manam mudra

వ్యోమభారతీయం

Updated By ManamWed, 10/03/2018 - 01:58

మనిషికి రెక్కలొచ్చి నాలుగు దశాబ్దాలు దాటింది. ఆకాశపు సరిహద్దుల్ని దాటి భూకక్ష్యలోకి, భూ వాతావరణాన్ని దాటి ఖగోళం లోకి, ఖగోళపు అనంత దూరా ల్లోకి మానవుడు అడుగుపెట్టి నాలుగు దశాబ్దాలు దాటింది. యూరీ గగారిన్ 12 ఏప్రిల్ 1961న తొలిసారిగా భూ కక్ష ్యలో అడుగు పెట్టారు. దిగజ్ఞ్మండల లక్ష్మణ రేఖను దాటిన ఆ తొలిమానవుడు ఖగోళంలోకి రెక్కల్ని విప్పార్చాడు. రష్యా, అమెరికా, చైనాలు మానవుల్ని అంతరిక్షంలోకి పంపాయి. ఇప్పు డిక భారతీయుల వంతు..., ఇప్పుడిక మన వంతు! 

స్వాతంత్య్రానంతరం ఇన్ని దశాబ్దాల తరువాత, దేశం ఖగోళ పరిశోధనల్లో తనదైన ప్రయోగాలు మొదలు పెట్టిన తరువాత ఇన్నేళ్ళకు...., తొలిసారిగా భారత్ మానవ సహిత అంతరిక్ష నౌక ప్రయోగానికి శ్రీకా రం చుట్టింది. ఈ ప్రయోగం పేరు ‘గగన్‌యాన్’. మన దేశం 2022 నాటికి స్వయంగా మానవ సహిత అంతరిక్ష నౌకను రోదసిలోకి పంపడానికి నిశ్చయించింది. ప్రపంచంలోనే మానవ సహిత అంతరిక్ష నౌకను ప్రయోగించిన నాలుగో దేశంగా భారత్ చరిత్ర సృష్టించబోతోంది. ఇంతవరకు రష్యా, అమెరికా, చైనాలే ఈ దిశగా విజయవంతమైన ప్రయోగాలు నిర్వహించాయి. ఇది శాస్త్ర, సాంకేతిక రంగంలో ముఖ్యంగా అంతరిక్ష ప్రయోగాల్లో దేశప్రతిష్ఠను ఇనుమడింపజేసే ప్రయత్న మే అవుతుంది. మానవసహిత రోదసి నౌకల్ని ప్రయోగించడం ద్వారా రష్యా, అమెరికాలు ఖగోళం మీద ఆధిపత్యం కోసం, శాస్త్ర, సాంకేతిక రంగాల్లో మరింత శక్తిమంతమైన దేశాలుగా ఎదగడం కోసం నిర్విరామంగా కృషి చేస్తూనే ఉన్నాయి. అయితే ఇలాంటి పోటీ అనారోగ్యకరమైందని, ఖగోళ పరిశోధ నలు జనబాహుళ్య ప్రయోజనాల్ని తీర్చే విధంగా ఉండాలని విక్రమ్ సారాభాయ్ భారత ప్రభుత్వాల్ని కోరేవారు.

image


భారతీయ వ్యోమగాముల్ని, భారతీ య పరిజ్ఞానంతో, భారత భూభాగం నుంచి రోదసిలోకి పంపాలన్న ప్రభుత్వ ప్రయత్నానికి సానుకూలంగాను, ప్రతికూ లంగాను ప్రతిస్పందనలు వ్యక్తమవుతున్నా యి. ప్రధాని నరేంద్ర మోడి ప్రభుత్వం సామాజిక ప్రయోజనాల్ని పక్కనబెట్టి అనవసరమైన పోటీకి దిగుతోందన్న విమర్శలు వినిపించాయి. మానవ సహిత అంతరిక్ష నౌక ప్రయోగానికి 2022వ సంవత్సరాన్ని తుదిగడువుగా ప్రధాని ప్రకటించినప్పటి నుంచి ఇలాంటి విమర్శ లు కొంత తగ్గుముఖం పట్టాయి. భారీ ఉపగ్రహ ప్రయోగ వాహక నౌక జిఎస్‌ఎల్‌వి మార్క్ 3 ద్వారా 300-400 కిలోమీటర్ల భూకక్ష్యలోకి మానవ సహిత అంతరిక్ష నౌకను ప్రయోగించే ఈ బృహత్పయత్నం అత్యంత వ్యయప్రయాసలతో కూడుకున్నది. వ్యోమగాముల్ని సురక్షితంగా రోదసిలోకి ప్రవేశ పెట్టే విధంగా ఈ ఉపగ్రహ వాహక నౌకకు సెమీ క్రయోజనిక్ ఇంజన్‌ను జతపరచి మరిం త ఆధునికీకరించారు. దీనివల్ల ఆ ఉపగ్రహ వాహక నౌకకు మరింత భారాన్ని మోయగల సామర్థ్యం పెరుగుతుంది. అయితే మానవ సహిత అంతరిక్ష నౌకను రోదసిలో ప్రవేశ పెట్టే ముందు మన రోదసి శాస్త్రవేత్తలు 2019లో చంద్రయాన్ -2 వంటి పలు ఉపగ్రహాల్ని విజయవంతంగా రోదసిలోకి ప్రవేశపెట్టగలగాలి. అప్పుడే మానవ సహిత రోదసి నౌకను ఖగోళంలోకి దిగ్విజయంగా పంపగలిగే ఆత్మవిశ్వాసం ఇనుమడిస్తుంది. 

imageమానవ సహిత అంతరిక్ష నౌకలో వ్యోమగాముల్ని స్పేస్‌కా ప్స్యూల్ అనే భాగంలో ఉంచుతారు. ఒకవేళ రాకెట్ ప్రయోగ సమయంలో ఏదైనా విపత్తు తలెత్తితే వ్యోమగాముల్ని సురక్షితంగా రాకెట్ నుంచి విడగొట్టే ‘పాడ్ అబార్టు టెస్టు’ను భారతీయ ఖగోళ శాస్త్ర వేత్తలు విజయవంతంగా పూర్తి చేశారు. అయితే ఈ ప్రయోగం ప్రస్తుతం భూవాతావరణానికి పరిమితమైంది. 

మానవ సహిత ఖగోళ నౌకను ప్రయోగించే ఈ ప్రయత్నంలో తొలుత ముగ్గురు వ్యోమగాముల్ని వారం రోజుల పాటు భూకక్ష్యలోకి పంపు తారు. ఇది చాలా కష్టతరమైన విష యం. ఈ వ్యోమగాములు అతిచిన్న కాప్స్యూల్‌లో భూమి చుట్టూ వేగంగా పరిభ్రమించే అంతరిక్షనౌకలో ప్రయాణించాల్సి ఉంటుంది. కాప్స్యూల్‌లో వాళ్ళు తిరిగే చోటు కూడా పరిమితంగానే ఉంటుంది. దీనివల్ల ఆ వ్యోమగాములు విపరీతమైన మాన సిక ఒత్తిడికి గురవుతారు. వ్యోమ గాములకు శిక్షణ ఇవ్వడం కూడా ప్రమాదభరిత మైన పనిగానే ఉంటుంది. ఇందుకోసం శిక్షణ తొలిదశలో భారత వైమానిక దళానికి చెందిన పైలట్ల సహకారాన్ని కూడా తీసుకుంటారు. అమెరికా, రష్యాల్లోని అనుభవజ్ఞులైన వ్యోమశిక్షకుల చేత, ప్రఖ్యాత వ్యోమశిక్షణ కేంద్రాల్లో భారతీయ వ్యోమగాములకు శిక్షణను ఇప్పిస్తారు. ఈ దిశగా భారతీయ అంతరిక్ష ప్రయోగశాల ‘ఇస్రో’తో కలిసి పనిచేయడానికి అమెరికా ఆసక్తిని కనబరుస్తోంది. దీనితో పాటు ఫ్రాన్స్, రష్యాలు కూడా ఈ భారతీయ వ్యోమ ప్రయోగంలో పాలు పంచుకోవడానికి ఆసక్తి చూపుతున్నాయి. 

పదిహేనేళ్ళ కల
మానవ సహిత అంతరిక్ష నౌకను ప్రయోగించడమన్న కల ఇస్రోకి సంబంధించినంత వరకు ఈనాటిది కాదు. ఈ దిశగా నవంబరు 2004 లోనే ఇస్రోకి నిధులు అందాయి. మీడియా కంటికి అందకుండా ఇస్రో ఈ బృహత్కార్యానికి అవసరమైన అన్ని ప్రయోగాల్ని చేస్తూనే ఉంది. అయితే ఈ ప్రయోగానికి అవసరమైన జిఎస్‌ఎల్‌వి మార్క్ 3 ఉపగ్రహ వాహక నౌకను రూపొందించడం పూర్తి కాకపోవడంతో ఇంతకాలం ఇస్రో తన ప్రయత్నానికి కార్యరూపాన్ని ఇవ్వలేక పోయింది. అయితే ఇప్పుడు మానవ సహిత అంతరిక్షనౌక తయారీకి అనుగుణంగా జిఎస్‌ఎల్‌వి మార్క్ 3 ఉపగ్రహ వాహక నౌకను రూపొందించారు. 

 మానవ సహిత అంతరిక్ష నౌక పనితీరును బెంగళూరుకు చెందిన పీన్యాలోని ‘ఇస్రో టెలీమెట్రీ ట్రాకింగ్ అండ్ కమాండ్ సెంటర్’ పర్య వేక్షిస్తుంది. దీని కోసం ఇస్రోలో కూడా ఒక కేంద్రాన్ని నెలకొల్పుతారు. వ్యోమగాములకు సంబంధించిన ఆహార, పారిశుద్ధ్య సదుపాయాల దిశ గా కూడా దృష్టిని సారిస్తున్నారు. వ్యోమగాములు ధరించడానికి నారింజ రంగు సూట్‌లను కూడా రూపొందించారు. శ్రీహరికోటలోని లాంచ్‌పాడ్ ను, సతీష్ ధావన్ అంతరిక్ష కేంద్రాన్ని కూడా ప్రాజెక్టులో భాగం చేశారు. ఖగోళాన్ని జల్లెడ పట్టి, మానవ ప్రయోజనా లకు అనుగుణమైన ఆవిష్క రణలకు తెరతీసే దారిలో మానవ సహిత అంతరిక్ష నౌక ప్రయోగమన్నది ఒక చిన్న ముందడుగు మాత్రమే. ఈ దిశగా ఇస్రో మరెంతో దూరం ప్రయాణించాల్సి ఉంది.


మన వ్యోమణులు
ఖగోళ పరిశోధనల్లో భారత్ ప్రస్థానం ఈనాటిది కాదు. ఖగోళ చరిత్రలో 1984 నుంచి భారత పతాకాన్ని రెపరెపలాడించిన కొందరు వ్యోమరత్నాల గురించి మనమిప్పుడు తెలుసుకుందాం. 

రాకేష్ శర్మ
image‘సారే జహాసే అచ్ఛా హిందూస్థాన్ హమారా...’ ఇది దేశభక్తి గీతంలోని వాక్యమైతే కావచ్చు కానీ, 1984లో రాకేష్ శర్మ ఈ మాటల్ని ఉచ్ఛరించినపుడు యావద్భారత దేశం మున్నెన్నడూ ఎరుగనంత సంతోషంతో పొంగిపోయింది. రోదసిలో అడుగు పెట్టిన మొదటి భారతీయుడు రాకేష్ శర్మ. రష్యన్ వ్యోమగాములతో కలిసి ఏప్రిల్, 1984లో రాకేష్ శర్మ రష్యన్ ఉపగ్రహ నౌక సోయజ్ టి-11లో రోదసిలో అడుగు పెట్టారు. అక్కడ ఆయన శాల్యుట్ 7 ఆర్బిటరీ స్టేషన్ (రష్యన్ ఖగోళ పరిశోధనా కేంద్రం)లో ఏడు రోజుల 21 గంటల 40 నిమిషాల పాటు గడిపారు. ‘రోదసి నుంచి భారత్ ఎలా కనిపిస్తోంది?’ అన్న అలనాటి ప్రధాని ఇందిరా గాంధీ ప్రశ్నకు రాకేష్ శర్మ ‘సారే జహా సే అచ్ఛా హిందూస్థాన్ హమారా...’ అంటూ జవాబిచ్చారు. రాకేష్ శర్మను రోదసికి పంపడం ద్వారా రోదసిలోకి మానవుల్ని పంపిన 14వ దేశంగా భారత్ చరిత్రలో నిలిచిపోయింది. 

కల్పనా చావ్లా
హర్యాణా లోని కర్నాల్ జిల్లాలో జన్మించిన కల్పనా చావ్లా ఒక ఏరోస్పేస్ ఇంజనీరు. ఆమె 1995లో అమెరికన్ ఖగోళimage పరిశోధనా సంస్థ నాసాలో వ్యోమగామిగా చేరారు. కల్పన తదనంతరం అమెరికన్ పౌరసత్వాన్ని స్వీకరించారు. రోదసిలో అడుగుపెట్టి, పదిహేను రోజులు గడిపిన భారతీయ సంతతికి చెందిన తొలిమహిళా వ్యోమగామి ఆమె. కల్పన 1997లో తొలిసారిగా కొలంబియా అంతరిక్ష నౌకలో రోదసి ప్రయాణం చేశారు. ఈ ప్రయాణంలో ఆమె రోదసిలో 15 రోజుల పాటు గడిపారు. తరువాత ఆమె 16 జనవరి 2003న కొలంబియా ఎస్‌టిఎస్ 107లో రెండవసారి రోదసి ప్రయాణం చేశారు. అయితే ఈ అంతరిక్ష నౌక తిరుగు ప్రయాణంలో సాంకేతిక లోపాల కారణంగా 1 ఫిబ్రవరి 2003న కూలిపోయి, అందులోని ఏడుగురు వ్యోమగాములు మరణించారు. ఈ దురదృష్టకర సంఘటనను భారతీయ అంతరిక్షయాన చరిత్రలో ఒక చేదు అనుభవంగానే పరిగణిస్తారు.

వి.ఆర్.లలితాంబిక
imageతిరువనంతపురం లోని విక్రమ్ సారా భాయి అంతరిక్ష కేంద్రంలో డిప్యూటీ డైరెక్టర్‌గా పదవీ బాధ్యతలు నిర్వహిం చిన వి.ఆర్.లలితాంబిక ప్రస్తుతం ప్రతిష్ఠాత్మక గగనయాన్ ప్రాజెక్టుకు సారథిగా వ్యవహరిస్తున్నారు. లలితాంబిక 1988లో భారత అంతరిక్ష కేంద్రం ఇస్రోలో చేరినప్పటి నుంచి ఆ సంస్థ నిర్వహించిన ఖగోళ ప్రయోగాల్లో కీలక పాత్రను పోషించారు. ఖగోళ శాస్త్రవేత్తగా కీర్తిప్రతిష్ఠల్ని ఆర్జించిన లలితాంబికకు 2002లో ‘ఆస్ట్రోనాటికల్ సొసైటీ ఆఫ్ ఇండియా’ వారి స్వర్ణపతకం లభించింది. ఉపగ్రహ వాహక నౌకల సాంకేతిక పరిశోధనల్లో ఆమె కనబరిచిన ప్రతిభను గౌరవించి ఈ స్వర్ణపతకాన్ని బహూకరించారు. 

సునీతా విలియమ్స్
ఖగోళయాత్రల్లో ఎన్నో మైలురాళ్ళను స్థాపించిన ఘనత సునీతా విలియమ్స్‌ది. ఆమె 1987లో అమెరికన్ వైమానికimage దళంలో పని చేశారు. తరువాత సునీత 1998లో అమెరికన్ ఖగోళ పరిశోధనా సంస్థ నాసాలో చేరారు. వ్యోమయాత్రలకు సునీత పెట్టింది పేరు. ఈ రంగంలో ఆమె ఎన్నో రికార్డుల్ని నెలకొల్పారు. రోదసిలో మారథాన్‌ను నిర్వహించిన తొలివ్యక్తిగా ఆమె రికార్డు సృష్టించారు. తరువాత ఆమె రోదసిలో ‘ట్రైథ్లాన్’ను కూడా నిర్వహించారు. రోదసిలో ఎక్కువ దూరం నడిచిన మహిళగాను, సుదీర్ఘ సమయాన్ని గడిపిన తొలి మహిళగాను సునీత చరిత్రలో నిలిచి పోయారు. ఆమె ప్రస్తుతం అమెరికా నిర్వహిస్తున్న వాణిజ్యపరమైన రోదసి పర్యటనల ప్రాజెక్టులో పని చేస్తున్నారు.
 



నిరాధారం

Updated By ManamWed, 09/26/2018 - 00:30

ప్రపంచం లోనే అతిపెద్ద ప్రజాస్వామిక దేశం భారత్. ప్రపం చంలోనే అతిపెద్ద బయోమెట్రిక్ ఐడి వ్యవస్థ ‘ఆధార్’. సగటు భారతీయ పౌరుణ్ణి అతని శారీరక, భౌగోళిక సమాచా రం ఆధారంగా గుర్తించే కంప్యూటర్ ఆధారిత వ్యవస్థ ఇది. బ్యాంకు ఖాతా తెరవాల న్నా, విద్యా సంస్థల్లో ఉపకార వేతనాన్ని పొందాలన్నా, ఆసుప త్రుల్లో ప్రభుత్వ పథకాల కింద ఆరోగ్యపరమైన ప్రయోజనాలు పొందాలన్నా, రేషన్ షాపుల్లో సరుకులు పొందాలన్నా... ఏం కావాలన్నా ఆధార్ నెంబర్ కావాలి. ఆధార్ కార్టు లేని భారతీయుడు నిరాధారంగా నిలబడి పోవాల్సిందే. మనలో ప్రతిఒక్కరి గురించిన సమాచారం ‘ఆధార్ కార్డు నెంబరు’ రూపంలో కంప్యూటర్ డేటాగా రికార్డు అయిపోయింది. అయితే మన సమాచారాన్ని ‘వాళ్ళ’ చేతుల్లో పెట్టి, అన్ని అవసరాలకు ఆ ఒక్క నెంబరు చుట్టూ తిరిగే మన జీవితాలకు ‘ఆధార్’ పేరిట ఒరిగే భద్రత ఏపాటిది?

image


ఇందు పదేళ్ళ పిల్ల, దళిత బాలిక. ఆంధ్రప్రదేశ్‌లోని అనంతపురానికి చెందిన ఇందుకి రాష్ట్ర ప్రభుత్వం ఎస్‌సి/ఎస్‌టి/ ఒబిసి చట్టం కింద ఏడాదికి 1,200 రూపాయల ఉపకార వేతనం అందిస్తుంది. ఆ ఉపకార వేతనం కోసం ఇందు సంబంధిత అధికారుల్ని కలిసింది. వాళ్ళు ఆమె ఆధార్ కార్డు తెమ్మన్నారు. ఇందు ఆ కార్డును తెచ్చి ఇచ్చింది. కానీ దురదృష్టమేమిటంటే, కార్డులో ఇందు పేరుకు అదనంగా ‘హెచ్’ అనే అక్షరాన్ని కలిపి ‘హిందు’ అని నమోదు అయి ఉంది. అధికారులు ఇందుకు ఉపకార వేతనాన్ని నిరాకరించారు. ఆమె తల్లిదండ్రులు, పాఠశాల ఉపాధ్యాయులు బాలికకు కొత్త ఆధార్ కార్డును తీసుకోవడం కోసం మళ్ళీ రిజిస్టరు కూడా చేశారు. ఆమె జన్మ ధృవీకరణ పత్రం, ఫోటోను కూడా అప్‌లోడ్ చేశారు. అయినా సరే, మళ్ళీ ‘హిందూ’ అనే పేరుతోనే కొత్త ఆధార్‌కార్డు వచ్చింది. ఇక ఏం చేయాలో తెలియని ఇందు తన ఉపకార వేతనం మీద ఆశ వదులుకుంది.
 
 గౌరవ్ పాంధీ ఒక రాజకీయపార్టీ నాయకుడు, పూర్వా శ్రమంలో ఆయన బ్యాంకు ఉద్యోగి కూడా. కానీ ఆయన కు గత జనవరి 15 వ తేదీన ఢిల్లీలోని ఐసిఐ సిఐ బ్యాంకు వారి పశ్చిమ్ విహార్ బ్రాంచి నుంచి ఒక మెసేజ్ వచ్చిం ది. ‘బ్యాంకు ఖాతాకు మీ ఆధార్ నెంబర్‌ను అనుసంధానం చేయా లన్న మీ అభ్యర్థనను మేము స్వీకరించాం. మరి కొన్ని రోజుల్లో మీ ఆధార్ నెంబర్‌ను మీ ఖాతాకు అనుసంధానిస్తాం’ అన్నది ఆ మెసేజ్  సారాంశం. కానీ తాను తన ఖాతాకు ఆధార్ నెంబర్‌ను అనుసంధానం చేయాల్సిందిగా ఆ బ్యాంకును కోరలేదని, తన అనుమతి లేకుండా బ్యాంకు తన బయోమెట్రిక్ డాటా వివరాల్ని బ్యాంకు ఖాతాకు అనుసంధానం చేయడం తనను బాధించిందని గౌరవ్ పాంధీ తన ట్విటర్ ఖాతాలో వాపోయారు. 

తెలంగాణలోని పెద్దపల్లి జిల్లా, ధర్మారంలో సంతోష్ కుమార్ అనే వ్యక్తి ప్రీ పెయిడ్ ఒడాఫోన్ సిమ్ కార్డుల్ని అమ్మేవాడు. అతను డిగ్రీ చదువును అర్థంతరంగా ఆపేశాడు. అయితే ప్రభుత్వ వెబ్‌సైట్ల నుంచి కుమార్ జూన్, 2018లో దాదాపు 3000 మంది ఆధార్ నెంబర్లని అక్రమంగా సేకరించి, వారికి తెలియకుండానే సిమ్ కార్డుల వ్యాపారాన్ని కొనసాగించాడు. ఎందుకంటే ఎన్ని ఎక్కువ సిమ్ కార్డుల్ని అతను అమ్మగలిగితే, టెలికామ్ కంపెనీ అతనికి అంత ఎక్కువ కమీషన్ ఇస్తుంది కాబట్టి! అతను ఫోర్జరీకి పాల్పడి ‘ఇ కెవైసి’ (నో యువర్ కస్టమర్) పద్ధతి ద్వారా సిమ్ కార్డుల్ని యాక్టివేట్ చేయగలిగాడు. మూడువేల మందికి చెందిన ఆధార్ వివరాలు అతని చేతిలోకి వెళ్ళిపోయాయి. అతను వాటిని అక్రమంగా వినియోగించాడు. దీనికి సంబంధించి ఒక వ్యక్తి ఫిర్యాదు చేసేంత వరకు ఈ అక్రమం వెలుగు చూడలేదు. ఆధార్ వ్యవస్థలోని లోపాలకు ఇలాంటి సంఘటనలన్నీ ఉదాహరణలే! ఇవన్నీ మన భారత విశిష్ఠ గుర్తింపు కార్డు తాలూకు మహిమలే! 

ఒక వ్యక్తి తాలూకు శారీరక, భౌగోళిక అంశాలకు సంబంధించిన వ్యక్తిగత వివరాల్ని భద్రంగా దాచి ఉంచేటంతటి పటిష్టమైన వ్యవస్థ, సామర్థ్యం మనకు ఉన్నాయా అన్నదే ఇప్పుడు ప్రశ్నార్థకం. దేశపౌరులకు సంబం ధించిన ఇలాంటి కీలక వివరాల గురించిన భద్రత ప్రశ్నార్థకమైన తరువాత ఆధార్ విశ్వసనీయత వివాదాస్పదమైంది. తాజాగా ఛత్తీస్‌గఢ్‌లోని ధామ్‌తరి జిల్లా ప్రజలు ఆధార్ బాధితులై అల్లాడి పోతున్నారు. ప్రధాని నరేంద్ర మోడి 2014 నాటి తన ఎన్నికల ప్రచారంలో కాంగ్రెస్‌పార్టీ అవినీతికి పాల్పడి ప్రజాధనాన్ని దుర్వినియోగం చేస్తోందని విరుచుకుపడ్డారు. స్వచ్ఛపాలనను అందిస్తానని వాగ్దానం చేశారు. ఇప్పటికిప్పుడు ఆయన ప్రభుత్వం రాఫెల్ కుంభకోణం విషయంలో నానా ఇబ్బందుల్ని ఎదుర్కొంటున్నప్పటికీ మోడీ తీరులో మార్పు లేదు. ఆధార్ వ్యవస్థకు అనుసంధానం చేయడం ద్వారా పలు ప్రభుత్వ సంక్షేమ పథకాలు, వేతనాల చెల్లింపుల్లో ఎలాంటి అవినీతి చోటు చేసుకోకుండా రక్షణ కల్పిస్తున్నామని ఆయన ఘంటాపథంగా చెబుతూనే ఉన్నారు. ఈ నేపథ్యంలో ఛత్తీస్‌గఢ్‌లోని ధామర్తి జిల్లాలో ప్రజలకు ఎదురైన ‘ఆధార్ కష్టాల’ గురించి తెలుసుకోవాల్సిందే! 

సేవ్తిసాహు అనే మహిళ ఒక ఆరోగ్య కార్యకర్త, ఆమె 2017లో  ధామ్‌తరి జిల్లాలోని కొర్రాగ్రామంలో శిశువులకు ఆరోగ్య పరీక్షలు నిర్వ హించి 6,400 రూపాయల్ని ఆర్జించింది. ఆమె అందించిన ఈ ఆరోగ్యసేవలకు గాను తాము చెల్లించాల్సిన ఈ 6,400 రూపాయల్ని జూలై, అక్టోబరు, డిసెంబరు నెలల్లోనే దఫాల వారీగా చెల్లించేశామని రాష్ట వైద్య ఆరోగ్య శాఖ అధికారులు అంటున్నారు. కానీ ఆ సొమ్ము ఆ మహిళ బ్యాంకు ఖాతాకు జమ కానే లేదు. కొన్ని నెలల పాటు తన సొమ్ము కోసం తిరిగి, తిరిగి ఆఖరుకు ఆ డబ్బు టెలికామ్ కంపెనీ ‘ఎయిర్ టెల్’కు చేరుకుందని సేవ్తిసాహు తెలుసుకుంది. అలాగే మరొక సామాజిక ఆరోగ్య కార్యకర్త నిర్మలా రాజ్‌ఫుత్‌కు కూడా ఇదే అనుభవం ఎదురైంది. ఆమె గడాధి గ్రామానికి చెందిన ఆరోగ్య కార్యకర్త. నిర్మలకు వైద్య ఆరోగ్య శాఖ చెల్లించాల్సిన 10,320 రూపా యలు మరో మహిళ ఖాతాలోకి వెళ్ళిపోయాయి. ఛత్తీస్‌గఢ్‌కు చెందిన రమారమి మూడువేల మంది గ్రామీణ ఆరోగ్య కార్యకర్తలు ప్రతినెలా ఇలా వేతనాల చెల్లింపుల్లో చోటు చేసుకుంటున్న అవకతవకలతో ఇబ్బం దులను ఎదుర్కొంటున్నట్టు తెలిసింది. ఇదివరకు జరిపిన బ్యాంకు లావా దేవీల్లో ఇలాంటి ఇబ్బందులు ఎదురు కాలేదని, ఆధార్ ఆధారిత బ్యాంకు లావాదేవీల్ని మొదలు పెట్టినప్పటి నుంచి ఈ ఇబ్బందులు చోటు చేసుకుంటున్నాయని పేరు చెప్పడానికి ఇష్టపడని వైద్య ఆరోగ్య శాఖ ఉద్యోగి ఒకరు తెలిపారు.

బ్యాంకు అధికారులు డేటా ఎంట్రీలో పొరపాట్లు చేసిన ఫలితంగా నిర్మలకు రావలసిన డబ్బు వేరొక మహిళ అక్కౌంట్‌లోకి వెళ్ళిపోయింది. అయితే సాహుకు రావలసిన డబ్బు వ్యవహారం మాత్రం కాస్త జటిలమైందే! ఆ టెలికామ్ కంపెనీ తన ఖాతాదారుల అనుమతితో నిమిత్తం లేకుండా పేమెంట్స్ ఖాతాల్ని తెరచి, వారికి వచ్చే చెల్లింపుల్ని ఆయా ఖాతాల్లోకి మళ్ళిస్తోంది. మొబైల్ నెంబర్లకు ఆధార్‌ను అనుసంధానం చేయాలన్న ప్రభుత్వ నిబంధన కారణంగా ఆ టెలికామ్ కంపెనీ తన ఖాతాదారుల ఆధార్ నెంబర్లని సేకరించగలిగింది.‘ఆధార్ పేమెంట్ బ్రిడ్జి సిస్టమ్’ను మోడీ ప్రభుత్వం  గ్రామీణ ఉపాధి హామీ పథకాలతో సహా దాదాపు 433 పథకాలకు విస్తరించింది. ఆరు లక్షల కోట్ల రూపాయల విలువ చేసే పథకాలివి. వేతన చెల్లింపులకు ఆధార్‌తో అవసరం లేదని పైకి చెబుతూనే, ఆధార్ అనుసంధానం జరిగిన బ్యాంకు అక్కౌంట్లకు మాత్రమే చెల్లింపు లు జరపాలని కేంద్ర ప్రభుత్వం రాష్ట్రాల్ని ఆదేశించింది. కేంద్ర ఆరోగ్య మంత్రిత్వ శాఖ తాజాగా ఆగస్టు 13న రాష్ట్రాలకు చెంది న ఆరోగ్య శాఖ కార్యదర్శులకు లేఖలు రాస్తూ, ‘ఆధార్ అనుసంధానం చేసిన బ్యాంకు అక్కౌంట్లకే డబ్బు చెల్లించ డమన్నది కేంద్ర ప్రభుత్వ ప్రధాన లక్ష్యమని మీకు తెలుసు. కాబట్టి ఈ వ్యవహారాన్నంతటినీ కేంద్ర మంత్రిమండలి పర్యవేక్షిస్తుంది’ అని తెలిపింది. పన్నెండంకెలతో కూడిన ఆధార్ నెంబర్ ను మోడీ ప్రభుత్వం తన ‘డిజిటల్ ఇండియా’కు ఆరాధ్యదైవంగా భావిస్తున్న విషయం తెలిసిందే! 

దేశంలో లంచగొండితనం పెచ్చరిల్లిపోయిందని, ముఖ్యంగా సంక్షేమ పథకాల్లో అవినీతికి అంతే లేకుండా పోయిందని ప్రధాని నరేంద్ర మోడీ వాపోతుంటారు. ఆ లంచగొండితనాన్ని కూకటి వేళ్లతో సహా పెకిలించి వేయడానికే తాను ఈ ఆధార్ వ్యవస్థను ముందుకు తీసుకు వెళుతు న్నానని ఆయన చెబుతుంటారు. వేతనాల్ని, సంక్షేమ పథకాల తాలూకు ఆర్థిక ప్రయోజనాల్ని మధ్యవర్తులకు కాకుండా నిజమైన లబ్దిదారులకే ప్రత్యక్షంగా చేర్చాలన్నది తన ఆశయంగా ఆయన చెప్పుకుంటారు. అయితే వాస్తవానికి ఆధార్ వల్ల ఆ నిజమైన లబ్దిదారులే తమకు చెందా ల్సిన ప్రయోజనాలకు దూరమవుతున్నారు. ప్రభుత్వం జరుపుతున్న చెల్లింపుల్ని, ఆ వ్యవహారంలో వస్తున్న ఫిర్యాదుల్ని నమోదు చేయడానికి తగిన వ్యవస్థ ఏదీ లేదు. దాని ఫలితమే ఛత్తీస్‌గఢ్ ఉదంతం. మహాత్మా గాంధీ జాతీయ గ్రామీణ ఉపాధి కార్యక్రమం కింద 2017 నుంచి 2018 కాలానికి 500 కోట్ల రూపాయల చెల్లింపులు తిరస్కరణకు గురయ్యాయని ప్రముఖ ఆర్థికవేత్త జీన్ డ్రెజ్ తెలిపారు. ఒక్క ఛత్తీస్‌గఢ్‌లో పరిస్థితి ఇలా ఉంటే, జాతీయ స్థాయిలో సంక్షేమ పథకాల చెల్లింపుల పరిస్థితి ఎలా ఉంటుందో ఊహించుకోవచ్చు. మనదేశంలోని గ్రామాల్లో బ్యాంకుల బ్రాంచీలు చాలినన్ని ఉండవు. డిజిటల్ చెల్లింపులకు అవసరమైన ఇంటర్‌నెట్ అందుబాటులో ఉండదు. ‘సర్వర్ డౌన్’, ‘లింక్ ఫెయిల్యూర్’ వంటి పదాలు ఇవాళ ఇంగ్లీష్ రాని మన గ్రామీణుల నిత్య జీవితంలో భాగమై పోయాయి. 

‘మోడీ ప్రభుత్వం వికేంద్రీకరణ గురించి ఉపన్యాసాలిస్తోంది. కానీ ఆచరణలో డిజిటలైజేషన్ రూపంలో కేంద్రీకృత పాలనకు బాటలు పరుస్తోంది. దీనికి ప్రజలు సహకరించరు’ అని మధ్యప్రదేశ్, మండ్లా జిల్లాలోని నారాయణ్‌గంజ్ పంచాయితీకి చెందిన ఉపసర్పంచ్ భూపేంద్ర వర్కాడే అంటున్నారు. ఆధార్ పేమెంట్ బ్రిడ్జి సిస్టమ్ ద్వారా ప్రతి ఒక్కరికి ఆధార్ నెంబర్‌తో అనుసంధానమైన ఒక బ్యాంకు అక్కౌంట్ ఉండి తీరాలని ప్రభుత్వం సంకల్పించింది. అయితే 2016-17 కాలంలో ప్రభుత్వం అన్ని బ్యాంకు ఖాతాల్ని ఆధార్ నెంబర్‌కు అనుసంధానం చేయాల్సిందిగా బ్యాంకుల్ని ఒత్తిడి చేసింది. దాంతో ఒకే ఆధార్ నెంబర్ మీద ఒకే వ్యక్తికి చెందిన పలు బ్యాంకు ఖాతాలు పని చేయడం మొద లైంది. చిట్ట చివరగా ఏ అక్కౌంటైతే ఆధార్ నెంబర్‌కు అనుసం ధానమైందో, ఆ అక్కౌంట్‌కే చెల్లింపులు వచ్చి పడడం ప్రారంభమైంది. ప్రజలకు ఈ విషయం తెలియదు. చివరికి ప్రభుత్వ విభాగాల చెల్లింపు లన్నీ ఆధార్ పేమెంట్ బ్రిడ్జి వ్యవస్థ కిందికి వచ్చేశాయనే విషయం కూడా ప్రజలకు తెలియదు. ఈ విషయంలో గ్రామీణులే కాదు పట్టణాలకు, నగరాలకు చెందిన ప్రజల్లో కూడా అయోమయం నెలకొని ఉంది. ఈ అయోమయం ఎంత దారుణంగా ఉందంటే, ఛత్తీస్‌గఢ్‌లోని సంబల్‌పూ ర్-అమోలీ పంచాయితీ ఆధార్ నెంబర్ ఒకానొక గ్రామస్తుని బ్యాంకు అక్కౌంట్‌కు పొరపాటున అనుసంధానమైంది. గ్రామస్తుడి దగ్గరి నుంచి తన సొమ్మును రాబట్టలేని పంచాయితీ ఇవాళ ‘ఆడిట్’ను ఎదుర్కొం టోంది. నిరక్ష్యరాస్యుల పరిస్థితి మరింత దారుణంగా ఉంది. వృద్ధాప్య పింఛన్లను కూడా తీసుకోలేని పరిస్థితిలో వారు ఇబ్బందుల పాలవుతున్నారు. కొండనాలుక్కి మందేస్తే ఉన్న నాలు క ఊడిపోవడమంటే ఇదేనేమో?! రోజుల తరబడి, నెలల తరబడి, సంవ త్సరాల తరబడి నానా కష్టాలు పడి సంపాదించుకున్న ప్రజల కష్టార్జితం ఇవాళ ఆధార్ పుణ్యమాని నేలమీద ఒలికి పోయిన పాదరసం చందంగా మారిపోయిం ది. మరి ఈ ఆధార్ ఇక్కట్ల నుంచి ప్రజల్ని ఎలా బయటపడేస్తారో ప్రభుత్వం తేల్చి చెప్పాల్సి ఉంది.

బయోమెట్రిక్ కార్డు: కనుపాప, వేలిముద్రల వంటి ఆధారాలతో వ్యక్తిని గుర్తించడం ద్వారా రూపొందించే గుర్తింపు కార్డును బయోమెట్రిక్ కార్డు అంటారు. వేలిముద్రలతో పాటు, చెవులు, చేతుల ఆకారం, రెటీనా, కంఠస్వరం, డిఎన్‌ఎ వంటి సమాచారాన్ని కూడా పొందుపరచి కొన్ని దేశాల్లో గుర్తింపు కార్డుల్ని రూపొందిస్తారు. ఒక్కో దేశం ఒక్కో రకమైన జాతీయ గుర్తింపు కార్డుల్ని కలిగి ఉంటుంది. మనదేశంలో ఆధార్‌కార్డులాంటివి ఈ కోవకు చెందుతాయి. కంప్యూటర్ల వినియోగం పెరిగిన 20 వ శతాబ్దంలో ఇలాంటి బయోమెట్రిక్ కార్డుల వినియోగం కూడా బాగా పెరిగింది. వ్యక్తి పౌరసత్వాన్ని గుర్తించడానికి కనుపాపను ఒక సాధనంగా ఎంచుకోవడమన్నది 1930ల నుంచే ప్రారంభమైనట్టు తెలుస్తోంది.

ఐడి పంజరం
డిజిటలైజేషన్ పరిష్కారం కాదు

imageధృవీకరణ పత్రాలు మన దైనందిన జీవితంలో సింహభాగాన్ని ఆక్రమించుకుంటున్న రోజుల్లో మనం జీవిస్తున్నాం. ఓటు చేయాలన్నా, బ్యాంకు అక్కౌంట్ తెరవాలన్నా, పన్నులు చెల్లించాలన్నా, సంక్షేమ పథకాల నుంచి ప్రయోజనాల్ని పొందాలన్నా మనకు వేలకొద్దీ సంతకాలు, పాస్‌పోర్టు సైజ్ ఫోటోలు, కెవైసిలు (నో యువర్ కస్టమర్), ఇంకా ఇతర సరంజామా అంతా అవసరం. పౌరునిగా మన విశ్వనీయతను నిరూపించుకునేందుకు ఉపయోగపడే ఈ ధృవీకరణ పత్రాల రూపకల్పన వెనుక పౌరప్రయోజనాల కన్నా రాజకీయ ప్రయోజనాలే అధికంగా ఉండడం శోచనీయం. మన వ్యక్తిగత వివరాలన్నీ సంక్లిష్టమైన, జటిలమైన పత్రాల దొంతరలో ఇరుక్కుని పోతోంది. ఒక్కోరకమైన ప్రయోజనానికి ఒక్కోరకమైన వ్యక్తిగా మనం మారుతున్నాం. మనకు మనమే మన అవసరాల నిమిత్తం ధృవీకరణ పత్రాలుగా రూపాం తరం చెందుతున్నాం. 

మనల్ని మనం ‘ధృవీకరించుకునే’ ఈ యుద్ధంలో సగటు భారతీయుడు ఎంత సుదీర్ఘమైన ప్రయాణం చేశాడన్న విషయాన్ని ‘ఇన్ పర్‌సూట్ ఆఫ్ ప్రూఫ్ - ఎ హిస్టరీ ఆఫ్ ఐడెండిటిఫికేషన్ డాక్యుమెంట్స్ ఇన్ ఇండియా’ అనే పుస్తకం విశదీకరిస్తోంది. పుస్తక రచయిత తరంగిణీ శ్రీరామన్ బెంగళూరులోని అజీమ్ ప్రేమ్‌జీ విశ్వవిద్యా లయంలోని స్కూల్ ఆఫ్ లిబరల్ స్టడీస్‌లో చరిత్ర, రాజనీతి శాస్త్రాల్ని బోధిస్తున్నారు. గుర్తింపు పత్రాలకు అంతమంటూ ఉండదు. ఏ ఉద్దేశంతో అయితే వీటిని రూపొందిస్తారో, అనంతరకాలంలో అవి తమ నిర్దేశిత ఉద్దేశాల్ని దాటి ప్రవర్తిస్తాయి.
 
బ్రిటిష్ వలసపాలన కాలం నుంచి భారతదేశంలో గుర్తింపు పత్రాల ప్రక్రియ జరుగుతూనే ఉంది. తొలుత రెండవimage ప్రపంచయుద్ధకాలంలో ఆహార పదార్థాల పంపిణీ అవసరాల నిమిత్తం గుర్తింపు కార్డుల ప్రస్థానం మొదలైంది. రేషన్ కార్డుల రూపకల్పన కూడా ఆ కాలంలోనే మొదలైంది. వ్యక్తుల పేర్లు, కుటుంబ సభ్యుల వివరాలు, చిరునామాల్ని నమోదు చేసుకుని, తదనుగుణంగా నిత్యావసర వస్తువుల్ని పంపిణీ చేసేవారు. ఈ కార్డు పొందిన వ్యక్తికి తన కుటుంబానికి అవసరమైన ఆహార పదార్థాల్ని చవకధరలకు పొందే వీలు కలిగింది. స్థిరమైన చిరునామా లేకుంటే రేషన్‌కార్డును పొందడం మాత్రం గగనమయ్యేది. వివిధ రాష్ట్రాలు తమ భౌగోళిక, రాజకీయ పరిస్థితులకు అనుగుణంగా పలు విధాలైన గుర్తింపు కార్డుల్ని జారీ చేయడం మొదలు పెట్టాయి.

రేషన్ కార్డుల రూపకల్పనలో కూడా ఆయా రాష్ట్రాలు తమదైన నియమ నిబంధనల్ని రూపొందించు కుని, అనుసరించడం ప్రారంభించాయి. ప్రజల జాతి, కుల, మత ప్రాతిపదికపై కూడా విభిన్నమైన కార్డుల రూపకల్పన జరిగింది. దేశ తొలి ప్రధాని నెహ్రూ కాలంలో రేషన్ కార్డు సామాజిక సంక్షేమ పథకాలకు నాంది పలికింది. నెహ్రూ తరువాత లాల్‌బహదూర్, 1965లో ఇందిరా గాంధీల పాలనలో ఆహార పదార్థాల్ని, నిత్యావసర వస్తువుల పంపిణీని క్రమబద్ధం చేసేందుకు రేషన్ కార్డు ఉపయోగ పడింది. ‘రోటీ, కపడా ఔర్ మకాన్’ నినాదం కింద సబ్సిడీపై ఆహార దినుసుల్ని పొందడానికి రేషన్ కార్డు తప్పనిసరైంది. 

దేశ విభజన తరువాత వెల్లువెత్తిన శరణార్థుల సమస్యతో సతమతమవుతున్న వ్యవస్థకు తోడు 1990ల్లో నాటి ప్రధాని వి.పి.సింగ్ రేషన్‌కార్డుల లభ్యతను పెంచే దిశగా నియమ నిబంధనల్ని మరింత విస్తృతం చేశారు. సంక్షేమం అనే పేరుతో గుర్తింపు కార్డుల చుట్టూ అల్లుకున్న గందరగోళాన్ని పరిష్కరించేందుకే ఆధార్ కార్డు రూపకల్ప నకు తలుపులు తెరిచానని అంటోంది మోడీ ప్రభుత్వం. జాతీయ స్థాయిలో పౌరుల వివరాల్ని నిక్షిప్తం చేయడ మంటే ఇదొక అత్యంత వ్యయప్రయాసలతో కూడుకున్న జాతీయ ప్రాజెక్టు. అయితే బయోమెట్రిక్ విధివిధానాల్లో ప్రధానపాత్ర పోషించే వేలి ముద్రలకు సంబంధించిన సాంకేతిక పరిజ్ఞానాన్ని అందించే ప్రైవేటు రంగ సంస్థల మీద ఈ ప్రాజెక్టు ఎక్కువగా ఆధారపడింది. పౌరుల వ్యక్తిగత, శారీరక, భౌగోళిక వివరాల్ని డిజిటలైజ్ చేసేందుకు అవసరమైన పరికరాల్ని ఈ సంస్థలు అందిస్తాయి. అవినీతి, అధికార దుర్వినియోగం, ఆశ్రిత పక్షపాతం వంటి అవలక్షణాల నుంచి ఈ ఒక్క కార్డు భారతీయ పౌరుణ్ణి కాపాడేస్తుందా? ఎంతమాత్రం కాదని తరంగిణి వాదిస్తున్నారు. ఎందుకంటే లబ్ధిదారుల నమోదు ప్రక్రియ, సాధారణమైన గుర్తింపు కార్డుల నమోదు ప్రక్రియతోనే ముడిపడి ఉంది. ఈ ప్రక్రియలో ఎలాంటి స్వచ్ఛంద మైన పౌర పాత్ర లేనే లేదు. డిజిటల్ యంత్ర సముదాయం మీద ఆధార పడడమంటే, పేదల్ని సంక్షేమ పథకాలకు మరింత దూరం చేయడమే అవు తుంది. పేదరికాన్ని, అవినీతిని తుదముట్టించాలంటే కేవలం సాంకేతికత వల్ల ఎలాంటి ప్రయోజనం ఉండదని, ఈ పుస్తకం బల్లగుద్ది చెబుతోంది. డిజిలై జేషన్ ప్రక్రియలో గుర్తింపు కార్డుల జారీ అన్నది కేవలం టెక్నోక్రాట్‌ల స్వలా భాల్ని మాత్రమే సంతృప్తిపరుస్తుందన్నది నిర్వివాదాంశం. 

" పౌరుల వ్యక్తిగత జీవితాలకు సంబంధించిన అన్ని వివరాల్ని తెలుసుకోవాలన్న కుతూహలం ప్రభుత్వాలకు ఉండడం సహజమే. అయితే, ఈ దిశగా ఎంతటి కఠిన చట్టాల్ని ప్రవేశపెట్టినా సరే, ఫలితం మాత్రం దుర్వినియోగానికే దారి తీస్తుంది."
- ఎడ్వర్ట్ స్నోడెన్, అమెరికన్ కంప్యూటర్ నిపుణుడు,
    అమెరికన్ గూఢచారి సంస్థ సిఐఎ మాజీ ఉద్యోగి

 



రెడీ టు ఫైర్

Updated By ManamWed, 09/19/2018 - 00:50

‘నేను జీవించి ఉండగానే ఈ అపవాదు నుంచి బయటపడాలని  నా పిల్లలు చెప్పారు. లేకుంటే వంశం మొత్తం జీవితాంతం ఈ కళంకాన్ని మోయాల్సి వస్తుందని, అది తమకు ఇష్టం లేదని వాళ్ళన్నారు. అందుకే ఇంతకాలం జీవించి ఉన్నాను. పోరాడడానికే జీవించి ఉండడమన్నది నాకు అవసరమై పోయింది. ఇది నా దేశానికి వ్యతిరేకంగా జరిగిన ఒక కుట్ర కథ..., ఇది నా కథ!’    - నంబి నారాయణన్


దేశానికి వ్యతిరేకంగా గూఢచర్యం చేశారన్న అభియోగం ఒక్కటి చాలు, ఒక వ్యక్తి సామాజిక, సాంస్కృతిక, నైతిక, ఆర్థిక, కౌటుంబిక పునాదులన్నీ కదిలిపోతాయి. ఒక వ్యక్తి జీవితాన్ని మట్టిపాలు చేయడంతో పాటు, గూఢచర్యం అన్న పదం ఒక దేశ ఖగోళ శాస్త్ర పరిశోధనకు ఉపయోగపడాల్సిన మేధస్సును కూడా వ్యర్థం చేసేసింది. దేశానికి సంబంధించిన రాకెట్ పరిశోధనల తాలూకు రహస్యాల్ని పాకిస్తాన్‌కు అందిస్తున్నారన్న అభియోగం మీద ఇస్రో శాస్త్రవేత్త నంబి నారాయణన్‌ను 1994 నుంచి వేధించి, హింసిం చి, నరకం చూపించారు కేరళ పోలీసులు. ఇన్నేళ్ళపాటు కొనసాగిన అసత్య ఆరోపణల ఫలితంగా ఈ దేశం ఒక శాస్త్రవేత్త సేవల్ని కోల్పోయింది. ఒక శాస్త్రవేత్త తన ఆశయానికి దూరమయ్యాడు. ఒక ప్రతిష్ఠాత్మక ఖగోళ పరిశోధనా సంస్థ తన పరువును పోగొట్టు కుంది. ఒక కుటుంబం అవమానంతో కుంగిపోయింది. ఈ అసత్య గూఢచర్యం కేసులో సుప్రీంకోర్టు గత శుక్రవారం వెలువరించిన తీర్పు నిజాయితీకే తుది విజయ మన్న విశ్వాసానికి సాక్ష్యం. 

image


భారీ ఉపగ్రహాల్ని కూడా మోసుకెళ్ళగలిగే రాకెట్లను తయారు చేసే శాస్త్ర సాంకేతికతను రాకెట్ రంగంలో క్రయోజెనిక్స్ అంటారు. నంబి నారాయణన్ (76) భారత ఖగోళ పరిశోధనా కేంద్రం ‘ఇస్రో’కు చెందిన క్రయోజెనిక్ సైంటిస్టు. ఆయనతోపాటు ఇస్రోలో నే పని చేస్తున్న మరో సైంటిస్టు శశికుమార్, మాల్దీవులకు చెందిన మరియం రషీదా, ఆమె స్నేహితురాలు ఫౌజియా హసన్, వ్యాపార వేత్త శర్మ, రష్యన్ వ్యోమ పరిశోధనా సంస్థ ప్రతినిధి చంద్రశేఖ ర్‌లపై కేరళ పోలీసులు గూఢచర్యం కేసును నమోదు చేసి, అరెస్టు లు చేశారు. 

ఆద్యంతం అసత్యారోపణలతో నిండిపోయిన ఈ కేసును విచారించిన సుప్రీంకోర్టు ‘వీరిని అనవసరంగా అరెస్టు చేశారం టూ’, ఇందుకు బాధ్యులైన పోలీసులపై కఠిన చర్యలు తీసుకోవా లని తీర్పునిచ్చింది. ఈ దిశగా ఒక కమిటీని నియమించాలని ఆదేశించింది. 

ఇన్నేళ్ళుగా తన మీద సాగిన ఈ గూఢచర్యం కేసు గురించిన నిజానిజాలన్నింటినీ ప్రపంచానికి తెలియజెప్పాలన్న ఉద్దేశంతో నంబి నారాయణన్ ‘రెడీ టు ఫైర్ : హౌ ఇండి యా అండ్ ఐ సర్‌వైవ్డ్ ది ఇస్రో స్పై కేస్’ అనే పుస్తకాన్ని రచించారు. ఈ స్వీయగాథలోని కొన్ని భాగాలకు సంక్షిప్త అనువాదాన్ని ‘ముద్ర’ ఇక్కడ మీ కోసం ప్రచురిస్తోంది. 
ఏదో ఒక ముస్లిం పేరు చెప్పు చాలు!

‘సత్య, ధర్మ అనే పేర్లతో ఎవరో కొందరు వ్యక్తులు నా మీద మొదటి పోలీసు విచారణ జరిపారు. నా వెనుక చిన్న కోటు, లాగూ తొడుక్కున్న ఇద్దరు నిలుచున్నారు. వాళ్ళిద్దరూ నా మెడను విరగ్గొట్టడానికే నా వెనుక నిలుచున్నారన్న నిజాన్ని అర్థం చేసుకోవడానికి నాకు ఎక్కువ సేపు పట్టలేదు. 

గదిలో ఉన్న వాళ్ళలో ఒక సీనియర్ అధికారి ‘మీరు గొప్ప శాస్త్రవేత్త. మీరు జాతి సొత్తు. అలాగే మీరు మంచి మెళుకువలు తెలిసిన వ్యక్తి. సరే, ఇదంతా ఎందుకు చేశారు?’ అని నన్ను ప్రశ్నించాడు. 

‘నేనేం చేశాను?!’
‘గూఢచర్యం’
‘గూఢచర్యమేమిటి?’

అతను తన గొంతును సవరించుకుని ‘మిస్టర్ నంబి..., సారీ, డాక్టర్ నంబి...’ అంటూ నన్ను సంబోధించాడు. 
‘నేను డాక్టర్‌ని కాదు, మిస్టర్ చాలు...’ అన్నాను
‘సరే, మీరు డాక్టర్ అంతటి వారే! అయితే, మీరు ఎందుకు ఈ నేరానికి పాల్పడ్డారో చెప్పండి’ అన్నాడు వ్యంగ్యంగా.
‘మీరు దయచేసి అర్థం చేసుకోండి..., నేను ఏ నేరమూ చేయలేదు. మీకేం కావాలో చెప్పండి’
‘పిచ్చిగా మాట్లాడకు, ఒప్పుకుంటే సంతోషంగా బతుకుతావు లేదంటే, నీ చేత ఎలా ఒప్పించాలో మాకు తెలుసు’
బెదిరింపులకు అది మొదటి సూచన.

‘నేను చేసిన నేరమేంటి?’
‘నీక తెలీదా?’ అతను ఒకసారి లేచి, మళ్ళీ కూర్చున్నాడు. ‘నువ్వు దేశ రహస్యాల్ని, రాకెట్ సాంకేతికతను పాకిస్తాన్‌కు అమ్మేశావనడానికి మా దగ్గర ఆధారాలున్నాయి. ఇప్పుడు మేము ఆ మాటను నీ నోటి వెంట వినాలనుకుంటున్నాం. ఇదంతా ఎలా చేశావో చెప్పు. ఎంత లంచం తీసుకున్నావో చెప్పు’
అదే సమయంలో మరో ముగ్గురు గదిలోకి వచ్చారు. వారిలో ఒకడు బూడిద రంగు సఫారీ సూట్‌ను ధరించి ఉన్నాడు. ఒక బక్కపలుచని వ్యక్తి ‘ఈయన ఇండియన్ బ్యూరో ఆఫ్ ఇన్వెస్టిగేషన్‌లో అతి పెద్ద అధికారి’ అని పరిచయం చేశాడు. 

ఉన్నట్టుండి ఆ బక్కపలుచని వ్యక్తి కోపం గా, ‘ఒరే, లం...కొడకా నీ మీద ఎంత తీవ్ర మైన ఆరోపణలున్నాయో నీకు తెలుస్తోందా? అంటూ అరిచాడు. నేను అతనికి వ్యతిరేకంగా జవాబివ్వగానే, అతను తన దగ్గరున్న ఫైలు నుంచి కొన్ని కాగితాల్ని బయటికి తీసి, నా మీద నమోదైన ఆరోపణల్ని చదివాడు. ఇది అఫిషియల్ సీక్రెట్ యాక్ట్ కింద నమోదైన నేరం. దీనికి పధ్నాలుగేళ్ళు జైలుశిక్ష పడుతుం ది. తరువాత ఆయన తనతో వచ్చిన ఆ ‘పెద్దమనిషి’కేసి వేలు చూపెడుతూ, ‘ఇంత పెద్ద మనిషి నీ నోటి నుంచి ఆ మాటను విన డానికే ఇంత దూరం వచ్చారు. ఈయన నేరుగా దేశంలో అత్యున్నత పదవిలో వ్యక్తికి ఈ సమా చారాన్ని చెబుతారు. ఆయన త్వరలోనే ఢిల్లీకి వస్తారు. కాబట్టి నువ్వు ఎంత త్వరగా ఒప్పు కుంటే అంత మంచిది’ అని అన్నాడు. ఆ పెద్ద మనిషి నిజంగా ఐబికి అధినేత కాదు, ఆయన ఐబి జాయింట్ డైరెక్టర్ ఎం.కె.ధర్ అని నాకు తెలుసు. 
నేను నింపాదిగా, ‘నేను మీకు చెప్పేదేం లేదు. నేను నిరపరాధిని. ఇదం తా ఏవో అపార్థాల వల్ల జరుగుతోంది’ అని జవాబిచ్చాను. కాదు...మాకంతా తెలుసు. నువ్వు మరియం రషీదాని ఎప్పుడు కలుసుకున్నావో చెప్పు’
‘నేను ఆమెను కలవలేదు’ ‘అబద్ధాలాడడానికి నీకు ఎంత ధైర్యం? ఆమె మాకు అంతా చెప్పింది. మా సహనం నశించక ముందే నిజం చెప్పు. అంతటినీ ఒప్పుకో, లేదా నువ్వు అంతమై పోతావు’ ‘దయచేసి నన్ను నమ్మండి’ అని అన్నాను. నా కంఠస్వరం నిజాన్ని ప్రతిధ్వనిస్తోంది. ‘నేను మీరు చెబుతున్నట్టుగా ఆ మాల్దీవుల ఆడవాళ్ళను ఎన్నడూ కలవలేదు. వాళ్ళు ఎలా ఉంటారో కూడా నాకు తెలియదు. నేను వాళ్ళని కలిశానని వాళ్ళు ఎలా చెప్పగలరు?’ ‘నువ్వు ఇలాగే బొంకుతూ ఉంటే, నేను ఫౌజియాను ఇక్కడికి తీసుకొస్తా, దాని చెప్పుతో నిన్ను కొట్టిస్తాను. అది నిన్ను కొడుతుండగా ఫోటోలు తీసి, న్యూస్‌పేపర్లకి ఇస్తాను’ ఆ ఐబి పెద్దమనిషి, అతనితో వచ్చిన వ్యక్తి వెళ్ళిపోయారు. నన్ను విచారిస్తున్న ప్రధాన అధికారి మళ్ళీ తన పనిని కొనసాగిం చాడు. అప్పటికి రాత్రి అవుతోంది. ఒక అబ్బాయి నాకోసం అన్నం, సాంబారు తీసుకొచ్చాడు. నేను ఆ ఆహారాన్ని ముట్టలేదు. అప్పు డు గదిలో ఉన్న ఇద్దరు వెళ్ళిపోయారు. మరో ఇద్దరు వచ్చారు. 

‘ఎందుకు ఈ నేరానికి పాల్పడ్డావో చెప్పు’ అంటూ వాళ్ళు కూడా పాత పాటే పాడసాగారు. 
‘నువ్వు వికాస్ ఇంజన్, క్రయోజెనిక్ ఇంజన్లను పాకి స్తాన్‌కు అమ్మేశావు’ అని అన్నాడు వారిలో ఒకడు. 
‘మీకు రాకెట్ సైన్స్ అంటే తెలియదు. మీరు చెబుతున్న డ్రాయింగ్‌లు లేనే లేవు. ఏ డ్రాయింగ్‌లు ఇస్రో నుంచి బయటకు వెళ్ళలేదు. ఒక వేళ అలాంటి డ్రాయింగులు ఉన్నా, మాతో కలిసి ఏళ్ళూ పూళ్ళూ పని చేయ కుండా కేవలం డ్రాయింగ్‌ల సహాయంతో ఎవ్వరూ ఇంజన్లను తయారు చేయలేరు. ఇంత వరకు భారతదేశానికి క్రయోజెనిక్ ఇంజన్ లేనే లేదు. ఆ విషయం మీకు తెలుసా? అలాంటి ఇంజన్‌ను తయారు చేయడానికే మేమింకా నానా ప్రయత్నాలు చేస్తున్నాం’

పాకిస్తాన్ న్యూక్లియర్ సైంటిస్టు మొహమ్మద్ అస్లామ్‌తో నాకు సంబంధాల్ని అంటగట్టే ప్రయత్నం చేశారు. ఒక న్యూక్లియర్ సైంటిస్టు తో కలిసి, రాకెట్ పరిజ్ఞానం గురించి మాట్లాడడం కుదరదన్నా ను. ముఫ్ఫై గంటల పాటు అన్న పానీయాలు లేకుండా, నిలబడే ఉన్నాను. ‘నేను నిర్దోషినని మీరు ఒప్పుకునేంత వరకు ఇలాగే ఉంటాను’ అని వాళ్ళని బెదిరిం చాను. ‘కనీసం ఒక్క ముస్లిం పేరైనా చెప్పు...’ అంటూ వాళ్ళు నన్ను నానా హింసలు పెట్టారు. నేను నిజాన్ని మాత్రమే నమ్ము కున్నాను. వాళ్ళు వెళ్ళిపోయారు. భారతీయ నిఘా సంస్థ ‘రా’ అధికారులు కూడా నాతో వాళ్ళు కోరుకున్న దాన్ని చెప్పించలేక పోయారు. నాలో ఆత్మవిశ్వాసం బలపడింది. కానీ నేను పనిచేస్తున్న సంస్థ ఇస్రో మాత్రం నాపై వచ్చిన ఈ అపవాదును ఖండించక పోవడం నన్ను బాధపెట్టింది. విక్రమ్ సారాభాయికే ఇలాంటి పరిస్థితి వచ్చి ఉంటే, ఆయనేం చేసే వాడో?!

అవిశ్రాంత  పోరాటం
imageకేరళలోని తిరువనంతపురంలో హోటల్ సామ్రాట్‌లోని 205 వ నెంబరు గదిలోకి 20 అక్టోబరు 1994న ఒక పోలీసు అధికారి సుడిగాలిలా దూసుకొచ్చాడు. గదిలో ఆయనకి ఒక డైరీ దొరికింది. ఆ డైరీ మాల్దీవులకు చెందిన మరి యం రషీదా అనే మహిళకు చెందింది.  ఆ డైరీ, ఆ రోజు జరిగిన సంఘటనలు భారత దేశపు ఖగోళ పరిశోధనల బాటలో అతి పెద్ద అగాథాన్ని ఏర్పరిచాయి. ఒక శాస్త్రవేత్త సేవల్ని దేశానికి దూరం చేశాయి. ఇరవై నాలుగేళ్ళ జీవితాన్ని అతనికి నరకప్రాయం చేశాయి. భారత ఖగోళ విజయయాత్రకు సారథి అయిన ‘ఇస్రో’ ప్రతి ష్ఠను పరీక్షకు నిలిపాయి. చివరికి ఇన్నాళ్ళకు గ్రహణం వీడింది. ఆ శాస్త్రవేత్త నిర పరాధి అని తేలిపోయింది. 
అవాస్తవాల వెంట పరుగెత్తి, ఇంతటి అనరా ్థనికి కారకులైన వారి మీద చర్య తీసుకోవాలంటూ, ఆ శాస్త్రవేత్తకు యాభైలక్ష ల రూపాయల నష్టపరిహా రాన్ని చెల్లించాలని కూడా కోర్టు ఆదేశించింది! కానీ ఈ పరిహారం జరిగిన నష్టాన్ని ఎన్నటికీ పూడ్చలేదు.

ఆ నాటి ఆ ఘటన ఇస్రోకి చెందిన క్రయోజెనిక్ ప్రాజెక్టు అధినేత, ప్రముఖ ఖగోళ శాస్త్రవేత్త నంబి నారాయణన్‌ను పదవీ చ్యుతుణ్ణి చేసింది. దేశానికి వ్యతిరేకంగా గూఢచర్యానికి పాల్ప డి, పాకిస్తాన్‌కు దేశ రహస్యాల్ని చేరవేశారన్న అభియోగాన్ని మోపి పోలీసులు ఆయనను అరెస్టు చేశారు. భారతదేశానికి చెందిన మూడువందల కోట్ల రూపాయల క్రయోజెనిక్ ప్రాజెక్టు తాలూకు రహస్య పత్రాల్ని అక్రమంగా అమ్ముకున్నారంటూ నారాయణన్‌తో పాటు మరో ఐదుగురి మీద అభియోగాన్ని మోపారు. ఇస్రో శాస్త్రవేత్తల్ని ఇద్దరు మహిళలు లైంగిక ప్రలోభా నికి గురిచేసి, ఈ అక్రమానికి పురికొల్పారని పోలీసులు వాదిం చారు.  దాంతో నారాయణన్ తనకు జరిగిన అన్యాయానికి వ్యతిరేకంగా 2015లో సుప్రీం కోర్టును ఆశ్రయించారు. నారాయణన్ అవిశ్రాంతంగా చేసిన ఈ న్యాయపోరాటంలో గత శుక్రవారం ఆయనకు విజయం లభించింది.

పోలీసుల్ని వదిలి పెట్టను!
తనను దారుణంగా హింసించారంటున్న మరియం రషీదా

‘విదేశీ వ్యక్తుల రిజిస్ట్రేషన్ వ్యవహారాల విభాగంపై పోలీసు అధికారి ఇన్‌స్పెక్టర్ విజయన్ పెత్తనం చెలాయించే వాడు. అతని లైంగిక వాంఛను తీర్చక పోవడంతో నన్ను తప్పు డు కేసులో ఇరికించాడు. నా వీసా గడువును పొడిగించాలని నేను అతణ్ణి సంబంధిత కార్యాలయంలో కలిశాను. నేను దేశాన్ని విడిచి వెళ్ళడానికి టిక్కెట్లు కూడా తీసుకున్నాను. దురదృష్టవశాత్తు అప్పుడు విమాన సర్వీసులు రద్దయ్యాయి. విజయన్ నా పాస్‌పోర్టును, టిక్కెట్లను తీసుకున్నాడు. కొన్ని రోజుల తరువాత అతను నేను ఉంటున్న హోటల్ గదికి వచ్చి, నా స్నేహితురాలు ఫౌజియాను గది వెలుపల వేచి ఉండ మన్నాడు. ఆమె వెళ్ళిపోగానే, అతను నా దగ్గరికి వచ్చి, నా భుజం చుట్టూ చేతులు వేసి, కౌగిలించుకునేందుకు ప్రయత్నిం చాడు. నేను ఆగ్రహించి, అతనిని దూరంగా నెట్టేసి, గదిలోంచి వెళ్ళిపోవాలంటూ కేకలు పెట్టాను...’ అంటూ మాల్దీవులకు చెందిన మరియం రషీదా వాపోయింది.

image


ఇస్రో శాస్త్రవేత్త నంబి నారాయణన్ మీద నమోదైన గూఢచర్యం కేసులో ఈమె కూడా ఒక నిందితురాలు. రషీదా అక్టోబరు 1994 నుంచి ఏప్రిల్ 1998 వరకు మూడేళ్ళ పాటు కేరళ జైళ్ళలో గడిపింది. ‘జైలు జీవితం దుర్భరమైంది. ‘ై‘పోలీసు కస్టడీలో నన్ను దారుణంగా హింసించారు. జైల్లో నంబినారాయణన్ పేరు చెప్పాలంటూ నన్ను నానా విధాలుగా హింసించారు. ఆ పోలీసు అధికారులకు వ్యతిరేకంగా నా తరఫున మా న్యాయవాది త్వరలో కేసును నమోదు చేస్తారు’ అని రషీదా హెచ్చరించింది. రషీదా స్నేహితురాలు ఫౌజియా హసన్‌ను కూడా గూఢచర్యం కేసులో అరెస్టు చేశారు. కానీ సాక్ష్యాధారాలతో నిరూపించలేక పోవడం వల్ల ఆమెను, రషీదాను విడిచి పెట్టాలని కోర్టు ఆదేశించింది.



ప్రాణ‘శత్రువులు’

Updated By ManamWed, 09/05/2018 - 02:26

ఆత్మహత్యలకు బాసటగా క్రిమిసంహారకాలు.. 18 ప్రమాదకర కీటకనాశినులపై నిషేధం
imageజీవితమనే పుస్తకం నుంచి ఒక్క పేజీని కూడా మనం చింపలేం. కానీ ఆ పుస్తకాన్ని ఒక్కోసారి ఏకమొత్తంగా మంటల్లో పడేస్తుంటాం, దాన్నే ఆత్మహత్య అని పిలుస్తుంటాం. నిస్సహాయత వల్ల లేదా కోపం వల్ల మనం ఎవరినైనా చంపేస్తే అది నేరమవుతుంది. కానీ అదే పని మనకు మనం చేసుకుంటే మహాపరాధమవుతుంది. ఎవరినీ ఏమీ చేయలేని, ఏ పరిస్థితినీ మార్చలేని అసమర్థతకు లోకువగా కనిపించేది సొంత ప్రాణమే కదా?! ప్రాణాల్ని తృణప్రాయంగా వదిలేయడం ఒక్కో సందర్భంలో మనల్ని యోధులుగా నిలబెడుతుంది. చాలా సందర్భాల్లో అది మనల్ని పిరికి వాళ్ళుగా తేల్చి పారేస్తుంది. ‘నేషనల్ హెల్త్ ప్రొఫైల్ - 2018’ ప్రకారం మన దేశంలో ఒక్క 2015 వ సంవత్సరంలోనే 1,33,623మంది ఆత్మహత్య చేసుకున్నారు. వీరంతా 30 నుంచి 45 ఏళ్ళ మధ్య వయస్కులే. మనదేశంలో రైతుల ఆత్మహత్యలకు కొదవే లేదు. పంటలు పండించాల్సిన పొలాల్లో ఈ రైతులు క్రిమిసంహారక మందుల్ని తాగి ప్రాణాలు విడవడం మనకు కొత్తకాదు. మనదేశంలో ఆత్మహత్య లకు ప్రధాన సాధనంగా మారుతున్నదేమిటో తెలుసా..., క్రిమిసంహారక మందులు. పంటలకు తెగుళ్ళ నుంచి విముక్తి కల్పించడానికి ఉద్దేశించిన ఈ క్రిమినాశినులు చాలామందికి ప్రాణాల నుంచి విముక్తిని ప్రసాది స్తున్నాయి. ఆత్మహత్య చేసుకోవాలనుకోవడం క్షణకమైన భావోద్వేగానికి సంబంధించిన ప్రక్రియ. ఆ క్షణంలో వారికి అందుకు అనువైన పరిస్థితులు అందుబాటులో లేకపోతే, వారు తమ నిర్ణయాన్ని మార్చుకునే అవకాశాలు పెరుగుతాయి. అయితే మనదేశంలో ప్రతి చిన్న గ్రామంలో కూడా అందుబాటులో ఉండే క్రిమి సంహారక మందులు ఆత్మహత్యా యత్నాల్ని సఫలీకృతం చేయడానికి ఇతోధికంగా తోడ్పడు తున్నాయి. ఈ సమస్య మన భారతదేశానికి మాత్రమే సంబంధించిన విషయం కాదు. ఇది శ్రీలంక, బంగ్లా దేశ్, దక్షిణ కొరియా, నేపాల్ వంటి దేశాల్ని కూడా పట్టి పల్లారుస్తున్న సమస్య. అందుకే కొన్ని అత్యంత ప్రమాదకరమైన క్రిమిసంహారకాల్ని ప్రజలకు అందుబాటులో లేకుండా చేయడం తప్పనిసరైంది. మనదేశం కూడా ఈ దిశగా తొలి అడుగు వేసింది. 

ఏటా 8 లక్షల మంది
క్రిమిసంహారక మందులు, తుపాకులు వంటి ఆయుధాల అందుబాటును తగ్గించడం ద్వారా ప్రపంచంలో ఆత్మహత్యల సంఖ్యను గణనీయంగా తగ్గించవచ్చునని ప్రపంచ ఆరోగ్య సంస్థ తేల్చి చెబుతోం ది. ప్రపంచంలో ఆత్మహత్యలకు పాల్పడే వారికి క్రిమిసంహారక మందులు తొలి ఆయుధంగా ఉపయోగపడుతున్నాయి. ప్రపంచ ఆరోగ్య సంస్థ 2014లో ఆత్మహత్యల నివారణకు సంబంధించిన తొలి అధ్యయనాన్ని నిర్వహించింది. ఈ అధ్యయనంలో ప్రపంచవ్యాప్తంగా ఏటా ఎనిమిది లక్షల మంది ఆత్మహత్యలకు పాల్పడుతున్నట్టు తేలింది. ఇలా ఆత్మహత్యలకు పాల్పడే వారు క్రిమిసంహారక మందుల ద్వారా విషాన్ని స్వీకరించడం, నిప్పంటించుకోవడం, లేదా తుపాకీతో కాల్చుకోవడం, ఉరివేసుకోవడం ద్వారా ప్రాణాల్ని తీసుకుంటున్నట్టు అధ్యయనం చెబుతోంది. ప్రతి దేశంలోను జాతీయ ఆత్మహత్యల నివార ణ వ్యూహాల్ని అమలు పరచడం కూడా ఆత్మహత్యల నివారణకు మంచి తరుణోపాయమని ఆ అధ్యయనం పేర్కొంది. 

18 క్రిమిసంహారకాలపై నిషేధం
imageవ్యవసాయ ప్రయోజనాల కోసం వినియోగిస్తున్న ప్రమాదకరం క్రిమిసంహారకాల్ని నిషేధించడం ద్వారా శ్రీలంకలో ఆత్మహత్యల నివారణ విజయవంతమైంది. ఈ సత్యాన్ని గుర్తించిన మనదేశం కూడా ఈ దిశగా ఒక ముందడుగు వేసింది. భారత ప్రభుత్వం గత ఆగస్టు 8న అత్యంత ప్రమాదకరమైన 18 క్రిమి సంహారకాల వినియోగం మీద నిషేధాన్ని విధించింది. వీటిలో 12 క్రిమిసంహారకాల వినియోగంపై నిషేధం తక్షణం అమల్లోకి వచ్చింది. మిగిలిన వాటిపై రెండేళ్ళ వ్యవధి లో నిషేధాన్ని వర్తింప జేసే అవకాశం ఉంది. ప్రమాదకర కీటకనా శినులపై నిషేధాన్ని విధించా లంటూ ప్రజా ఉద్యమ కార్యకర్తలు సుదీర్ఘ పోరాటం చేస్తున్నారు. తత్ఫలితంగా 2015లో నియమితమైన అనుపమ్ వర్మ కమిటీ సమర్పించిన నివేదిక ఈ 18 క్రిమిసంహారకాల్ని నిషేధించాలని ప్రభుత్వానికి సిఫార్సు చేసింది. ఈ సిఫార్సు ఫలితంగానే ప్రభుత్వం ఇప్పుడు దేశంలో 18 రకాల క్రిమిసంహారకాల వినియోగం మీద నిషేధాన్ని విధించింది. 

ఆత్మహత్యాయత్నాల్లో ఎక్కువగా అందుబా టులో ఉండే క్రిమిసంహారకాలే ప్రాణనష్టానికి కారణమవుతున్నాయి. శ్రీలంకలో 1995 నుంచి అనుసరిస్తున్న క్రిమిసంహా రకాల నియంత్రణ విధానాలు ప్రపంచమే అబ్బురపడేంతగా సత్ఫలితాలనిచ్చాయి. ఈ విధానాల ఫలితంగా ఆ దేశంలో 70 శాతం వరకు ఆత్మహత్యల్ని నివారించడం సాధ్యమైంది. అంటే 93 వేల మందిని ఆత్మహత్యలు చేసుకోకుండా కాపాడారన్న మాట. శ్రీలంకలో 1990ల్లో ఏటా లక్షమందిలో 57 మంది ఆత్మహత్యలకు పాల్పడేవారు. కానీ క్రిమిసంహారకాల లభ్యతను నియంత్రించిన తరువాత ఏటా లక్షమందిలో 17 మంది మాత్రమే ఆత్మహత్యలకు పాల్పడుతున్నారు. వ్యవసాయం లో క్రిమిసంహారకాల వినియోగానికి సంబంధించి నియంత్రణా విధానాల్ని రూపొందించడం అంత సులభమైన పనేమీ కాదు. ఇది దేశ స్థూల వ్యవసాయోత్పత్తి మీద ప్రతికూల ప్రభావాన్ని చూపే ప్రమాదం ఉంది. అయితే శ్రీలంక, బంగ్లాదేశ్, దక్షిణ కొరియాల్లో అమలులోకి తెచ్చిన క్రిమిసంహారక నియంత్రణా విధానాల వల్ల ఆయా దేశాల స్థూల వ్యవసాయోత్పత్తి తగ్గిన దాఖలాలు కనిపించలేదు. 

మనదేశంలో 18 క్రిమిసంహారకాల్ని వ్యవసాయంలో వినియోగించడంపై నిషేధం విధించడమన్నది స్వాగతించాల్సిన పరిణా మం. మిథైల్ పారథియోన్, ఫోరేట్, ఫాస్ఫామిడాన్, డైక్లోర్వోస్ వంటి క్రిమిసంహారకాలు మనదేశంలో వేలాది ఆత్మహత్యలకు కారణమ వుతున్నాయి. భారత్‌లో ఏటా 90వేల మంది వ్యవసాయంలో ఉపయోగించే క్రిమిసంహారకాల్ని తాగడం వల్లే ప్రాణాల్ని కోల్పోతు న్నారు. మార్కెట్‌లో ఈ క్రిమిసంహారకాలు అందుబాటులో ఉండడమే దీనికి ప్రధాన కారణం. కొంతమంది ఇలాంటి విషపదార్థాల్ని వాడినప్పటికీ ప్రాణాల్ని కోల్పో కుండా రక్షించడం సాధ్యమవుతోంది. అయితే క్రిమిసంహారకాల్ని తాగిన వ్యక్తికి చికిత్స చేయించాలంటే, అందుకు పెద్దమొత్తంలో డబ్బు అవసరమవుతోంది. క్రిమిసంహార కాల విషం కుటుంబాల్ని,  సమాజాన్ని ఛిద్రం చేస్తోంది. అయితే ప్రభుత్వం వీటిపై నిషేధాన్ని విధించడమన్నది సమర్థవంతమైన క్రిమిసంహారక నియంత్రణా విధానాల రూపకల్పన లో తొలి అడుగు మాత్రమే. ఈ దిశగా ఇంకా సుదీర్ఘ ప్రయాణం చేయవలసి ఉంది. క్రిమిసంహారకాల నిషేధం కోసం అనుపమ్ వర్మ కమిటీ సిఫార్సు చేసిన వాటిలో మోనోక్రోటోఫాస్, కార్బొఫ్యూరాన్, డైమిథియోట్, క్వినాల్ ఫాస్ వంటి 27 కీటకనాశినులు ఉన్నాయి. ఇవి ఆగ్నేయాసియాలో వేలాదిమందిని పొట్టనబెట్టుకున్నాయి. ఇవి అత్యంత ప్రమాదకరమైన క్రిమిసంహారకాలు (హెచ్‌హెచ్‌పి). వీటిని ఉపయోగించడం, దాచడం వంటివి ఎంతో జాగ్రత్తతో చేయాల్సిన పనులు. అయితే గ్రామీణ భారతదేశంలోని పేదరైతులు వీటి పట్ల తగిన అవగాహనను కలిగి ఉండరు. అందుకే వ్యవసాయంలో వీటి వినియోగంపై నియంత్రణను విధించాల్సిన అవసరం తలెత్తింది. మనదేశంలో ఒక్క 2015లోనే ప్రతిగంటకూ 15 మంది ఆత్మహత్యకు పాల్పడినట్టు తెలుస్తోంది. అదేవిధంగా 2010లో 187,000 మంది కేవలం పురుగుమందులు తాగి మరణించారు. పురుగుమందును తాగి ఆత్మహత్యకు పాల్పడడమన్నది మనదేశంలో పరిపాటిగా మారింది. గ్రామీణ భారతదేశంలో వ్యవసాయ ప్రయోజనాల కోసం శక్తిమంతమైన, అత్యంత ప్రమాదకరమైన పురుగు మందుల్ని వాడుతుంటారు. ఇలాం టి పురుగు మందుల్ని ‘హెచ్‌హెచ్‌పి’ అంటారు. వ్యవసాయరంగంతో సంబంధం లేని వ్యక్తులు కూడా ఆత్మహత్య చేసుకోదల చినపుడు పురుగు మందుల్నే ఆశ్రయిస్తు న్నారు. రైతులతో పాటు సామాన్య ప్రజానీకానికి కూడా ఇలాంటి పురుగు మందులు అందుబాటులోకి రాకుండా అడ్డుకోగలిగితే ప్రాణనష్టం నుంచి కొంతైనా వారిని కాపాడుకోవచ్చు. అంతేగాక రైతులు వ్యవసాయ పనుల్లో భాగంగా ఈ ప్రమాదకర పురుగు మందుల్ని అజాగ్రత్తగా ఉపయోగించ డం వల్ల కూడా మరణాల బారిన పడుతున్నారు. ప్రజల ప్రాణాల్ని రక్షించడం ప్రభుత్వ కర్తవ్యం కనుక ఇలాంటి పురుగు మందుల్ని వ్యవసాయంలో కూడా ఉపయోగించకుండా నిషేధించడం వల్ల సమాజానికి మేలు జరుగుతుంది.
 
దేశంలో క్రిమిసంహారకాల్ని ఉపయోగించి ఆత్మహత్యాయత్నాలు జరిగితే, ‘సూసైడ్ ప్రివెన్షన్ ఇండి యా ఫౌండేషన్’ వారి సహాయాన్ని పొందవచ్చు. వారు మీకు దగ్గర్లోని ఆసుపత్రి, చికిత్స తదితర వివరాల ను అందించి మీకు సహకరిస్తారు. ‘డబ్ల్యుడబ్ల్యుడబ్ల్యు డాట్ ఎస్‌పిఐఎఫ్ డాట్ ఇన్’ వెబ్‌సైట్‌ను దర్శిస్తే మీ పరిచయస్తులెవరైనా ఆత్మహత్యా యత్నంలో ప్రాణాపాయ స్థితిలో చిక్కినపుడు, వారిని రక్షించే అవకాశం లభిస్తుంది. 
- కల్కి
 





Related News