hurricane

10 లక్షల మంది తరలింపు!

Updated By ManamTue, 09/11/2018 - 22:22
  • ఫ్లోరెన్స్ హరికేన్ నేపథ్యంలో నిర్ణయం

  • సురక్షిత ప్రాంతాలకు వెళ్లాలని సూచన

  • ఉభయ కరోలినాలు, వర్జీనియాలో హై అలర్ట్ 

hurricaneవాషింగ్టన్: అట్లాంటిక్ మహాసముద్రంలో ఏర్పడిన ‘ఫ్లోరెన్స్’ హరికేన్ బీభత్సం  సృష్టించే అవకాశాలు ఉండటంతో దాదాపు 10 లక్షల మందిని సురక్షిత ప్రాంతాలకు తరలించాలని అమెరికా నిర్ణయించింది. ఉత్తర, దక్షిణ కరోలియా, వర్జీనియా తీర ప్రాంతాల్లోని ప్రజలను తరలించేందుకు యంత్రాంగం  ముమ్మర ఏర్పాట్లు చేసింది. ప్రజలు స్వచ్ఛందంగా సురక్షిత ప్రాంతాలకు వెళ్లాలని సూచించింది. బెర్మూడా దీవులకు 1100 కిలోమీటర్ల దూరంలో ఏర్పడిన టైఫూన్.. అమెరికా తీరాన్ని చేరే సరికి భీకర హరికేన్‌గా మారనుంది. ప్రస్తుతం గంటలకు 220 కిలోమీటర్ల వేగంతో గాలులు వీస్తున్నాయి. దీని కారణంగా అమెరికా తూర్పుతీరంలో ఉన్న రాష్ట్రాల్లో బలమైన ఈదురుగాలులు, భారీ వర్షాలు, ఆకస్మిక వరదల ప్రభావంతో కొండ చరియలు విరిగిపడే అవకాశాలు ఉన్నాయి.అమెరికా తూర్పు తీరంలో ఫ్లోరెన్స్ విధ్వంసం 2-3 రోజుల పాటు కొనసాగవచ్చని నేషనల్ హరికేన్ సెంటర్(ఎన్‌హెచ్‌సీ) తెలిపింది. ఉత్తర కరోలీనా, వర్జీనియా, దక్షిణ కరోలీనా రాష్ట్రాల్లో తీవ్ర విధ్వంసం సృష్టించే అవకాశముందని వెల్లడించింది.  ఉత్తర, దక్షిణ కరోలీనా రాష్ట్రాల మధ్య హరికేన్ గురువారం రాత్రి లేదా శుక్రవారం ఉదయం తీరం దాటే అవకాశం ఉంది.  ప్రస్తుతం అట్లాంటిక్ సముద్రంలో కొత్తగా ఐజాక్, హెలెన్ హరికేన్లు ఏర్పడినప్పటికీ, ఇవి అమెరికా తీరంవైపు రావడానికి వారం రోజులు పడుతుందని తెలిపింది. ఫ్లోరెన్స్ హరికేన్‌ను ఎదుర్కొనేందుకు దక్షిణ కరోలినా, వర్జీనియా, ఉత్తర కరోలినా రాష్ట్రాలు ఎమర్జెన్సీని ప్రకటించాయి. కాగా, గత కొన్నేళ్ల తర్వాత తూర్పు తీర ప్రాంతాలు భీకర తుఫాన్‌ను ఎదుర్కోనున్నాయి అని దేశాధ్యక్షుడు ట్రంప్ ట్విటర్‌లో పేర్కొన్నారు.



అవెురికాకు మరో విపత్తు

Updated By ManamSun, 10/08/2017 - 18:33
  • ముంచెత్తిన నేట్ హరికేన్.. కేటగిరి-1 తుఫానుగా గుర్తింపు

  • పెనుగాలులు,కుండపోత వర్షాలు.. 28 మంది మృతి

న్యూఆర్లిన్స్(యూఎస్), అక్టోబరు 8: వరుస విపత్తులతో అవెురికా అతలాకుతలం అవుతోంది. హరికేన్లు ఒకదాని తర్వాత మరోటి ప్రజలను వణికిస్తున్నాయి. ఒక తుఫాను దాటిపోయింది.. ఇక నిశ్చింతగా ఉండొచ్చని అనుకునేలోగానే మరోటి వచ్చిపడుతోంది. బాధితులను కోలుకోలేకుండా దెబ్బతీస్తున్నాయి. మొన్న ఇర్మా, నిన్న మరియా.. ప్రస్తుతం నేట్ తుఫాను మధ్య అమెరికాలో బీభత్సం సృష్టిస్తోంది. ఈ హరికేన్ ప్రభావంతో గంటకు 140 కిలో మీటర్ల వేగంతో పెనుగాలులు వీస్తున్నాయి. మూడు రోజులుగా కురుస్తున్న కుండపోత వర్షాలతో పలు భవనాలు నేలమట్టమయ్యాయి. వరద నీరు పోటెత్తింది. మిసిసిపి సహా పలు నదులు పొంగి పొర్లుతున్నాయి. తుఫాను కారణంగా ఇప్పటి వరకు 28 మంది ప్రాణాలు కోల్పోయినట్టు అధికారులు తెలిపారు. ఆదివారం నేట్ హరికేన్‌గా మారి గల్ఫ్ తీరం దిశగా పయనించడంతో లూసియానా, మిసిసిపి, అలబామా రాష్ట్రాలను మయామి జాతీయ తుఫాను హెచ్చరికల కేంద్రం అప్రమత్తం చేసింది. ఈ సూచనల మేరకు ఆయా రాష్ట్రాల గవర్నర్లు తుఫాను హెచ్చరికలు జారీ చేశారు. ప్రజలు అప్రమత్తంగా ఉంటూ ఎప్పటికప్పుడు జారీ అయ్యే సూచనలను పాటించాల్సిందిగా అభ్యర్థించారు. లోతట్టు ప్రాంతాల్లో నివసించే వారు సురక్షిత ప్రాంతాలకు తరలి వెళ్లాలంటూ సూచించారు. మిగతా ప్రదేశాల్లో ఉన్నవారు కూడా రెండు మూడు రోజులకు అవసరమయ్యే వంట దినుసులు, ఇతర నిత్యావసరాలను సిద్ధం చేసి పెట్టుకోవాలని తెలిపారు. ఆదివారం సాయంత్రం నాటికి నేట్ తీవ్రరూపం దాల్చడంతో పలుచోట్ల కుండపోత వర్షాలు కురిశాయి. దీంతో కొన్ని రాష్ట్రాల్లో సాయంత్రం 7 గంటల నుంచి అత్యవసర స్థితిని విధించారు. నేట్‌ను కేటగిరీ-1 తుఫానుగా అధికారులు ప్రకటించారు. దీంతో ఆయా రాష్ట్రాల గవర్నర్లు అప్రమత్తత ప్రకటించారు. లూసియానాలోని మిసిసిపి నది వద్ద నేల భారీగా కోతకు గురైంది. నదీ తీరంలోని బిలాక్సో వద్ద కూడా భారీగా నేలకోతకు గురైంది. ఇప్పటికే లూసియానా, మిసిసిపి, అలబామా, ఫ్లోరిడాలోని కొన్ని రాష్ట్రాల్లో ప్రభుత్వం హెచ్చరికలు జారీ చేసింది. నికరాగ్వలో వర్షాల కారణంగా పలువురు మృతి చెందారు. మరికొంతమంది నీటిలో గల్లంతయ్యారు. ఈ నేపథ్యంలో మృతుల సంఖ్య పెరిగే ప్రమాదం ఉందని అధికారులు భావిస్తున్నారు. నేట్ హరికేన్ వేగంగా కదులుతోందని వాతావరణ శాస్త్రజ్ఞు లు చెబుతున్నారు. ఫలితంగా లోతట్టు ప్రాంతాల్లో వరదలు సంభవించవచ్చని హెచ్చరిస్తున్నారు. మరోపక్క లూసియానా ప్రజలు అప్రమత్తంగా ఉండాలని అధ్యక్షుడు డొనాల్డ్ ట్రంప్ కోరారు. నేట్ అత్యధికంగా ప్రభావం చూపించే గల్ఫ్ ఆఫ్ మెక్సికో అమెరికా ఇంధన రవాణాకు కీలక ప్రాంతం. ఇక్కడి నుంచే చమురు ఎగుమతులు, దిగుమతులు జరుగుతాయి. ప్రస్తుతం నేట్ హరికేన్ కారణంగా ఈ ప్రాంతాన్ని ప్రభుత్వం ఖాళీ చేయించింది. 





Related News