nayanatara

ఆ రీమేక్‌లో న‌య‌న‌తార‌?

Updated By ManamWed, 04/04/2018 - 15:38

nayanataraత‌మిళ‌నాట లేడీ సూప‌ర్‌స్టార్‌గా రాణిస్తున్నారు న‌య‌న‌తార‌. ప్ర‌స్తుతం.. క‌థానాయిక ప్రాధాన్య‌త ఉన్న సినిమాల వైపే మొగ్గు చూపిస్తున్నారు ఈ కేర‌ళ‌కుట్టి. ఇదిలా ఉంటే.. ఇప్ప‌టికే 'మాయ' (తెలుగులో మ‌యూరి), 'డోర' వంటి హార‌ర్ మూవీ చిత్రాలు చేసిన న‌య‌న్‌.. మ‌రో హార‌ర్ మూవీ చేయ‌బోతున్నార‌ని కోలీవుడ్ వ‌ర్గాలు పేర్కొంటున్నాయి. కాస్త వివ‌రాల్లోకి వెళితే.. అనుష్క శ‌ర్మ క‌థానాయిక‌గా హిందీలో రూపొందిన హార‌ర్ మూవీ 'ప‌రి'. ఈ సినిమాని త‌మిళంలో రీమేక్ చేసేందుకు ఓ నిర్మాత స‌న్నాహాలు చేసుకుంటున్నారు. అనుష్క శ‌ర్మ పాత్ర కోసం.. న‌య‌న‌తార అయితే బాగుంటుంద‌ని ఆయ‌న భావిస్తున్నార‌ట‌. మ‌రి.. న‌య‌న్ ఈ సినిమాకి గ్రీన్ సిగ్న‌ల్ ఇస్తారో లేదో తెలియాలంటే కొన్నాళ్లు ఆగాల్సిందే. కాగా, ప్ర‌స్తుతం చిరంజీవి 151వ చిత్రం 'సైరా న‌ర‌సింహారెడ్డి'లో న‌య‌న్ క‌థానాయిక‌గా న‌టిస్తున్న సంగ‌తి తెలిసిందే.    



న‌య‌న‌తారపై నిర్మాత‌ల ఆగ్ర‌హం

Updated By ManamFri, 03/30/2018 - 18:36

nayanataraడిజిటల్ సర్వీస్ ప్రొవైడర్స్ (డి.ఎస్.పీ) వైఖరికి నిరసనగా ఈ నెల 16నుంచి కోలీవుడ్ పరిశ్రమలో బంద్ నిర్వహిస్తున్న సంగతి తెలిసిందే. ఈ సమయంలో సినిమా విడుదల కాని, ఆడియో ఫంక్షన్స్‌గాని.. ఇలా సినిమాలకి సంబంధించి ఏ ఒక్క వేడుకని కూడా నిర్వహించరాదని నిర్ణ‌యం తీసుకున్నారు. ఈ నేపథ్యంలో తమిళనాడులో తెలుగు, మలయాళం, హిందీ సినిమాలు మినహా ఒక్క‌ తమిళ సినిమా కూడా విడుదల కావ‌డం లేదు.

ఇదిలా ఉంటే.. కోలీవుడ్‌ లేడీ సూపర్ స్టార్ నయనతార 2016లో ‘పుదియ నియమం’ అనే మళయాళ చిత్రంలో నటించారు. ఈ చిత్రానికి గానూ ఉత్తమ నటిగా ఫిలింఫేర్‌ను కూడా సొంతం చేసుకున్నారు నయన్‌. తాజాగా ఈ చిత్రాన్ని ‘వాసుకి’ అనే పేరుతో తమిళంలోకి డ‌బ్‌ చేశారు. ఈ సినిమాని నిన్న (గురువారం) తమిళనాట విడుదల చేశారు. ప్రస్తుతం కోలీవుడ్ బంద్ పాటిస్తున్న ఈ క్రమంలో.. సినిమా ఎలా విడుదలైందనీ, ఎవరికీ లేని ప్రత్యేకత నయనతారకు మాత్రం ఎందుకని ఓ వర్గం నిర్మాతలు ఆగ్రహం వ్యక్తం చేశారు. దీనిపై నిరసిస్తూ చెన్నైలో నయన్‌ ఇంటిని ముట్ట‌డిస్తామ‌ని ప్రకటించారు.

ఈ నేపథ్యంలో నయన్‌ స్పందిస్తూ, “మలయాళం వెర్ష‌న్‌కు సంబంధించి.. నేను ఈ సినిమాలో నటించాను. త‌మిళ డ‌బ్బింగ్ వెర్ష‌న్‌కు సంబంధించి నాకు ఎటువంటి సంబంధం లేదు. అలాంట‌ప్పుడు.. కేవలం ఒరిజ‌న‌ల్ వెర్ష‌న్‌లో నటించినంత మాత్రాన నన్ను బాధ్యురాలిని చేయడం ఎంతవరకు సమంజసం” అంటూ ఆవేదన వ్యక్తం చేశారు.



వైర‌ల్.. 'సైరా'లో అమితాబ్‌ లుక్‌

Updated By ManamTue, 03/27/2018 - 16:22

amitaab bacchanమెగాస్టార్ చిరంజీవి, ద‌ర్శ‌కుడు సురేందర్ రెడ్డి కాంబినేషన్‌లో ‘సైరా నరసింహారెడ్డి’ చిత్రం తెరకెక్కుతున్న విషయం తెలిసిందే. ప్రస్తుతం చిత్రీకరణ శరవేగంగా  జ‌రుగుతోంది. తాజాగా రెండో షెడ్యూల్‌ను కూడా పూర్తిచేశార‌ని స‌మాచారం. ఈ షెడ్యూల్‌లో చిరంజీవి, నయనతార, జగపతి బాబు తదితరులపై కొన్ని ముఖ్యమైన సన్నివేశాలను చిత్రీకరించారు.  

ఈ నెల 29 (గురువారం) నుంచి మూడో షెడ్యూల్ ప్రారంభం కానుంద‌ని తెలిసింది. ఈ షెడ్యూల్‌లో బాలీవుడ్ మెగా స్టార్ అమితాబ్ బచ్చన్‌పై కొన్ని కీలక సన్నివేశాలను షూట్ చేయనున్నార‌ని టాలీవుడ్ వ‌ర్గాలు పేర్కొంటున్నాయి. ఈ సినిమాలో అమితాబ్‌తో పాటు విజయ్ సేతుపతి, సుదీప్ పాత్రలు కూడా ప్రత్యేక‌ ఆకర్షణగా నిలవనున్నాయని తెలుస్తోంది. ఇదిలా ఉంటే.. 'సైరా'లో అమితాబ్ లుక్ అంటూ ఓ స్టిల్ సోష‌ల్ మీడియాలో వైర‌ల్ అవుతోంది. దీనికి మంచి స్పంద‌న వ‌స్తోంది.

కాగా, ఈ చిత్రానికి సంగీత దర్శకుడిగా బాలీవుడ్ మ్యూజిక్ డైరెక్టర్ అమిత్ త్రివేది పేరు వినిపిస్తోంది. ప్రస్తుతం చర్చలు జరుగుతున్నాయి. మరికొద్ది రోజుల్లో ఈ విషయంపై  క్లారిటీ వచ్చే అవకాశం ఉంది. వ‌చ్చే ఏడాది  ప్ర‌థ‌మార్థంలో ఈ సినిమా తెర‌పైకి రానుంది.



‘సైరా’.. నయనతార సంద‌డి మొద‌లైంది

Updated By ManamTue, 03/20/2018 - 13:36

nayanataraమెగాస్టార్ చిరంజీవి,  ద‌ర్శ‌కుడు సురేందర్ రెడ్డి కలయికలో ‘సైరా న‌ర‌సింహారెడ్డి’ చిత్రం తెరకెక్కుతున్న విషయం విదితమే. నయనతార కథానాయిక కాగా.. అమితాబ్ బచ్చన్, జగపతి బాబు కీలక పాత్రలు పోషిస్తున్నారు. ఇప్పటికే పూర్తైన మొదటి షెడ్యూల్‌లో.. సంతృప్తికరంగా లేని కొన్ని సన్నివేశాలను ఇటీవ‌ల‌ మళ్ళీ చిత్రీకరించారు. అలాగే.. తాజాగా రెండో షెడ్యూల్‌ను కూడా ప్రారంభించారు. ఈ షెడ్యూల్లో నయనతార కూడా ‘సైరా’ టీంతో జాయిన్ అయ్యారు. ఈ నేపథ్యంలో చిరంజీవి, నయనతార, జగపతిబాబుపై కొన్ని సన్నివేశాలను నానక్ రామ్ గూడా(హైదరాబాద్)లో చిత్రీకరిస్తున్నారు. సినిమాలో ప్రధాన ఆకర్షణగా చెప్పుకునే సన్నివేశాల్లో ఇవి కూడా ఉంటాయ‌ని చిత్ర బృందాలు వెల్లడిస్తున్నాయి. కాగా, ఈ నెల 28నుంచి ఈ షెడ్యూల్‌లో అమితాబ్ కూడా చేరుతారని నిర్మాణ వర్గాలు తెలియజేస్తున్నాయి. రూ.150కోట్లతో తెరకెక్కుతున్న ఈ సినిమా వచ్చే ఏడాది ప్రేక్షకుల ముందుకు రానుంది.



'క‌ర్త‌వ్యం' రివ్యూ

Updated By ManamFri, 03/16/2018 - 12:14

karthavyamచిత్రంః క‌ర్త‌వ్యం
న‌టీన‌టులుః న‌య‌న‌తార‌, రాజా కృష్ణ‌మూర్తి, రామ‌చంద్ర‌న్ దురైరాజ్‌, సును ల‌క్ష్మి, బేబి మ‌హాల‌క్ష్మీ, మాస్ట‌ర్ విఘ్నేష్, త‌మ్మారెడ్డి భ‌రద్వాజ‌, సుద్ధాల అశోక్ తేజ‌ త‌దిత‌రులు
సంగీతంః జిబ్రాన్‌
ఛాయాగ్ర‌హ‌ణంః ఓం ప్ర‌కాశ్‌
కూర్పుః రూబెన్‌
నిర్మాత‌లుః శ‌ర‌త్ మ‌రార్‌, ఆర్‌.ర‌వీంద్ర‌న్‌
ర‌చ‌న - ద‌ర్శ‌క‌త్వంః  గోపీ న‌య‌నార్‌
విడుద‌ల తేదిః మార్చి 16, 2018

సినిమా అంటే ఎంట‌ర్‌టైన్‌మెంట్ మాత్ర‌మే అనేది చాలా మంది ద‌ర్శ‌కుల అభిప్రాయం. అందుకే.. సినిమాని వినోద మాధ్య‌మంగానే ప‌రిగ‌ణిస్తుంటారు. అయితే అతి కొద్ది మంది ద‌ర్శ‌కులు మాత్ర‌మే.. సినిమాని వినోదం కోసం కాకుండా సామాజిక స్పృహ‌తో కూడిన అర్థ‌వంత‌మైన ప్ర‌య‌త్నాల‌కు వేదిక‌గా మ‌లుచుకుంటారు. వారిలో ఒక‌రిగా త‌మిళ ద‌ర్శ‌కుడు గోపీ న‌య‌నార్‌ను చెప్పుకోవ‌చ్చు. న‌య‌న‌తార ప్ర‌ధాన పాత్ర‌లో ఈ ద‌ర్శ‌కుడు రూపొందించిన త‌మిళ చిత్రం 'ఆర‌మ్' త‌మిళ‌నాట ఘ‌న‌విజ‌యం సాధించింది. ఇప్పుడు అదే చిత్రం తెలుగులో 'క‌ర్త‌వ్యం' పేరుతో శుక్ర‌వారం ప్రేక్ష‌కుల ముందుకొచ్చింది. ఈ సినిమాపై 'మనం' అందిస్తున్న స‌మీక్ష మీ కోసం..

క‌థాంశంః 
karthavyamనెల్లూరు జిల్లా క‌లెక్టర్ మ‌ధువ‌ర్షిణి (న‌య‌న‌తార‌). జీతం కోసం ఉద్యోగం చేయ‌డం ఆమెకు ఇష్టం ఉండ‌దు. ఉద్యోగం అంటే.. ఆ ఉద్యోగం ద్వారా ప్ర‌జ‌ల కోస‌మే జీవించ‌డం, ప‌నిచేయ‌డం అని న‌మ్మే మ‌నిషి ఆమె. అంత‌రిక్ష ప్ర‌యోగం జ‌రిపే ప్రాంతానికి ద‌గ్గ‌ర‌లో ఉన్న ఓ గ్రామానికి  వ‌స్తుంది మ‌ధు. ఆ ఊరికి త్రాగునీటి స‌మ‌స్య ఉంటుంది. ఆ స‌మ‌స్య తీర్చే ప్ర‌య‌త్నంలో ఉన్న‌ప్పుడే.. వేనాడు గ్రామానికి చెందిన బుల్లెబ్బాయ్ (రామ‌చంద్ర‌న్ దురైరాజ్‌), సుమ‌తి (సును ల‌క్ష్మి)ల నాలుగేళ్ళ కూతురు ధ‌న్సిక (బేబి మ‌హాల‌క్ష్మి) బోరు బావిలో ప‌డిపోయింద‌ని తెలుస్తుంది. దాదాపు 146 అడుగుల లోతు ఉన్న ఆ బావి.. కౌన్సిల‌ర్‌ బాల‌కు చెందిన ప్రాంతంలో ఉంటుంది. నీళ్ళు ప‌డ‌క‌పోవ‌డంతో.. ఆ బోర్ బావిని మూయ‌కుండా అలాగే ఉంచేస్తారు. కూలీ ప‌నికి వ‌చ్చిన సుమ‌తితో పాటు అక్క‌డికి వ‌చ్చిన ధ‌న్సిక‌.. ప్ర‌మాద‌వ‌శ‌త్తు అందులో పడిపోతుంది. మొద‌ట 36 అడుగుల లోతులో ఉండిపోయిన ఆ పాప‌ని.. అగ్నిమాప‌క ద‌ళం, మెడిక‌ల్ టీమ్ స‌హాయంతో పైకి తీసుకువ‌చ్చే ప్ర‌య‌త్నం చేస్తుంది మ‌ధు. అయితే.. ఆ ప్ర‌య‌త్నం విఫ‌ల‌మై మ‌ళ్ళీ బావిలో ప‌డుతుంది పాప‌. ఈ సారి 93 అడుగుల లోతుకి వెళుతుంది. పాప‌ను బ‌య‌ట‌కు తీసుకురావ‌డానికి స‌రిప‌డ సాంకేతిక పరిక‌రాలేవి అందుబాటులో లేక‌పోవ‌డంతో.. మ‌ధు ఏం చేస్తుంది?  చివ‌ర‌కు ఆ పాప బోర్ బావి నుంచి బ‌య‌ట‌ప‌డిందా? లేదా? అన్న‌దే ఈ చిత్ర క‌థాంశం.

విశ్లేష‌ణ‌
మ‌నం నిత్యం దిన‌ప‌త్రిక‌ల్లోనూ, టీవీ ఛాన‌ళ్ళ‌లోనూ చూసే 'బోర్ బావి' దుర్ఘ‌ట‌న‌ల ఆధారంగా అల్లుకున్న క‌థ ఇది. దీనికి త్రాగునీటి స‌మ‌స్య‌ని జ‌త‌చేస్తూ ద‌ర్శ‌కుడు గోపీ న‌య‌నార్ త‌యారుచేసుకున్న క‌థ ఆలోచ‌న రేకెత్తించేలా ఉంది. ఒక‌వైపు అంత‌రిక్ష ప్ర‌యోగాల కోసం ల‌క్ష‌ల్లో ఖ‌ర్చు పెట్టే ప్ర‌భుత్వం.. మ‌రో వైపు బోర్ బావుల్లో ప్ర‌మాద‌వ‌శాత్తు ప‌డిపోయిన పిల్ల‌ల‌ను కాపాడుకోవ‌డానికి వంద‌ల్లో వేల‌ల్లో కూడా ఖ‌ర్చు పెట్ట‌క‌పోవ‌డం గురించి సూటిగా ప్ర‌శ్నించే విధానం ఆలోచింప‌జేసేలా ఉంటుంది. వాస్త‌విక‌త‌కు అద్దం ప‌డుతూ.. సినిమాని తీర్చిదిద్దిన విధానం ప్ర‌శంస‌నీయం. అలాగే ఓ మ‌హిళా క‌లెక్ట‌ర్ ఇలాంటి ప‌రిస్థితుల్లో ఎదుర్కొనే స‌మ‌స్య‌ల‌ను కూడా చ‌క్క‌గా ఆవిష్క‌రించారాయ‌న‌. ప్ర‌జ‌ల కోసం ఆలోచించే ఆ క‌లెక్ట‌ర్ పాత్ర‌ని ఆయ‌న తీర్చిదిద్దిన తీరు కూడా బాగుంది. ఇలాంటి అధికారులు ఉంటే.. ప్ర‌జ‌ల‌కు ఎదురయ్యే ఎలాంటి స‌మ‌స్య అయినా ప‌రిష్కార‌మవుతుందన్న‌ట్లుగా ఆ పాత్ర‌ను చూపించారు. అదేవిధంగా.. ప్ర‌భుత్వం అంటే ప్ర‌జ‌లే అని చెప్పే సంభాష‌ణ‌లు ఆక‌ట్టుకునేలా ఉంటాయి. విచార‌ణ‌కి వ‌చ్చిన మాజీ క‌లెక్ట‌ర్‌, ఓ ప్ర‌భుత్వ అధికారి(రాజా కృష్ణ‌మూర్తి)కి మ‌ధ్య న‌డిచే విచార‌ణ నేప‌థ్యంలో సినిమాని ఆద్యంతం ఆస‌క్తిక‌రంగా మ‌లుచుకున్న విధానం బాగుంది.

nayanన‌టీన‌టుల విష‌యానికి వ‌స్తే..  క‌లెక్ట‌ర్ మ‌ధు వ‌ర్షిణి పాత్ర‌లో న‌య‌న‌తార ఒదిగిపోయార‌నే చెప్పాలి. నిజంగానే ఓ క‌లెక్ట‌ర్ మాదిరిగా చాలా హుందాగా క‌నిపించారు. ప్ర‌జ‌ల స‌మ‌స్య‌కి వెంట‌నే స్పందించే సంద‌ర్భాల్లోనూ.. పాప‌ని కాప‌డ‌డానికి చ‌ర్య‌లు తీసుకునే సంద‌ర్భాల్లోనూ.. రాజ‌కీయ నాయ‌కుల మాట‌ల‌కు నొచ్చుకునే సంద‌ర్భాల్లోనూ.. ధ‌న్సిక అన్న భాను (మాస్ట‌ర్ విఘ్నేష్‌)ని మోటివేట్ చేసే సంద‌ర్భంలోనూ.. పాప‌ ప్రాణాల‌తో బ‌య‌ట‌ప‌డ్డాక సంతోషాన్ని వ్య‌క్తం చేసే సంద‌ర్భంలోనూ.. ఆమె న‌ట‌న మెప్పిస్తుంది. పాప త‌ల్లిదండ్రులుగా న‌టించిన రామ‌చంద్ర‌న్ దురైరాజ్‌, సును ల‌క్ష్మి న‌ట‌న కూడా సహ‌జంగా ఉంది. మిగిలిన న‌టీన‌టులంతా కూడా ఎవ‌రి పాత్ర‌ల్లో వాళ్లు చ‌క్క‌గా న‌టించారు.

సాంకేతికంగా సినిమా ఉన్న‌తంగా ఉంది. జిబ్రాన్ సంగీతంలో 'పిడుగులు ప‌డినా' పాట‌ స‌న్నివేశాల్లో గాఢ‌త‌ని పెంచింది. అలాగే నేప‌థ్య సంగీతం అడుగడుగున సినిమా మూడ్‌ని ఎలివేట్ చేస్తూనే ఉంది. ఓం ప్ర‌కాశ్ ఛాయాగ్ర‌హ‌ణం.. సినిమా చూస్తున్న ఫీలింగ్‌ని కాకుండా.. వాస్తవ ప‌రిస్థితుల‌ను క‌ళ్ళ ఎదుటే చూస్తున్నామ‌న్న‌ట్లుగా చ‌క్క‌గా కుదిరింది. ఎడిటింగ్ కూడా బాగుంది. మాట‌ల్లో 'ఒక ప్రాణం నా క‌ళ్ళ‌ముందు కొట్టుమిట్టాడుతుంటే మాన‌వ‌త్వం ఉన్న మ‌నిషిగా ఏ మాత్రం ఆవేశానికి లోన‌వ‌కుండా నా క‌ర్త‌వ్యాన్ని నిర్వ‌ర్తించాను', 'అధికారులు ఎలా ప‌నిచేస్తున్నార‌నేది ప్ర‌జ‌ల‌లోకి వెళితేనే తెలుస్తుంది', 'వాంతులు, విరేచ‌నాల‌కు, క‌లరాకు మందు ఉంది.. దాహంతో చ‌నిపోయే వాళ్ళ‌కు మందు ఏది?  దానికి నీళ్ళే మందు', 'ప్ర‌జ‌ల‌కు ఏది అవ‌స‌ర‌మో అదే చ‌ట్టం కావాలి కానీ మ‌నం ముందే  దాన్ని త‌యారు చేసి ప్ర‌జ‌ల మీద‌కు రుద్ద‌కూడ‌దు', 'మా కుల‌దైవం ఎంక‌న్న స్వామిని వేడుకుంటున్న‌ట్లు వేడుకుంటున్నాన్న‌మ్మా', 'అంత‌రిక్షంలోకి వెళ్ళ‌డం గొప్ప కాదు.. అధః పాతాళానికి ధైర్యంగా వెళ్ళి వ‌చ్చేవాడు గొప్ప‌', 'ప‌ద‌వి వ‌ల్ల వ‌చ్చే అధికారం వ‌ద్దు.. ప్ర‌జ‌లు ఇచ్చే అధికారం కావాలి', 'నా డ్యూటీ.. పై అధికారుల‌ను క‌న్వీన్స్ చేయ‌డం కాదు.. ప్ర‌జ‌ల‌కు సేవ చేయ‌డం' వంటి ప‌లు డైలాగులు అర్థ‌వంతంగా, ఆలోచింప‌జేసేలా ఉన్నాయి. నిర్మాణ విలువ‌లు బాగున్నాయి.

చివ‌ర‌గాః క‌ర్త‌వ్యం.. అర్థ‌వంత‌మైన ప్ర‌య‌త్నం
రేటింగ్ః 4/5                                                                                           - మ‌ల్లిక్ పైడి



న‌య‌న‌తార 'కోకో' ఫ‌స్ట్ లుక్

Updated By ManamMon, 03/05/2018 - 20:17

nayanataraకోలీవుడ్ లేడీ సూప‌ర్‌స్టార్ న‌య‌న‌తార న‌టించిన తాజా త‌మిళ చిత్రం 'కోల‌మావు కోకిల‌' (కోకో). నెల్స‌న్ ద‌ర్శ‌క‌త్వం వ‌హిస్తున్న ఈ చిత్రానికి అనిరుధ్ సంగీత‌మందిస్తున్నాడు. లైకా ప్రొడ‌క్ష‌న్స్ సంస్థ ఈ చిత్రాన్ని నిర్మిస్తోంది. ఇదిలా ఉంటే.. ఈ సినిమా ఫ‌స్ట్ లుక్‌ను సోమ‌వారం విడుద‌ల చేశారు. ఎక్క‌డికో ప్ర‌యాణ‌మైన న‌య‌న్‌.. ఓ చోట నిల‌బ‌డి ఏదో విష‌య‌మై ఆలోచిస్తూ ఉన్న‌ట్లుగా ఈ ఫ‌స్ట్ లుక్‌ను డిజైన్ చేశారు. కాగా, మార్చి 8న ఈ సినిమాకి సంబంధించిన ఫ‌స్ట్ సింగిల్‌ను విడుద‌ల చేయ‌బోతున్న‌ట్లు చిత్ర బృందం ప్ర‌క‌టించింది.



వై.ఎస్.ఆర్ బ‌యోపిక్‌లో మెగాస్టార్‌?

Updated By ManamThu, 03/01/2018 - 20:19

ysrఇండియన్ స్క్రీన్‌పై బయోపిక్‌ల హవా ఎక్కువగా ఉంది. ఈ నేపథ్యంలో ఉమ్మడి ఆంధ్రప్రదేశ్ రాష్ర్ట మాజీ ముఖ్యమంత్రి, దివంగత నేత వై.ఎస్.రాజశేఖర్ రెడ్డి జీవితకథను సినిమా రూపంలో తెరకెక్కించబోతున్న సంగతి తెలిసిందే. ‘ఆనందో బ్రహ్మ’ ఫేమ్ మహి.వి.రాఘవ్ దర్శకత్వంలో విజయ్ చిల్లా, శశి దేవిరెడ్డి ఈ చిత్రాన్ని నిర్మించనున్నారు. ఈ సినిమాకు సంబంధించిన ప్రీ ప్రొడక్షన్ పనులు శరవేగంగా జరుగుతున్నాయి. వై.ఎస్.ఆర్ పాత్రలో టాలీవుడ్ స్టార్ హీరో నాగార్జున నటిస్తాడని కూడా ఆ మ‌ధ్య‌ వార్తలు వినిపించాయి. అయితే విశ్వసనీయ వర్గాల సమాచారం ప్రకారం.. మలయాళ మెగాస్టార్‌ మమ్ముట్టి ఈ సినిమాలో రాజశేఖర్ రెడ్డి పాత్రలో నటిస్తారట. యూనిట్ కూడా మమ్ముట్టిని ఇప్ప‌టికే సంప్రదించార‌ని స‌మాచారం. అలాగే వై.ఎస్.ఆర్ సతీమణి విజయమ్మ పాత్రలో నయనతారను నటింపచేసే దిశగా ప్రయత్నాలు జరుగుతున్నాయట. త్వరలోనే ఈ సినిమాకు సంబంధించిన అధికారిక సమాచారం వెలువడనుంది.



అజిత్ సినిమాలో అర్జున్‌?

Updated By ManamMon, 02/19/2018 - 19:43

arjunయాక్ష‌న్ కింగ్ అర్జున్‌.. ప‌రిచ‌యం అక్క‌ర్లేని పేరిది. త‌మిళ అనువాద చిత్రాల‌తో పాటు నేరుగా తెలుగు సినిమాలు చేసి ఇక్క‌డివారిని అల‌రించారు ఈ యాక్ష‌న్ కింగ్. గ‌త ఏడాది 'లై'లో విల‌న్‌గా న‌టించిన అర్జున్‌.. ప్ర‌స్తుతం 'నా పేరు సూర్య నా ఇల్లు ఇండియా', 'అభిమ‌న్యుడు' చిత్రాల్లో కీల‌క పాత్ర‌ల్లో న‌టిస్తున్న సంగ‌తి తెలిసిందే. ఇదిలా ఉంటే.. అజిత్ క‌థానాయ‌కుడిగా రూపొందుతున్న త‌మిళ చిత్రం 'విశ్వాస‌మ్'లోనూ అర్జున్ ఓ ముఖ్య పాత్ర చేయ‌బోతున్నార‌ని త‌మిళ‌నాట క‌థ‌నాలు వినిపిస్తున్నాయి. ఇదివ‌ర‌కు అజిత్ 50వ చిత్రం 'మాంగాత్తా' (గ‌్యాంబ్ల‌ర్‌)లో అర్జున్ కీల‌క పాత్ర పోషించారు. ఆ సినిమా ఘ‌న‌విజ‌యం సాధించింది. మ‌ళ్ళీ ఈ కాంబినేష‌న్‌లో సినిమా అంటే.. అది ఆస‌క్తిక‌ర‌మే. న‌య‌న‌తార హీరోయిన్‌గా నటిస్తున్న ఈ చిత్రానికి శివ ద‌ర్శ‌క‌త్వం వ‌హిస్తున్నారు. దీపావ‌ళి కానుక‌గా ఈ సినిమా విడుద‌ల కానుంది. 



2018 తొలి ఏడు వారాలు.. లోటు తీర్చిన విజ‌యాలు

Updated By ManamSat, 02/17/2018 - 22:58

nayan2018లోకి అడుగుపెట్టి 7 వారాలు పూర్త‌య్యింది. ఈ ఏడు వారాల్లో.. ప్ర‌తి వారం కూడా తెలుగు తెర‌పై సినిమాలు సంద‌డి చేస్తూనే ఉన్నాయి. ఈ 50 రోజుల కాలంలో అటుఇటుగా 20 సినిమాలు ప్రేక్ష‌కుల ముందుకు రాగా.. వాటిలో నాలుగు సినిమాలు మాత్ర‌మే బాక్సాఫీస్ వ‌ద్ద కాసుల గ‌ల‌గ‌లల‌కు చిరునామాగా నిలిచాయి. ఆ చిత్రాలే 'జై సింహా', 'భాగ‌మ‌తి', 'ఛ‌లో', 'తొలిప్రేమ‌'. ఈ సినిమాల్లో ప్ర‌తి సినిమా కూడా క‌నీసం ఇద్ద‌రికి చాలా కాలంగా విజ‌యాలు, బ్రేక్ లేని కొర‌త‌ని తీర్చ‌డం విశేషం. ఓ సారి వారిపై దృష్టి పెడితే..

సెకండ్ ఇన్నింగ్స్‌లో తొలి హిట్‌
న‌య‌న‌తార‌.. కోలీవుడ్ లేడీ సూప‌ర్ స్టార్‌. తెలుగులోనూ ఈమెకి మంచి క్రేజే ఉంది. అయితే.. త‌మిళంలో ఉన్నంత స్టార్ డ‌మ్‌ మాత్రం ఇక్క‌డ లేద‌న్న‌ది వాస్త‌వం. న‌య‌న‌తార కెరీర్‌ను 'శ్రీ‌రామ రాజ్యం' చిత్రానికి ముందు, త‌రువాత అని చెప్పుకోవ‌చ్చు. ఎందుకంటే.. ప్ర‌భుదేవాని పెళ్ళి చేసుకోవాల‌న్న ఆలోచ‌న‌తో.. ఆ స‌మ‌యంలో సినిమాల‌కి దూరంగా ఉండాల‌నుకుంది ఈ మ‌ల‌యాళ మందారం. అయితే.. ఊహించ‌ని విధంగా ప్ర‌భుదేవాతో బ్రేక‌ప్ అవ‌డంతో.. తిరిగి కొత్త‌ ఇన్నింగ్స్ మొద‌లు పెట్టింది న‌య‌న్‌. క్రిష్ ద‌ర్శ‌క‌త్వంలో రూపొందిన 'కృష్ణం వందే జ‌గ‌ద్గురుమ్' చిత్రంలో న‌ట‌న‌కు స్కోప్ ఉన్న పాత్ర‌లో క‌నిపించ‌డ‌మే కాకుండా.. త‌న పాత్ర‌కు త‌నే డ‌బ్బింగ్ కూడా చెప్పుకుంది. అంతేనా.. ప్ర‌మోష‌న్స్‌కు దూరంగా ఉండే ఈ అమ్మ‌డు.. ఆ సినిమా ప్ర‌చార కార్య‌క్ర‌మాల్లో కూడా బాగానే పాల్గొంది. అయితే.. ఇంత‌చేసి ఆ సినిమా ఆమెకి ఏ విధంగానూ ప్ల‌స్ కాలేక‌పోయింది. ఆ త‌రువాత 'గ్రీకు వీరుడు', 'అనామిక‌', 'బాబు బంగారం' వంటి సినిమాలు చేసినా.. విజ‌యం మాత్రం ద‌క్క‌లేదు. మ‌రో వైపు.. అదే స‌మ‌యంలో త‌మిళనాట వ‌రుస విజ‌యాల‌తో నంబ‌ర్ వ‌న్ క‌థానాయిక అనిపించుకుంది. కోట్ల పారితోషికానికి ప‌డ‌గ‌లెత్తింది. అయితే.. ఒక‌టే లోటు. తెలుగులో స‌రైన విజ‌యం లేద‌ని. అయితే.. ఆ ముచ్చ‌టా తీరింది. తెలుగులో త‌న‌కి క‌లిసొచ్చిన క‌థానాయ‌కుల్లో ఒక‌రైన బాల‌కృష్ణ‌కి జోడీగా న‌టించిన 'జై సింహా' చిత్రం.. న‌య‌న్‌కు చాలా కాలం త‌రువాత తెలుగులో విజ‌యాన్ని అందించింది. ప్ర‌స్తుతం చిరంజీవి స‌ర‌స‌న 'సైరా న‌ర‌సింహారెడ్డి'లో న‌టిస్తోంది న‌య‌న్‌. 

తొలి విజ‌యం ద‌క్కింది
కె.ఎస్‌.రవికుమార్‌.. త‌మిళ‌నాట నంబ‌ర్ వ‌న్ డైరెక్ట‌ర్‌.  ఆయ‌న రూపొందించిన ప‌లు చిత్రాలు ఇక్క‌డా అనువాద‌మై.. ఘ‌న‌విజ‌యం సాధించాయి. 'ముత్తు', 'భామ‌నే స‌త్య‌భామ‌నే', 'న‌ర‌సింహా' వంటి చిత్రాల‌ను ఈ జాబితాలో చేర్చుకోవ‌చ్చు. అయితే.. తెలుగులో నేరుగా రూపొందించిన సినిమాలు మాత్రం ర‌వికుమార్‌కు అంత‌గా అచ్చిరాలేదు. చిరంజీవి ద్విపాత్రాభిన‌యం చేసిన 'స్నేహం కోసం' యావ‌రేజ్ కాగా.. నాగార్జున‌తో చేసిన 'బావ‌న‌చ్చాడు', రాజ‌శేఖ‌ర్‌తో రూపొందించిన 'విల‌న్' ప‌రాజ‌యం పాల‌య్యాయి. ఈ నేప‌థ్యంలో.. దాదాపు 15 ఏళ్ళ త‌రువాత కె.ఎస్‌.ర‌వికుమార్ చేసిన తెలుగు  చిత్రం 'జై సింహా'. బాల‌కృష్ణ కాంబినేష‌న్‌లో చేసిన ఈ మాస్ మూవీ.. బాక్సాఫీస్ వ‌ద్ద విజేత‌గా నిలిచింది. ర‌వికుమార్‌కు తెలుగులో తొలి విజ‌యాన్ని అందించింది.

తొమ్మిదేళ్ళ త‌రువాత‌
అనుష్క ద‌శ‌, దిశ‌ని మార్చివేసిన చిత్రం 'అరుంధ‌తి'. ఆ సినిమా త‌రువాత హీరోయిన్ ఒరియెంటెడ్ మూవీస్‌కు కేరాఫ్ అడ్ర‌స్‌లా మారింది ఈ మంగ‌ళూరు బ్యూటీ. 'పంచాక్ష‌రి', 'వ‌ర్ణ‌', 'రుద్ర‌మ‌దేవి', 'సైజ్ జీరో'.. ఇలా స్వీటీ చేసిన నాయిక ప్రాధాన్యం ఉన్న చిత్రాల‌న్నీ ఆశించిన స్థాయిలో విజ‌యం సాధించ‌లేదు. ఇలాంటి త‌రుణంలో  వ‌చ్చింది.. 'భాగ‌మ‌తి' . జ‌న‌వ‌రి 26న విడుద‌లైన ఈ పొలిటిక‌ల్ హార‌ర్ థ్రిల్ల‌ర్‌.. 'అరుంధ‌తి' త‌రువాత లేడీ ఒరియెంటెడ్ మూవీస్ ప‌రంగా అనుష్కకు విజ‌యాలు లేని లోటును తీర్చింది. అలాగే.. ఓవ‌ర్సీస్‌లో మిలియ‌న్ డాల‌ర్లు వ‌సూళ్ళు సాధించిన తొలి నాయిక ప్రాధాన్యం ఉన్న చిత్రంగా నిలిచింది. 

నిరీక్ష‌ణ ఫ‌లించింది
'పిల్ల జమీందా'ర్ చిత్రంలో మాన‌వ‌తా విలువ‌ల‌ను చ‌క్క‌గా ఆవిష్క‌రించారు ద‌ర్శ‌కుడు జి.అశోక్‌. అయితే ఆ త‌రువాత ఆయ‌న రూపొందించిన 'సుకుమారుడు', 'చిత్రాంగ‌ద' చిత్రాలు పూర్తిగా నిరాశ‌ప‌రిచాయి. అయితే.. అనుష్క‌తో రూపొందించిన హీరోయిన్ ఓరియెంటెడ్ మూవీ 'భాగ‌మ‌తి'..  అశోక్‌కు మ‌రో మంచి విజ‌యాన్ని అందించింది. కొత్త త‌ర‌హా స్క్రీన్‌ప్లేతో ఆయ‌న సెల్యూలాయిడ్‌పై చేసిన మాయాజాలం.. స‌క్సెస్ కోసం నిరీక్షిస్తున్న ఈ టాలెంటెడ్ డైరెక్ట‌ర్‌కు సూప‌ర్ హిట్ రిజ‌ల్ట్‌ను అందించింది. 

వినోదం మెప్పించింది
'ఊహ‌లు గుస‌గుస‌లాడె' చిత్రంతో యువ‌త‌రంలో త‌నకంటూ ప్ర‌త్యేక గుర్తింపు తెచ్చుకున్న యువ క‌థానాయ‌కుడు నాగ‌శౌర్య‌. ఆ త‌రువాత 'దిక్కులు చూడ‌కు రామ‌య్య‌', 'క‌ల్యాణ వైభోగ‌మే', 'జో అచ్యుతానంద' వంటి సినిమాలు చేసినా.. సాలిడ్ హిట్ మాత్రం ద‌క్క‌లేదు. అయితే.. త‌న హోమ్ బేన‌ర్‌పై చేసిన 'ఛ‌లో' చిత్రంతో సాలిడ్ హిట్‌ను సొంతం చేసుకున్నారు. ఫిబ్ర‌వ‌రి 2న విడుద‌లైన ఈ సినిమా.. ఆద్యంతం వినోదాత్మ‌కంగా తెర‌కెక్కి లాభాల బాట ప‌ట్టింది. ఈ సినిమా త‌రువాత నాగ శౌర్య మార్కెట్ పెరిగింద‌నే చెప్పాలి.

తండ్రికి త‌గ్గ త‌న‌యుడు
మ‌ణిశ‌ర్మ‌.. ఇండ‌స్ట్రీ హిట్ చిత్రాల‌న్నెంటికో సంగీత‌మందించిన నిన్న‌టి త‌రం మేటి సంగీత ద‌ర్శ‌కుడు. ఆయ‌న స్వ‌ర‌వార‌సుడిగా ప‌రిశ్ర‌మ‌లోకి అడుగుపెట్టాడు మ‌హ‌తి స్వ‌ర‌సాగ‌ర్‌. 'జాదుగాడు' వంటి సినిమాలు చేసినా.. అత‌ని ప్ర‌తిభ‌కి స‌రైన గుర్తింపు రాలేదు. ఇలాంటి స‌మ‌యంలో 'ఛ‌లో' రూపంలో వ‌చ్చిన అవ‌కాశాన్ని స‌ద్వినియోగం చేసుకున్నాడు. త‌న పాట‌ల‌తో, నేప‌థ్య సంగీతంలో ఆ సినిమా విజ‌యంలో భాగ‌స్వామ్యం వ‌హించాడు. ముఖ్యంగా 'చూసీ చూడంగానే' పాట‌తో సంగీత ప్రియుల ప్ర‌శంస‌లు ద‌క్కించుకున్నాడు.

ప్ర‌తిభ‌కి త‌గ్గ గుర్తింపు
'ఊహ‌లు గుస‌గుస‌లాడె' చిత్రంతో తెలుగు తెర‌కు క‌థానాయిక‌గా ప‌రిచ‌యం అయ్యింది ఉత్త‌రాది భామ రాశి ఖ‌న్నా. ఆ సినిమా త‌రువాత 'జోరు, జిల్‌, బెంగాల్ టైగ‌ర్‌, శివ‌మ్‌, సుప్రీమ్‌,  హైప‌ర్‌, జై ల‌వ‌కుశ‌, ఆక్సిజ‌న్‌, ట‌చ్ చేసి చూడు' వంటి సినిమాలు చేసినా.. ఆ చిత్రాల‌న్నీ ఆమెను గ్లామ‌ర్ హీరోయిన్‌గానే ఎలివేట్ చేశాయి. అయితే ఈ నెల 10న విడుద‌లైన 'తొలిప్రేమ' చిత్రం ఆమెలో దాగిఉన్న మంచి న‌టిని ఆవిష్క‌రించింది. భావోద్వేగాల‌కు అవ‌కాశ‌మున్న వ‌ర్ష పాత్ర‌లో రాశి జీవించింద‌నే చెప్పాలి. ఈ ఒక్క‌ చిత్రంతో నాలుగేళ్ళుగా.. ఇంత‌కు ముందు చేసిన ప‌ది తెలుగు చిత్రాల‌తో రాని గుర్తింపు వ‌చ్చింది. 

ప్రేమ‌క‌థల‌కు సైతం..
త‌మ‌న్‌.. ఒక‌ప్పుడు ఈ పేరు వింటే బీట్ ఒరియెంటెడ్ సాంగ్స్ మాత్ర‌మే గుర్తొచ్చేవి. ఇప్పుడు.. ఆ లెక్క మారింది. కేవ‌లం మాస్ మూవీస్‌, హార‌ర్ చిత్రాలకే త‌ను ప‌రిమితం కాద‌ని.. స‌రైన అవ‌కాశం రావాలే కాని.. ప్రేమ‌క‌థా చిత్రాల‌కు త‌ను అద్భుత‌మైన స్వ‌రాలు ఇవ్వ‌గ‌ల‌న‌ని నిరూపించుకున్నాడు త‌మ‌న్‌. 'తొలిప్రేమ' చిత్రం.. ఇందుకు వేదిక‌గా నిలిచింది. ఇందులోని 'నిన్నిలా నిన్నిలా', 'తొలిప్రేమ టైటిల్ సాంగ్‌', 'అల్ల‌సాని' అనే మెలోడీ గీతాలు త‌మ‌న్‌కు మంచి పేరు తీసుకొచ్చాయి.

ఇలా.. ఏడు వారాల కాలంలో 8 మంది ప్ర‌తిభావంతుల‌కు క‌లిసొచ్చిన 2018.. పూర్తి సంవ‌త్సరంలో ఇంకెంత‌మందికి నెగెటివ్ సెంటిమెంట్స్‌కు బ్రేక్ వేస్తుందో,  అలాగే స‌రైన బ్రేక్ లేనివారికి ట‌ర్నింగ్ పాయింట్‌లా నిలుస్తుందో చూడాలి.  



అజిత్ చిత్రానికి సంగీత ద‌ర్శ‌కుడిగా..

Updated By ManamWed, 02/14/2018 - 18:51

d.imaanత‌ల అజిత్ హీరోగా న‌టిస్తున్న తాజా త‌మిళ చిత్రం 'విశ్వాస‌మ్‌'. లేడీ సూప‌ర్ స్టార్ న‌య‌న‌తార క‌థానాయిక‌గా న‌టిస్తున్న ఈ సినిమాకి శివ ద‌ర్శ‌క‌త్వం వ‌హిస్తున్నారు. కాగా, ఈ చిత్రానికి సంగీత ద‌ర్శ‌కుడిగా డి.ఇమాన్‌ను క‌న్‌ఫ‌ర్మ్ చేశారు. మెలోడీ పాట‌ల‌కు చిరునామాలా నిలిచిన ఇమాన్‌కు.. అజిత్ కాంబినేష‌న్‌లో ప‌నిచేయ‌డం ఇదే తొలిసారి. ఇప్ప‌టికే మ‌రో స్టార్ హీరో విజ‌య్ న‌టించిన 'త‌మిళ‌న్‌', 'జిల్లా' చిత్రాల‌కు ఇమాన్ స్వ‌రాల‌ను అందించారు. ఇదిలా ఉంటే.. దీపావ‌ళి కానుక‌గా 'విశ్వాస‌మ్' తెర‌పైకి రానుంది.





Related News