Amit Shah

మీ తీరు బాగాలేదు

Updated By ManamWed, 11/21/2018 - 04:31
  • బానిస శిబిరంలో ఉన్నవారిలా చూస్తున్నారు

  • అయ్యప్ప భక్తులకు బీజేపీ అండగా ఉంటుంది

  • కేరళ సీఎం విజయన్‌పై అమిత్ షా ఫైర్ 

amit-shahన్యూఢిల్లీ: శబరిమల ఆలయానికి అయ్యప్ప స్వామి దర్శనానికి వచ్చే భక్తుల పట్ల సముచితంగా వ్యవహరించడం లేదని, బానిస శిబిరాల్లో ఉన్నవారిలా చూస్తున్నారని కేరళ ముఖ్యమంత్రి పినరయ్ విజయన్‌పై బీజేపీ చీఫ్ అమిత్ షా మండిపడ్డారు. అయ్యప్ప భక్తుల పట్ల అమానుషంగా ప్రవర్తిస్తున్నారని, చెత్తకుండీల వద్ద నిద్రలేని రాత్రులు గడిపేలా చేస్తున్నారని విమర్శించారు. ప్రజల విశ్వాసాన్ని దెబ్బతీసేందుకు కేరళ ప్రభుత్వం ప్రయత్నిస్తోందని, భక్తులకు బీజేపీ అండగా ఉంటుందని షా పేర్కొనారు. ‘‘సున్నితమైన శబరిమల ఆలయ విషయంలో పినరయ్ విజయన్ సర్కార్ వ్యవహరించితీరు నిరాశ కలిగించింది. బాలికలు, తల్లులు, మహిళల పట్ల కేరళ పోలీసులు అమానవీయంగా ప్రవర్తించారు. భోజనం, తాగునీరు, ఆవాసం, మరుగుదొడ్లు వంటి కనీస సదుపాయాలు కల్పించలేదు’’ అని అమిత్ షా ట్వీట్ చేశారు. కాగా శబరిమల ఆలయంలోకి 10-50 ఏళ్ల మధ్య వయసు మహిళల ప్రవేశాన్ని అనుమతిస్తూ సుప్రీం కోర్టు తీర్పు ఇచ్చిన సంగతి తెలిసిందే. కాగా ఈ వయసు మహిళల ప్రవేశాన్ని వ్యతిరేకిస్తూ అయ్యప్ప భక్తులు కేరళలో తీవ్ర స్థాయిలో ఆందోళన నిర్వహించారు. కేరళ రాష్ట్ర బంద్‌కు కూడా పిలుపునిచ్చారు. ఆలయ దర్శనానికి వచ్చిన మహిళలను అడ్డుకున్నారు. దీంతో అక్కడ తీవ్ర ఉద్రిక్త పరిస్థితి నెలకొంది. కేరళ ప్రభుత్వం శబరిమలలో భారీగా పోలీసు బలగాలను మోహరించింది. హిందూ సంఘాలు, బీజేపీ నేతలను అరెస్ట్ చేయించింది. కాగా పినరయ్ సర్కారు తీరుపై అయ్యప్ప భక్తులు తీవ్ర నిరసన తెలియజేశారు. పోలీసులు చర్యలను నిరసిస్తూ ఆందోళనకు దిగారు. 



'రాహుల్‌కు.. మోదీ ఫోబియా పట్టుకుంది'

Updated By ManamFri, 11/16/2018 - 16:42
  • మధ్యప్రదేశ్ ఎన్నికల ప్రచారంలో అమిత్ షా 

  • కాంగ్రెస్ అధ్యక్షుడిపై షా విమర్శల జల్లు

  • గిరిజన ప్రజల సంక్షేమమే లక్ష్యంగా పనిచేస్తాం

Rahul Gandhi, Modi phobia, Amit Shah, Madhya Pradeshబర్వాన్: మధ్యప్రదేశ్ అసెంబ్లీ ఎన్నికల నేపథ్యంలో రాష్ట్రంలో అధికారం చేపట్టేందుకు బీజేపీ, కాంగ్రెస్ ఎన్నికల ప్రచారంలో జోరుగా దూసుకెళ్తున్నాయి. మధ్యప్రదేశ్‌లో అధికారమే లక్ష్యంగా ఇరుపార్టీల మధ్య మాటల యుద్ధం నడుస్తోంది. తాజాగా గురువారం మధ్యప్రదేశ్‌లోని బర్వానీలో నిర్వహించిన ర్యాలీలో బీజేపీ జాతీయ అధ్యక్షుడు అమిత్ షా కాంగ్రెస్ అధ్యక్షుడు రాహుల్‌పై మాటల తూటలు పేల్చారు. రాహుల్ గాంధీ మోదీ ఫోబియాతో బాధపడుతున్నారని చురకులు అంటించారు. బీజేపీ, కేంద్రం, రాష్ట్రంలో అధికారంలోకి వస్తే ప్రజలకు మేలు చేసే ఎన్నో సంక్షేమ పథకాలను తీసుకొస్తామని హమీ ఇచ్చారు. రాహుల్ ఎక్కడికి వెళ్లినా మోదీ నామాన్ని స్మరిస్తున్నారని, ఆయన ప్రసంగాలను వింటుంటే కాంగ్రెస్ చీఫ్ ఏకంగా బీజేపీ ర్యాలీలో మోదీకి అనుకూలంగా ప్రచారం చేస్తున్నారనే గందరగోళంగా ఉందని ఎద్దేవా చేశారు.

తన పార్టీ సహచరులు, నేతల కంటే రాహులే ఎక్కువగా మోదీ జపాన్ని చేస్తున్నారని అమిత్ షా వ్యంగస్త్రాలను సంధించారు. ‘‘దేశవ్యాప్తంగా ఎక్కడికి వెళ్లానా మోదీ..మోదీ.. అనే నామాన్ని రాహుల్ పదేపదే స్మరిస్తున్నారు. బహుషా రాహుల్‌కు మోదీ ఫొబియా పట్టుకుందనే అనుమానం కలుగుతోంది. ఆయన ప్రసంగాన్ని వింటుంటే రాహుల్ బాబా మాట్లాడుతున్నట్టుగా ఉంది’’ అని ఎద్దేవా చేశారు. గిరిజన ప్రజలకు కాంగ్రెస్ చేసిందేమి లేదని షా విమర్శించారు. కానీ, గిరిజన ప్రజల కోసం బీజేపీ ఇండోర్-మన్‌మడ్ రైలు మార్గాన్ని తీసుకొచ్చిన విషయాన్ని ఈ సందర్భంగా షా గుర్తు చేశారు. నాలుగు గిరిజన అసెంబ్లీ స్థానాలతో కలిపి మధ్యప్రదేశ్‌లో ఈ నెల 28న ఎన్నికలు జరుగనున్న సంగతి తెలిసిందే. 



అమిత్‌షా తెలంగాణ పర్యటన ఖరారు

Updated By ManamThu, 11/15/2018 - 10:12

Amit Shahహైదరాబాద్: బీజేపీ జాతీయధ్యక్షుడు అమిత్ షా తెలంగాణ పర్యటన ఖరారు అయ్యింది. ఈ నెల 25న ఆయన తెలంగాణకు రానున్నారు. ఇక ఆయన ఏఏ సభల్లో పాల్గొననున్నారు, ఏఏ ప్రాంతాల్లో ప్రచారం చేయనున్నారు అనే దానిపై త్వరలో స్పష్టత వస్తుందని పార్టీ వర్గాలు అంటున్నాయి. ఇప్పటికే అమిత్ షా పలుమార్లు తెలంగాణలో పర్యటించినప్పటికీ.. ఈ సారి ఆయన పర్యటన ఎన్నికలకు సహాయపడుతుందని పార్టీ వర్గాలు భావిస్తున్నాయి.



త్యాగధనులను విస్మరించారు

Updated By ManamMon, 10/29/2018 - 06:59
  • ఎంఐఎంకు టీఆర్‌ఎస్ భయపడుతోంది

  • అందుకే విమోచన దినం చేయడం లేదు

  • తెలంగాణలో కాషాయ జెండా ఎగిరితేనే అభివృద్ధి

  • మునిగిపోయే నావ.. సారథి లేని కాంగ్రెస్ 

  • మరోసారి మోదీ ప్రధాని కావడం ఖాయం

  • జాతీయ యువ సమ్మేళనం ముగింపు సభలో బీజేపీ జాతీయాధ్యక్షుడు అమిత్‌షా 

Amit Shahహైదరాబాద్: తెలంగాణ విమోచనం కోసం  ప్రాణ త్యాగాలు చేసిన అమరులు చరిత్రలో నిలిచి పోయారని, అలాంటి త్యాగ దనులను టీఆర్‌ఎస్ విస్మరిం చిందని భారతీయ జనతాపార్టీ అధ్యక్షులు అమిత్‌షా ఆరోపించారు. మజ్లిస్ పార్టీకి భయపడి తెలంగాణ విమోచన దినం నిర్వహించకపోవడం బాధాకరమన్నారు. ఆదివారం సికింద్రాబాద్ గ్రౌండ్స్‌లో జరిగిన బీజేపీ జాతీయ యువ మోర్చా సమ్మేళన ముగింపు సభకు ముఖ్య అతిథిగా హాజరయ్యారు. యువ మోర్చా అధ్యక్షురాలు పూనమ్ మహాజన్ ఆధ్వర్యంలో జరిగిన సభలో  ఆయన మాట్లాడుతూ..  2019లో మోదీ మళ్లీ ప్రధాని కావడం ఖాయమని, అందుకోసం యువనాయకులంతా సంకల్పంతో పనిచేయాలని సూచించారు. నిరంకుశ నిజాం పాలన నుంచి తెలంగాణ విముక్తి కల్పించిన నేత సర్దార్ వల్లాబాయ్ పటేల్ అని, దేశ రక్షణ కోసం రాజీపడని మహానీయుడని కొనియాడారు.  తాము అధికారంలోకి రాగానే తెలంగాణ విమోచన దినోత్సవాన్ని నిర్వహిస్తామని హామీ ఇచ్చారు. విమోచన దినం మరవడం కన్నా దౌర్భాగ్యం మరొకటి లేదన్నారు. తెలంగాణలో సర్కార్ మారాలని, ఇక్కడ బీజేపీ సర్కార్ వస్తే బలిదానాలు చేసిన వారికి  ఘనమైన నివాళులర్పిస్తామన్నారు.  ఇప్పటి నుంచి ఓట్ల లెక్కింపు వరకు యువ మోర్చా కార్యకర్తలు విజయం కోసం పాటు పడాలని, మోదీకి ప్రత్యర్థి ఎవరో తెలియని కూటమితో పోటీ ఉంటుందన్నారు. దేశం కోసం ఎందరో ప్రాణాలర్పిస్తేనే మనకు స్వాతంత్ర వచ్చిందని, ఇప్పడు మోదీ నేతృత్వంలో పనిచేయాల్సిన అవసరం ఉందని, కాంగ్రెస్ పాలనలో నిరుపేదలకు చేసిందేమిలేదని ఆరోపించారు. బీజేపీ పాలనలో పేదలు, రైతులు, మహిళలు, యువత, ఎస్సీ, ఎస్టీ అన్ని వర్గాల  వారికి సంక్షేమ పథకాలు ప్రవేశపెట్టామని వివరించారు. మెరుపుదాడులు ద్వారా పాకిస్తాన్‌కు దీటైన సమాధానం ఇచ్చామని గుర్తు చేశారు. దేశం అభివృద్ధిలో పరుగులు పెడుతోందని, కాశ్మీర్ నుంచి కన్యాకుమారి వరకు కమల దళపతులు గెలుపు కోసం శ్రమించాలని పిలుపునిచ్చారు. రాహాల్‌బాబాకు తమను ప్రశ్నిస్తే హక్కులేదని, నాలుగు తరాలు అధికారంలో ఉన్న కాంగ్రెస్ కంటే నాలుగు సంవత్సరాల్లో మోదీనే ప్రజలకు ఎక్కువ సేవలందించారని పేర్కొన్నారు. పాకిస్తాన్‌తో ఆట పాట వల్ల దేశంలో ఎక్కడ చూసిన ఉగ్రవాదులు రెచ్చిపోయారని, సర్జికల్ దాడులు చేసిన తరువాత  దేశం పేరు ప్రపంచ వ్యాప్తంగా మారు మోగిందన్నారు. దేశంలో జవాన్లు, మానవ హక్కులు కాంగ్రెస్‌కు పట్టవని, పదవి విరమణ చేసిన సైనికుల కోసం  యూపీఏ ఇవ్వని వన్ ర్యాంక్ పెన్షన్ తాము అందజేస్తున్నామని చెప్పారు.  ఉజ్వల యోజనతో కోట్లాది మంది మహిళలు కట్టెల పొయ్యి నుంచి విముక్తి పొందరని, 14కోట్ల మంది యువకులకు ముద్ర రుణాలు మంజూరు చేశామని, కోట్ల మంది మహిళలు మరుగుదొడ్లతో ఆత్మగౌరవం పొందారని వెల్లడించారు. దేశాన్ని ఏకతాటిపై నడిపేందుకు తాము నిరంతరం కృషి చేస్తామన్నారు. కాంగ్రెస్ కూటమికి నాయకులులేరని, అలాంటి కూటమిని ప్రజలు నమ్మరన్నారు. బీజేపీ ప్రజా సంక్షేమ కార్యక్రమాలను ప్రజల్లోకి తీసుకెళ్లాని యువతకు సూచించారు.

నిరుద్యోగులను టీఆర్‌ఎస్ మోసం చేసింది: డా. ల క్ష్మణ్
ఎన్నికల్లో లక్ష ఉద్యోగాలు నియమిస్తామని గొప్పగా హామీ ఇచ్చిన టీఆర్‌ఎస్ అధికారం చేపట్టిన తరువాత నిరుద్యోగులపై కేసులు పెట్టి అణిచివేసేందుకు ప్రయత్నం చేశారని రాష్ట్ర అధ్యక్షులు డా. లక్ష్మణ్ ఆరోపించారు. యువత నరేంద్ర మోదీని ఆదర్శంగా తీసుకోవాలని, నిరుద్యోగులకు ఉపాధి కోసం స్కిల్ డెవలప్‌మెంటు సెంటర్లు ఏర్పాటు చేశారని, దేశంలో లక్షలాదిమంది జీవితాల్లో వెలుగులు నింపామని చెప్పారు. తాము అధికారం చేపడితే నాణ్యమైన విద్య, మెగా డీఎస్సీ, ఇతర ఉద్యోగాలు భర్తీ చేస్తామని హామీ ఇచ్చారు. కే సీఆర్ తెలంగాణ నిరుద్యోగులకు విలన్‌గా కనిపిస్తున్నాడని, మోసం చేసిన  టీఆర్‌ఎస్ సర్కార్‌కు చరమగీతం పాడాలని యువతకు ఆయన సూచించారు. అధికారమే లక్ష్యంగా యువ మోర్చానాయకులు ముందుకు వెళ్లాలని కోరారు. దక్షిణాది యువ మోర్చా సమ్మేళనం హైదరాబాద్‌లో నిర్వహించడం పార్టీ బలోపేతం అవుతుందని ఆశాభావం వ్యక్తం చేశారు.

పతంగి పట్టుకుని నడుస్తున్న కారు: పూనమ్ మహాజన్
తెలంగాణ సీఎం కేసీఆర్ పతంగి పట్టుకుని కారు నడుపుతున్న వారి మధ్యలోకి అమిత్‌షా లాంటి  సింహం రావడంతో భయపడుతున్నారని పూనమ్ మహాజన్ విమర్శించారు. తాను తెలంగాణ బిడ్డను, ఆంద్రా కోడలినని చెప్పిన ఆమె 2018 తెలంగాణ ఎన్నికల్లో గెలుపుద్వారా కేంద్రంలో  2019 ఎన్నికల్లో మోదీ విజయం సాధించడం ఖాయమన్నారు.  రాహుల్ వెంట కొంతమంది మూర్ఖులు ఉన్నారన పరోక్షంగా చురకవేశారు.  ప్రతి పోలింగ్  బూత్‌లో కమలం గెలుపొందాలని,  వచ్చే ఎన్నికల్లో గెలుపే మన సంకల్పమని, ఈసమ్మేళనం ఉద్దేశ్యం కూడా అదేనన్నారు. డిసెంబర్ 11న తెలంగాణలో బీజేపి జెండా ఎగురుతుందని ధీమా వ్యక్తం చేశారు.



అయ్యప్ప భక్తులకు అండగా ఉంటాం..

Updated By ManamSat, 10/27/2018 - 18:44
amit shah in kerala

తిరువనంతపురం : శబరిమలలో మహిళల ప్రవేశం విషయంలో కేరళ ప్రభుత్వం దుర్వినియోగానికి పాల్పడుతోందని, బీజేపీ, ఆర్‌ఎస్‌ఎస్ కార్యకర్తలను లక్ష్యంగా చేసుకుందని బీజేపీ జాతీయ అధ్యక్షుడు అమిత్ షా ఆరోపించారు. కేరళ ప్రజలు, అయ్యప్ప స్వామి భక్తుల మనోభావాలకు బీజేపీ మద్దతు ఇస్తుందని, మీ వెంటే ఉంటామంటూ ఆయన భరోసా ఇచ్చారు. శబరిమల ఆలయంలో బ్రహ్యచర్యం దీక్ష పాటించే వారికే అనుమతి ఉంటుందని, ప్రత్యేకించి ఓ వయసు మహిళలను అనుమతించరని అన్నారు. దేశంలో చాలా ఆలయాలు మహిళలకు మాత్రమే ఉన్నాయని, పురుషులను అనుమతించరని, ఆ ఆలయాల్లోకి ప్రవేశించేందుకు మగవాళ్లు ప్రయత్నించరని అమిత్ షా అన్నారు. ‘స్వామియే శరణం అయ్యప్ప’ అంటూ షా తన ప్రసంగాన్ని ముగించారు. 

శబరిమల అయ్యప్ప స్వామి ఆలయంలోకి మహిళల ప్రవేశాన్ని అడ్డుకున్నందుకు 2800 మందికిైపెగా అరెస్ట్ చేయడాన్ని షా ప్రస్తావిస్తూ.. వీరు సంప్రదాయాలను కాపాడుకునేందుకు పోరాడుతున్నారని అన్నారు. కాగా శబరిమల ఆలయంలోకి అన్ని వయసుల మహిళల ప్రవేశాన్ని అనుమతిస్తూ ఇటీవల సుప్రీం కోర్టు తీర్పు వెలువరించిన సంగతి తెలిసిందే. దీంతో ఆలయంలోకి మహిళలు (10-50 ఏళ్ల మధ్య వయసు వారు) ప్రవేశించకుండా కేరళలో పెద్ద ఎత్తున ఆందోళన చేపట్టగా, పలుచోట్ల హింస చోటుచేసుకుంది.

శనివారం కేరళలోని కన్నూరులో జరిగిన బహిరంగ సభలో అమిత్ షా ఈ విషయంపై స్పందించారు. కేరళలో ప్రభుత్వ నిరంకుశత్వానికి, మతవిశ్వాసాలకు మధ్య పోరాటం జరుగుతోందని అన్నారు. శబరిమల అంశాన్ని కేరళ ప్రభుత్వం దుర్వినియోగం చేస్తోందని, బీజేపీ, ఇతర పార్టీ సానుభూతి పరులను అరెస్ట్ చేయడానికి దీన్ని అవకాశంగా తీసుకుంటోందని విమర్శించారు. వేలదిమంది కార్యకర్తలు జైలులో ఉన్నారని చెప్పారు. శబరిమలపై సుప్రీం కోర్టు తీర్పు అమలు పేరుతో భక్తులను వేధించవద్దని కేరళ ముఖ్యమంత్రి పినరయి విజయన్‌ను హెచ్చరించారు. కేరళలో ఆలయాల పవిత్రతను దెబ్బతీసేందుకు పథకం ప్రకారం కుట్ర జరుగుతోందని అమిత్ షా ఆరోపించారు. 

శబరిమల అయ్యప్పస్వామి ఆలయంలో మహిళలు ప్రవేశించకుండా చేపట్టిన ఆందోళనకు కేరళ బీజేపీ శాఖ మద్దతు ప్రకటించింది. నెలవారీ పూజల నిర్వహణకు ఈ నెల 17 నుంచి 22 వరకూ అయ్యప్ప స్వామి ఆలయాన్ని తెరిచి ఉంచారు. ఈ సందర్భంగా ఆలయ దర్శనానికి వెళ్లిన మహిళలను ఆందోళనకారులు అడ్డుకున్నారు. కేరళలో 2825 మంది నిరసనకారులను పోలీసులు అరెస్ట్ చేసి, మొత్తం 495 కేసులను నమోదు చేశారు. 



బీజేపీలో చేరిన స్వామి పరిపూర్ణానంద

Updated By ManamFri, 10/19/2018 - 17:13
paripoornananda swami joins bjp

న్యూఢిల్లీ : శ్రీపీఠం అధిపతి స్వామి పరిపూర్ణానంద శుక్రవారం భారతీయ జనతా పార్టీలో చేరారు. బీజేపీ జాతీయ అధ్యక్షుడు అమిత్ షా సమక్షంలో ఆయన కాషాయ కండువా కప్పుకున్నారు. పార్టీ అధ్యక్షుడు అమిత్ షా ఇవాళ సాయంత్రం పరిపూర్ణానందకు కండువా కప్పి పార్టీలోకి ఆహ్వానించారు. బీజేపీ చేరిన అనంతరం స్వామి పరిపూర్ణానంద మీడియాతో మాట్లాడుతూ ... అమిత్ షా నాయకత్వంలో పని చేస్తామని అన్నారు. తాను ఎలాంటి షరతులతో బీజేపీలో చేరడం లేదని అన్నారు.

ఈ కార్యక్రమంలో పార్టీ జాతీయ ప్రధాన కార్యదర్శి రాం మాధవ్ కూడా పాల్గొన్నారు. పరిపూర్ణానంద చేరికతో తెలంగాణలో రాజకీయ సమీకరణలు అనూహ్యంగా మారతాయని ఆ పార్టీ భావిస్తోంది. కాగా ఈ నెల 8వ తేదీన స్వామి.. షాతో భేటీ అయిన విషయం తెలిసిందే. స్వామి పరిపూర్ణానంద తెలంగాణ బీజేసీ సీఎం అభ్యర్థిగా పేరు వినిపిస్తోంది. రానున్న అసెంబ్లీ ఎన్నికల్లో ఆయన జూబ్లీహిల్స్ నుంచి పోటీ చేసే అవకాశం ఉంది.

paripoornanada swamy


కాంగ్రెస్ పార్టీకి భారీ ఎదురుదెబ్బ

Updated By ManamSat, 10/13/2018 - 15:10
  • ఛత్తీస్‌గఢ్‌లో కాంగ్రెస్‌కు పార్టీకి షాక్

  • బీజేపీలో చేరిన పార్టీ సీనియర్ నేత రాందేయ్ ఉకి

Chhattisgarh congress Senior Leader  Ramdey Uike Joins BJP

బిలాస్‌పూర్ : మరో నెలలో అసెంబ్లీ ఎన్నికలు జరగనున్న నేపథ్యంలో ఛత్తీస్‌గఢ్‌లో కాంగ్రెస్ పార్టీకి భారీ ఎదురుదెబ్బ తగిలింది. కాంగ్రెస్ సీనియర్ నేత, ఆ పార్టీ రాష్ట్ర స్టేట్ ఎగ్జిక్యూటివ్ ప్రెసిడెంట్ రాందేయ్ ఉకి శనివారం కాషాయ కండువా కప్పుకున్నారు. బిలాస్‌పూర్‌లో జరిగిన ఓ కార్యక్రమంలో సీఎం రమణ్ సింగ్ ఆధ్వర్యంలో బీజేపీ జాతీయధ్యక్షుడు అమిత్ షా సమక్షంలో ఉకి బీజేపీలో చేరారు. ఆయన పాలి నియోజకవర్గం నుంచి నాలుగుసార్లు ప్రజా ప్రతినిధిగా ఎన్నిక అయ్యారు.

ఉకి బీజేపీలో చేరికపై ఛత్తీస్‌గఢ్ కాంగ్రెస్ అధ్యక్షుడు భూపేష్ భగాలే మాట్లాడుతూ... కొద్దిరోజుల క్రితం తాము కలిశామని, అయితే ఉకి పార్టీ మారే విషయంపై ఏమీ మాట్లాడలేదన్నారు. అయితే ఎన్నికల వేళ  రాజకీయ నాయకులు ఇలా పార్టీలు మారడం సరకాదని అన్నారు. మరోవైపు ఏఐసీసీ అధ్యక్షుడు రాహుల్ గాంధీ శుక్రవారం ఛత్తీస్‌గఢ్‌ అసెంబ్లీ అభ్యర్థుల జాబితాను ఖరారు చేశారు. మరో రెండు రోజుల్లో అభ్యర్థుల పేర్లను ప్రకటించే అవకాశం ఉంది.



కాంగ్రెస్‌కు అమిత్‌ షా సవాల్

Updated By ManamFri, 10/05/2018 - 17:37
BJP chief Amit Shah challenges Congress to open debate on development

నరహర్‌పూర్ : అభివృద్ధిపై బహిరంగ చర్చకు సిద్ధమా అని కాంగ్రెస్ అధిష్ఠానానికి బీజేపీ జాతీయాధ్యక్షుడు అమిత్‌షా సవాలు విసిరారు. ‘అటల్ వికాస్ యాత్ర’లో భాగంగా ఛత్తీస్‌గఢ్‌లో నరహర్‌పూర్‌లో శుక్రవారం నిర్వహించిన సభలో అమిత్‌షా పాల్గొన్నారు.

ప్రధాని నరేంద్రమోదీ మార్గదర్శకం, సీఎం రమణ్‌సింగ్ నేతృత్వంలో ఛత్తీస్‌గఢ్ అభివృద్ధిలో దూసుకుపోతోందని అమిత్‌షా పేర్కొన్నారు. రాష్ట్రంలో జరుగుతున్న అభివృద్ధిపై చర్చకు కాంగ్రెస్ సిద్ధమా? చర్చకు మేం సిద్ధమేనని అన్నారు. 55 ఏళ్ల కాంగ్రెస్ పాలన, 15 ఏళ్ల బీజేపీ పాలనపై చర్చకు కాంగ్రెస్ రావాలని అన్నారు.

వికాస్ యాత్రలో భాగంగా రమణ్‌సింగ్ రాష్ట్రమంతా 11 వేల కిలోమీటర్లు ప్రయాణించారని, అన్ని అసెంబ్లీ నియోజకవర్గాలను చుట్టివచ్చారని చెప్పారు. ప్రజలతో ఆయనకు మంచి సంబంధాలు ఉన్నాయన్నారు. రాష్ట్రం ఏర్పడిన తొలినాళ్లలో కాంగ్రెస్ మూడేళ్లు అధికారంలో ఉందని, వారి హయాంలో ‘బిమారు’ జాబితాలో ఛత్తీస్‌గఢ్ ఉండేదని అన్నారు. 

 



బీజేపీలోకి ‘గజపతి’ ఫ్యామిలీ

Updated By ManamTue, 10/02/2018 - 13:34
  • బీజేపీలో చేరిన మాజీమంత్రి ఆనంద గజపతి కుమార్తె

  • సనా స్వచ్ఛంద సంస్థ మేనేజింగ్ ట్రస్టీ

  • ఎనిమిది క్లస్టర్లుగా ఆంధ్రప్రదేశ్

  • కోర్ కమిటీ సమావేశంలో నిర్ణయం

Sanchaita Gajapati Raju Joins BJP

న్యూఢిల్లీ : విజయనగరం జిల్లాకు చెందిన గజపతుల కుటుంబ సభ్యురాలు బీజేపీ తీర్థం పుచ్చుకున్నారు. రాష్ట్ర మాజీమంత్రి ఆనంద గజపతిరాజు కుమార్తె సంచిత గజపతిరాజు సోమవారం ఢిల్లీలో బీజేపీ జాతీయాధ్యక్షుడు అమిత్‌షా, రాష్ట్ర అధ్యక్షుడు కన్నా లక్ష్మీనారాయణ, సీనియర్ నాయకుడు హరిబాబుల సమక్షంలో కండువా కప్పుకొన్నారు.

కేంద్ర మాజీమంత్రి పూసపాటి అశోక్ గజపతిరాజుకు.. మాజీమంత్రి ఆనంద గజపతిరాజు స్వయంగా సోదరుడు. సంచిత చాలా కాలం నుంచి సనా స్వచ్ఛంద సంస్థకు మేనేజింగ్ ట్రస్టీగా వ్యవహరిస్తూ.. రాష్ట్రంలో పలు సేవా కార్యక్రమాలు నిర్వహిస్తున్నారు. ఆమె తల్లి ఉమాగజపతి రాజు కూడా గతంలో విశాఖపట్నం ఎంపీగా పనిచేశారు. ఒకవైపు అశోక్ గజపతిరాజు టీడీపీలో చురుకైన నేతగా వ్యవహరిస్తుండగా.. ఆయన సోదరుడి కుమార్తె మాత్రం ఇప్పుడు బీజేపీలో చేరడం విశేషం. 



సమ్మేళనాలతో సమరంలోకి..

Updated By ManamSat, 09/29/2018 - 23:09
  • స్పీడ్ పెంచిన బీజేపీ

  • యువత, రైతులకు దగ్గరయ్యేలా ప్రణాళిక

  • అక్టోబర్‌లో అసెంబ్లీ నవయువ సమ్మేళనాలు

  • టీఆర్‌ఎస్ వైఫల్యాలపై విస్తృత ప్రచారం

  • బీజేపీ ఏం చేస్తుందో వివరించనున్న శ్రేణులు

BJPహైదరాబాద్:  తెలంగాణలో ముందస్తు ఎన్నికల నేపథ్యంలో బీజేపీ దూకుడు పెంచింది. ఎన్నికల ప్రణాళికలను సిద్ధం చేసుకుంటోంది. రాష్ట్రంలో అధికారంలోకి వచ్చేందుకు ముమ్మర ప్రయత్నాలు చేస్తోంది. నేరుగా ప్రజాక్షేత్రంలోకి వెళ్లాలని నిర్ణయించింది. ఇందులో భాగంగా అసెంబ్లీవారీగా సమ్మేళనాలు, నవయువ సమ్మేళనాలు నిర్వహించేందుకు ప్రణాళికలు రచిస్తోంది. టీఆర్‌ఎస్ వైఫల్యాలు, బీజేపీ అధికారంలోకి వస్తే ఏం చేస్తుందో ఈ సమ్మేళనాల ద్వారా విస్తృత ప్రచారం చేయాలని సంకల్పించింది.

బూత్ స్థాయి నుంచే ప్రచారం
ఈనెల 15న బీజేపీ జాతీయ అధ్యక్షుడు అమిత్ షా.. పాలమూరులో ఎన్నికల శంఖారావం పూరించారు. ఇటీవల చేగుంటలో బీజేపీ మహిళా శంఖారావాన్ని విజయవంగా నిర్వహించింది. ఈ రెండు సభల విజయవంతంతో బీజేపీ శ్రేణుల్లో ఉత్సాహం కనిపిస్తోంది. అదే ఉత్సాహాన్ని కొనసాగించేం దుకు ఆ పార్టీ కోర్‌కమిటీ సమావేశంలో పలు నిర్ణయాలు తీసుకున్నారు. ముఖ్యంగా ప్రజల్లోకి ఎలా వెళ్లాలనే దానిపై చర్చించారు. అక్టోబర్ 1వ తేదీ నుంచి 15వ తేదీ వరకు 119 నియోజకవర్గాల్లో అసెంబ్లీ సమ్మేళనం నిర్వహించనున్నారు. ప్రతీ బూత్ స్థాయిలో 20మందితో సమ్మేళనం నిర్వహిస్తారు. అదే విధంగా కొత్తగా ఓటు నమోదు చేసు కున్న యువతతో అక్టోబర్ 1వ తేదీ నుంచి 25వ తేదీ వరకు నవయువ సమ్మేళనం నిర్వహిస్తారు. ఈ రెండు కార్యక్రమాల్లో టీఆర్‌ఎస్ ప్రభుత్వ వైఫ ల్యాలను ఎండగట్టడం తోపాటు బీజేపీ అధికారంలోకి వస్తే ఏం చేస్తుందనే అంశాలను వివరించను న్నారు. ఆయా సమ్మేళనాలకు బీజేపీ సీనియర్ నేతలు ముఖ్య అతిథులుగా హాజరవుతారు.

3,4,5 తేదీల్లో అభిప్రాయాల స్వీకరణ
బీజేపీ 119 స్థానాల్లో ఒంటరిగా పోటీ చేస్తామని చెప్పడంతో ఎమ్మెల్యే టికెట్ కోసం ఆశావహులు పార్టీ కార్యాలయానికి క్యూ కడుతున్నారు. తమ అనుచరగణంతో వచ్చి టికెట్ ఇవ్వాలని కోరుతున్నారు. ఇప్పటికే ఆశావహుల నుంచి బీజేపీ నేతలు దరఖాస్తులు స్వీకరించారు. ఈ నేపథ్యంలో అక్టోబర్ 3,4,5 తేదీల్లో ఆయా నియోజకవర్గాల నుంచి అభ్యర్థులకు సంబంధించి అభిప్రాయాలను తెలుసుకోనున్నారు. 3వ తేదీన ఖమ్మం, నల్లగొండ, వరంగల్, 4న ఆదిలాబాద్, నిజామాబాద్, కరీంనగర్, మెదక్, 5న రంగారెడ్డి, మహబూబ్‌నగర్, హైదరాబాద్ ప్రాంతాలకు చెందిన బీజేపీ, దాని అనుబంధ సంఘాల జిల్లా, మండల అధ్యక్షులు, ఇతర నేతల నుంచి అభ్యర్థుల ఎంపికకు సంబంధించి అభిప్రాయాలను స్వీకరించనున్నారు.

అక్టోబర్ 17 తర్వాత అమిత్‌షా టూర్
amit-shahరాష్ట్రంలో ముందస్తు ఎన్నికల నేపథ్యంలో బీజేపీ జాతీయ అధ్యక్షుడు అమిత్ షా తెలంగాణపై దృష్టి పెట్టారు. ఇప్పటికే పాలమూరు నుంచి ఎన్నికల ప్రచారాన్ని ప్రారంభించగా రాష్ట్ర వ్యాప్తంగా 50సభలు నిర్వహించాలని పార్టీ నిర్ణయించింది. ఇందులో భాగంగా అమిత్ షా రెండో సభను కరీంనగర్‌లో నిర్వహించనున్నారు. మొదటగా అక్టోబర్ తొలివారంలో అమిత్ షా సభ ఉంటుందని అనుకున్నప్పటికీ వివిధ కారణాలతో అక్టోబర్ 17 లేదా 18వ తేదీకి వాయిదా పడినట్లు సమాచారం. ఆ తర్వాత కొద్ది రోజుల తేడాతో వరంగల్‌లో మరో సభ ఏర్పాటు చేయనున్నారు.





Related News