banks

ఆ మూడింటి విలీనం దిశగా మరో అడుగు

Updated By ManamWed, 10/10/2018 - 22:48

bankముంబై: విలీనానికి తమ తమ డైరెక్టర్ల బోర్డుల నుంచి ఆమోద ముద్ర వేయించుకున్న ప్రభుత్వ రంగ బ్యాంక్ ఆఫ్ బరోడా, విజయా బ్యాంక్, దేనా బ్యాంకులు తమ మూడింటిని విలీనం చేయాలన్న ప్రతిపాదనను తుది ఆమోదం నిమిత్తం ప్రభుత్వానికి పంపాయి. ఈ మూడు బ్యాంకులను విలీనం చేయనున్నట్లు ప్రభుత్వం సెప్టెంబర్ 17న ప్రకటించింది. ఈ మూడూ విలీనమైతే దేశంలో మూడవ పెద్ద బ్యాంక్ అవతరిస్తుంది. విలీన ప్రక్రియకు ప్రభుత్వం అధికారికంగా ఆమోదం తెలుపడం తదుపరి ప్రక్రియ. షేర్ల వినిమయ నిష్పత్తిని నిర్ణయించవలసి ఉంది. ఈ మూడు బ్యాంకుల సమష్టి వ్యాపార విలువ రూ. 14.82 లక్షల కోట్లు ఉంటుంది. స్టేట్ బ్యాంక్ ఆఫ్ ఇండియా, ఐ.సి.ఐ.సి.ఐ బ్యాంక్‌ల తర్వాత మూడవ పెద్ద బ్యాంక్ అవుతుంది. ఎస్.బి.ఐలో 2017 ఏప్రిల్‌లో దాని అనుబంధ బ్యాంకులు ఐదు విలీనం అయ్యాయి. దాంతో 550 బిలియన్ డాలర్ల సమష్టి ఆస్తులతో ఎస్.బి.ఐ ప్రపంచంలోని టాప్ 50 బ్యాంకులలో ఒకటిగా అవతరించింది. ఈ మూడు బ్యాంక్‌ల విలీనం తర్వాత, ప్రభుత్వ రంగ బ్యాంక్‌ల సంఖ్య 19కి తగ్గిపోతుంది. బ్యాంక్ ఆఫ్ బరోడా మేనేజింగ్ డైరెక్టర్ పి.ఎస్. జయకుమార్ ఈ సంగతులు వెల్లడించారు. ఆయన మూడేళ్ళ పదవీ కాలం అక్టోబర్ 12తో ముగియనుంది. 

వ్యతిరేకిస్తున్న ఉద్యోగులు
బ్యాంక్ అధికారుల కార్మికోద్యమానికి చెందిన సర్వోన్నత సంస్థ ఆల్ ఇండియా బ్యాంక్ ఆఫీసర్స్ కాన్ఫెడరేషన్ (ఏ.ఐ.బి.ఓ.సి) ఈ విలీనాన్ని వ్యతిరేకిస్తోంది. ఈ మూడు బ్యాంక్‌ల విలీనం 1970/1980 నాటి బ్యాంకింగ్ కంపెనీల స్వాధీనం, ట్రాన్స్‌ఫర్ ఆఫ్ అండర్‌టేకింగ్ చట్టానికి విరుద్ధమని వ్యాఖ్యానిస్తోంది. పార్లమెంట్ సమావేశాలు జరుగుతున్నప్పుడు చేసిన ఈ ప్రకటనకు 30 రోజుల లోపల పార్లమెంట్ ఆమోదం పొందాలని, కనుక విలీన ప్రతిపాదనను పార్లమెంట్ ముందుంచాలని కోరుతోంది. దీనికి ఆర్.బి.ఐ అనుమతి కూడా తీసుకోవాల్సి ఉందని చెబుతోంది. ప్రభుత్వ రంగ బ్యాంకుల డైరెక్టర్ల బోర్డులలో సిబ్బంది/అధికారుల ప్రతినిధులు ఎవరూ లేరని వాపోయింది. బ్యాంక్‌ల విలీనం సత్ఫలితాల నిస్తుందన్న నమ్మకం లేదంది. ఈ మూడు బ్యాంకుల విలీనాన్ని వ్యతిరేకిస్తూ ప్రభుత్వ రంగ బ్యాంకుల ఉద్యోగులు నిరసనలు, ఆందోళనలను కొనసాగించనున్నట్లు ఏ.ఐ.బి.ఓ.సి ప్రధాన కార్యదర్శి సౌమ్య దత్తా ఒక ప్రకటనలో తెలిపారు. యూనియన్లు అన్నీ ఈ నిరసన ప్రదర్శనల్లో పాల్గొనాలని ఆల్ ఇండియా బ్యాంక్ ఎంప్లాయీస్ అసోసియేషన్ ప్రధాన కార్యదర్శి సిహెచ్. వేంకటాచలం పిలుపు నిచ్చారు. అక్టోబర్ 12న సమావేశమయ్యే  బ్యాంక్ యూనియన్ల ఐక్య వేదిక (యు.ఎఫ్.బి.యు) ఈ విషయంలో తదుపరి కార్యాచరణను నిర్ణయించనుంది. 



బ్యాంకులకు వరుస సెలవులపై క్లారిటీ..

Updated By ManamFri, 08/31/2018 - 13:23
No continuous holidays for banks starting september 1st week

న్యూఢిల్లీ : వచ్చే నెల (సెప్టెంబర్ మొదటివారంలో) వరుసగా బ్యాంకులకు సెలవులంటూ సోషల్ మీడియాలో వస్తున్న వార్తలపై కేంద్ర ఆర్థిక మంత్రిత్వ శాఖ శుక్రవారం స్పందించింది. బ్యాంకులకు వరుస సెలవుల వార్తలు, కేవలం వదంతులేనంటూ కొట్టిపారేసింది. కేవలం రెండో శనివారం ఆదివారం మాత్రమే హాలిడేస్ అని స్పష్టం చేసింది. మిగతా రోజులు బ్యాంకులు పనిచేస్తాయని తెలిపింది. అలాగే అన్ని రాష్ట్రాల్లోని ఏటీఎంలో సరిపడా నగదు నిల్వలు ఉన్నాయని పేర్కొంది. 

కాగా సెప్టెంబర్ ఫస్ట్ వీక్‌లో బ్యాంకులకు వరుసగా ఆరు రోజులు సెలవులు అంటూ సామాజిక మాద్యమాల్లో వార్తలు హల్‌చల్ చేస్తున్నాయి. దీంతో పాటు బ్యాంకు ఉద్యోగులు సామూహిక సెలవు ప్రకటించడంతో సామాన్య ప్రజానీకంతో పాటు చిరు ఉద్యోగులు కూడా బెంబేలు పడుతున్నారు. దీనిపై క్లారిటీ ఇచ్చిన ఆర్థిక శాఖ... ఆర్బీఐ ఉద్యోగులు మాత్రమే సెలవు ప్రకటించారని, మిగతా బ్యాంకు ఉద్యోగులకు దీంతో ఎలాంటి సంబంధం లేదని వెల్లడించింది. ఇక ఆన్‌లైన్ సేవలు యథాతథంగా కొనసాగనున్నట్లు పేర్కొంది.



బ్యాంకులకు బకాయిల భారం

Updated By ManamTue, 08/14/2018 - 01:27

imageమన దేశంలోని ప్రభుత్వ, ప్రైవేటు బ్యాంకులకు అధికారిక లెక్కల ప్రకారం సుమారు 6 లక్షల కోట్ల రూపాయల బాకీలు గుట్టల్లా పేరుకుపోయాయి. తీసుకొన్న అప్పులను చెల్లించ కుండా సతాయిస్తున్న వందలాది సంస్థలున్నాయి. బ్యాంకుల్లో ఈ సమస్య ఇంతగా తయారవడానికి కారణాలను చూస్తే - మనకు ముఖ్యంగా 2 విషయాలు బోధపడతాయి. అవి.. బ్యాంకుల రుణ మంజూరు విధానం లోపభూయిష్టమైనా కావాలి లేదా రుణాలు ఇచ్చే  అధికారుల్లో చిత్తశుద్ధి అయినా కొరవడి ఉండాలి. రుణ మంజూరు విధానాలు తప్పుల తడక గా ఉండే అవకాశాలు చాలా తక్కువ. కొన్ని దశాబ్దాలుగా పకడ్బందీ పద్ధతులకు దేశవాళీ బ్యాంకులు పెట్టింది పేరు. నిర్దిష్ట విధానాల ప్రాతిపాదికన కొనసాగు తున్న భారతీయ బ్యాం కింగ్‌లో నిరర్ధక ఆస్తులు పెరిగిపోవడానికి ఆ వ్యవ స్థలను నిర్వహిస్తున్న కొందరు అధికారుల చిత్తశుద్ధి లోపం కారణ మవుతోంది. వ్యాపారం జరగని, నష్టాలతో మూసివేత ప్రమా దం ఎదుర్కొంటున్న కింగ్ ఫిషర్ వంటి సంస్థలకు వేల కోట్ల రూపాయల రుణాన్ని బ్యాంకులు ఏ ప్రాతిపాదికన మంజూరు చేయగలిగాయన్న ప్రశ్నకు వారి వద్ద సమాధానం లేదు.

రుణాల మంజూరు పూర్తిగా బ్యాంకుల అంతర్గత వ్యవహారం మాత్రమే కాదు. బ్యాంకులు ప్రజాధనానికి కేవలం ధర్మకర్తలు మాత్రమే! ప్రజల నుండి డిపాజిట్ల రూపంలో పోగుపడిన మొత్తాలను విచ్చల విడిగా రుణ వితరణలను చేసే అధికారం బ్యాంకులకు ఏ మాత్రం లేదు. బ్యాంకింగ్ నియంత్రణ చట్టం - 1949లో భారీ మార్పులు తీసుకురావాల్సిన అవసరం ఉంది. వ్యాపారం సక్రమంగా లేని, దివాలా తీయడానికి దగ్గరగా ఉన్నటువంటి సంస్థలకు బ్యాంకులు రుణాలు మంజూరు చేసిన దాఖలాలు అనేకం ఉన్నాయి. క్షేత్రస్థాయి పరిశీలనతో నిమిత్తం లేకుండా కేవలం ప్రాజె క్టు నివేదికల ఆధారంగా అప్పులివ్వడమే సమ స్యను తెచ్చిపెడుతోంది. బ్యాంకులు మం జూరు చేసిన రుణాలు ఎలా వినియోగ మవుతున్నాయన్న విషయంపైనా బ్యాంకులు శ్రద్ధ పెట్టడం లేదు. భారీ ఎత్తున రుణాలు మంజూరు చేసే విషయంలో బ్యాంకులు ఒక సమూహంగా ఏర్పడతాయి. అందులో పెద్ద మొత్తంలో అప్పు ఇవ్వజూపిన బ్యాంకు నాయకత్వపు బాధ్యత నిర్వహిస్తుంది. పెద్ద బ్యాంకుల వనరులు, పరపతి సామర్ధ్యం, విస్తృతి దృష్ట్యా సాధారణంగా అవే నాయ కత్వ బ్యాంకులుగా అవతరిస్తుంటాయి.

ఆపైన చిన్న చిన్న బ్యాంకులన్నీ కూడా దాన్ని గుడ్డిగా అనుసరి స్తుంటాయి. ఈ సంప్రదాయమే చిన్న బ్యాంకుల పాలిట శాపంగా మారుతోంది. ప్రభుత్వ రంగ బ్యాంకులకు మరింతగా మూలధనం సమకూర్చడం ద్వారా నిరర్ధక ఆస్తుల సమస్యను ఎదుర్కోవా లని ప్రభుత్వం భావిస్తోంది. ప్రభుత్వ రంగ బ్యాంకుల విలీనం వల్ల బ్యాంకింగ్ వ్యవస్థకు మంచి జరుగుతుందని, మొండి బకాయిలు తద్వారా ఏర్పడిన రుణ ఒత్తిడిని తట్టుకోవడం పెద్ద బ్యాంకులకు సులభమవుతుంద న్నది ఆర్బీఐ అభిప్రాయం. అది ఏ మేరకు వాస్తవరూపం దాలుస్తుందన్నది భవిష్యత్తులో గానీ తేలదు. బ్యాంకులు రుణాలను మంజూరు చేసే క్రమంలో జాగ్రత్తగా వ్యవహరిం చడమే మొండి బాకీల సమస్యకు శాశ్వత పరిష్కారం!   

- శ్రీనివాస్ చిరిపోతుల, 
జయశంకర్ భూపాలపల్లి, 96034 71199



త్వరలో పోస్టల్ పేమెంట్స్ బ్యాంక్‌లు

Updated By ManamTue, 08/07/2018 - 23:07

ippbన్యూఢిల్లీ: చాలా కాలంగా ఎదురు చూస్తున్న ఇండియా పోస్ట్ పేమెంట్స్ బ్యాంక్(ఐపీపీబీ)ను ఈ నెల 21 న ప్రధాన మంత్రి నరేంద్ర మోదీ ప్రారంభించనున్నారు. దేశంలోని ప్రతి జిల్లాలో కనీసం ఒక శాఖను నెలకొల్పి గ్రామీణ ప్రాంత ప్రజలకు సేవలందించాలని భావిస్తున్నట్లు ప్రభుత్వ అధికారి ఒకరు తెలిపారు. ‘‘ఐపీపీబీని ఆవిష్కరించేందుకు  ఈ నెల 21న ప్రధాన మంత్రి సమయం ఇచ్చారు. ఇప్పటికే రెండు శాఖలు పనులను ప్రారంభించాయి. మిగతా 648 శాఖలు దేశంలోని ప్రతి జిల్లాలో అందుబాటులోకి రానున్నాయి’’ అని కమ్యునికేషన్ మంత్రిత్వ శాఖ సీనియర్ అధికారి తెలిపారు.  ఐపీపీబీ దేశవ్యాప్తపంగా ఉన్న 1.55లక్షల పోస్ట్ ఆఫీసుల ద్వారా గ్రామీణ ప్రజానీకానికి అర్థికపరమైన సేవలందివ్వనుంది. ఈ ఏడాది చివరి నాటికి 1.55 లక్షల పోస్టాఫీస్‌లను ఐపీపీబీలతో అనుసంధానం చేయాలని ప్రభుత్వం భావిస్తోందని ఆయన తెలిపారు. ‘‘ప్రస్తుతం జిల్లా స్థాయిలో ఎక్కువగా ఉన్న బ్యాంకింగ్ వ్యవస్థను ఐపీపీబీ గ్రామీణ స్థాయికి చేర్చనుంది. దీని ద్వారా దేశంలోనే అతి పెద్ద బ్యాంకింగ్ వ్యవస్థగా ఐపీపీబీ ఎదగనుంది ’’ అని ఆయన పేర్కొన్నారు. దేశ వ్యాప్తంగా ఉన్న పెద్ద పోస్ట్ ఆఫీసుల నుంచి అనుసంధానపరచిన కేంద్రాల ద్వారా 11,000లకు పైగా పోస్ట్ మ్యాన్‌లు  డోర్ స్టెప్ బ్యాంకింగ్ సేవలందివ్వనున్నారు. 17 కోట్ల పోస్టల్ సేవింగ్స్ ఖాతాల అనుసంధానానికి ఐపీపీబీకి పోస్టల్ బ్యాంకింగ్ అనుమతులు ఇచ్చింది. ఐపీపీబీ ద్వారా ఎన్‌ఆర్‌ఈజీఏ కూలీ డబ్బులు, పెన్షన్‌లు అందించే సేవలను నిర్వహించనుంది. పోస్టల్ పేమెంట్స్ బ్యాంక్ ఇచ్చే కార్డుల ద్వారా ఈ సేవలు అందుబాటులోకి రానున్నాయి.  ఐపీపీబీ మొబైల్ యాప్ కూడా ఆగస్టు 21న అందుబాటులోకి రావచ్చని ప్రభుత్వ అధికారులు చెబుతున్నారు. దీని ద్వారా మొబైల్  రీచార్జ్, కరెంట్ బిల్స్, డీటీహెచ్ బిల్స్, కళాశాల ఫీజుల చెల్లింపుతో పాటు దాదాపు అన్ని రకాల డిజిట్ చెల్లింపులు చేసుకోవచ్చని వారు తెలిపారు.



ప్రైవేటీకరణ సర్వరోగ నివారిణి కాదు

Updated By ManamFri, 07/13/2018 - 01:06

BANKబ్యాంకుల ప్రైవేటీకరణ ఇటీవల చర్చనీయాంశమవుతోంది. సమర్ధవంతంగా పనిచేయడం లేదనే సాకుతో ప్రైవేటీకరణ బాట పట్టించడానికి ఏర్పాట్లు చేస్తున్నారన్న వాదనలు వినిపి స్తున్నాయి. బ్యాంకులను జాతీయం చేయడానికి దారితీసిన పరిస్థితులు, వాటి పనితీరును పరిశీలిద్దాం. 1969లో అప్పటి ఇందిరాగాంధీ ప్రభుత్వం సుమారు 14 బ్యాంకులను జాతీ యం చేసింది. దేశ ఆర్ధిక మూలాలకు జవజీవాలు అందించ డానికి ఈ చర్య తప్పనిసరి అని ప్రభుత్వం వివరణ ఇచ్చిం ది. దానికనుగుణంగానే పబ్లిక్ సెక్టార్ బ్యాంకులు పనిచేసి దేశ ఆర్ధిక పరిపుష్టికి బాటలు వేశాయి. దీనితోపాటు 1980లో మరో ఆరు బ్యాంకులను జాతీయం చేశారు.  

ఈ క్రమంలో భారతీయ స్టేట్ బ్యాంక్‌తో పాటు దేశంలో 1,16,394 బ్రాంచిలతో అభివృద్ధి పథంలో కొనసాగుతున్నా యి. ఇందులో 33,864 బ్రాంచ్‌లు గ్రామీణ ప్రాంతాల్లో సేవలందిస్తున్నాయి. ఇదిలా ఉంటే ఈ బ్యాంకులన్నీ 2017- 18లో వ్యవసాయ రంగంపై రూ. 6,22,685 కోట్ల రుణాలు మంజూరు చేశాయని గణాంకాలు సూచిస్తున్నాయి. డ్వాక్రా మహిళలకు, విద్యా రుణాల కోసం రు.1,30,000 కోట్లు మంజూరు చేశాయి. బడాబాబులకు ఇచ్చిన రుణాల వసూళ్ల విషయంలో ఉదాసీనంగా వ్యవహరిస్తుండడం వల్లే ప్రభుత్వ బ్యాంకులు నష్టాల ఊబిలో కూరుకుపోతున్నాయి తప్ప పాల కులు, వారి మేధోవర్గం చెప్తున్నట్లు సామాన్యులకు ఇస్తున్న సబ్సిడీ రుణాల వల్లకాదని  గ్రహించాలి. 

ముఖ్యంగా 1991లో కేంద్రంలో అధికారంలోకి వచ్చిన కాంగ్రెస్ పార్టీ పివి నరసింహారావును ప్రధానమంత్రిగా నియమించింది. దేశ ఆర్ధిక పురోగతిని పరుగులు పెట్టిం చాలనే ఉద్దేశంతో ఆయన ప్రపంచీకరణకు తలుపులు బార్లా తెరిచారు. పెట్టుబడులను ఆహ్వానించడం... వాటికి మౌలిక సదుపాయాలు, భారీ ఎత్తున రుణాలు మంజూరు చేయడం వంటి పనులన్నీ చకాచకా జరిగిపోయాయి. అయితే అందు కోసం దేశ ఆర్ధిక మూలాలను బలోపేతం చేస్తున్న పబ్లిక్ సెక్టార్ బ్యాంకుల భవిష్యత్తుతో పాటు రైతులు మనుగడను కూడా తాకట్టుపెట్టడానికి పాలకులు సిద్ధమవుతున్నారన డానికి ఈ ఐదేళ్లలో రూ. 2,30,000 కోట్లు బ్యాంకుల్లో వసూ లు కాని మొండి బకాయిలను రద్దుచేసిన ఉదంతమే ఇందుకు నిదర్శనం. 

బ్యాంకుల్లో మొండి బకాయిలు ఎందుకు పెరుగు తు న్నాయి? ప్రపంచీకరణలో భాగంగా ఆతిధ్య కంపెనీలకు మౌలిక సదుపాయాల కల్పన కోసం పబ్లిక్, ప్రైవేట్ పార్టనర్ షిప్ (పీపీపీ బ్యాంకుల్లో ప్రజలు దాచుకున్న సొమ్ముకు కార్పొరేట్ కంపెనీలు కొంత జమచేసి భాగస్వామ్యంలో) పద్ధతిలో కార్పొరేట్ కంపెనీలను ప్రోత్సహించేందుకు భారీగా ఇచ్చిన రుణాలు తిరిగి రాకపోవడమే ప్రధాన కారణం.  ఒక్క మాటలో చెప్పాలంటే ఇరు భాగస్వామ్యాలనేది పేరుకే. కానీ ఎక్కువ మొత్తం భాగస్వామ్యం ప్రభుత్వరంగ బ్యాం కులదే. ఒక్కమాటలో చెప్పాలంటే ఈ రుణాలు తీర్చాల్సిన అవసరం తమకు లేదని రుణాలు తీసుకున్న సంస్థలు భావి స్తున్నట్లుగా ఉంటున్నాయి. పెట్టుబడుల ప్రోత్సాహం పేరుతో ఆయా కంపెనీల అలవిమాలిన గొంతెమ్మ కోర్కెలు తీర్చడా నికి సిద్ధపడుతున్న ప్రభుత్వాల అసమర్ధ విధానాలే ఇందుకు కారణమని మనం గుర్తించాలి. 

తమ పాలనలోని వైఫల్యాలను కప్పిపిచ్చుకోవడానికి పాలకులు, వారి తొత్తులైన మేధావులు కొత్త పల్లవిని అందు కోవడం గమనార్హం. వీళ్లంతా దేశంలో పేదల సంక్షేమ పథ కాలకు, రైతుల రుణ మాఫీలకు, ఎరువులు, పురుగు మందు లు, విత్తనాలకు, విద్యుత్తుకు ఇస్తున్న సబ్సిడీలే దేశ ఆర్ధిక స్థితిపై పెనుభారం మోపుతోందని చెప్తూ అనుంగు మీడియా ద్వారా ఊదరగొడుతున్నారు. వాస్తవానికి దేశంలో వసూళ్లు కాని మొండి బకాయిలను చిత్తశుద్ధితో సకమ్రంగా రాబడితే పదేళ్లపాటు నిరాటంకంగా సబ్సిడీలను అమలు చేయొచ్చు. మన పాలకుల నిర్వాకానికి పబ్లిక్ సెక్టార్‌లోని బ్యాంకులను ప్రైవేటుపరం చేయాలని యోచించడం ఆడలేక మద్దెల ఓడు అన్నట్లుగా ఉంది. పోనీ ప్రైవేటు బ్యాంకుల పని సామర్ధ్యం కూడా పాలకులు ఊహిస్తున్నంత ఘనంగా ఏమీ లేదని గత కొన్నాళ్ల నుంచి జరుగుతున్న పరిణామాలను బట్టి చూస్తే అర్ధమవుతుంది. 1947 నుంచి 69 వరకు 559 ప్రైవేటు బ్యాంకులు  విఫలమయ్యాయి. బ్యాంక్ ఆఫ్ ద ఇయర్‌గా అవార్డు అందుకున్న గ్లోబల్ ట్రస్ట్‌బ్యాంక్ ఆ మరుసటి ఏడా దే రూ. 1100 కోట్ల నష్టాన్ని చవిచూడగా, 2003లో పబ్లిక్ సెక్టార్ బ్యాంక్ ఓరియంటల్ బ్యాంక్ ఆఫ్ కామర్స్‌లో విలీ నం చేశారు. బ్యాంకులను జాతీయం చేయడం మొదలు పెట్టినప్పటి నుంచి 2014 వరకు 23 ప్రైవేటు బ్యాంకులను పబ్లిక్ సెక్టార్ బ్యాంకుల్లో విలీనం చేసిన చరిత్రను బ్యాంకు లను ప్రైవేటుపరం చేయాలని సూచిస్తున్న మేధావులు గమనంలోకి తెచ్చుకోగలిగితే మేలు.  

దేశంలో ప్రభుత్వ రంగ బ్యాంకులను దివాలా తీయిం చిన ఘనత కార్పొరేట్ కంపెనీలకే దక్కుతుందంటే అతిశ యోక్తి కాదు. ప్రధానంగా బ్యాంకులు ఇచ్చిన రుణాల్లో పేరు కుపోయిన నిరర్థక ఆస్తుల విలువ సుమారు రూ. 11 లక్షల కోట్లు కాగా (ఇది మన జాతీయస్థూల ఉత్పత్తిలో 25 శాతం) దీనిలో రూ. 500 కోట్లకు పైబడిన మొత్తం రూ. 9.5 లక్షల కోట్లకు పైబడి ఉంటుందని అంచనా. అనగా సుమారు 80 శాతానికి పైగా మొండిబకాయిలు బ్యాంకులకు గుదిబండగా మారాయని అర్ధమవుతోంది. ఇదంతా ఎవరి పాప ఫలితం? మన పాలకులు అనుసరిస్తున్న అసంబద్ధ విధానాల కారణం గానే బ్యాంకులు దివాళా తీసే స్థితికి చేరుకున్నాయని ఆర్ధిక విశ్లేషకులు వివరిస్తున్నారు. పారిశ్రామిక విధానంలో విదేశీ కార్పొరేట్ రంగంపై ఆసక్తి చూపిస్తున్న మన ప్రభువులు దేశంలో ఖాయిలా పడిన పరిశ్రమలను గాలికి వదిలేశారు. ప్రభుత్వ రంగంలో ఉన్న పరిశ్రమలను క్రమంగా దివాలా తీయించే పరిస్థితిని సృష్టించి వాటిని ప్రైవేటు పరం చేయ డమో... మూసివేయించడమో చేసిన విధానాన్నే బ్యాంకుల విషయంలోనూ అనుసరిస్తున్నట్లు అనిపిస్తోంది. అదే జరిగితే దేశంలో ఆర్థిక రంగం అతలాకుతలమై సామాన్యులు రోడెక్కే ప్రమాదముంది.  

 ఇప్పటికే దేశంలో వనరుల దోపిడీకి అవకాశం కల్పించి బడా కార్పొరేట్ కంపెనీల బలోపేతానికి తీవ్రంగా కృషి చేస్తు న్న మన పాలకులు బ్యాంకింగ్ రంగాన్ని కూడా ప్రైవేటు పరం చేసి కార్పొరేట్ శక్తుల చేతికి అప్పగిస్తే దేశ భవిష్యత్తుకే ప్రమాదంగా పరిణమిస్తుంది. కేవలం తమ స్వార్థ ప్రయోజ నాల కోసం దేశాన్ని ఆర్ధిక సంక్షోభంలోకి నెట్టేసే ప్రమాదకర మైన క్రీడకు తెరతీస్తే అది భస్మాసుర హస్తం కాగలదని ఆర్ధిక నిపుణులు హెచ్చరిస్తున్నారు. దేశ సార్వభౌమత్వాన్ని కాపాడే ఆర్ధిక మూలాలను కాపాడుకోవాల్సిన బాధ్యత మనందరిపై ఉంది. ముఖ్యంగా పాలకుల చేతుల్లో ఉంది. ఎగవేతదారుల నుంచి బకాయిలు జప్తు చేసి బ్యాంకులను ఆర్ధికంగా పరిపుష్టి చేసే మార్గాలు అన్వేషించి,  దేశాన్ని కాపాడే ప్రయత్నం చేయాలి. ఎలుకలు ఉన్నాయని ఇల్లు తగులబెట్టుకోకూడదు. ఆర్ధికంగా దివాలా స్థితిలో ఉందని దేశాన్ని తాకట్టు పెట్టే దుస్థితి కల్పించకూడదు. అదే జరిగితే భారత దేశం తిరిగి పరాయి పాలనలోకి వెళ్లడం ఖాయం.
ఇక్బాల్ యం.జి
7396048316 



రుణాలు తిరిగి చెల్లిస్తా: మాల్యా

Updated By ManamTue, 06/26/2018 - 15:54

రుణం చెల్లించాలన్నదే నా అభిమతం
అప్పుడు.. ఇప్పుడూ.. అదే ప్రయత్నంలో ఉన్నా: మాల్యా

న్యూఢిల్లీ: బ్యాంకుల నుంచి తీసుకున్న రుణాలను తిరిగి చెల్లించేందుకు అన్ని రకాలుగా ప్రయత్నించానని.. ఇప్పటికీ ప్రయత్నిస్తూనే ఉన్నానని విజయ్ మాల్యా స్పష్టం చేశారు. అయితే, బ్యాంకులు మాత్రం తనను రుణాల ఎగవేతదారుగా పోస్టర్లకు ఎక్కించాయని ఆయన విమర్శించారు.

mallya

భారత్ లో ఉన్నపుడు కూడా పబ్లిక్ సెక్టార్ బ్యాంకుల నుంచి తీసుకున్న రుణాలను చెల్లించాలనే ప్రయత్నించినట్లు వివరించారు. అందుకోసం పట్టుదలగా ప్రయత్నించానని చెప్పారు. ఈ విషయంలో రాజకీయ నాయకులు జోక్యం చేసుకోవడంతో బ్యాంకులు తనను ముద్దాయిగా నిలబెట్టాయని ఆరోపించారు. ఎప్పుడైతే లోన్ రికవరీ అంశంలో రాజకీయ శక్తులు జోక్యం చేసుకున్నాయో.. అప్పుడిక తనకు చేయడానికి ఏమీ మిగలలేదని మాల్యా తెలిపారు. 

వాస్తవానికి రుణాల వసూలు అంశం సివిల్ పరిధిలోకి వచ్చినా.. భారత ప్రభుత్వం మాత్రం ప్రజల ముందు తనను క్రిమినల్‌గా నిలబెట్టిందని మండిపడ్డారు. 2016లో ఇదే విషయానికి సంబంధించి ప్రధాని మోదీతో పాటు ఆర్థిక శాఖ మంత్రి అరుణ్ జైట్లీకి తాను లేఖ రాసానని మాల్యా తెలిపారు. అయితే, వారి నుంచి తనకు ఎలాంటి జవాబు రాలేదని పేర్కొన్నారు. తాజాగా ఆ లేఖలను మాల్యా మీడియాకు విడుదల చేశారు. లిక్కర్ బేరన్‌గా ప్రసిద్ధి చెందిన విజయ్ మాల్యా వివిధ ప్రభుత్వ రంగ బ్యాంకుల్లో దాదాపు 9 వేల కోట్ల రుణం తీసుకుని విదేశాలకు పారిపోయిన విషయం తెలిసిందే.

ప్రస్తుతం లండన్‌లో తలదాచుకుంటున్న మాల్యాను తిరిగి స్వదేశానికి రప్పించేందుకు భారత్ ప్రయత్నిస్తోంది. ఈ ప్రయత్నాలపై మాల్యా మంగళవారం  స్పందించారు. తీసుకున్న రుణాలను తిరిగి చెల్లించాలన్నదే తన అభిమతమని స్పష్టం చేశారు. న్యాయ పర్యవేక్షణలో తన ఆస్తులను విక్రయించడానికి కోర్టు అనుమతి ఇవ్వాలని ప్రస్తుతం మాల్యా కోరారు. విక్రయించిన ఆస్తుల ద్వారా తాను బ్యాంకులకు రుణాలు చెల్లించనున్నట్టు ఒప్పుకున్నారు. ఈమేరకు మీడియాకు ఓ ప్రకటన విడుదల చేస్తూ.. తాను గతంలో ప్రధాని మోదీకి రాసిన లేఖనూ బయటపెట్టారు.



స్తంభించిన బ్యాంకింగ్

Updated By ManamThu, 05/31/2018 - 06:35
  • దేశవ్యాప్తంగా నిలిచిన లావాదేవీలు.. సమ్మెలో తొలి రోజు 10 లక్షల మంది ఉద్యోగులు

  • వినియోగదారులకు తీవ్ర అవస్థలు.. కొన్ని ప్రైవేటు బ్యాంకుల్లో యథావిధిగా కార్యకలాపాలు

banksహైదరాబాద్: వేతన పెంపు డిమాండ్‌తో దేశవ్యాప్తంగా బ్యాంకు ఉద్యోగులు చేపట్టిన రెండు రోజుల సమ్మె తొలిరోజు బుధవారం బ్యాంకింగ్ కార్యకలాపాలు స్తంభించిపోయాయి. దేశవ్యాప్తంగా 21 ప్రభుత్వరంగ బ్యాంకులు, కొన్ని ప్రైవేటు బ్యాంకులకు చెందిన పది లక్షలకు మందికి పైగా ఉద్యోగులు సమ్మెలో పాల్గొన్నారు. సమ్మెను గురువారం వరకు కొససాగించనున్నట్టు యునైటెడ్ ఫోరం అఫ్ బ్యాంకు యూనియన్స్ కన్వీనర్ వివిఎస్ ఆర్ శర్మ చెప్పారు. ఉద్యోగులు, అధికారులందరికీ స్కేల్ -7 ప్రకారం వేతన సవరణ చేయాలని బుధవారం డిమాండ్ చేసారని తెలిపారు.అయితే ఇండియన్ అసోసియేుషన్‌లో భాగస్వామ్యం కాని,ఐసీఐసీఐ, హెచ్‌డీఎఫ్‌సీ, యాక్సిస్, కోటక్‌మహీంద్రా బ్యాంకుల్లో కార్యకలాపాలు యథావిధిగా కొనసాగించారని అన్నారు . అయితే ఇతర బ్యాంకు ఉద్యోగులు సమ్మెలో ఉన్నందున చెక్కుల క్లియరెన్స్ వంటి కార్యకలాపాలు చేపట్టలేదు.  లాభాలలో వస్తున్న తరుగుదలను కుంటిసాకుగా చూపి 2శాతం వేతన పెరుగుదలను మాత్రమే చేయగలమని ప్రతిపాదించడం శోచనీయమని అన్నారు. వాస్తవానికి బ్యాంకు లాభాలలో 70శాతం నిరర్ధక ఆస్తులకు, మొండిబకాయిలకు కేటాయించడమే ప్రస్తుత బ్యాంకుల లాభాలపై ఒత్తిడికి మూలకారణమని విమర్శించారు. బ్యాంకింగ్ రంగ ఉద్యోగులకు వేతన సవరణ చేయాలని అన్ని ప్రభుత్వ రంగ బ్యాంకులకు, ఇండియన్ బ్యాంక్స్ అసోసియేషన్‌కు కేంద్ర ఆర్థిక శాఖ 2016 జనవరి నుంచి పలుమార్లు ఆదేశించిందని ఆయన తెలిపారు. కేంద్ర ప్రభుత్వంతో ఇప్పటికే 12 సార్లు చర్చలు జరిపినప్పటికీ బ్యాంకు ఉద్యోగుల వేతన సవరణ ఒప్పందం అసంపూర్తిగానే ఉన్నదని ఆయన ఆవేదన వ్యక్తం చేశారు. 1979వ సంవత్సరం నుంచి అమలవుతున్న విధంగా అందరు అధికారులను(స్కేల్-7 వరకు ఈ వేతన సవరణ) ఒప్పందంలో భాగం  చేయాలని యునైటెడ్ ఫోరం అఫ్ బ్యాంకు యూనియన్స్ డిమాండ్ చేస్తున్నాయని అన్నారు. కేంద్ర ప్రభుత్వం ప్రవేశపెట్టిన వివిధ పథకాలను ప్రజలకు అందించేందుకు బ్యాంకు ఉద్యోగులు, అధికారులు శ్రమిస్తున్నారని పేర్కొన్నారు. న్యాయసమ్మతమయిన వేతన సవరణ ఒప్పందం విషయంలో ప్రభుత్వం ఆలస్యం చేస్తోందని ఆవేదన వ్యక్తం చేశారు. కేంద్ర ప్రభుత్వం వేతన సవరణను వెంటనే చేపట్టాలని డిమాండ్ చేశారు. కేరళ, పశ్చిమబెంగాల్, బిహార్, జార్ఖ్‌ండ్‌లలో సమ్మె ప్రభావం ఎక్కువగా కనిపించింది.



బ్యాంకులే కాదు, ఏటీఎంలూ పనిచేయవు

Updated By ManamWed, 05/30/2018 - 09:32

atm హైదరాబాద్: దేశవ్యాప్తంగా రెండు రోజుల బ్యాంకు ఉద్యోగుల సమ్మె మొదలైంది. వేతన సవరణపై చీఫ్ లేబర్ కమిషనర్ ఆధ్వర్యంలో జరిగిన చర్చలు విఫలం కావడంతో సమ్మెకు దిగక తప్పలేదని, మొత్తం 9 బ్యాంక్ ఉద్యోగుల అసోషియేషన్లు సమ్మెలో పాల్గొంటున్నాయని బ్యాంక్ ఆఫీసర్స్ కాన్ఫెడరేషన్ తెలియజేసింది. ఈ రెండు రోజుల పాటు ఏటీఎంలు కూడా పని చేయవని, ప్రజలు తమ న్యాయమైన డిమాండ్లను అర్థం చేసుకుంటారనే ఆశిస్తున్నామని యూఎఫ్బీయూ పేర్కొంది. కాగా చెక్కువ క్లియరెన్స్ మినహా ప్రైవేట్ రంగంలోని ఐసీఐసీఐ, యాక్సిస్, కోటక్ మహీంద్రా, హెచ్‌డీఎఫ్‌సీ తదితర బ్యాంకులు మామూలుగానే పనిచేయనున్నాయి. అయితే వేతనాలు పెంచాలని ప్రభుత్వ బ్యాంకు ఉద్యోగులు ఈ సమ్మెను చేస్తున్నారు.

 



యూకో బ్యాంక్‌లో రూ.621 కోట్లు మోసం

Updated By ManamSun, 04/15/2018 - 12:39

CBI Files Case Against Former UCO Bank Chairman For Rs. 621 Loss Involving Conspiracy

న్యూ ఢిల్లీ: ప్రపంచ వ్యాప్తంగా చర్చనీయాంశమైన పంజాబ్ నేషనల్ బ్యాంకు ఉదంతం మర్చిపోకముందే తాజాగా మరో బ్యాంకులో నిబంధనలకు విరుద్దుంగా రుణాలను మంజూరు చేసిన వ్యవహారం వెలుగు చూసింది. పేరుగాంచిన యూకో బ్యాంకు మాజీ ఛైర్మెన్, అరుణ్‌ కౌల్‌పై సిబిఐ కేసు నమోదు చేసింది. సుమారు రూ.621 కోట్ల మోసానికి పాల్పడ్డారనే ఆరోపణలపై యూకో బ్యాంక్‌ మాజీ చైర్మన్‌ అరుణ్‌ కౌల్‌తో పాటు మరి కొంత మంది బిజినెస్‌ ఎక్జిక్యూటివ్‌లపై సీబీఐ కేసు నమోదు చేసింది. ఎరా ప్రమోటర్లు బ్యాంకు చైర్మెన్‌తో కుమ్మకై బ్యాంకు నుంచి తీసుకున్న రుణాలను తమ స్వంత ఖాతాల్లోకి మళ్ళించుకొన్నారని అభియోగాలు నమోదయ్యాయి. పక్కా ప్లాన్‌‌తో చేసినప్పటికీ ఒక్కసారిగా వెలుగులోకి రావడంతో నిందితులు కంగుతిన్నారు. రంగంలోకి సిబిఐ నిందితుల నుంచి నిజానిజాలు రాబట్టేందుకు సిద్ధమవుతున్నట్లు తెలుస్తోంది.

కాగా.. అరుణ్‌ కౌల్‌ 2010 నుంచి 2015 మధ్యంలో యూకో బ్యాంకుకు చైర్మన్‌గా వ్యవహరించారని, ఈ సంస్థలకు రుణాలు మంజూరు చేయడంలో అరుణ్‌ కౌల్‌దే ప్రధాన భూమిక అని సీబీఐ అధికారులు తెలిపారు. బ్యాంకింగ్‌ రంగంలో ఫిబ్రవరి తర్వాత బయట పడిన మరో పెద్ద మోసం ఇదే అని చెప్పుకోవచ్చు. ఇదిలా ఉంటే.. నిందితుల ఇళ్ళు, కార్యాలయాలపై సీబిఐ అధికారులు దాడులు నిర్వహించారు. ఎరా ఇన్‌ఫ్రా ఇంజనీరింగ్‌ ఇండియా (ఇఐఈల్‌) సిఎండి హేమ్‌సింగ్‌ భరానా, చార్టర్డ్‌ అకౌంట్లు పంకజ్‌ జైన్‌, వందనా శారదా, ఆల్టీస్‌ ఫిన్‌సర్వ్‌ ప్రైవేట్‌ లిమిటెడ్‌కు చెందిన పవన్‌ బన్సాల్‌పై కూడా సిబిఐ అభియోగాలు దాఖలు చేసింది. ఈ బ్యాంకు నుండి సుమారు రూ.650 కోట్లను స్వాహ చేసినట్టు సిబిఐ అనుమానిస్తుంది. అయితే ఈ కేసులో పోలీసులు, సీబీఐ ఎలా ముందుకెళ్తుందో.. నిందితులకు ఎలాంటి శిక్ష విధిస్తుందే వేచి చూడాల్సిందే.

 Arun Kaul



సడన్ షాకిచ్చిన బ్యాంకులు

Updated By ManamThu, 03/22/2018 - 08:50

Banks Refusing Soiled New Currency Notes

హైదరాబాద్: మోదీ సర్కార్ పెద్ద నోట్లను రద్దు చేస్తూ వాటి స్థానంలో కొత్త నోట్లను తీసుకొచ్చిన సంగతి తెలిసిందే. ముందున్న నోట్లకు ఇప్పుడొచ్చిన కొత్త నోట్లకు చాలా తేడా ఉంటుంది. రంగురంగులుగా నోట్లు రావడంతో కాస్త కలర్ పోయినా.. చిరిగినట్లుగా ఉన్నవాటిని ఇది వరకు మార్చుకోవడానికి బ్యాంకులు వెసులుబాటు కల్పించాయి. అయితే ఇకపైన చిరిగిన నోట్లు తీసుకునేది లేదంటూ  బ్యాంకులు సడన్ షాకిచ్చాయి. అంతేకాదు మీరు ఆర్బీఐకి వెళ్లి అష్టకష్టాలు పడినా సరే తీసుకునే పరిస్థితులే ఉండవు. మీ నోటు చిరిగితే మాత్రం ఇక అంతే సంగతులు అన్నమాట. చిరిగిన నోటును ఇంట్లో పెట్టుకోవడం తప్ప చేసేదేమీ లేదు.

అసలు కారణమిదీ..
పెద్ద నోట్లు రద్దు చేసి, కొత్త నోట్లను చలామణిలోకి తెచ్చి ఏడాదిన్నర అవుతున్నా... కొత్త నోట్లకు సంబంధించి చిరిగిన/దెబ్బతిన్న కొత్త నోట్ల మార్పిడికి మార్గదర్శకాలు ఇప్పటికీ రాలేదు. దీంతో ఒక వేళ చిరిగిన నోట్లు బ్యాంకులు తీసుకున్నా.. వాటిని కూడా కౌంటింగ్‌‌లో లెక్కలు తేల్చాల్సిందే. ఈ మేరకు మార్గదర్శకాలు లేకపోవడంతో వాటిని తీసుకోవడం లేదని బ్యాంకులు స్పష్టం చేస్తున్నాయి. అయితే బ్యాంకుల నుంచి సొమ్ము డ్రా చేసుకున్నప్పుడు, ఏటీఎంలలో మాత్రం చిరిగిన కొత్త నోట్లు వచ్చినా కష్టమే. వాటిని తిరిగి బ్యాంకుల వద్దకు తీసుకెళ్లినా పెద్ద ప్రయోజనం ఉండదు. చిరిగిన నోట్లను తీసుకోవట్లేదని సింగిల్ మాటతో బ్యాంకు సిబ్బంది ఒక్క మాటలో తేల్చేస్తుందంతే.

దాచిపెట్టుకోండి.. తర్వాత చూద్దాం..!
చిరిగిన నోట్లను తీసుకుని జనాలు బ్యాంకుల దగ్గరికెళితే.. ‘నోట్లన్నీ దాచిపెట్టుకోండి.. తర్వాత చూద్దాం’.. ఇదీ సిబ్బంది నుంచి వస్తున్న ఏకైక సమాధానం. దీంతో తీవ్ర నిరాశతో.. అత్యవసరానికి డబ్బులు లేక జనాలు ఇంటిబాట పడుతున్నారు. తమ నుంచి ఆదేశాలు వచ్చేవరకు చిరిగిన/ దెబ్బతిన్న కొత్త నోట్ల మార్పిడి చేయవద్దని రిజర్వు బ్యాంకు ప్రధాన కార్యాలయం నుంచి ఆదేశాలు ఉన్నట్లు బ్యాంకులు చెబుతున్నాయి. 

డబ్బులు దొబ్బేస్తున్నారు.. ఓ వైపు బ్యాంకులు నోట్లను తీసుకోకుండా తిరస్కరిస్తుండటంతో అత్యవసరాలకు డబ్బుల్లేక దేశ వ్యాప్తంగా జనాలు చాలా ఇబ్బందులు పడుతున్నారు. దీంతో ఏం చేయాలో దిక్కుతోచక జనాలు తలలుపట్టుకుంటున్నారు. దీన్నే అదనుగా తీసుకుంటున్న కొందరు.. చిరిగిన నోట్లను తీసుకుంటామని చెప్పి  భారీగా కమీషన్ల దందాకు తెరలేపుతున్నారు. బ్యాంకులకు సమీపంలో తమ పని కానిచ్చేస్తున్నారు. రూ.2 వేల చిరిగిన నోటుకు రూ.500 నుంచి వెయ్యి వరకు కమీషన్ తీసుకున్నారు. ఇక, రూ.500 చిరిగిన నోటు మార్పిడికి రూ.200 నుంచి 300 వరకు కమీషన్‌గా తీసుకుంటున్నారు. అయినా సరే మా నోట్లు చేతులు మారితో చాలంటూ చిరిగిన నోట్ల బాధితులు అతి బలవంతంగా మార్చుకుంటుంటే.. ఇంకొందరు మాత్రం ‘మార్పిడి చేసుకునే రోజు’ వస్తుందేమో అని వేచి చూస్తున్నారు.

Banks Refusing Soiled New Currency Notes





Related News