bse

రూపాయి అలపై ఎగసిన మార్కెట్లు

Updated By ManamFri, 11/02/2018 - 22:53
  • 35 వేల మైలురాయిపై సెన్సెక్స్

  • వారం వారీగా కూడా లాభాలతో ముగిసిన సూచీలు

bseముంబై: బొంబాయి స్టాక్ ఎక్చ్సేంజి (బి.ఎస్.ఇ) 30 కంపెనీల సూచి సెన్సెక్స్ శుక్రవారం దాదాపు 580 పాయింట్లు దూసుకెళ్ళి ఒక నెల గరిష్ఠ స్థాయి 35,011.65 వద్ద ముగిసింది. గ్లోబల్ ఈక్విటీలలో తిరుగులేని ర్యాలీ మధ్య రూపాయి ముచ్చటపడ దగిన రీతిలో పుంజుకుంది. అమెరికా-చైనా వాణిజ్య యుద్ధంపై ఆందోళనలు సడలడంతో ఏషియన్, యూరోపియన్ మార్కెట్లు ఆరోహణలో సాగడంతో ట్రేడింగ్ సెంటిమెంట్‌కు ఊతం లభించింది. దానికితోడు ముడి చమురు ధరలు కూడా కొంత సడలాయి. 

బలపడిన రూపాయి
భారతీయ రూపాయి  ఏకంగా 95 పైసలు పుంజుకుని, డాలర్‌తో మారకంలో  (ఇంట్రా-డే) రూ. 72.50 వద్ద ట్రేడయింది. సెన్సెక్స్ 34,743.95 వద్ద బలమైన స్థాయిలో ఆరంభమై 35,000 మైలురాయిని తిరిగి వశపరచుకుంది. అది ఒక దశలో 35,190.20 స్థాయిని తాకింది. కానీ, లాభాల స్వీకరణ చోటుచేసుకోవడంతో  సెన్సెక్స్ లాభాలు కొంత తగ్గాయి. చివరకు అది 579.68 పాయింట్ల లాభంతో 35,011.65 వద్ద ముగిసింది. అక్టోబర్ 4 నాటి (35,169.16 పాయింట్ల) తర్వాత సెన్సెక్స్‌కు ఇదే అత్యధిక ముగింపు. నేషనల్ స్టాక్ ఎక్చ్సేంజి (ఎన్.ఎస్.ఇ) 50 కంపెనీల సూచి నిఫ్టీ కూడా 172.55 పాయింట్లు పుంజుకుని 10,553 వద్ద ముగిసింది. అది ఒక దశలో 10,606.95 స్థాయిని తాకింది. వారం ప్రాతిపదికన చూసినా కూడా, (సెన్సెక్స్, నిఫ్టీ) సూచీలు రెండూ రెండు వారాల నష్టాల పరంపరకు తెరదించుతూ వరుసగా 1662.34 పాయింట్ల, 523 పాయింట్ల లాభాలను నమోదు చేశాయి. 

చల్లారిన బ్రెంట్ క్రూడ్ 
అంతర్జాతీయ గీటురాయిగా భావించే బ్రెంట్ క్రూడ్ ధర 73 డాలర్ల స్థాయి దిగువకు దిగి, ఏడు నెలల కనిష్ఠ స్థాయి 72.65 డాలర్ల వద్ద ట్రేడయింది. ప్రపంచంలోని ప్రధాన ఉత్పాదనదారుల నుంచి  అధిక సరఫరాతో ముడి చమురు ధర 3.48 శాతం తగ్గుదలను చూసింది. జి.ఎస్.టి వసూళ్ళు ఐదు నెలల వ్యవధి తర్వాత, అక్టోబర్ నెలలో రూ. 1 లక్ష కోట్ల మైలురాయిని అధిగమించడం కూడా ఆశావాదాన్ని పెంపొందించింది. పండుగ సీజన్‌లో వ్యయాలు, ఎగవేత నిరోధక చర్యల ఫలితంగా వసూళ్ళు పెరిగాయి. 

మారిన ధోరణి
కొంతకాలంగా వరుసగా అమ్మకాలు సాగిస్తూ వచ్చిన విదేశీ మదుపు సంస్థలు గురువారం రూ. 348.75 కోట్ల విలువ చేసే తాజా కొనుగోళ్ళు జరిపాయి. దేశీయ మదుపు సంస్థలు రూ. 509.17 కోట్ల విలువ చేసే షేర్లను విక్రయించాయి.



మార్కెట్లు మళ్లీ ఢమాల్

Updated By ManamFri, 10/26/2018 - 22:34
  • అమ్మకాలు పెరగటంతో మార్కెట్ల భారీ పతనం

  • ఏడు నెలల కనిష్ఠ స్థాయికి బీఎస్‌ఈ

  • బీఎస్‌ఈ 33,349, ఎన్‌ఎస్‌ఈ 10,030 వద్ద ముగింపు

  • అంతర్జాతీయ ప్రతికూల పవనాలే కారణమన్న విశ్లేషకులు

BSEముంబై: దేశీయ స్టాక్ మార్కెట్లు వరుసగా రెండో సీజన్‌లో అమ్మకాలు పెరగడంతో వారంతంలో నష్టాలను మూటగట్టుకున్నాయి. అంతర్జాతీయ మార్కెట్ల నుంచి వచ్చిన ప్రతికూలసంకేతాలతో సెన్సెక్స్ 341 పాయింట్లు పతనం కాగా,33,349 వద్ద ఏడు నెలల కనిష్ఠ స్థాయిలో ముగిసింది. ఇక జాతీయ ఎక్స్‌చేంజీ నిఫ్టీ 95 పాయింట కోల్పోపయి 10,030 ముగిసింది. రూపాయి పతనమవ్వడం ఇందుకు ప్రధాన కారణంగా బ్రోకర్లు చెప్పారు. రెండో త్రైమాసికంలో ఫలితాలు వెలువడిన తదనంతరం మారుతి సుజుకి, ఎస్ బ్యాంక్ వంటి కంపెనీలు నిరుత్సాహపరచడంతో మార్కెట్లు కుదేలవ్వడానికి ఒక కారణంగా వారు చెప్పారు. అయితే ఉదయం నిరుత్సాహంగా ప్రారంభమైన బీఎస్‌ఈ కొద్ది సేపటికే 300 పాయింట్లను కోల్పోయి మదుపర్లను కలవర పెట్టాయి. తిరిగి కొద్దిగా కోలుకున్నప్పటకీ తరిగి ఏప్రిల్ నెలలో నమోదైన స్థాయిని కనబర్చి భారీ నష్టాలను మిగిల్చాయి. ఇక ఎన్‌ఎస్‌ఈ ప్రారంభ సమయం నుంచే 10,128.85-10,004.55 పాయిట్ల మధ్య ఊగిసలాడి చివరకు 10,030 వద్ద ట్రేడింగ్‌ను ముగించాయి. ఇక రెండు ఇండెక్స్‌లు వరుసగా  రెండో వారంలో నష్టాలనే నమోదు చేశాయి. కాగా, రెండు వారాల్లో కలిపి 996.32 పాయిట్లను ఇండెక్సులు కోల్పోయాయి. అయితే ముందునుంచే బీఎస్‌ఈ నష్టాల బాట పట్టినప్పటికీ ఎన్‌ఎస్‌ఈ మాత్రం కొంత ఆటు పోట్ల మధ్యే ట్రేడింగ్‌ను సాగించింది. బ్యాంకింగ్ దిగ్గజాలు యాక్సిస్ బ్యాంకు, ఇండస్‌ఇండ్‌బ్యాంకు,  కోటక్ బ్యాంకులతో పాటు పెద్ద కంపెనీలైన ఓఎన్‌జీసీ, ఇన్ఫోసిస్, టీసీఎస్, హెయూఎల్, ఏషియన్ పెయింట్స్, సన్ ఫార్మా షేర్లు భారీగా నష్టపోయాయి. టాటా మోటార్స్, రిలయన్స్, విప్రో, హీరో మోటార్స్, బజాజ్ ఆటో, భారతీ ఎయిర్‌టెల్, టాటా స్టీల్ షేర్లు స్వల్పంగా లాభాలను నమోదు చేశాయి.



దిగువ దిశలో మార్కెట్లు

Updated By ManamThu, 10/25/2018 - 22:31
  • ప్రపంచ మార్కెట్ల పతన ప్రభావం

  • ఫ్యూచర్లు, ఆప్షన్లలో లావాదేవీలను నవంబర్‌కు పొడిగించని ఇన్వెస్టర్లు

bseముంబై: ప్రపంచ మార్కెట్ల పతనాన్ని అనుసరిస్తూ బి.ఎస్.ఇ సెన్సెక్స్ గురువారం సుమారు 344 పాయింట్లు కోల్పోయింది. రూపాయిలో తాజా బలహీనత మార్కెట్ల పతనంలో దాని వంతు పాత్రను పోషించింది. అక్టోబర్ ఫ్యూచర్లు, ఆప్షన్ల గడువు ముగియడం మార్కెట్ కష్టాలను మరింత పెంచింది. నవంబర్ సిరీస్‌కు తీసుకెళ్ళడానికి బదులు ఇన్వెస్టర్లు  విక్రయాలకు మొగ్గు చూపారని బ్రోకర్లు చెప్పారు. అక్టోబర్ ఫ్యూచర్లు, ఆప్షన్ల కాలంలో బొంబాయి స్టాక్ ఎక్చ్సేంజి (బి.ఎస్.ఇ) సెన్సెక్స్ 2,634 పాయింట్లు పతనమైంది. నేషనల్ స్టాక్ ఎక్చ్సేంజి (ఎన్.ఎస్.ఇ) నిఫ్టీ 852.65 పాయింట్లు కోల్పోయింది. అమెరికాలో షేర్లు బుధవారం పతనమవడంతో ప్రపంచ మార్కెట్లు కుదేలయ్యాయి. అవి ఈ ఏడాది గడించిన లాభాలన్నీ ఒక్క దెబ్బతో తుడిచిపెట్టుకుపోయాయి. కంపెనీలు ప్రకటిస్తున్న ఫలితాలు, పెరుగుతున్న భౌగోళిక, రాజకీయ ఉద్రిక్తతలు కూడా ప్రభావం చూపాయి. ఫారెక్స్ మార్కెట్‌లో అమెరికన్ డాలర్‌తో రూపాయి మారకం విలువ గురువారం (ఇంట్రా-డేలో) 22 పైసలు క్షీణించి రూ. 73.38గా ఉంది. సెన్సెక్స్‌లోని 30 కంపెనీల్లో 22 కంపెనీల షేర్లు నష్టాలతో ముగియడంతో అన్ని రంగాల సూచీలు నష్టాల్లోనే ముగిశాయి. బుధవారం టాప్ ఇండెక్స్ గైనర్‌గా నిలిచిన భారతీ ఎయిర్‌టెల్ గురువారం సెషన్‌లో పెద్ద లూజర్‌గా మిగిలింది. దాని షేర్ విలువ 6.60 శాతం క్షీణించింది. సెన్సెక్స్ 33,778.60 వద్ద ఆరంభమైన తర్వాత పతనం మొదలై సెషన్ పొడుగూతా కొనసాగింది. ప్రపంచ మార్కెట్లలో అమ్మకాలతో భారతీయ స్టాక్ మార్కెట్లలో కూడా బహుముఖ అమ్మకాలు చోటుచేసుకున్నాయి. అదొక దశలో 33,553.18 కనిష్ఠ స్థితిని చూసింది. చివరకు 343.87 పాయింట్ల నష్టంతో 33,690.09 వద్ద ముగిసింది. సెన్సెక్స్ బుధవారం దాదాపు 187 పాయింట్లు లాభపడింది. నిఫ్టీ కూడా 99.85 పాయింట్లు నష్టపోయి 10,124.905 వద్ద ముగిసింది. 

విదేశీ మదుపు సంస్థలు బుధవారం రూ. 2,040.54 కోట్ల విలువ చేసే షేర్లను విక్రయించగా, దేశీయ మదుపు సంస్థలు రూ. 1873.51 కోట్ల విలువ చేసే ఈక్విటీలను కొనుగోలు చేసినట్లు తాత్కాలిక డాటా సూచించింది. ‘‘11,000 స్ఠాయిల నుంచి నిఫ్టీలో 7 శాతం దిద్దుబాటు చోటుచేసుకుంది. అప్పటి నుంచి మార్కెట్లు మొత్తం నెలంతా దిగువ గతిలోనే ఉన్నాయి. ఐ.ఎల్ అండ్ ఎఫ్.ఎస్ ఎగవేత అనంతరం నెలకొన్న లిక్విడిటీ కొరత, రూపాయి మారకం విలువ, ముడి చమురు ధరల్లో హెచ్చు తగ్గులు వంటి స్థూల అంశాలు ఇన్వెస్టర్లను మార్కెట్లకు దూరం ఉంచాయి. అత్యంత అధ్వానమైన పనితీరును కనబరచిన రంగంగా నాన్ బ్యాంకింగ్ ఫినాన్స్ కంపెనీల రంగం నిలిచింది. కంపెనీలు ఇంతవరకు ప్రకటించిన త్రైమాసిక ఫలితాలు మిశ్రమంగా ఉన్నాయి. ఇటువంటి పరిస్థితుల్లో ఇన్వెస్టర్లు జాగ్రత్తగా ఎంచుకున్న షేర్లపైనే దృష్టి పెట్టడం మంచిది’’ అని ఎమ్కే గ్లోబల్ ఫినాన్షియల్ సర్వీసెస్‌కు చెందిన రాహుల్ మిశ్రా అన్నారు.



34వేల మైలురాయిపై సెన్సెక్స్

Updated By ManamWed, 10/24/2018 - 23:28
  • సడలిన ముడి చమురు ధరలు

  • కొద్దిగా బలపడిన రూపాయి

  • ఎగువ గతికి మారిన మార్కెట్లు

bseముంబై: బొంబాయి స్టాక్  ఎక్స్చేంజి (బి.ఎస్.ఇ) సెన్సెక్స్ నాలుగు సెషన్ల పతన ధోరణికి బుధవారం బ్రేక్ వేసి, 187 పాయింట్లు లాభపడడం ద్వారా 34,000 స్థాయిని తిరిగి అందుకుంది. ముడి చమురు ధరలు సడలడం, రూపాయి కొద్దిగా రికవరవడం మార్కెట్ల ఆరోహణకు దోహదపడ్డాయి. నేషనల్ స్టాక్ ఎక్చ్సేంజి (ఎన్.ఎస్.ఇ) 50 కంపెనీల సూచి నిఫ్టీ కూడా 10,200 స్థాయికి ఎగువన ముగిసింది. గత పలు సెషన్లలో ‘షార్ట్ పొజిషన్లు’ సృష్టించుకుంటూ వచ్చిన బేర్ ఆపరేటర్లు డెరివేటివ్‌ల విభాగంలో అక్టోబర్ గడువు గురువారం పూర్తవనుండగా, తిరిగి కొనుగోళ్ళు జరపడం కనిపించిందని బ్రోకర్లు చెప్పారు. బ్యాంకింగ్, ఫినాన్షియల్  సర్వీసుల షేర్లు లాభపడడం మార్కెట్లను ఎగువకు నెట్టింది. అయితే, ఇన్ఫర్మేషన్ టెక్నాలజీ, ఫార్మా కౌంటర్లలో నష్టాలు మార్కెట్లు మరింత పెరగకుండా నిరోధించాయి. 

ఎయిర్‌టెల్ శుభవార్త
ఎయిర్‌టెల్ ఆఫ్రికాలో 1.25 బిలియన్ డాలర్లు పెట్టుబడి పెట్టేందుకు వార్‌బర్గ్ పిన్కస్, టిమాసెక్, సింగ్‌టెల్, సాఫ్ట్‌బ్యాంక్‌లతో సహా ఆరు గ్లోబల్ ఇన్వెస్టర్లు అంగీకరించారని ఎయిర్‌టెల్ ప్రకటించడంతో ఆ కంపెనీ షేర్ ధర బుధవారం 10.79 శాతం పెరిగింది. 

కాస్త బలపడిన రూపాయి
ఇదిఇలాఉండగా, ఫారెక్స్ మార్కెట్‌లో అమెరికన్ డాలర్‌తో మారకంలో రూపాయి 42 పైసలు బలపడి రూ. 73.15 (ఇంట్రా-డే)గా నిలిచింది. పటిష్టమైన స్థితిలో ఆరంభమైన సెన్సెక్స్ 34 వేల మైలురాయిని వేగంగా అందుకుంది. అది సెషన్‌లో 34,300.97 అధిక స్థాయిని కూడా తాకింది. సడలిన ముడి చమురు ధరలు, రూపాయిలో రికవరీ, సానుకూల ఏషియన్ సంకేతాలు చాలా వరకు మార్కెట్లకు మద్దతు ఇచ్చాయి. అయితే, ఇన్వెస్టర్లు హఠాత్తుగా అమ్మకాలకు దిగడంతో సెన్సెక్స్ నెగిటీవ్ జోన్‌లోకి జారుకుంది. అది 186.73 పాయింట్ల లాభంతో 34,033.96 వద్ద ముగియడానికి ముందు 33,726.07 కనిష్ఠ స్థితిని కూడా చూసింది. బలహీన దేశీయ సంకేతాలు, అంతర్జాతీయ అంశాల ప్రభావంతో సెన్సెక్స్ గత నాలుగు సెషన్లలో 1315 పాయింట్లు కోల్పోయింది. ఇక నిఫ్టీ 77.95 పాయింట్లు కోలుకుని 10,224.75 వద్ద ముగిసింది. ఇంట్రా-డేలో అది 10,126.70 నుంచి  10,290.65 మధ్య ఊగిసలాడింది. కాగా దేశీయ మదుపు సంస్థలు మంగళ వారం రూ. 116.41 కోట్ల విలువ చేసే షేర్లను కొనుగోలు చేయగా, విదేశీ మదుపు సంస్థలు రూ. 340.35 కోట్ల విలువ చేసే షేర్లను విక్రయించాయని తాత్కాలిక డాటా సూచించింది. 

తగ్గిన బ్రెంట్ క్రూడ్
బ్రెంట్ క్రూడ్ ధరలు 4.37 శాతం తగ్గాయి. అది మంగళవారం పీపా 76.24 డాలర్లు పలికింది. బుధవారం కూడా అది పీపా 76.72 డాలర్లుగా ఉంది. దాంతో స్పైస్‌జెట్, ఇంటర్‌గ్లోబ్, జెట్ ఎయిర్‌వేస్ విమానయాన కంపెనీల షేర్ల ధరలు 4 శాతం వరకు లాభపడ్డాయి.



కొనసాగిన పతనం

Updated By ManamTue, 10/23/2018 - 22:09
  • క్షీణించిన రూపాయి... వాణిజ్య యుద్ధ కలవరమే కారణం 

  • ఆరు నెలల కనిష్ఠ స్థాయిలకు సూచీలు

bseముంబై: స్టాక్ మార్కెట్లకు గీటురాళ్ళుగా భావించే సూచీలు సెన్సెక్స్, నిఫ్టీలు వరుసగా నాల్గో సెషన్‌లో మంగళవారం పతనమయ్యాయి. గత ఆరు నెలల్లో ఎన్నడూ లేనంత కనిష్ఠ స్థాయిలకు అవి పడిపోయాయి. ముఖ్యంగా ఇన్ఫర్మేషన్ టెక్నాలజీ, ఫార్మా షేర్ల పతనం సూచీలను కిందకు గుంజింది. డాలర్‌తో రూపాయి మారకం విలువ క్షీణించడం, అంతర్జాతీయ వాణిజ్య యుద్ధ తగవు, భౌగోళిక-రాజకీయ ఉద్రిక్తతలు తిరిగి తలెత్తడం మార్కెట్ల క్షీణతకు కారణమయ్యాయి. బొంబాయి స్టాక్ ఎక్చ్సేంజి (బి.ఎస్.ఇ) సెన్సెక్స్ 287.15 పాయింట్లు కోల్పోయి 33,847.23 వద్ద ముగిసింది. గత ఏప్రిల్ 10 తర్వాత, సెన్సెక్స్ ఇంత బలహీన స్థితిలో పడడం ఇదే మొదటిసారి. నేషనల్ స్టాక్ ఎక్చ్సేంజి (ఎన్.ఎస్.ఇ) నిఫ్టీ 98.45 పాయింట్లు కోల్పోయి 10,146.80 వద్ద ముగిసింది. ఏప్రిల్ 4 తర్వాత నిఫ్టీకి ఇదే అత్యంత కనిష్ఠ స్థాయి. అయితే, స్పెక్యులేటర్లు నష్టాలను తగ్గించుకునేందుకు ట్రేడింగ్ ముగింపు దశలో జరిపిన కొనుగోళ్ళు ఆ రెండు కీలక సూచీలు నష్టాలను తగ్గించుకునేందుకు సహాయపడ్డాయి. ఇదిఇలాఉండగా, అమెరికన్ డాలర్‌తో రూపాయి మారకం విలువ క్షీణించి రూ. 73.82 (ఇంట్రా-డే)గా ఉండడం కూడా ప్రతికూల ప్రభావాన్ని చూపింది. ‘‘ఇన్ఫర్మేషన్ టెక్నాలజీ, ఫార్మాస్యూటికల్స్ షేర్లలో లాభాల స్వీకరణ చోటుచేసుకోవడం మంగళవారం నాడు సూచీలను దిగవ గతి పట్టించింది. మార్కెట్లో మిగిలినవన్నీ సర్దుబాటుకు గురికాగా, ఇటీవల పతనమవకుండా నిలదొక్కుకున్నది ఈ రెండు రంగాల షేర్లే. కరెన్సీ తరుగుదల గాలులు మందగించడంతో వీటిలో కొన్ని లాభాలు బుక్ చేసుకోవడానికి ఇన్వెస్టర్లు మొగ్గు చూపారు’’ అని హెచ్.డి.ఎఫ్.సి సెక్యూరిటీస్‌కు చెందిన పి.సి.జి అండ్ క్యాపిటల్ మార్కెట్స్ గ్రూప్ అధిపతి వి.కె. శర్మ చెప్పారు. 

గత మూడు సెషన్లలో సెన్సెక్స్ 1028 పాయింట్లు కోల్పోయింది. 
‘‘మరోసారి తీవ్ర ఒడుదుడుకులతో సాగిన సెషన్‌లో, భారతీయ ఈక్విటీ గీటురాయి సూచీలు వరుసగా నాల్గో సెషన్‌లో తక్కువ స్థాయిలో ముగిశాయి. ప్రపంచ మార్కెట్ల సంకేతాలు బలహీనంగా ఉండడం దీనికి చాలా వరకు కారణం...స్వల్ప అధిక స్థాయిలో ముగిసిన విద్యుత్, రియల్టీ రంగాలను మినహాయిస్తే, ఇతర రంగాల సూచీలన్నీ నష్టాల్లోనే ముగిశాయి. ఐటీ, హెల్త్‌కేర్, ఎఫ్.ఎం.సి.జి షేర్లు ఎక్కువ నష్టపోయాయి. ప్రపంచవ్యాప్తంగా చూస్తే, ఏషియన్, యూరోపియన్ సూచీలు చాలా తక్కువ స్థాయిలో ట్రేడయ్యాయి’’ అని నిపుణులు చెప్పారు. వాల్‌స్ట్రీట్‌లో నష్టాలు వాటిపై ఆ రకమైన ప్రభావం చూపాయి. విదేశీ పోర్ట్‌ఫోలియో ఇన్వెస్టర్లు సోమవారం రూ. 511.91 కోట్ల విలువ చేసే షేర్లను విక్రయించగా, దేశీయ మదుపు సంస్థలు రూ. 303.21 కోట్ల విలువ చేసే షేర్లను కొనుగోలు చేశాయని తాత్కాలిక డాటా సూచించింది. 



ఆందోళనతో అమ్మకాలు

Updated By ManamMon, 10/22/2018 - 22:33
  • మూడో సెషన్‌లోనూ నష్టపోయిన మార్కెట్లు

sensexముంబై: భారతీయ ఈక్విటీలు వరుసగా మూడో సెషన్‌లో సోమవారం దిగువ గతిలో పయనాన్ని కొనసాగించాయి. ప్రధానంగా ఫినాన్షియల్, ఎనర్జీ రంగాల షేర్లలో చివరలో చోటుచేసుకున్న అమ్మకాలతో బొంబాయి స్టాక్ ఎక్చ్సేంజి (బి.ఎస్.ఇ)  ‘సెన్సెక్స్’ 181 పాయింట్లకు పైగా కోల్పోయింది. లిక్విడిటీ ఆందోళనలు, కంపెనీలు వెల్లడిస్తున్న రెండో త్రైమాసిక ఫలితాలు మిశ్రమంగా ఉండడంతో ఇన్వెస్టర్లు ఆచితూచి వ్యవహరించారు. ముడి చమురు ధర పీపా 80 డాలర్లను మించడం కూడా సెంటిమెంట్లను బలహీనపరచింది. ‘సెన్సెక్స్’లోని 30 కంపెనీల్లో ఇండస్‌ఇండ్ బ్యాంక్ షేర్ ఎక్కువగా 9.52 శాతం క్షీణించింది. రిలయన్స్ ఇండస్ట్రీస్ 3.56 శాతం పతనమైంది. ‘సెన్సెక్స్’ 34,689.39 వద్ద మొదలై 34.748.69 పాయింట్ల స్థాయిని తాకింది. అయితే, ట్రేడింగ్ చివరి గంటలో అమ్మకాలు ఊపందుకోవడంతో అది ప్రతికూల స్థితిలోకి జారుకుని 34,082.76 కనిష్ఠ స్థితిని చూసింది. చివరకు, 181.25 పాయింట్ల పతనంతో 34,134.38 వద్ద ముగిసింది. ద్రవ్యతపై కలవరం, బలహీనంగా ఉన్న ప్రపంచ మార్కెట్ల సంకేతాలతో ‘సెన్సెక్స్’ గత రెండు సెషన్లలో 847 పాయింట్లు కోల్పోయింది. 

అదేమాదిరిగా, నేషనల్ స్టాక్ ఎక్చ్సేంజి (ఎన్.ఎస్.ఇ) 50 కంపెనీల సూచి ‘నిఫ్టీ’ 10,224 నుంచి 10,408.65 మధ్య ఊగిసలాడిన తర్వాత, 58.30 పాయింట్ల నష్టంతో 10,245.25 వద్ద ముగిసింది. ‘‘ప్రపంచ మార్కెట్లు సానుకూలంగా ప్రారంభమైనప్పటికీ, నిఫ్టీ రేంజ్-బౌండ్‌లో ట్రేడ్ అయి, ప్రతికూల స్థితిలో ముగిసింది. లిక్విడిటీపై కలవరం, వడ్డీ రేటు దానికి కారణమయ్యాయి. మధ్య, చిన్న స్థాయి షేర్లు వాటి శక్తి మేరకు రాణించలేదు. ‘నిఫ్టీ’ లోని అగ్ర కంపెనీల క్యూ 2 ఫలితాలు మిశ్రమంగా ఉండడం ఇన్వెస్టర్ల సెంటిమెంట్‌ను బలహీనపరచింది. భవిష్యత్తులో కంపెనీల ఆదాయాలు తగ్గే రిస్కు కనిపిస్తోంది’’ అని జియోజీత్ ఫినాన్షియల్ సర్వీసెస్ పరిశోధన విభాగాధిపతి వినోద్ నాయర్ అన్నారు. 
మార్కెట్‌లో పరిస్థితిని మెరుగుపరచేందుకు ఆర్.బి.ఐ చర్యలు తీసుకున్నప్పటికీ, మార్కెట్‌లో నెలకొన్న ద్రవ్యత కొరత, పెరుగుతున్న ముడి చమురు ధరలు వంటి స్థూల అంశాల ఆందోళనలతో సెంటిమెంట్లు బలహీనంగానే ఉండిపోయాయని బ్రోకర్లు చెప్పారు. 

sensexబ్రెంట్ క్రూడ్ పీపా ధర సోమవారం 80.14 డాలర్లను తాకింది. ఏషియాలోని ఇతర మార్కెట్ల విషయానికి వస్తే,  మరిన్ని ఉద్దీపన చర్యలు ఉంటాయనే వాగ్దానంతో చైనా కంపెనీల షేర్లు రెండో సెషన్‌లోనూ పెరిగాయి. సౌదీ అరేబియా, ఇటలీ, బ్రెక్సిట్‌లపై భౌగోళిక, రాజకీయ ఆందోళనలు తగ్గుముఖం పట్టేట్లు చేయడానికి కూడా ఆ వాగ్దానం దోహదపడింది. చైనా ప్రపంచంలోనే రెండవ పెద్ద ఆర్థిక వ్యవస్థగా ఉంది. మరింత క్రియాశీల ద్రవ్య విధానాన్ని తీసుకువస్తామని బీజింగ్ వాగ్దానం చేసింది. ప్రపంచ ఆర్థిక సంక్షోభం తర్వాత, తిరిగి ఇప్పుడు మళ్ళీ చైనాలో వృద్ధి నత్తనడక సాగిస్తోంది. తిరిగి దేశీయ స్టాక్ మార్కెట్ విషయానికి వస్తే, విదేశీ పోర్ట్‌ఫోలియో ఇన్వెస్టర్లు శుక్రవారం రూ. 618.26 కోట్ల విలువైన షేర్లను విక్రయించగా, దేశీయ మదుపు సంస్థలు కూడా రూ. 2.14 కోట్ల విలువ చేసే షేర్లను విక్రయించాయని తాత్కాలిక డాటా సూచించింది. 



అమ్మకాల ఒత్తిడి

Updated By ManamWed, 10/17/2018 - 23:11
  • లాభాల స్వీకరణలో ఇన్వెస్టర్లు

  • కొనసాగిన రూపాయి కష్టాలు 

  • వెరసి మూడు రోజుల లాభాలకు బ్రేక్

rupeeeముంబై: బొంబాయి స్టాక్ ఎక్చ్సేంజి (బి.ఎస్.ఇ)కి గీటురాయిగా భావించే ‘సెన్సెక్స్’ మూడు రోజుల లాభాల ర్యాలీకి బుధవారం బ్రేక్ పడింది. బి.ఎస్.ఇ 30 షేర్ల ‘సెన్సెక్స్’ 383 పాయింట్లు పతనమైంది. పెరుగుతున్న ముడి చమురు ధరలు, రూపాయి మారకం విలువలో హెచ్చు తగ్గులు ఇన్వెస్టర్లలో కలవరం రేపాయి. ఆ బెంబేలు భారీయెత్తున అమ్మకాలకు పురికొల్పాయి. ప్రధానంగా ఫినాన్షియల్, మోటారు వాహనాల రంగ షేర్లలో అమ్మకాలు ముమ్మరంగా చోటుచేసుకున్నాయి. అమ్మకాలు, కొనుగోళ్ళు ఉవ్వెత్తున ఒకదాని తర్వాత ఒకటిగా చోటుచేసుకోవడంతో ‘సెన్సెక్స్’ దాదాపు 880 పాయింట్లు పెరగడమో లేదా తగ్గడమో అవుతూ వచ్చింది. నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి ‘నిఫ్టీ’ కూడా 131.70 పాయింట్లు పతనమై 10,500 స్థాయి దిగువకు జారుకుంది. ముఖ్యంగా ఆటో, రియల్టీ, ఆయిల్-గ్యాస్ షేర్లు తీవ్ర అమ్మకాల ఒత్తిడిని చవిచూశాయి. ద్రవ్యత ఆందోళనలతో సెంటిమెంట్లు దెబ్బతిన్నాయి. అవి నాన్-బ్యాంకింగ్ ఫినాన్షియల్ షేర్ల ధరలు పతనమొందేట్లు చేశాయి. 

బలపడని రూపాయి
ఇదిఇలాఉండగా, ఫారెక్స్ మార్కెట్‌లో రూపాయి ఆరంభంలో బలాన్ని ప్రదర్శించి రూ. 73.37గా ఉన్నప్పటికీ, తర్వాత 13 పైసలు క్షీణించి, అమెరికన్ డాలర్‌తో (ఇంట్రా-డేలో) రూ. 73.61 అయింది. రూపాయి ఇలా క్షీణించడం ఈక్విటీలపై ప్రభావం చూపింది. మొత్తం మీద మదుపరులలో వేచి చూసే ధోరణి కనిపించింది. వారు అప్రమత్త ధోరణిని అనుసరించారు. ‘సెన్సెక్స్’ బుధవారం 35,543.38 వద్ద మొదలై ఎర్లీ ట్రేడ్‌లో 35,605.43ను తాకింది. టెక్ దిగ్గజం ఇన్ఫోసిస్ క్యూ 2 ఫలితాలు ఊహించిన దానికన్నా మెరుగ్గా ఉండడంతో ‘సెన్సెక్స్’ మొదట్లో ఎగువ గతిలో సాగింది. అయితే, ఇన్వెస్టర్లు అన్ని రంగాల షేర్లను అమ్మడం ప్రారంభించడంతో పరిస్థితి మారింది. వారి అమ్మకాలు చాలా వరకు లాభాలను మూటగట్టుకునే స్వభావంతో సాగినవే. అమెరికా కేంద్ర బ్యాంక్‌కు చెందిన ఫెడరల్ ఓపెన్ మార్కెట్ కమిటీ (ఎఫ్.ఓ.ఎం.సీ) సమావేశ వివరాలు వెల్లడి కానున్నాయి. అమెరికాలో వడ్డీ రేట్లు ఏ గతిలో సాగనున్నాయో అవి సూచించే అవకాశం ఉంది. ఫలితంగా, గ్లోబల్ మార్కెట్లు మిశ్రమంగానే సాగాయి. రిలయన్స్ ఇండస్ట్రీస్ ప్రకటించబోయే ఫలితాల కోసం ఎదురు చూస్తున్న మదుపరులు అప్రమత్త వైఖరిని అనుసరించారు. దానితో, ‘సెన్సెక్స్’ చివరకు 382.90 పాయింట్ల నష్టంతో 34,779.58 వద్ద ముగిసింది. ఇక ‘నిఫ్టీ’ ఇంట్రా-డేలో 10,700 స్థాయిని తిరిగి అందుకుని, చివరకు 131.70 పాయింట్లు నష్టపోయి, 10,453.05 వద్ద ముగిసింది. దేశీయ మదుపు సంస్థల నిర్విరామ కొనుగోళ్ళు, పునరుద్యమించిన గ్లోబల్ ఈక్విటీ మార్కెట్ల స్ఫూర్తితో ‘సెన్సెక్స్’ గత మూడు సెషన్లలో దాదాపు 1161 పాయింట్లు పెరిగింది. కాగా, విదేశీ మదుపు సంస్థలు మంగళవారం రూ. 1165.63 కోట్ల విలువ చేసే షేర్లను విక్రయించగా, దేశీయ మదుపు సంస్థలు రూ. 1059.44 కోట్ల విలువ చేసే షేర్లను కొనుగోలు చేసినట్లు తాత్కాలిక డాటా సూచించింది. 

పెరిగిన క్రూడ్ ధరలు
బ్రెంట్ క్రూడ్ ధరలు పీపాకు (0.38 శాతం పెరిగి) 81.72 డాలర్లు పలుకుతూండగా, వెస్ట్ టెక్సాస్  ఇంటర్మీడియట్ క్రూడ్ ధర 0.26 శాతం పెరిగి పీపాకు 72.11 డాలర్లుగా ఉంది. అమెరికాలో చమురు నిల్వలు తగ్గడం ముడి చమురు ధరలను అలా ఎగదోసింది. 

గురువారం సెలవు
దసరా సందర్భంగా స్టాక్ ఎక్చ్సేంజీలకు గురువారం (అక్టోబర్ 18) సెలవు ప్రకటించారు. 



మార్కెట్లలో జోష్

Updated By ManamTue, 10/16/2018 - 22:17

bseముంబై: ఈక్విటీ గీటురాయి ‘సెన్సెక్స్’ వరుసగా మూడో సెషన్‌లోనూ మంగళవా రం విజయ పరంపరను కొనసాగించి, 297 పాయింట్లు పెరిగి, కీలకమైన 35,000 స్థాయిని తిరిగి అందుకుంది. రూపాయి బలపడడం, కార్పొరేట్ ఆదాయాల సీజన్ ఆరోగ్యకరమైన రీతిలో ప్రారంభమవడం వంటి సానుకూల స్థూల సంకేతాలు స్టాక్ మార్కెట్లకు ఊతమిచ్చాయి. 

బలపడిన రూపాయి
ఫారెక్స్ మార్కెట్‌లో అమెరికన్  డాలర్‌తో రూపాయి మారకం విలువ 25 పైసలు బలపడి (ఇంట్రా-డేలో) రూ. 73.58గా నిలిచింది. సడలిన ముడి చమురు ధరలు దీనికి తోడు ప్రపంచ ముడి చమురు ధరలు సడలాయి. ఏషియాలోని ఇతర మార్కెట్ల నుంచి సానుకూల సంకేతాలు లభించాయి. యూరోపియన్ మార్కెట్లలో షేర్లు హెచ్చు స్థాయిలో మొదలయ్యాయి. ఇవి కూడా మార్కెట్ ర్యాలీని పెంపొందించాయి. బ్రెంట్ క్రూడ్ పీపా మంగళవారం 80.58 డాలర్లు పలికింది. బొంబాయి స్టాక్ ఎక్చ్సేంజి (బి.ఎస్.ఇ) 30 షేర్ల ‘సెన్సెక్స్’ సెషన్‌లో సానుకూల స్థితిలోనే కొనసాగి 34,913.06 పాయింట్ల నుంచి 35,215.79 మధ్య ఊగిసలాడింది. అంతిమంగా 297.38 పాయింట్ల లాభంతో 35,162.48 వద్ద ముగిసింది. నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి ‘నిఫ్టీ’ 10,600 స్థాయిని తాకిన తర్వాత, 10,604.90 గరిష్ఠ స్థాయిని చూసింది. చివరకు 72.25 పాయింట్ల లాభంతో 10,584.75 వద్ద ముగిసింది. ‘‘మధ్య, చిన్న స్థాయి షేర్ల మద్దతుతో ‘నిఫ్టీ’ మంగళవారం అధిక స్థాయిని అందుకుంది. ‘నిఫ్టీ’కన్నా విస్తృత సూచీలు ఎక్కువ లాభపడ్డాయి. పి.ఎస్.యు బ్యాంకుల షేర్లు అగ్ర భాగాన నిలువగా, బ్యాంకింగ్ షేర్లు మిశ్రమ పెరుగుదలను సాధించాయి. ప్రపంచ సంకేతాలు కూడా మిశ్రమంగానే ఉన్నాయి. అమెరికన్ మార్కెట్లు క్షీణించగా, ఇతర మార్కెట్లలో చాలా భాగం స్థిరపడినట్లుగా కనిపించాయి’’ అని పీఎన్బీ పరిబస్ నిర్వహిస్తున్న పి.ఎం.ఎస్ షేర్‌ఖాన్ ఫండ్ మేనేజర్ రోహిత్ శ్రీవాస్తవ అన్నారు. 

ఇద్దరివీ కొనుగోళ్ళే
దేశీయ మదుపు సంస్థలు సోమవారం రూ. 294.78 కోట్లు విలువ చేసే షేర్లను కొనుగోలు చేయగా, విదేశీ మదుపు సంస్థలు కూడా రూ. 67.86 కోట్ల విలువ చేసే ఈక్విటీలను కొనుగోలు చేశాయని తాత్కాలిక డాటా సూచించింది. ప్రపంచ మార్కెట్ల పతనాన్ని అనుసరించి ఇటీవల తీవ్ర పతనాన్ని చూసిన దేశీయ మార్కెట్లు, కంపెనీలు రెండో త్రైమాసిక ఫలితాలను ప్రకటించడం మొదలుపెట్టిన సమయంలో తిరిగి గాడిన పడ్డాయని బ్రోక ర్లు చెప్పారు. 



ఎదురు గాలిలో ఆరోహణ

Updated By ManamMon, 10/15/2018 - 22:13
  • స్వల్పంగా పెరిగిన స్టాక్ మార్కెట్ సూచీలు

bseముంబై: బొంబాయి స్టాక్ ఎక్చ్సేంజి (బి.ఎస్.ఇ) 30 షేర్ల సున్నిత సూచి సోమవారం సుమారు 132 పాయింట్లు లాభపడి 34,865.10 వద్ద ముగిసింది. కొన్నాళ్ళుగా సాగుతున్న  వాణిజ్య వైరం, పెరుగుతున్న ముడి చమురు ధరల రూపంలో ఎదురు గాలులు ఇన్వెస్టర్ల సెంటిమెంట్లను దెబ్బతీయడం కొనసాగుతున్నప్పటికీ ఇన్ఫర్మేషన్ టెక్నాలజీ షేర్లలో కనిపించిన కొనుగోళ్ళు ‘సెన్సెక్స్’కు ఊతమిచ్చాయి. నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి ‘నిఫ్టీ’ 40 పాయింట్లు లాభపడి 10,512.50 వ ద్ద ముగిసింది. రూపాయిలో తాజా బలహీనత, పెరుగుతున్న ముడి చమురు ధరలు, ఏషియాలోని ఇతర మార్కెట్లలో మందగొడి  ధోరణితో ఇన్వెస్టర్ల మనోభిప్రాయాలు  ఆచితూచి వ్యవహరించే ధోరణితో సాగాయి. అమెరికా-చైనా వాణిజ్య వివాదం, చైనా ఆర్థిక వ్యవస్థలో మందగమనానికి ఉన్న అవకాశం, అమెరికా ఫెడరల్ రిజర్వ్ వడ్డీ రేట్లు పెంచే విధానాన్ని కొనసాగించవచ్చనే సంకేతాలు ఏషియాలో ఇతర మార్కెట్లలో మందగతికి కారణమయ్యాయి. 

దెబ్బతిన్న రూపాయి
ఫారెక్స్ మార్కెట్‌లో రూపాయి మరోసారి రూ. 74 స్థాయిని ఛేదించింది. అమెరికన్ డాలర్‌తో మారకంలో (ఇంట్రా-డేలో) రూ. 74.05గా ఉంది. బలపడిన బ్రెంట్ క్రూడ్ చమురుకు సంబంధించి అంతర్జాతీయ గీటురాయిగా భావించే బ్రెంట్ క్రూడ్ 0.98 శాతం పెరిగి, పీపా 81.79 డాలర్లుగా పలుకుతోంది. ‘‘అమెరికా-సౌదీ అరేబియాల మధ్య ఉద్రిక్తత హఠాత్తుగా పెరగడంతో చమురు ధరలు ఎగశాయి. ఫలితంగా రూపాయి ఒత్తిడికి లోనవుతూ వస్తోంది. క్యూ 2 ఫలితాల సీజన్ సానుకూల ధోరణిలోనే మొదలైంది. ఇన్ఫర్మేషన్ టెక్నాలజీ, ఎఫ్.ఎం.సి.జి రంగాల్లో  పెద్ద  కంపెనీలు ప్రకటిస్తున్న ఫలితాలు అంచనాలకు అనుగుణంగానే ఉన్నాయి’’ అని జియోజీత్ ఫినాన్షియల్ సర్వీసెస్ పరిశోధన విభాగాధిపతి వినోద్ నాయర్ అన్నారు. 

పెరిగిన టోకు ద్రవ్యోల్బణం
టోకు ధరల ఆధారిత ద్రవ్యోల్బణ సూచి సెప్టెంబర్‌లో రెండు నెలల గరిష్ఠ స్థాయి 5.13 శాతంగా ఉంది. ఆహార వస్తువుల ధరలు బలపడడం, పెట్రోల్, డీజిల్ ధరలు పెరగడం దానికి ప్రధాన కారణంగా భావిస్తున్నారు. 

తగ్గిన పారిశ్రామిక ఉత్పత్తి
పారిశ్రామిక ఉత్పత్తి  ఆగస్టులో  మూడు నెలల కనిష్ఠ స్థాయి 4.3 శాతానికి పడిపోయింది. రిటైల్ ద్రవ్యోల్బణం మాత్రం స్వల్పంగా పెరిగి సెప్టెంబర్‌లో 3.77 శాతంగా ఉంది. 

దేశీయ మదుపు సంస్థల మద్దతు
దేశీయ మదుపు సంస్థలు శుక్రవారం రూ. 1287 కోట్ల విలువ చేసే షేర్లను కొనుగోలు చేయగా, విదేశీ పోర్ట్‌ఫోలియో ఇన్వెస్టర్లు రూ. 1322 కోట్ల విలువ చేసే షేర్లను విక్రయించారని తాత్కాలిక డాటా సూచించింది. 



లాభాల్లో మార్కెట్లు

Updated By ManamFri, 10/12/2018 - 23:26
  • తగ్గిన ముడి చమురు ధరలు.. 

  • డాలరుతో మారకంలో కోలుకున్న రూపాయి

bseముంబై: ముడి చమురు ధరల్లో తగ్గుదల, రూపాయిలో రికవరీ రెండూ కలసి బి.ఎస్.ఇ ‘సెన్సెక్స్’ను శుక్రవారం పైకెత్తాయి.  బొంబాయి స్టాక్ ఎక్చ్సేంజి (బి.ఎస్.ఇ) 30 షేర్ల సున్నిత సూచి 700 పాయింట్లకు పైగా పెరిగింది. ‘సెన్సెక్స్’ గత 19 నెలల్లో ఒకే రోజులో ఇంత అత్యధిక స్థాయిలో లాభప డడం ఇదే మొదటిసారి. వరుసగా రెండు సెషన్లలో నష్టాల తర్వాత, గ్లోబల్ మార్కెట్లు కూడా బలం పుంజుకున్నాయి. ఫారెక్స్ మార్కెట్‌లో అమెరికన్ డాలర్‌తో మారకంలో రూపాయి 53 పైసలు పటిష్టపడి (ఇంట్రా-డేలో) రూ. 73.59 గా నిలిచింది. వారం వారీగా చూస్తే, రెండు సూచీలు గత ఆరు వారాల్లో మొదటిసారిగా లాభాలతో ముగిశాయి. ఈ వారంలో ‘సెన్సెక్స్’ 366.59 పాయింట్లు, ‘నిఫ్టీ’ 156.05 పాయింట్లు పెరిగాయి. 

రిటైల్ ఇన్వెస్టర్లు మార్కెట్‌కు తిరిగి రావడంతో, కొనుగోళ్ళ ఉధృతితో ‘సెన్సెక్స్’ 34,808.42 పాయింట్ల అధిక స్థాయిని తాకింది. తర్వాత, అది లాభాలలో కొన్నింటిని వదులుకుంది. అయినా, గణనీయంగా 732.45 పాయింట్ల పెరుగుదలతో 34,733.58 వద్ద ముగిసింది. ‘సెన్సెక్స్’ 2017 మార్చి తర్వాత ఒకే రోజులో ఇన్ని పాయింట్లు మూటగట్టుకోవడం ఇదే మొదటిసారి. నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి ‘నిఫ్టీ’ 237.85 పాయింట్ల లాభంతో 10,472.50 వద్ద ఈ వారానికి ముగింపు పలికింది. డే ట్రేడ్‌లో అది 10,492.45 పాయింట్ల అధిక స్థాయిని తాకింది. ఇన్వెస్టర్లు ఇటీవల దెబ్బతిన్న ఆటో, రియల్టీ, మెటల్, ఆయిల్ అండ్ గ్యాస్, ఎఫ్.ఎం.సి.జి, బ్యాంకింగ్, విద్యుత్, మౌలిక వసతులు, ఇన్ఫర్మేషన్ టెక్నాలజీ, క్యాపిటల్ గూడ్స్ షేర్లను కొనుగోలు చేశారు. దేశీయ మదుపు సంస్థలు కూడా మార్కెట్‌లోకి అవిచ్ఛిన్నంగా నిధులను ప్రవహింపజేశాయి.





Related News