tirumala

నన్ను తొలగించి గుట్టుగా 30లక్షలు అకౌంట్లో వేశారు: రమణ దీక్షితులు 

Updated By ManamWed, 08/29/2018 - 10:52

Ramana Deekshituluతిరుపతి: టీటీడీ మాజీ ప్రధాన అర్చకులు రమణ దీక్షితులు మరోసారి సంచలన వ్యాఖ్యలు చేశారు. తనకు ఏమాత్రం సమాచారం ఇవ్వకుండా తన బ్యాంకు ఖాతాలోకి టీటీడీ అధికారులు రూ.30 లక్షలు డిపాజిట్ చేశారని రమణ దీక్షితులు ఆరోపించారు. ఆ తరువాత ఇవే రిటైర్మెంట్ బెనిఫిట్స్ అని అధికారులు చెబుతున్నారని ఆవేదన వ్యక్తం చేశారు. 

రిటైర్మెంట్ బెనిఫిట్స్ కోసం తాను అసలు దరఖాస్తే చేయలేదని రమణ దీక్షితులు స్పష్టం చేశారు. ఆగమ శాస్త్రాలకు విరుద్ధంగా టీటీడీలో జరుగుతున్న అక్రమాలను బయటపెట్టినందుకే కక్షపూరితంగా బాధ్యతల నుంచి తనను తొలగించారన్నారు.

ఇక తన నియామకం వంశపారంపర్య హక్కుల కింద జరిగిందనీ, సర్వీస్ రూల్స్ ప్రకారం కాదని.. అందువల్లే గత 30 ఏళ్ల పాటు తనకు ఎలాంటి అలవెన్సులు, ఇతర సదుపాయాలు కల్పించలేదని రమణదీక్షితులు వెల్లడించారు. తనతో పాటు బలవంతంగా తొలగించిన అర్చకుల బ్యాంకు ఖాతాల్లోనూ ఇలాగే డబ్బును డిపాజిట్ చేశారని పేర్కొన్నారు. ఎలాంటి అధికారిక ఉత్తర్వులు, రసీదులు లేకుండా దరఖాస్తు చేయకుండా అధికారులు ఈ మొత్తాన్ని బ్యాంకు ఖాతాల్లో వేశారనీ, టీటీడీ నిధులు దుర్వినియోగం అవుతున్నాయని చెప్పడానికి ఇదే సాక్ష్యమని రమణ దీక్షితులు అన్నారు.



టీటీడీలో లైంగిక వేధింపుల కలకలం

Updated By ManamThu, 08/23/2018 - 10:38

TTDతిరుపతి: పవిత్ర తిరుపతి దేవస్థానం సంస్థ టీటీడీలో లైంగిక వేధింపుల ఆరోపణలు కలకలం రేపుతున్నాయి. తన కూతుర్ని ఏఈవో శ్రీనివాసులు వేధిస్తున్నాడని, టీటీడీలో పనిచేస్తున్న మహిళా ఉద్యోగిని ఆరోపణలు చేశారు. శ్రీనివాస మంగాపురం ఆలయంలో శ్రీనివాసులు ఏఈవోగా పనిచేస్తుండగా.. తన కూతురిని వేధిస్తున్నాడని ఆమె ఫిర్యాదులో పేర్కొంది. గత కొంతకాలంగా తమ కుమార్తెకు ఫోన్ చేస్తున్న శ్రీనివాసులు నా మాట వినకపోతే మీ అమ్మను బదిలీ చేస్తామంటూ బెదిరిస్తున్నారని తెలిపింది. కేసు నమోదు చేసుకున్న పోలీసులు విచారణ ప్రారంభించారు.



శ్రీవారి సేవా టికెట్ల కుంభకోణం

Updated By ManamSat, 08/18/2018 - 00:13
  • నకిలీ ఆధార్‌తో సుప్రభాత సేవ టికెట్ల విక్రయం

  • నిఘాకు చిక్కిన దళారి ప్రభాకర్

tirumalaతిరుమల: తిరుమల వెంకటేశ్వర స్వామి దర్శనం టికెట్లను వ్యాపార వస్తువుగా చేసుకున్న ఓ వ్యక్తి గుట్టురట్టయ్యింది. శ్రీవారి ఆర్జిత సేవల టికెట్ల అమ్మకాల్లో అక్రమాల నియంత్రణకు టీటీడీ ఆధార్‌ను తప్పనిసరి చేసింది. అయితే మహారాష్ట్రలో షోలాపూర్‌కు చెందిన ప్రభాకర్ అనే వ్యక్తి టీటీడీ వెబ్‌సైట్‌ను హ్యాక్ చేసి దేవస్థానం లక్కీడిప్‌లో అందించే టికెట్లను పొందేవాడు. వాటిని అధిక ధరకు ఇతరులకు విక్రయించేవాడు. ఇదే విధంగా సుప్రభాత సేవకు సంబంధించిన నాలుగు టికెట్లను కొనుగోలు చేసిన ప్రభాకర్ మహారాష్ట్రకు చెందిన భక్తులకు వాటిని విక్రయించాడు. లక్కీడిప్ ద్వారా టీటీడీ అందించే టికెట్లలో అక్రమాలు జరుగుతున్నాయని డయల్ యువర్ ఈవో కార్యక్రమాలు గతంలో పలు ఫిర్యాదులు అందాయి. ఫిర్యాదులు అందుకున్న టీటీడీ అధికారులు ఈ వ్యవహారంపై నిఘా ఉంచారు. శుక్రవారం ఉదయం సుప్రభాత సేవలో పాల్గొంటున్న భక్తుల టికెట్లను సిబ్బంది తనిఖీ చేయగా అక్రమం వెలుగు చూసింది. షోలాపూర్‌కు చెందిన నాగేష్ జనార్ధన్ గుప్తా, అతని భార్య వనిత, విజయ్‌కుమార్, బసవరాజు, రామచంద్ర చౌగులేల ఆధార్ కార్డులను పరిశీలించగా అందులో ఉన్న పేర్లు, టికెట్‌పై ఉన్న పేర్లకు పొంతన లేదు. టీటీడీ సిబ్బంది వారిని ప్రశ్నించగా తమ ప్రాంతానికి చెందిన ప్రభాకర్ వద్ద అధిక ధర చెల్లించి టికెట్లు కొనుగోలు చేసినట్లు చెప్పారు. ఆలయ అధికారులు పోలీసులకు ఫిర్యాదు చేశారు. టీటీడీ వారు లక్కీ డిప్‌లో కేటాయించే టికెట్లలో ప్రభాకర్ ఇప్పటివరకు వందకు పైగా పొందినట్లు విచారణలో తేలింది. 



నేటితో ముగియనున్న మహాసంప్రోక్షణ

Updated By ManamThu, 08/16/2018 - 10:38

Tirumalaతిరుమల: ఈ నెల 12నుంచి తిరుమలలో శ్రీవారికి జరుగుతున్న మహా సంప్రోక్షణ కార్యక్రమం ఇవాళ్టితో ముగియనుంది. గురువారం రాత్రి జరగబోయే పెద్దశేష వాహనసేవతో మహాక్రతువు పరిసమాప్తం అవ్వనుంది. ఆ తరువాత అర్ధరాత్రి నుంచి దివ్యదర్శనం, సర్వదర్వనం టోకెన్ల జారీని పునరుద్ధరించనున్నారు. రేపటి నుంచి యథావిధిగా శ్రీవారికి అన్ని ఆర్జిత సేవలను నిర్వహించనున్నారు. కాగా మహా సంప్రోక్షణలో భాగంగా ఉదయం స్వామివారి మూల విరాట్టుకు, పరివార దేవతలకు క్షీరాధివాస తిరుమంజనం చేశారు.



వెంకన్నకు క్షీరాధివాసం

Updated By ManamThu, 08/16/2018 - 01:26
  • వైభవంగా క్షీరాధివాస తిరుమంజన సేవ

  • ప్రాణప్రతిష్ఠకు ఏడు అధివాసాలు.. వాటిలో మొదటిదే క్షీరాధివాస సేవ

  • నేడు వెంకన్నకు మహా సంప్రోక్షణం.. ఎమ్మెల్యే సుగుణమ్మకు అవమానం

tirupathiతిరుపతి: కలియుగ వైకుంఠం తిరుమలలో జరుగుతున్న బాలాలయ అష్టదిగ్బంధన మహా సంప్రోక్షణంలో భాగంగా నాలుగో రోజు బుధవారం శ్రీవారి మూలమూర్తికి క్షీరాధివాస తిరుమంజన సేవా కార్యక్రమం నిర్వహించారు. మూల మూర్తితో పాటు ఇతర పరివార దేవతలకు క్షీరాధివాస తిరుమంజన క్రతువులు శాస్త్రోక్తంగా నిర్వహించారు. విగ్రహాలకు ప్రాణ ప్రతిష్ఠ చేపట్టే సమయంలో విశ్వంలో ని శక్తిని ఆవాహన చేసేందుకు అధివాసం నిర్వహిస్తారు. ప్రాణప్రతిష్ఠ ద్వారా విగ్రహాలు అనంతమైన శక్తిని పొందుతాయి. ఇలాంటి విగ్రహ రూపంలో ఉన్న దేవతలను దర్శించడం ద్వారా కోరిన కోరికలు తీరడంతో పాటు మానసిక శాంతి చేకూరుతుంది. శాస్త్రాల ప్రకారం ఆలయాల ప్రాణప్రతిష్ఠ సమయంలో ఏడు అధివాసాలను నిర్వహిస్తారు. వీటిలో క్షీరాధివాసం, జలాధివాసం, ఫలాదివాసం, ఛాయాదివాసం, ధాన్యాధి వాసం, పుష్పాధివాసం, శయనాధివాసం ఉంటాయి. శ్రీవారి మూల మూర్తిని పవిత్రమైన పాలతో అభిషేకం చేయడమే క్షీరాధివాసం అంటారు.  ‘‘క్షీరసాగర  తరంగ శిఖర సార తరకిత చారుమూర్తే’’ అంటూ ముకుంద మాల  స్తోత్రంలో కులశేఖరాళ్వారు క్షీరాధివాసం వైశిష్ట్యాన్ని తెలియజేశారు. శ్రీవారి ఆలయంలో బుధవారం ఉదయం గోపురాల కలశాలను అద్దంలో చూపి, వాటి  ప్రతిబింబాలకు అభిషేకం నిర్వహించారు. 

నేడు మహా సంప్రోక్షణం 
శ్రీ వేకంటేశ్వర స్వామివారి ఆలయంలో గురువారం ఉదయం 10.16 గంటల నుంచి మధ్యాహ్నం 12.00 గంటల వరకు మహాసంప్రోక్షణ కార్యక్రమం జరుగుతుందని జేఈఓ శ్రీనివాసరాజు తెలిపారు. బుధవారం ఉదయం పవిత్రజలం, పాలు, పంచగవ్యాలతో కూడిన 14 కలశాలతో శ్రీవారి మూల మూర్తికి, ఇతర పరివార దేవతలకు క్షీరాధివాసం, తిరుమంజనం, మధ్యాహ్నం మహాశాంతి, పూర్ణాహుతి, మహాశాంతి తిరుమంజనం కార్యక్రమాలు జరిగాయన్నారు. 

స్థానిక ఎమ్మెల్యేకు అనుమతి నిరాకరణ
తిరుపతి ఎమ్మెల్యే సుగుణమ్మకు బుధవారం ఆలయంలోకి అనుమతి లభించలేదు. ఆమె ఆలస్యంగా వెళ్లడంతో, ఆమెను అనుమతించలేదని సమాచారం. దీంతో ఆమె నిరసన వ్యక్తం చేశారు. 
 



అష్ట బంధనం

Updated By ManamTue, 08/14/2018 - 07:20
  • మహా సంప్రోక్షణంలో మూడోరోజు కార్యక్రమం

  • అష్టదిక్కుల్లో సంధిబంధనం చేసిన రుత్వికులు

  • తగ్గిన వేంకటేశ్వర స్వామి హుండీ ఆదాయం 

  • రోజుకు రూ. 3 కోట్ల నుంచి.. కోటి లోపే!

tirumalaతిరుపతి: కలియుగ వైకుంఠం తిరుమలలోని శ్రీ వేంకటేశ్వర స్వామివారి ఆలయంలో జరుగుతున్న బాలాలయ అష్టబంధన మహాసంప్రోక్షణంలో మూడో రోజు సోమవారం అష్టబంధన కార్యక్రమం జరిగింది. రుత్వికులు శాస్త్రోక్తంగా అష్టబంధన కార్యక్రమాలు నిర్వహించారు. గర్భాలయంలో మూలమూర్తి (ధ్రువమూర్తి) పటిష్ఠత కోసం విగ్రహం చుట్టూ కదలికలు లేకుండా దృఢంగా ఉండేందుకు ఎనిమిది వైపుల సంధిబంధనం చేయడాన్ని అష్టబంధన బాలాలయ మహాసంప్రోక్షణం అంటారు. వైఖానస ఆచార్యుల అధ్వర్యంలో సంప్రదాయ శిల్పాచార్యుల సహకారంతో అష్టబంధన ద్రవ్యాలను సేకరించి, ఆయాద్రవ్యాలకు సంబంధించిన దేవతలను ఆరాధించిన తరువాత అష్టబంధనం తయారుచేస్తారు. సోమవారం రుత్వికులు శాస్త్రోక్తంగా అష్టబంధన ద్రవ్యాలను సేకరించి, ఉదయం 6.00 గంటల నుంచి 12 గంటల వరకు, రాత్రి ఏడు నుంచి పది వరకు యాగశాలలో వైదిక కార్యక్రమాలు నిర్వహించారు. మంగళవారం ఉదయం శ్రీ వేంకటేశ్వరుని మూలమూర్తితో పాటు ఇతర దేవతామూర్తుల విగ్రహాలకు అష్టబంధనాన్ని సమర్పిస్తారు. అష్టబంధనం గురించి భృగుమహర్షి  రచించిన భృగుప్రకీర్ణాధికారం గ్రంధంలో చెప్పిన విధంగా చేపట్టారు. భృగు మహర్షి అష్టబంధనం గురించి తెలియజేస్తూ ‘‘శంఖచూర్ణం, మధూచ్చిష్టం, లాక్షా త్రిఫలమేవచ, కాసీసం గుగ్గులుం చైవ చూర్ణం రక్త శిలాకృతమ్, మాహిషం నవనీతం చేత్యష్టబన్ధ ఇతి స్మృతః’’ అని అన్నారని అర్చకులు తెలిపారు. ఎనిమిది రకాల ద్రవ్యాలతో అష్టబంధనాన్ని తయారు చేస్తారు. వాటిలో శంఖచూర్ణం 25.5 తులాలు, మధుజ (తేనె మైనం) 3.5 తులాలు, లాక్షా (లక్క) 3.75 తులాలు, గుగ్గులు (వృక్షపు బంక) 9 తులాలు, కార్పాసం (ఎర్రపత్తి) ఒక తులం, త్రిఫలం (ఎండిన ఉసిరికాయ, తానికాయ, కరక్కాయ) 7.5 తులాలు, రక్తశిలాచూర్ణము (గైరికము) 7.5 తులాలు, మాహిషా నవనీతము (గేదె వెన్న) 15 తులాలు ఉంటాయి. వీటికి ఔషధ గుణాలు కూడా ఉన్నట్లు తెలిపారు. శంఖ చూర్ణంతో చంద్రుడిని, తేనె మైనంతో రోహిణీ, లక్కతో అగ్ని, గుగ్గులుతో చండ, ఎర్రపత్తితో వాయువును,  త్రిఫల చూర్ణంతో హరిని, గైరికముతో స్కందుడిని, గేదె వెన్నతో యముడిని ఆరాధిస్తారు. ముందుగా ద్రవ్యాలను శుభ్రపరిచి ఆచార్యుల సమక్షంలో సంప్రదాయ శిల్పులు రోటిలో వేసి, 30 నిముషాలు దంచుతారు. దంచగా వచ్చిన పాకాన్ని ముద్దగా చేసుకుని, గంటకు ఒకసారి చొప్పున ఎనిమిది సార్లు, అవసరమైనంత వెన్న కలుపుకుంటూ దంచుతారు. ఈ పాకాన్ని ముద్దలుగా తయారు చేసి, ఈ అష్టబంధనాన్ని పద్మపీఠంపై స్వామి వారి పాదాల కింద అష్టదిక్కుల్లోను సమర్పిస్తారు. ఈ కార్యక్రమం సోమవారం పూర్తయింది. 

తగ్గిన శ్రీవారి హుండీ ఆదాయం
శ్రీవారి ఆలయంలో జరుగుతున్న ఆరు రోజుల మహాసంప్రోక్షణం కారణంగా శ్రీవారి హుండీ ఆదాయం బాగా తగ్గిపోయింది.  స్వామి వారి హుండీ ఆదాయం ఇన్నాళ్లూ సగటున రోజుకు మూడు కోట్ల రూపాయలు ఉండగా, ఆదివారం హుండీ ఆదాయం ఒక్కసారిగా 73 లక్షలకు పడిపోయింది. సోమవారం కోటి రూపాయలకు చేరుకున్నా, మంగళ బుధవారాల్లో  భక్తుల సంఖ్యను పూర్తిగా తగ్గించనున్నారు. దీంతో ఈ రెండురోజుల ఆదాయం మరింత తగ్గిపోయే అవకాశాలు ఉన్నట్లు అధికారులు పేర్కొంటున్నారు. గత మూడు రోజులుగా  భక్తుల సంఖ్య కూడా విపరీతంగా తగ్గిపోయింది. ఎక్కువ మంది భక్తులకు దర్శించకునేందుకు అవకాశం ఇచ్చినా, అంత మంది భక్తులు తిరుమలకు రావడానికి సంకోచిస్తున్నారు. దీనికి కారణం గతంలో టీటీడీ అధికారులు చేపట్టిన అతి ప్రచారమేనని తెలుస్తోంది. సోమవారం నాటికి భక్తుల సంఖ్య కూడా బాగా తగ్గిపోయి, అరగంటలో శ్రీవారి దర్శనం కల్పించేలా జరుగుతోంది.



మహాసంప్రోక్షణ ఆరంభం

Updated By ManamMon, 08/13/2018 - 04:58
  • 12 ఏళ్ల విరామం తర్వాత కార్యక్రమం.. 300 గ్రాముల బంగారంతో కూర్చ

  • దర్భల కూర్చకు బదులు బంగారం.. బంగారు కలశంతో పాటు ప్రతిష్ఠాపన

  • కలశంలోకి దేవతామూర్తుల ఆవాహన.. రోజూ 6 గంటల నుంచి హోమాలు

  • ఈ నెల 16 వరకు కార్యక్రమాలు

imageతిరుమల: తిరుమల శ్రీవారి ఆలయంలో 12 ఏళ్ల సుదీర్ఘ విరామం తర్వాత అష్టబంధన బాలాలయ మహాసంప్రోక్షణ వైదిక కార్యక్రమాలు ఆదివారం ఆగమోక్తంగా ప్రారంభమయ్యాయి. ఆగస్టు 16వ తేదీన మహాసంప్రోక్షణతో ఇవి ముగియను న్నాయి. ఉదయం ఒక హోమగుండాన్ని వెలిగించి పుణ్యాహ వచనం, పంచగవ్యారాధన, వాస్తు హోమం, రక్షాబంధనం చేపట్టారు. శ్రీవారి ఆలయ మహాసంప్రోక్షణలో వినియోగించే బంగారు కూర్చను టీటీడీ సిద్ధం చేసింది. 300 గ్రాముల బంగారంతో దీన్ని తయారుచేశారు. సాధారణంగా వైదిక కార్యక్రమాల్లో అర్చకులు దర్భలతో చేసిన కూర్చలను వినియోగిస్తారు. కూర్చలోకి మంత్రావాహన చేసి వైదిక క్రతువులకు దాన్ని ఉపయోగిస్తారు. అయితే ఇక్కడ మాత్రం బంగారు కూర్చను వాడుతుండటం విశేషం. శ్రీవారి మూలమూర్తిని ఆవాహన చేసిన బంగారు కలశంతో పాటు ఈ బంగారు కూర్చను యాగశాలలో ప్రతిష్ఠిస్తామని తిరుమల జేఈవో కేఎస్ శ్రీనివాసరాజు తెలిపారు.

కళాకర్షణ
రాత్రి 7 గంటల నుంచి 9 గంటల వరకు కళాకర్షణలో భాగంగా గర్భాలయంలోని మూలవర్లతోపాటు ఉప ఆలయాల్లోని imageదేవతామూర్తుల శక్తిని కుంభం(కలశం) లోకి ఆవాహన చేశారు. శ్రీవారి మూలమూర్తికి తల, నుదురు, ముక్కు, నోరు, గొంతు, రెండు భుజాలు, హృదయం, నాభి, కటి, మోకాలు, పాదాల్లో 12 జీవస్థానాలు ఉంటాయి. ఒక్కో జీవస్థానానికి 4 కళల చొప్పున మొత్తం 48 కళలు ఉంటాయి. ఈ 48 కళలను కుంభంలోకి ఆవాహన చేస్తారు. ఈ కుంభాలతో పాటు శ్రీ భోగశ్రీనివాసమూర్తి, శ్రీదేవి, భూదేవి సమేత శ్రీ మలయప్ప స్వామి వారు, శ్రీ ఉగ్ర శ్రీనివాసమూర్తి, శ్రీ చక్రత్తాళ్వార్, శ్రీ సీతాలక్ష్మణ సమేత శ్రీరాముల వారు, రుక్మిణీ సత్యభామ సమేత శ్రీకృష్ణస్వామివారి ఉత్సవమూర్తులను యాగశాలలోకి వేంచేపు చేస్తారు. ఉప ఆలయాల్లోని జయవిజయులు, ధ్వజస్తంభం, శ్రీ విష్వక్సేనుడు, శ్రీగరుడాళ్వార్, ప్రసాదం పోటులోని అమ్మవారు, లడ్డూపోటులోని అమ్మవారు, శ్రీ భాష్యకారులు, శ్రీ యోగ నరసింహస్వామి, శ్రీ వేణుగోపాలస్వామి, శ్రీ బేడి ఆంజనేయస్వామివారి శక్తిని కూడా కుంభంలోకి ఆవాహనచేసి యాగశాలకు తీసుకెళతారు. మొత్తం 18 వేదికలపై కుంభాలను కొలువుదీరుస్తారు. యాగశాలలో ప్రతిరోజూ నిత్య కైంకర్యాలతో పాటు ఉదయం 6 గంటల నుంచి హోమాలు నిర్వహిస్తారు.



మహాసంప్రోక్షణకు అంకురార్పణ

Updated By ManamSat, 08/11/2018 - 11:41

Tirumalaతిరుమల: పన్నేండేళ్లకోసారి నిర్వహించే బాలాలాయ అష్టబంధన మహాసంప్రోక్షణ కార్యక్రమానికి శనివారం సాయంత్రం టీటీడీ అధికారులు అంకురార్పణ చేయనున్నారు. ఇక ఆదివారం నుంచి ఈ నెల 16వరకు బాలాలాయ మహాసంప్రోక్షణ జరిపించనున్నారు. ఈ నేపథ్యంలో సుప్రభాత సేవ మొదలుకొని ఏకాంత సేవ వరకు అన్నీ ఆగమోక్తంగా నిర్వహిస్తారు.

మరోవైపు మహాసంప్రోక్షణ కార్యక్రమం నేపథ్యంలో శ్రీవారి ప్రత్యేక దర్శనాలు, వీఐపీ దర్శనాలు, ఆర్జిత సేవలను రద్దు చేశారు. నేటి నుంచి పరిమిత సంఖ్యలో భక్తులకు శ్రీవారి దర్శనానికి అనుమతిస్తామని టీటీడీ ఈవో అనిల్ కుమార్ సింఘాల్ తెలిపారు. మొత్తం 14గంటల్లో సుమారు 50వేల మంది దర్శనం చేసుకుంటారని ఆలయ అధికారులు వెల్లడించారు. ఈ నెల 17 నుంచి శ్రీవారి సేవలు యథావిధిగా మొదలౌతాయని పేర్కొన్నారు.



తిరుమల వెంకన్న సమాచారం

Updated By ManamFri, 08/10/2018 - 08:39

ttd

తిరుమల: అఖిలాండ కోటి బ్రహ్మాండ నాయకుడు వెంకన్న కొలువైన తిరుమల పుణ్యక్షేత్రంలో భక్తుల రద్దీ సాధారణంగా ఉంది. స్వామివారి సర్వదర్శనం కోసం భక్తులు 5 కంపార్ట్‌మెంట్లలో వేచి చూస్తున్నారు. సర్వదర్శనం, నడకదారి, ప్రత్యేక ప్రవేశ దర్శనం భక్తులకు ఉదయం 9 గంటలు నుంచి టైంస్లాట్ కింద టోకెన్లను జారీ చేయనున్నట్లు  టీటీడీ ఓ ప్రకటనలో తెలిపింది. కాగా.. తిరుమలేశ్వరుడి ఉచిత దర్శనానికి 12 గంటలు, టైంస్లాట్, సర్వ, దివ్య దర్శనాలకు 2 గంటలు, ప్రత్యేక ప్రవేశ దర్శనానికి రెండు గంటల సమయం పడుతుందని అధికారులు స్పష్టం చేశారు. కాగా గురువారం ఒక్కరోజే శ్రీవారికి హుండీ ద్వారా రూ.3.26 కోట్ల ఆదాయం లభించింది.

ఇదిలా ఉంటే.. నేటి అర్థరాత్రి నుంచి శ్రీవారి టోకెన్ల జారీని టీటీడీ నిలిపివేయనుంది. అష్టబంధన బాలాలయ మహాసంప్రోక్షణం నేపథ్యంలో టోకెన్లను నిలిపివేస్తున్నట్లు టీటీడీ అధికారులు వెల్లడించారు. రేపు మహాసంప్రోక్షణకు అంకురార్పణ జరుగనుంది. మహాసంప్రక్షణ సమయంలో భక్తులకు పరిమితి సంఖ్యలో మాత్రమే శ్రీవారి దర్శనానికి అనుమతి ఉంటుంది.

కాగా.. తెలుగురాష్ట్రాలతో పాటు కర్ణాటక, తమిళనాడు నుంచి 45 మంది ఉద్ధండ పండితులంతా ఇప్పుడిప్పుడే తిరుమలకు చేరుకుంటున్నారు. ఇప్పటికే యాగశాలలో ఇటుకలు, ఎర్రమట్టితో 28 హోమగుండాలు నిర్మించి, వాటిని గోమయంతో అలికారు. 21 హోమ వేదికలు ఏర్పాటు అయ్యాయి. ఇక్కడి కరెంటు తీగలు, బల్బులు, సీసీ కెమెరాలను తొలగించి, వెలుతురు కోసం 1000 నెయ్యి దీపాలను ఏర్పాటు చేశారు.



తిరుమల శ్రీవారి సమాచారం

Updated By ManamThu, 08/09/2018 - 08:35

TTD

తిరుమల: అఖిలాండ కోటి బ్రహ్మాండ నాయకుడు కొలువైన తిరుమల వెంకన్న సన్నిధిలో భక్తుల రద్దీ సాధారణంగానే ఉంది. సర్వదర్శనం కోసం 14 కంపార్ట్‌మెంట్లలో భక్తులు వేచి చూస్తున్నారు. సర్వ, నడకదారి, ప్రత్యేక ప్రవేశ దర్శనం భక్తులకు ఉదయం 9 గంటల నుంచి టైంస్లాట్ కింద టోకెన్ల జారీ చేస్తామని టీటీడీ ఓ ప్రకనటలో తెలిపింది. కాగా.. స్వామి వారి ఉచిత దర్శనానికి 12 గంటలు, టైంస్లాట్, సర్వ, దివ్య దర్శనాలకు 3 గంటల సమయం పడుతుందని టీటీడీ అధికారులు చెబుతున్నారు. అయితే ప్రత్యేక ప్రవేశ దర్శనానికి మాత్రం కేవలం రెండు గంటల సమయం మాత్రమే పడుతోంది. కాగా.. బుధవారం ఒక్కరోజు శ్రీవారి హుండీ ద్వారా రూ.2.87కోట్లు.
 
ఇదిలా ఉంటే.. గురువారం అర్థరాత్రి నుంచి శ్రీవారి టోకెన్ల జారీని టీటీడీ నిలిపివేయనున్నట్లు తెలిపింది. కాగా అష్టబంధన బాలాలయ మహాసంప్రోక్షణం నేపథ్యంలో టోకెన్లను నిలిపివేస్తున్నట్లు టీటీడీ అధికారులు ఇదివరకే ప్రకటించిన సంగతి తెలిసిందే. ఈనెల 11న మహాసంప్రోక్షణకు అంకురార్పణ జరుగనుంది. కాగా మహాసంప్రోక్షణ విషయమై అప్పట్లో పెద్ద గొడవ జరగడంతో చివరికి వెనక్కి తగ్గిన టీటీడీ పరిమితి సంఖ్యలో భక్తులను దర్శానికి అనుమతిస్తారు.





Related News