sensex

మార్కెట్లలో జోష్

Updated By ManamTue, 10/16/2018 - 22:17

bseముంబై: ఈక్విటీ గీటురాయి ‘సెన్సెక్స్’ వరుసగా మూడో సెషన్‌లోనూ మంగళవా రం విజయ పరంపరను కొనసాగించి, 297 పాయింట్లు పెరిగి, కీలకమైన 35,000 స్థాయిని తిరిగి అందుకుంది. రూపాయి బలపడడం, కార్పొరేట్ ఆదాయాల సీజన్ ఆరోగ్యకరమైన రీతిలో ప్రారంభమవడం వంటి సానుకూల స్థూల సంకేతాలు స్టాక్ మార్కెట్లకు ఊతమిచ్చాయి. 

బలపడిన రూపాయి
ఫారెక్స్ మార్కెట్‌లో అమెరికన్  డాలర్‌తో రూపాయి మారకం విలువ 25 పైసలు బలపడి (ఇంట్రా-డేలో) రూ. 73.58గా నిలిచింది. సడలిన ముడి చమురు ధరలు దీనికి తోడు ప్రపంచ ముడి చమురు ధరలు సడలాయి. ఏషియాలోని ఇతర మార్కెట్ల నుంచి సానుకూల సంకేతాలు లభించాయి. యూరోపియన్ మార్కెట్లలో షేర్లు హెచ్చు స్థాయిలో మొదలయ్యాయి. ఇవి కూడా మార్కెట్ ర్యాలీని పెంపొందించాయి. బ్రెంట్ క్రూడ్ పీపా మంగళవారం 80.58 డాలర్లు పలికింది. బొంబాయి స్టాక్ ఎక్చ్సేంజి (బి.ఎస్.ఇ) 30 షేర్ల ‘సెన్సెక్స్’ సెషన్‌లో సానుకూల స్థితిలోనే కొనసాగి 34,913.06 పాయింట్ల నుంచి 35,215.79 మధ్య ఊగిసలాడింది. అంతిమంగా 297.38 పాయింట్ల లాభంతో 35,162.48 వద్ద ముగిసింది. నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి ‘నిఫ్టీ’ 10,600 స్థాయిని తాకిన తర్వాత, 10,604.90 గరిష్ఠ స్థాయిని చూసింది. చివరకు 72.25 పాయింట్ల లాభంతో 10,584.75 వద్ద ముగిసింది. ‘‘మధ్య, చిన్న స్థాయి షేర్ల మద్దతుతో ‘నిఫ్టీ’ మంగళవారం అధిక స్థాయిని అందుకుంది. ‘నిఫ్టీ’కన్నా విస్తృత సూచీలు ఎక్కువ లాభపడ్డాయి. పి.ఎస్.యు బ్యాంకుల షేర్లు అగ్ర భాగాన నిలువగా, బ్యాంకింగ్ షేర్లు మిశ్రమ పెరుగుదలను సాధించాయి. ప్రపంచ సంకేతాలు కూడా మిశ్రమంగానే ఉన్నాయి. అమెరికన్ మార్కెట్లు క్షీణించగా, ఇతర మార్కెట్లలో చాలా భాగం స్థిరపడినట్లుగా కనిపించాయి’’ అని పీఎన్బీ పరిబస్ నిర్వహిస్తున్న పి.ఎం.ఎస్ షేర్‌ఖాన్ ఫండ్ మేనేజర్ రోహిత్ శ్రీవాస్తవ అన్నారు. 

ఇద్దరివీ కొనుగోళ్ళే
దేశీయ మదుపు సంస్థలు సోమవారం రూ. 294.78 కోట్లు విలువ చేసే షేర్లను కొనుగోలు చేయగా, విదేశీ మదుపు సంస్థలు కూడా రూ. 67.86 కోట్ల విలువ చేసే ఈక్విటీలను కొనుగోలు చేశాయని తాత్కాలిక డాటా సూచించింది. ప్రపంచ మార్కెట్ల పతనాన్ని అనుసరించి ఇటీవల తీవ్ర పతనాన్ని చూసిన దేశీయ మార్కెట్లు, కంపెనీలు రెండో త్రైమాసిక ఫలితాలను ప్రకటించడం మొదలుపెట్టిన సమయంలో తిరిగి గాడిన పడ్డాయని బ్రోక ర్లు చెప్పారు. 



ఎదురు గాలిలో ఆరోహణ

Updated By ManamMon, 10/15/2018 - 22:13
  • స్వల్పంగా పెరిగిన స్టాక్ మార్కెట్ సూచీలు

bseముంబై: బొంబాయి స్టాక్ ఎక్చ్సేంజి (బి.ఎస్.ఇ) 30 షేర్ల సున్నిత సూచి సోమవారం సుమారు 132 పాయింట్లు లాభపడి 34,865.10 వద్ద ముగిసింది. కొన్నాళ్ళుగా సాగుతున్న  వాణిజ్య వైరం, పెరుగుతున్న ముడి చమురు ధరల రూపంలో ఎదురు గాలులు ఇన్వెస్టర్ల సెంటిమెంట్లను దెబ్బతీయడం కొనసాగుతున్నప్పటికీ ఇన్ఫర్మేషన్ టెక్నాలజీ షేర్లలో కనిపించిన కొనుగోళ్ళు ‘సెన్సెక్స్’కు ఊతమిచ్చాయి. నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి ‘నిఫ్టీ’ 40 పాయింట్లు లాభపడి 10,512.50 వ ద్ద ముగిసింది. రూపాయిలో తాజా బలహీనత, పెరుగుతున్న ముడి చమురు ధరలు, ఏషియాలోని ఇతర మార్కెట్లలో మందగొడి  ధోరణితో ఇన్వెస్టర్ల మనోభిప్రాయాలు  ఆచితూచి వ్యవహరించే ధోరణితో సాగాయి. అమెరికా-చైనా వాణిజ్య వివాదం, చైనా ఆర్థిక వ్యవస్థలో మందగమనానికి ఉన్న అవకాశం, అమెరికా ఫెడరల్ రిజర్వ్ వడ్డీ రేట్లు పెంచే విధానాన్ని కొనసాగించవచ్చనే సంకేతాలు ఏషియాలో ఇతర మార్కెట్లలో మందగతికి కారణమయ్యాయి. 

దెబ్బతిన్న రూపాయి
ఫారెక్స్ మార్కెట్‌లో రూపాయి మరోసారి రూ. 74 స్థాయిని ఛేదించింది. అమెరికన్ డాలర్‌తో మారకంలో (ఇంట్రా-డేలో) రూ. 74.05గా ఉంది. బలపడిన బ్రెంట్ క్రూడ్ చమురుకు సంబంధించి అంతర్జాతీయ గీటురాయిగా భావించే బ్రెంట్ క్రూడ్ 0.98 శాతం పెరిగి, పీపా 81.79 డాలర్లుగా పలుకుతోంది. ‘‘అమెరికా-సౌదీ అరేబియాల మధ్య ఉద్రిక్తత హఠాత్తుగా పెరగడంతో చమురు ధరలు ఎగశాయి. ఫలితంగా రూపాయి ఒత్తిడికి లోనవుతూ వస్తోంది. క్యూ 2 ఫలితాల సీజన్ సానుకూల ధోరణిలోనే మొదలైంది. ఇన్ఫర్మేషన్ టెక్నాలజీ, ఎఫ్.ఎం.సి.జి రంగాల్లో  పెద్ద  కంపెనీలు ప్రకటిస్తున్న ఫలితాలు అంచనాలకు అనుగుణంగానే ఉన్నాయి’’ అని జియోజీత్ ఫినాన్షియల్ సర్వీసెస్ పరిశోధన విభాగాధిపతి వినోద్ నాయర్ అన్నారు. 

పెరిగిన టోకు ద్రవ్యోల్బణం
టోకు ధరల ఆధారిత ద్రవ్యోల్బణ సూచి సెప్టెంబర్‌లో రెండు నెలల గరిష్ఠ స్థాయి 5.13 శాతంగా ఉంది. ఆహార వస్తువుల ధరలు బలపడడం, పెట్రోల్, డీజిల్ ధరలు పెరగడం దానికి ప్రధాన కారణంగా భావిస్తున్నారు. 

తగ్గిన పారిశ్రామిక ఉత్పత్తి
పారిశ్రామిక ఉత్పత్తి  ఆగస్టులో  మూడు నెలల కనిష్ఠ స్థాయి 4.3 శాతానికి పడిపోయింది. రిటైల్ ద్రవ్యోల్బణం మాత్రం స్వల్పంగా పెరిగి సెప్టెంబర్‌లో 3.77 శాతంగా ఉంది. 

దేశీయ మదుపు సంస్థల మద్దతు
దేశీయ మదుపు సంస్థలు శుక్రవారం రూ. 1287 కోట్ల విలువ చేసే షేర్లను కొనుగోలు చేయగా, విదేశీ పోర్ట్‌ఫోలియో ఇన్వెస్టర్లు రూ. 1322 కోట్ల విలువ చేసే షేర్లను విక్రయించారని తాత్కాలిక డాటా సూచించింది. 



లాభాల్లో మార్కెట్లు

Updated By ManamFri, 10/12/2018 - 23:26
  • తగ్గిన ముడి చమురు ధరలు.. 

  • డాలరుతో మారకంలో కోలుకున్న రూపాయి

bseముంబై: ముడి చమురు ధరల్లో తగ్గుదల, రూపాయిలో రికవరీ రెండూ కలసి బి.ఎస్.ఇ ‘సెన్సెక్స్’ను శుక్రవారం పైకెత్తాయి.  బొంబాయి స్టాక్ ఎక్చ్సేంజి (బి.ఎస్.ఇ) 30 షేర్ల సున్నిత సూచి 700 పాయింట్లకు పైగా పెరిగింది. ‘సెన్సెక్స్’ గత 19 నెలల్లో ఒకే రోజులో ఇంత అత్యధిక స్థాయిలో లాభప డడం ఇదే మొదటిసారి. వరుసగా రెండు సెషన్లలో నష్టాల తర్వాత, గ్లోబల్ మార్కెట్లు కూడా బలం పుంజుకున్నాయి. ఫారెక్స్ మార్కెట్‌లో అమెరికన్ డాలర్‌తో మారకంలో రూపాయి 53 పైసలు పటిష్టపడి (ఇంట్రా-డేలో) రూ. 73.59 గా నిలిచింది. వారం వారీగా చూస్తే, రెండు సూచీలు గత ఆరు వారాల్లో మొదటిసారిగా లాభాలతో ముగిశాయి. ఈ వారంలో ‘సెన్సెక్స్’ 366.59 పాయింట్లు, ‘నిఫ్టీ’ 156.05 పాయింట్లు పెరిగాయి. 

రిటైల్ ఇన్వెస్టర్లు మార్కెట్‌కు తిరిగి రావడంతో, కొనుగోళ్ళ ఉధృతితో ‘సెన్సెక్స్’ 34,808.42 పాయింట్ల అధిక స్థాయిని తాకింది. తర్వాత, అది లాభాలలో కొన్నింటిని వదులుకుంది. అయినా, గణనీయంగా 732.45 పాయింట్ల పెరుగుదలతో 34,733.58 వద్ద ముగిసింది. ‘సెన్సెక్స్’ 2017 మార్చి తర్వాత ఒకే రోజులో ఇన్ని పాయింట్లు మూటగట్టుకోవడం ఇదే మొదటిసారి. నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి ‘నిఫ్టీ’ 237.85 పాయింట్ల లాభంతో 10,472.50 వద్ద ఈ వారానికి ముగింపు పలికింది. డే ట్రేడ్‌లో అది 10,492.45 పాయింట్ల అధిక స్థాయిని తాకింది. ఇన్వెస్టర్లు ఇటీవల దెబ్బతిన్న ఆటో, రియల్టీ, మెటల్, ఆయిల్ అండ్ గ్యాస్, ఎఫ్.ఎం.సి.జి, బ్యాంకింగ్, విద్యుత్, మౌలిక వసతులు, ఇన్ఫర్మేషన్ టెక్నాలజీ, క్యాపిటల్ గూడ్స్ షేర్లను కొనుగోలు చేశారు. దేశీయ మదుపు సంస్థలు కూడా మార్కెట్‌లోకి అవిచ్ఛిన్నంగా నిధులను ప్రవహింపజేశాయి.



మళ్ళీ కుదేలైన మార్కెట్లు

Updated By ManamThu, 10/11/2018 - 23:01
  • కుంగిన వాల్‌స్ట్రీట్ ప్రపంచ మార్కెట్లలో అమ్మకాలకు పురికొల్పింది

stock-marketsముంబై: బొంబాయి స్టాక్ ఎక్చ్సేంజి (బి.ఎస్.ఇ) ‘సెన్సెక్స్’  గురువారం 750 పాయింట్లకు పైగా పతనమై, ఆరు నెలల కనిష్ఠానికి పడిపోగా, నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి ‘నిఫ్టీ’ 10,300 స్థాయికి దిగువన ముగిసింది. ప్రపంచ మార్కెట్లలో ముమ్మర అమ్మకాలతో ఇన్వెస్టర్ల సెంటిమెంట్ దెబ్బతినడంతో ప్రపంచ సూచీలన్నీ నష్టాలను చవి చూశాయి. విదేశీ ఫండ్లు మదుపు మొత్తాలను నిర్విరామంగా వెనక్కి తీసుకుంటూండడం కూడా ఇన్వెస్టర్ల కష్టాలకుతోడైంది. తక్కువ స్థాయిలోనే మొదలైన బి.ఎస్.ఇ 30 షేర్ల ‘సెన్సెక్స్’ 1000 పాయింట్లకు పైగా కోల్పోయి, 34,000 స్థాయి కిందకు జారిపోయింది. మధ్యాహ్న ట్రేడ్‌లో 34,325.09ని తాకడానికి ముందు 33,723.53 తక్కువ స్థాయిని చూసింది. ‘సెన్సెక్స్’ చివరకు 759.74 పాయింట్ల నష్టంతో 34,001.15 వద్ద ముగిసింది. ఏప్రిల్ 11 తర్వాత, ‘సెన్సెక్స్’ ఇంత తక్కువ స్థాయిలో ముగియడం ఇదే మొదటిసారి. ‘సెన్సెక్స్’ బుధవారం 461.42 పాయింట్లు లాభపడిన సంగతి తెలిసిందే. 

‘నిఫ్టీ’ 225.45 పాయింట్ల నష్టంతో 10,234.65 పాయింట్ల వద్ద స్థిరపడింది. డే ట్రేడ్‌లో అది 10,138.60 నుంచి 10,335.95 మధ్య ఊగిసలాడింది. ‘‘ప్రపంచ మార్కెట్లలోని అమ్మకాలలో భాగంగానే, దేశీయ స్టాక్ మార్కెట్లలో కూడా అమ్మకాలు చోటుచేసుకున్నాయి. అమెరికా మార్కెట్‌లో తీవ్ర కోత వీటికి పురికొల్పింది’’ అని జియోజీత్ ఫినాన్షియల్ సర్వీసెస్‌లో ప్రధాన ఇన్వెస్ట్‌మెంట్ వ్యూహకర్త వి.కె. విజయకుమార్ అన్నారు. ‘‘అమెరికా ఆర్థిక వ్యవస్థ పనితీరు చాలా బాగుంది. ద్రవ్యోల్బణం కూడా పెరగడం ప్రారంభించింది. ప్రపంచంలోనే రిస్క్ రహిత అసెట్‌గా భావించే అమెరికా 10 ఏళ్ళ బాండ్ ప్రతిఫలం దాదాపు 3.15 శాతంగా ఉంది. ఇది ఇండియా వంటి ప్రవర్థమాన మార్కెట్ల నుంచి  మదుపు మొత్తాలు తరలిపోవడానికి పురికొల్పుతోంది. అమెరికాలో బాండ్ల ప్రతిఫలాలు పెరగడం, ప్రవర్థమాన దేశాల కరెన్సీలు పడుతున్న కష్టాలకు ప్రపంచ వాణిజ్య ఘర్షణలు కూడా తోడవడం సెంటిమెంట్‌పై ప్రభావం చూపుతోంది’’ అని ఆయన అన్నారు. ఏషియన్ మార్కెట్లు తక్కువ స్థాయిలో ముగిశాయి. యూరోపియన్ మార్కెట్లు కూడా మందగించి గురువారం ఆరంభ సెషన్‌లో 18 నెలలకుపైగా చూడని కనిష్ఠ స్థాయిలకు పడిపోయాయి. వాల్‌స్ట్రీట్ బుధవారం హఠాత్తుగా దారుణమైన నష్టాలను చూసింది. వాల్‌స్ట్రీట్ ఎనిమిది నెలల కాలంలో అంతటి నష్టాలను ఎన్నడూ చూడలేదు. ప్రపంచంలోని మిగిలిన మార్కెట్లు ఈ బాటనే అనుసరించాయి. 

ఒడుదుడుకులు
ఫారెక్స్ మార్కెట్‌లో అమెరికన్ డాలర్‌తో మారకంలో రూపాయి మరోసారి సరికొత్త అత్యల్ప స్థాయి రూ. 74.50కి క్షీణించింది. మధ్యాహ్నా ట్రేడ్‌లో కొంత కోలుకుని 24 పైసలు బలపడింది. ఇన్ని ఒడుదుడుకుల మధ్య కాస్త ఊరట నిచ్చే అంశం బ్రెంట్ క్రూడ్ ధర పీపాకు 82 డాలర్ల దిగువకు తగ్గడం. కాగా, విదేశీ పోర్ట్‌ఫోలియో ఇన్వెస్టర్లు బుధవారం రూ. 1096 కోట్ల విలువ చేసే షేర్లను విక్రయించగా, దేశీయ మదుపు సంస్థలు రూ. 1893 కోట్ల విలువ చేసే షేర్లను కొనుగోలు చేశాయని తాత్కాలిక డాటా వెల్లడించింది.



మార్కెట్లో ‘రిలీఫ్ ర్యాలీ’

Updated By ManamWed, 10/10/2018 - 22:48

marketముంబై: ఇటీవలి వరుస పతనాల తర్వాత, స్టాక్ మార్కెట్ సూచీలు రెండూ బుధవారం బలమైన పునరాగమనాన్ని కనబరచాయి. బాగా దెబ్బతిన్న ఫినాన్షియల్, మోటారు వాహనాలు, లోహాల రంగ షేర్లను ఇన్వెస్టర్లు కొనుగోలు చేయడం, కనివిని ఎరుగని కనిష్ఠ స్థాయిల నుంచి రూపాయి కొంత కోలుకోవడం మార్కెట్ల ఆరోహణకు ఊతమిచ్చాయి. బొంబాయి స్టాక్ ఎక్చ్సేంజి (బి.ఎస్.ఇ) 30 షేర్ల సున్నిత సూచి 34,493.21 వద్ద ఆరంభమై 34,858.35 అధిక స్థాయిని తాకింది. చివరకు 461.42 పాయింట్ల లాభంతో 34,760.89 వద్ద ముగిసింది. నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి ‘నిఫ్టీ’ కూడా 10,400 కీలక స్థాయిని తిరిగి అందుకుంది. అది ఒక దశో 10,482.35 స్థాయిని తాకి, చివరలో 159.05 పాయింట్ల లాభంతో 10,460.10 వద్ద ముగిసింది. కొనుగోలు కార్యకలాపాలు వేగం పుంజుకోవడంతో కీలక సూచీలు సెషన్ పొడుగూతా సానుకూల స్థితిలోనే కొనసాగాయి. బి.ఎస్.ఇ ‘సెన్సెక్స్’ మంగళవారం దాదాపు 175 పాయింట్లు కోల్పోయిన సంగతి తెలిసిందే. నగదు కొరతతో బాధపడుతున్న నాన్ బ్యాంకింగ్ ఫినాన్షియల్ కంపెనీల (ఎన్.బి.ఎఫ్.సిల)కు చెందిన రూ. 45,000 కోట్ల విలువ చేసే ఆస్తులను కొనుగోలు చేయాలని ఎస్.బి.ఐ నిర్ణయించడం కూడా సెంటిమెంట్‌ను పెంపొందించింది. ఐ.ఎల్ అండ్ ఎఫ్.ఎస్ గ్రూప్ సంస్థలు వరుసగా రుణాల ఎగవేతలకు పాల్పడుతూండడంతో ఎదురు గాలులు ఎదుర్కొంటున్న ఎన్.బి.ఎఫ్.సిలకు ద్రవ్యత మద్దతు సమకూర్చడానికి ఎస్.బి.ఐ నిర్ణయం దోహదపడుతుందని భావిస్తున్నారు. గత కొద్ది రోజుల్లో బాండ్ ప్రతిఫలాలు తగ్గాయని, ఈ దశలోరూపాయి బలపడడం ‘రిలీఫ్ ర్యాలీ’కి సాయపడిందని బి.ఎన్.పి పరిబస్‌కు చెందిన ఫండ్ మేనేజర్ రోహిత్ శ్రీవాస్తవ అన్నారు. అమ్మకాలు మితిమీరి సాగిన మార్కెట్లో ఒత్తిడి సడలడానికి, కొత్త కొనుగోళ్ళు లేదా నష్టాలు తగ్గించుకునేందుకు జరిపిన కొనుగోళ్ళకు పురికొల్పిందని ఆయన తెలిపారు. 

కాస్త తేరుకున్న రూపాయి
ఫారెక్స్ మార్కెట్‌లో డాలర్‌తో మారకంలో రూపాయి విలువ 34 పైసలు బలపడి బుధవారం ఇంట్రా-డేలో రూ. 74.05 గా నిలిచింది.  ‘‘అమెరికాలో బాండ్ ప్రతిఫలాలు, డాలర్ మంగళవారం చల్లబడడం (తగ్గడం)తో గ్లోబల్ మార్కెట్లు కూడా ఊపిరి పీల్చుకున్నాయి. ఒత్తిడి ఇలాగే సడలితే, రానున్న రోజుల్లో కూడా ఈ లాభాలు కొనసాగవచ్చు’’ అని శ్రీవాస్తవ అన్నారు.

తగ్గని ముడి చమురు సెగ
మురుకు అంతర్జాతీయ గీటురాయిగా తీసుకునే బ్రెంట్ క్రూడ్ ధర పీపాకు దాదాపు 84.30 డాలర్లు పలుకుతోంది.  ‘‘అందరి దృష్టి కంపెనీలు ప్రకటించబోయే త్రైమాసిక ఫలితాలపైకి మళ్ళుతోంది. ఈక్విటీ మార్కెట్లకు అది కొంత ఊరట కల్పించవచ్చు’’ అని శాంక్టమ్ వెల్త్ మేనేజ్‌మెంట్ చీఫ్ ఇన్వెస్ట్‌మెంట్ అధికారి సునీల్ శర్మ అన్నారు. 

ఏవియేషన్ షేర్లకు రెక్కలు
విమాన ఇంధనంపై ఎక్సైజ్ సుంకంలో కోత పెట్టవచ్చనే వార్తలతో జెట్ ఎయిర్‌వేస్, స్పైస్‌జెట్, ఇంటర్‌గ్లోబ్ ఏవియేషన్‌ల షేర్ల ధరలు 7.78 శాతం వరకు పెరుగుదలను చూశాయి.



నష్టాలకు బ్రేక్

Updated By ManamMon, 10/08/2018 - 22:05
  • ఆటుపోట్ల ట్రేడింగ్‌లో లాభపడ్డ మార్కెట్లు

bseముంబై: తీవ్ర ఆటుపోట్లతో సాగిన సెషన్‌లో, ఇటీవల దెబ్బతిన్న, చౌక ధరకు లభిస్తున్న బ్యాంకింగ్, చమురు, ఇంధన వాయు, మోటారు వాహనాల రంగ షేర్లను మదుపరులు కొనుగోలు చేయడంతో, మూడు రోజులుగా కొనసాగిన పతన పరంపరకు, సోమవారం తెరపడింది. సెన్సెక్స్, నిఫ్టీలు సోమవారం సానుకూల స్థితిలో ముగిసేందుకు ఆ కొనుగోళ్ళు సాయపడ్డాయి. అలలుగా ఎగసిన అమ్మకాలు, కొనుగోళ్ళతో సెన్సెక్స్  660 పాయింట్లు పెరగడం, తగ్గడం అవుతూ వచ్చింది.  దేశీయ మదుపు సంస్థలు స్థిరంగా కొనసాగించిన కొనుగోళ్ళ మద్దతుతో బొంబాయి స్టాక్ ఎక్చ్సేంజి (బి.ఎస్.ఇ) 30 షేర్ల సున్నిత సూచి  34,636.43 పాయింట్ల అత్యధిక స్థాయిని తాకింది. కానీ, తర్వాత ఎటువైపూ స్థిరంగా మొగ్గ కుండా పెరుగుతూ, తగ్గుతూ వచ్చిన మార్కెట్లో, అమ్మకాల ఒత్తిడి వేగం పుంజుకోవడంతో, సెన్సెక్స్  33,974.66 పాయింట్ల అత్యల్ప స్థితికి పడిపోయింది. అయితే, మళ్ళీ చివరలో కొనసాగిన కొనుగోళ్ళతో సెన్సెక్స్ 97.39 పాయింట్లు లాభపడి అంతిమంగా 34,474.38  స్థాయి వద్ద ముగిసింది. వరుసగా గత మూడు సెషన్లలో సెన్సెక్స్ 2,149.15 పాయింట్లు కోల్పోయిన సంగతి తెలిసిందే. నేషనల్ స్టాక్ ఎక్చ్సేంజి (ఎన్.ఎస్.ఇ)  50 షేర్ల సూచి నిఫ్టీ కూడా 31.60 పాయింట్లు పుంజుకుని 10,348.05 వద్ద ముగిసింది. సోమవారంనాటి సెషన్లో అది 10,198.40 నుంచి 10,398.35 మధ్య ఊగిసలాడింది. సరసమైన ధరలకు లభించిన షేర్లను కొనుగోలు చేయడంతోపాటు, నష్టాలను తగ్గించుకునేందుకు ఇన్వెస్టర్లు జరిపిన కొనుగోళ్ళు కూడా మార్కెట్లో రికవరీకి దోహదపడ్డాయి. కంపెనీలు త్రైమాసిక ఫలితాలను వెల్లడించనుండడం ఈ వారంలో ప్రారంభం కానుండడంతో ఆశావహ ధోరణితో కూడిన అమ్మకాలు చోటుచేసు కోవడంతో సెంటిమెంట్ కొంతవరకు బలపడిందని ఒక బ్రోకర్ చెప్పారు.



నేటి నుంచి ట్రేడింగ్‌కు ఆవాస్ ఫినాన్షియరీ షేర్లు

Updated By ManamSun, 10/07/2018 - 22:06

bseన్యూఢిల్లీ: ఇనీషియల్ పబ్లిక్ ఆఫర్(ఐపీఓ) ద్వారా ఇటీవల రూ. 1,734 కోట్లను పొందిన ఆవాస్ ఫినాన్షియరీస్ సోమవారం స్టాక్ మార్కెట్‌లో లిస్ట్ కానుంది. ఈ సంస్థ తక్కువ, మధ్యస్థ ఆదాయాల వారికి గృహ రుణాలను అందిస్తోంది. కాగా, సెప్టెంబర్ 25-27 మధ్య ఒక్కో షేర్‌కు రూ. 818 నుంచి రూ. 821 చొప్పున ఐపీఒకు వెళ్లింది. ఇందులో 97 శాతం వాటను ఐపీఓకు కంపెనీ ఉంచింది. అయితే అవాస్ ఫినాన్షియరీస్ ఎన్‌ఎస్‌ఈ, బీఎస్‌ఈల్లో వేరు వేరు సర్క్యూలర్‌పై ట్రేడ్ కానున్నాయి. ఐపీఓ ద్వారా 1,62,49,359 ఆన్న షేర్ల యాంకర్ పార్టిషన్‌తో కలిపి 63,36,439 షేర్లకు తగ్గాయి. ఈ ఇష్యూను ఐసీఐసీఐ సెక్యూరిటీస్ లిమిటెడ్, సిటీ గ్రూపు గ్లోబల్ మార్కెట్ ఇండియా ప్రైవేట్ లిమిటెడ్, ఇడెల్‌వైస్ ఫినాన్షియల్ సర్వీస్ లిమిటెడ్, స్పార్క్ క్యాపిటల్ అడ్వైసర్(ఇండియా) ప్రైవేట్ లిమి టెడ్, హెచ్‌డీఎఫ్‌సీ బ్యాంకులు నిర్వహించాయి.



ఆగని పతనం

Updated By ManamFri, 10/05/2018 - 22:09
  • వరుసగా ఐదో వారంలో నష్టాలతో ముగిసిన సూచీలు

stockముంబై: వడ్డీ రేట్లపై రిజర్వ్ బ్యాంక్ అనూహ్యంగా యథాతథ స్థితిని కొనసాగించడంతో వరుసగా మూడో సెషన్‌లో శుక్రవారంనాడు ఈక్విటీ మార్కెట్లు భారీ నష్టాలను మూటగట్టుకున్నాయి. డాలర్‌తో రూపాయి మారకం విలువ రూ. 74 మించి క్షీణించడంతో వడ్డీ రేట్ల విషయంలో ‘‘ఆచితూచి కట్టుదిట్టం’’ చేసే వైఖరికి రిజర్వ్ బ్యాంక్ మారింది. బొంబాయి స్టాక్ ఎక్చ్సేంజి (బి.ఎస్.ఇ) 30 షేర్ల ‘సెన్సెక్స్’ ఏకంగా 792.17 పాయింట్లు పతనమై దాదాపు ఆరు నెలల కనిష్ఠ స్థాయి 34,376.99 వద్ద ముగిసింది. నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి 282.80 పాయింట్లు నష్టపోయి 10,316.45 వద్ద ముగిసింది. సూచీలు వరుసగా ఐదో వారంలో నష్టాలు నమోదు చేసినట్లయింది. ఈ వారంలో ‘సెన్సెక్స్’ 1850.15 పాయింట్లు నష్టపోగా, ‘నిఫ్టీ’ 614 పాయింట్లు కోల్పోయింది. కీలక వడ్డీ రేటుపై రిజర్వ్ బ్యాంక్ అనూహ్యంగా యథాతథ స్థితిని కొనసాగించింది. కానీ, పెరుగుతున్న చమురు ధరలు, వ్యవస్థలోకి నిధుల ప్రవాహాన్ని తగ్గించే విధంగా, తద్వారా వ్యయాలకు ముకుతాడు వేసే దిశగా సాగుతున్న గ్లోబల్ ఫినాన్షియల్ పరిస్థితుల నుంచి వృద్ధికి, ద్రవ్యోల్బణానికి గణనీయమైన రిస్కులు పొంచి ఉన్నాయని కేంద్ర బ్యాంక్ హెచ్చరించింది. రిజర్వ్ బ్యాంక్ తన విధానాన్ని ‘తటస్థం’ నుంచి ‘ఆచితూచి నగదు ప్రవాహాన్ని తగ్గించే విధంగా’ మార్చుకుంది. ‘సెన్సెక్స్’ శుక్రవారం మొదటి నుంచి ప్రతికూల స్థితిలోనే ఉంది. ఆర్బీఐ విధాన నిర్ణయం తర్వాత అమ్మకాలు వేగం పుంజుకున్నాయి. అవి సూచీని ఒక దశలో 34,202.22 స్థాయికి కిందకు లాగాయి. చివరకు ‘సెన్సెక్స్’  34,376.99 వద్ద ముగిసింది. ఏప్రిల్ 23 (34,450.77 పాయింట్ల) తర్వాత ‘సెన్సెక్స్’ కి ఇదే అత్యల్ప ముగింపు. అమెరికన్ బాండ్ల ప్రతిఫలాలు పెరగడంతో ఇక్కడ నుంచి మదుపు మొత్తాలు తరలిపోతున్నాయి. విదేశీ పోర్ట్‌ఫోలియో ఇన్వెస్టర్లు గురువారం రూ. 2,760.63 కోట్ల విలువ చేసే షేర్లను విక్రయించగా, దేశీయ మదుపు సంస్థలు రూ. 1823.59 కోట్ల విలువ చేసే ఈక్విటీలను కొనుగోలు చేశాయని తాత్కాలిక డాటా సూచించింది. 



మార్కెట్ ఢమాల్

Updated By ManamThu, 10/04/2018 - 22:13
  • తుడిచిపెట్టుకుపోయిన రూ. 5 లక్షల కోట్ల సంపద.. పెరుగుతున్న ముడి చమురు ధర 

  • తరుగుతున్న రూపాయి విలువ జూఇన్వెస్టర్లలో తొలగని ఆందోళన

MARKETముంబై: ఈక్విటీ గీటురాయి ‘సెన్సెక్స్’ గురువారం ఏకంగా 806 పాయింట్లు పతనమై, మూడు నెలల కనిష్ఠ స్థాయి వద్ద ముగిసింది. బక్కచిక్కుతున్న రూపాయి, పెరుగుతున్న ముడి చమురు ధరలు మదుపరులను కలవరపరచడంతో ‘సెన్సెక్స్’ 35,200 స్థాయికి దిగువన ముగిసింది. అదేమాదిరిగా, నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి ‘నిఫ్టీ’ 259 పాయింట్లు పతనమై 10,600 స్థాయి దిగువన ముగిసింది.  అమెరికన్ డాలర్‌తో మారకంలో రూపాయి విలువ (ఇంట్రా-డేలో) సరికొత్త కనిష్ఠ స్థాయి రూ. 73.81కి పడిపోయింది. అంతర్జాతీయంగా ముడి చమురు ధరలు పీపాకు నాలుగేళ్ళ గరిష్ఠ స్థాయి 86 డాలర్లకు చేరాయి. డబ్ల్యు.టి.ఐ పీపా ధర 76.23 డాలర్లుగా ఉంది. ఇవి స్థూల ఆర్థిక స్థితిపై భారత్‌ను ఆందోళనకు గురి చేశాయి. ‘‘వ్యాపార సంస్థల్లో పటిష్టమైన సంస్థలు, లాభదాయకమైన కంపెనీల్లో అత్యంత లాభదాయకమైనవి కూడా గత రెండు సెషన్లలో బీటలు వారాయి. వాటి షేర్ల ధరలు కూడా పతనమవడం, ప్రస్తుతం నెలకొన్న ప్రతికూల సెంటిమెంట్‌ను, నిరాశాపూరిత వాతావరణాన్ని సూచించింది. రూపాయి విలువ పాతాళానికి చేరడం, ముడి చమురు ధరలు ఆకాశాన్ని అంటడం, కరెంట్ అకౌంట్ లోటు  విస్తృతమవుతూండడంపై పెరుగుతున్న భయాలకు తోడు లిక్విడిటీ ఆందోళనలు స్టాక్ మార్కెట్లలో మరో భారీ పతనానికి దారితీశాయి...’’అని సెంటమ్ వెల్త్ మేనేజ్‌మెట్‌లో ఈక్విటీ అడ్వైజరీ అధిపతి దేవాంగ్ మెహతా అన్నారు. ముఖ్యంగా ఆరోగ్య రక్షణ, ఇన్ఫర్మేషన్ టెక్నాలజీ, చమురు, గ్యాస్, బ్యాంకింగ్, మోటారు వాహనాల రంగ షేర్లు ఘోరంగా పతనమవడం ‘సెన్సెక్స్’ను 806.47 పాయింట్ల కిందకు గుంజింది. ఇంట్రా-డేలో అది 35,022.12 పాయింట్ల కనిష్ఠ స్థితిని చూసింది. వరుసగా రెండో సెషన్‌లోనూ నష్టాలను చూసిన ‘సెన్సెక్స్’ 35,264.41 వద్ద ముగిసింది. ‘సెన్సెక్స్’  బుధవారం 550.51 పాయింట్లు నష్టపోయిన సంగతి తెలిసిందే. 

ఈ క్రమంలో గత రెండు ట్రేడింగ్ సెషన్లలో మొత్తంమీద ఇన్వెస్టర్ల సంపద నుంచి రూ. 5 లక్షల కోట్లకు పైగా తుడిచిపెట్టు కుపోయాయి. ఎన్.ఎస్.ఇ ‘నిఫ్టీ’ 259 పాయింట్లు కోల్పోవడం ద్వారా 10,600 దిగువకు పతనమైంది. ఒక దశలో 10,547.25 స్థాయికి దిగిన ‘నిఫ్టీ’ చివరకు 10,599.25 వద్ద ముగిసింది. బుధవారం మొదలైన ఆర్.బి.ఐ మూడు రోజుల విధాన సమావేశ నిర్ణయం ఎలా ఉండబోతోందోననే ఆలోచన కూడా ట్రేడర్లను అప్రమత్తంగా వ్యవహరించేట్లు చేసింది. ‘‘ద్రవ్యోల్బణ ఒత్తిడిలో పెరుగుదల వల్ల ఆర్బీఐ వడ్డీ రేటు పెంచే వైఖరిని అనుసరించవచ్చనే అంచనాలు, ఇన్వెస్టర్లలో రిస్క్ తీసుకునే ధోరణిని తగ్గించాయి. స్థూల ఆర్థికాంశాలు క్షీణించడం వల్ల ఇప్పుడు అందరి దృష్టీ రెండవ త్రైమాసిక ఫలితాలపైనే ఉంది. వర్తమాన ద్రవ్యత స్థితిని అది ఎలా చక్కదిద్దనుందనే సందేహాలు కూడా మదుపరులను వెనక్కి తగ్గేట్లు చేశాయి’’అని మెహతా అన్నారు. ఈక్విటీ గీటురాళ్ళయిన సూచీలు ఆగస్టులో చేరుకున్న శిఖర స్థాయిల నుంచి దాదాపు 10 శాతం పతనమయ్యాయి. బలహీన దేశీయ సెంటిమెంట్లు, గ్లోబల్ అస్థిరతలు, తరుగుతున్న రూపాయి, మరుగుతున్న ముడి చమురు ధరలు అందుకు కారణాలు. రూపాయి మారకం విలువ, ముడి చమురు ధర స్థిరపడే సంకేతాలు కనిపించడం లేదు కనుక, ఈ బలహీనత రానున్న సెషన్లలోనూ కొనసాగే అవకాశముందని ఎనలిస్టులు చెబుతున్నారు. విదేశీ పోర్ట్‌ఫోలియో ఇన్వెస్టర్లు బుధవారం రూ. 1550 కోట్ల విలువ చేసే షేర్లను విక్రయించగా, దేశీయ మదుపు సంస్థలు రూ. 1402 కోట్ల విలువ చేసే షేర్లను కొనుగోలు చేశాయని తాత్కాలిక డాటా సూచించింది. 



ప్రభుత్వ చర్యలతో పైపైకి

Updated By ManamMon, 10/01/2018 - 22:46
  • సెన్సెక్స్ లాభం 299 పాయింట్లు.. తిరిగి 11 వేల శిఖరంపై నిఫ్టీ

bseముంబై: స్టాక్ మార్కెట్ సూచీలు రెండూ వరుసగా మూడు రోజుల క్షీణతను సోమవారం నిలువరించి లాభాలతో ముగిశాయి. లిక్విడిటీని పెంపొందించే చర్యలను భారతీయ రిజర్వ్ బ్యాంక్ (ఆర్.బి.ఐ) ప్రకటించడం, సంక్షోభంలో కూరుకున్న ఐ.ఎల్ అండ్ ఎఫ్.ఎస్ మేనేజ్‌మెంట్‌లో మార్పునకు ఒత్తిడి తేవడం పరిస్థితిలో కొంత సానుకూలతను తెచ్చాయి. బొంబాయి స్టాక్ ఎక్చ్సేంజి (బి.ఎస్.ఇ) 30 షేర్ల సున్నిత సూచి ఆటుపోట్ల ట్రేడ్‌లో 299 పాయింట్లు లాభపడి 36,526.14 వద్ద ముగిసింది. నేషనల్ స్టాక్ ఎక్చ్సేంజి (ఎన్.ఎస్.ఇ) 50 షేర్ల సూచి ‘నిఫ్టీ’ 77.85 పాయింట్లు పెరిగి 11,000 స్థాయిని తిరిగి అందుకుంది. సానుకూలంగా ఉన్న సెప్టెంబర్ నెల వస్తూత్పత్తి పి.ఎం.ఐ డాటా, ఆరోగ్యకరంగా ఉన్న మోటారు వాహనాల అమ్మకాలు కూడా ఇన్వెస్టర్లలో ఉత్సాహాన్ని నింపాయని బ్రోకర్లు చెప్పారు. మధ్యతరహా బ్యాంక్ ఎస్ బ్యాంక్ దాని మేనేజింగ్ డైరెక్టర్, సి.ఇ.ఓ రాణా కపూర్‌కు వారసుడిని కనుగొనేందుకు పూర్తి సన్నద్ధంగా ఉన్నట్లు ప్రకటించిన తర్వాత, ఎస్ బ్యాంక్ షేర్ ధర 9.86 శాతం పెరిగి సెన్సెక్స్ ప్యాక్‌లో టాప్ గైనర్‌గా నిలిచింది. రాణా కపూర్ పదవీ కాలానికి ఆర్.బి.ఐ గత నెలలో కోత పెట్టింది. 

ఐ.ఎల్ అండ్ ఎఫ్.ఎస్‌కి కొత్త బోర్డు
అలాగే, సంక్షోభంలో కూరుకున్న ఐ.ఎల్ అండ్ ఎఫ్.ఎస్ మేనేజ్‌మెంట్‌లో మార్పు తేవలసిందని ప్రభుత్వం జాతీయ కంపెనీ లా ట్రైబ్యునల్‌ను అభ్యర్థించడంతో దాని గ్రూప్ కంపెనీల షేర్ల ధరలు సోమవారం 20 శాతం వరకు పెరిగాయి. ఇన్‌ఫ్రాస్ట్రక్చర్ లీజింగ్ అండ్ ఫినాన్షియల్ సర్వీసెస్ లిమిటెడ్ డైరెక్టర్ల బోర్డును పునర్వవ్యవస్థీకరించాలన్న ప్రభుత్వ అభ్యర్థనకు సోమవారం మార్కెట్ వేళలు ముగిశాక ట్రైబ్యునల్ ఆమోదం తెలిపింది. కొత్త బోర్డులో నియమితులైన ఆరుగురిలో కోటక్ మహీంద్రా బ్యాంకునకు చెందిన ఉదయ్ కోటక్, రిటైర్డ్ ఐ.ఏ.ఎస్ అధికారి వినీత్ నయ్యర్, ‘సెబి’ మాజీ చైర్‌పర్సన్ జి.ఎన్. బాజ్‌పాయ్ ఐ.సి.ఐ.సి.ఐ నాన్-ఎగ్జిక్యూటివ్ చైర్‌పర్సన్ జి.సి. చతుర్వేది, ఐ.ఏ.ఎస్ అధికారి మాలిని శంకర్, ‘క్యాగ్’కు చెందిన సీనియర్ ప్రభుత్వాధికారి నంద కిశోర్‌లు ఉన్నారు. విభిన్న రంగాల్లో ఉన్న ఐ.ఎల్ అండ్ ఎఫ్.ఎస్ గ్రూప్ కంపెనీల్లో కొన్ని రుణాలు ఎగవేయడం ఫినాన్షియల్ మార్కెట్లలో లిక్విడిటీ సంక్షోభం తలెత్తవచ్చనే భయాలకు పురికొల్పింది. మొత్తంమీద నగదు పరిస్థితిని మెరుగుపర చేందుకు రిజర్వ్ బ్యాంక్ చర్యలు తీసుకుంటోంది. 

బాండ్లు కొంటున్న ఆర్బీఐ
అక్టోబర్‌లో ప్రభుత్వ బాండ్లను కొనుగోలు చేయడం ద్వారా వ్యవస్థలోకి రూ. 36,000 కోట్ల లిక్విడిటీని చొప్పించనున్నట్లు రిజర్వ్ బ్యాంక్ సోమవారం ప్రకటించింది. ‘సెన్సెక్స్’ 36,274.25 వద్ద పటిష్టమైన స్థితిలోనే ప్రారంభమైనప్పటికీ, నాన్ బ్యాంకింగ్ ఫినాన్షియల్ సంస్థల రంగం, కమర్షియల్ పేపర్ మార్కెట్ చుట్టూ అల్లుకున్న ఆందోళనలతో వెంటనే క్షీణించింది. అయితే, మధ్యాహ్న ట్రేడ్‌లో పుంజుకుని 36,616.64 పాయింట్ల అధిక స్థాయిని తాకింది. చివరకు 299 పాయింట్ల లాభంతో 36,526.14 వద్ద ముగిసింది. ఎన్.ఎస్.ఇ ‘నిఫ్టీ’ 77.85 పాయింట్లు లాభపడి, 11,008.30 వద్ద ముగిసింది. ఇంట్రా-డేలో అది 10,821.55 నుంచి 11,035.65 పాయింట్ల మధ్య ఊగిసలాడింది. విదేశీ మదుపు సంస్థలు శుక్రవారం రూ. 1,699.94 కోట్ల విలువ చేసే షేర్లను విక్రయించగా, దేశీయ మదుపు సంస్థలు రూ. 3,256.34 కోట్ల విలువ చేసే ఈక్విటీలను కొనుగోలు చేసినట్లు తాత్కాలిక డాటా సూచించింది. 

మెరిసిన మోటారు వాహనాల షేర్లు
మోటారు వాహనాల కంపెనీలు సెప్టెంబర్ నెలకు ప్రకటించిన అమ్మకాల వివరాలు ప్రోత్సాహకరంగా ఉండడంతో వాటి షేర్ల ధరలు పెరిగాయి. బజాజ్ ఆటో సెప్టెంబర్ నెల మొత్తం అమ్మకాల్లో 17 శాతం పెరుగుదలను ప్రకటిస్తే, హిందూజా గ్రూప్ ప్రధాన కంపెనీ అశోక్ లేలాండ్ 26 శాతం పెరుగుదలను నమోదు చేసింది. సెప్టెంబర్‌లో అమ్మకాలు పెరిగినట్లు వెల్లడించిన ఇతర కంపెనీల్లో మహీంద్రా అండ్ మహీంద్రా, టాటా మోటార్స్, ఐషర్ మోటార్స్‌కు చెందిన ద్విచక్ర వాహనాల విభాగం రాయల్ ఎన్‌ఫీల్డ్ కూడా ఉన్నాయి. కార్ల తయారీలో దేశంలో పెద్ద సంస్థ అయిన మారుతి సుజుకి ఇండియా అమ్మకాలు మాత్రం సెప్టెంబర్‌లో స్వల్పంగా మందగించాయి.





Related News