాట్లాడుతూ.. ‘శనివారం ఉదయం తనకు ఫోన్ రావడంతో అక్కడికి వెళ్లాను. నేను వెళ్లాకా అక్కడ రెండు పాము పిల్లల్ని నెలపై ఉండటం చూశాను. ఆ తర్వాత పుట్టను త్రవ్వగా పెద్ద మొత్తంలో పాము పిల్లలు బయటికొచ్చాయి. సాయంత్రం కూడా మరో రెండు నాగుపాము పిల్లలు బయటికొచ్చాయి. కానీ తల్లి పాముల అచూకీ మాత్రం కన్పించలేదు’ అని తెలిపారు.ఈ ఘటనపై మల్లిక్ అనే జంతు ప్రేమికుడు మాట్లాడుతూ.. ‘ఒక పాము సాధారణంగా 20 నుంచి 40 గుడ్లు పెడుతుంది.

దానిని పొదగడానికి 60 నుంచి 80 రోజుల సమయం పడుతుంది. అలా చూస్తే.. ఇక్కడ ఎన్ని పాములు ఉన్నాయి.. ఉంటే అన్ని పాములు ఒకే సారి గుడ్లు పెట్టాయా.. అన్ని ఒకే సారి పొదిగాయా.. వంటి ప్రశ్నలు తలెత్తుతున్నాయి. కానీ అక్కడ 26 పాము గుడ్ల అనవాళ్లు మాత్రమే లభించాయి. మిగిలిన పాము పిల్లలు ఎలా వచ్చాయి. అటవీ శాఖ అధికారులు దీనిని తీవ్రంగా పరిగణించి విచారణ చేపట్టాలి’ అని ఆయన కోరారు. 

 



2019లో మోదీ పోటీ చేసేది ఇక్కడ్నుంచే..!

Updated By ManamFri, 05/25/2018 - 09:59

PM Narendra Modi to contest 2019 elections from Odisha's temple town Puri?

న్యూ ఢిల్లీ: ఎన్నికలు దగ్గరపడుతున్న కొద్ది గెలుపుకోసం జాతీయ, ప్రాంతీయ పార్టీలు ఎత్తుకు పైఎత్తులు వేస్తున్నాయి. అధికారం కోసం ప్రతిపక్ష పార్టీలు తహతహలాడుతుంటే.. ఉన్న అధికారాన్ని చేజారకుండా మళ్లీ ప్రభుత్వాన్ని ఏర్పాటు చేయడానికి వ్యూహాలు రచిస్తున్నాయి పార్టీలు. దేశ వ్యాప్తంగా అన్ని పార్టీలు ఇదే పనిలో నిమగ్నమవుతున్నాయి. అయితే 2019లో జాతీయ పార్టీలైన బీజేపీ, కాంగ్రెస్ పరిస్థితి ఎలా ఉండబోతోందన్నది అంతుచిక్కట్లేదు. మరీ ముఖ్యంగా రానున్న సార్వత్రిక ఎన్నికలను దృష్టిలో పెట్టుకుని ఈసారి ప్రధాని నరేంద్ర మోదీ, బీజేపీ జాతీయాధ్యక్షుడు అమిత్ షా బీజేపీకి అంతగా ప్రాబల్యం లేని రాష్ట్రాలపై ఫోకస్ చేశారు. ఇవన్నీ అటుంచితే.. ఈ క్రమంలో ప్రధాని నరేంద్ర మోదీ రానున్న ఎన్నికల్లో ఎక్కడ్నుంచి పోటీ చేస్తారనేదానిపై సర్వత్రా ఆసక్తి నెలకొంది.

ఆ రెండూ వద్దు.. పూరీనే!
ఏ రాష్ట్రంలో అయితే తమ పార్టీ వీక్‌గా ఉందో అక్కడ్నుంచే పోటీ చేసి చక్రం తిప్పాలని బీజేపీ భావిస్తోంది. ఇందులో భాగంగానే.. ప్రధాని నరేంద్ర మోదీ ఈసారి వారణాసి మరియు గుజరాత్‌ను వదిలేసి ఒడిషాలోనే కమలాన్ని వికసింపజేయాలని భావిస్తున్నారు. ఒడిషాలోని ప్రముఖ పుణ్యక్షేత్రమైన పూరి నుంచి ఎన్నికల బరిలో దిగేందుకు నిర్ణయించుకున్నట్లు పెద్ద ఎత్తున వార్తలు వస్తున్నాయి. ఇదిలా ఉంటే.. గత ఎన్నికల్లో గుజరాత్‌లోని వడోదర, ఉత్తరప్రదేశ్‌లోని వారణాసి స్థానాల నుంచి పోటీ చేసిన మోదీ వచ్చే ఎన్నికల్లోనూ రెండు స్థానాల్లో పోటీ చేస్తారనే ప్రచారమూ జరుగుతోంది. అయితే ఆ రెండింటిలో పూరి ఒకటి అనేది తాజాగా వెలువడుతున్న ఈ వార్తా కథనాల సారాంశం.

నవీన్ పట్నాయక్‌కు చెక్ పెట్టేందుకే..!
2014 సార్వత్రిక ఎన్నికల్లో వడోదర, వారణాసి స్థానాల నుంచి గెలిచిన మోదీ స్వరాష్ట్రంలోని వడోదర స్థానాన్ని వదులుకుని వారణాసి నుంచే ఎంపీగా కొనసాగుతూ వచ్చిన సంగతి తెలిసిందే. అందుకు కారణమూ లేకపోలేదు. ఆ తర్వాత ఉత్తరప్రదేశ్‌లో జరగనున్న ఎన్నికల్లో బీజేపీకి పట్టు పెంచుకోవడం కోసమేనని అప్పట్లో విశ్లేషణలు వెలువడ్డాయి. ఆ విశ్లేషణలకు తగ్గట్టుగానే యూపీలో బీజేపీ అధికారాన్ని చేజిక్కించుకుంది. ఆ లెక్క ప్రకారం చూస్తే, ఈసారి ఒడిషాలో భారతీయ జనతా పార్టీని బలోపేతం చేయడం కోసమే పూరిని ఎంచుకోబోతున్నారని ఆ వార్తా కథనాలు ఉటంకించాయి. కాగా ప్రస్తుతం ఒడిషా సీఎంగా నవీన్ పట్నాయక్ ఉన్నారు. వచ్చే ఎన్నికల్లో ఆయనకు చెక్ పెట్టి ఎలాగైనా సరే బీజేపీ జెండా పాతాలని మోదీ, షాలు వ్యూహాలు రచిస్తున్నాయని తెలుస్తోంది.

ఒడిషాలో ఇంతకు మునుపు పరిస్థితి ఇదీ..
2014 ఎన్నికల్లో బీజేపీకి కేవలం 10 సీట్లు మాత్రమే రాగా.. కాంగ్రెస్‌కు 16 సీట్లొచ్చాయి. బిజు జనతా దళ్‌ 147 స్థానాలకు గాను 117 సీట్లు గెలుచుకుని ప్రభుత్వాన్ని ఏర్పాటు చేసింది. అంతకు మునుపు 2004, 2009 రెండు పర్యాయాలూ కాంగ్రెస్ సీఎం పీఠాన్ని దక్కించుకుంది. ఆ తర్వాత జరిగిన 2014 ఎన్నికల్లో కాంగ్రెస్ ఘోర పరాజయం చవిచూడాల్సి వచ్చింది. దీంతో చాలా వీక్‌గా ఉన్న బీజేపీని బలోపేతం చేసుకునేందుకు విశ్వ ప్రయత్నాలు చేస్తోంది. అయితే మోదీ పోటీ స్థానంపై బీజేపీ వర్గాలు ఏమని స్పందిస్తాయో.. ఒడిషాలో కమలాన్ని వికసింపజేయాలనే ప్రయత్నం ఎంతమేరకు సక్సెస్ అవుతుందో తెలియాలంటే కొద్దిరోజులు వేచిచూడాల్సిందే మరి.

PM Narendra Modi to contest 2019 elections from Odisha's temple town Puri?





Related News