Ganta srinivasa rao

ప్రైవేటుకు దీటుగా ప్రభుత్వ వర్సిటీలు

Updated By ManamMon, 10/29/2018 - 06:29
  • పనితీరును మెరుగుపరిచే బాధ్యత వీసీలదే 

  • జాతీయ స్థాయి టాప్ 100 ర్యాంకుల్లో నిలవాలి

  • కాంట్రాక్టు  లెక్చరర్ల సమస్య పరిష్కారమయ్యాక

  •  అసిస్టెంట్ ప్రొఫెసర్ల పోస్టులు భర్తీ: మంత్రి గంటా

gantaవిశాఖపట్నం: ప్రైవేటు విశ్వవిద్యాలయాలకు దీటుగా ప్రభుత్వ విశ్వవిద్యాలయాలు నిలవాలని,  అందుకు ఉపకులపతులే బాధ్యత వహించాలని రాష్ట్ర మానవ వనరుల అభివృద్ధి శాఖ మంత్రి గంటా శ్రీనివాసరావు ఉన్నారు. ఇందుకు  యూనివర్సిటీల వారీగా ప్రత్యేక కార్యాచరణ ప్రణాళికను రూపొందించుకుని అమలు చేయాల్సిన బాధ్యత ఉందన్నారు. అందుకు అవసరమైన అన్ని విధాల సహాయ సహకారాలు, ఆర్థిక వనరులను సమకూర్చే బాధ్యత  ప్రభుత్వం తీసుకుంటుందని ఆయన తెలిపారు. రాష్ట్ర ఉన్నత విద్యా మండలి ఒక సలహా మండలిగా కాకుండా, విశ్వవిద్యాలయాల పనితీరును మెరుగుపరిచేలా పర్యవేక్షించాలని మండలి చైర్మన్‌కు మంత్రి సూచించారు. ఆదివారం ఆంధ్ర విశ్వవిద్యాలయం సమావేశ మందిరంలో ఏపీలోని అన్ని ప్రభుత్వ విశ్వవిద్యాలయాల ఉపకులపతులతో ఆయన సమీక్ష సమావేశం నిర్వహించారు. ఈ సందర్భంగా మంత్రి మాట్లాడుతూ.. రాష్ట్రాన్ని నాలెడ్జ్ హబ్‌గా, ఎడ్యుకేషన్ హబ్‌గా తీర్చిదిద్దాలనే లక్ష్యంతో ప్రభుత్వం కృషి చేస్తున్నదన్నారు. ఈ దృష్టితోనే ప్రభుత్వం లోటు బడ్జెట్ సమస్యను ఎదుర్కొంటున్నా, విద్యారంగానికి అత్యధిక ప్రాధాన్యత ఇస్తూ బడ్జెట్లో 15 శాతం నిధులు అనగా సుమారు 25 వేల కోట్లకు పైగా కేటాయిస్తున్నట్టు  మంత్రి తెలిపారు. కాగా ఈ మధ్యకాలంలో ప్రకటించిన జాతీయ స్థాయి  100 లోపు యూనివర్సిటీ ర్యాంకులలో మన రాష్ట్రానికి చెందిన యూనివర్సిటీలు లేకపోవడంపై ముఖ్యమంత్రి చంద్రబాబు నాయుడు ఎంతో అసంతృప్తి వ్యక్తం చేసినట్లు మంత్రి తెలిపారు. జాతీయ స్థాయి 100  లోపు ర్యాంకుల్లో మన విశ్వవిద్యాలయాలు నిలిచేలా ఉప కులపతులు కృషి చేయాలని మంత్రి కోరారు. రాష్ట్రంలో విద్యారంగ అభివృద్ధికి ప్రైవేటు విశ్వవిద్యాలయ బిల్లును ప్రభుత్వం అమల్లోకి తెచ్చిందని, ఫలితంగా 12 జాతీయ స్థాయి ప్రైవేటు యూనివర్సిటీలు నెలకొల్పుతారని చెప్పారు.  ప్రైవేటు యూనివర్సిటీలతో దీటుగా ప్రభుత్వ యూనివర్సిటీలు పనితీరును మెరుగుపరుచు కోవాల్సిన అవసరం ఎంతో ఉందన్నారు.  పాతకాలపు కోర్సులను పక్కనపెట్టి, ప్రస్తుతం సామాజిక, పారిశ్రామిక అవసరాలకు అనుగుణంగా కోర్సులను రూపొందించి ప్రవేశ పెట్టాలని  ఉపకులపతులు ఆయన సూచించారు. విశ్వవిద్యాలయాలలో ఖాళీగా ఉన్న అసిస్టెంట్ ప్రొఫెసర్లు, అసోసియేట్ ప్రొఫెసర్లు, ప్రొఫెసర్ల పోస్టులను భర్తీ చేసేందుకు ఏడాదిన్నర క్రితమే కేబినెట్ ఆమోదం తెలిపిందన్నారు. ఈ విషయంలో న్యాయపరమైన వివాదాల కారణంగా పలు కోర్టుల్లో కేసులు దాఖలు అయ్యాయన్నారు. ఈ కేసులన్నీ పరిష్కారం అయినా, కాంట్రాక్ట్ లెక్చరర్ల  సమస్యను పరిష్కరించిన తదుపరి మాత్రమే అసిస్టెంట్ ప్రొఫెసర్ల పోస్టులు భర్తీ చేయాలని ఉపకులపతులకు ఆయన సూచించారు.  ఈ సమావేశంలో రాష్ట్ర ఉన్నత విద్యా మండలి చైర్మన్ ఎస్ వి జయరాజు, కార్యదర్శులు వరదరాజులు, కోటేశ్వరరావు, ఆంధ్ర విశ్వవిద్యాలయం ఉప కులపతి ఆచార్య జి.నాగేశ్వరరావు, రిజిస్ట్రారు  ఆచార్య కే నిరంజన్‌తోపాటు ఏపీలోని అన్ని విశ్వవిద్యాలయాల ఉపకులపతులు పాల్గొన్నారు. 



విద్యారంగానికి ఊతం

Updated By ManamSat, 10/27/2018 - 02:58
  • సిన్సినాటి వర్సిటీతో ఒప్పందాలకు చర్యలు

  • ప్రతినిధులతో సమావేశంలో మంత్రి గంటా

educationఅమరావతి: అంతర్జాతీయ ప్రమాణాలకు అనుగుణంగా నవ్యాంధ్ర విద్యారంగాన్ని తీర్చిదిద్దే క్రమంలో అమెరికాకు చెందిన ప్రఖ్యాత యూనివర్సిటీ ఆఫ్ సిన్సినాటీతో పలు ఒప్పందాలు చేసుకునేదిశగా ముందుకెళ్లుతున్నట్లు రాష్ట్ర మానవ వనరుల అభివృద్ధి శాఖ మంత్రి గంటా శ్రీనివాసరావు తెలిపారు. పరిశోధన, సైబర్ సెక్యూరిటీ, ఇండస్ట్రీయల్ డిజైన్, పిడియాట్రిక్స్ తదితర రంగాల్లో భాగస్వామ్య ఒప్పందాలు చేసుకునే దిశగా సాధ్యాసాధ్యాలను పరిశీలిస్తామని చెప్పారు. శుక్రవారం విజయవాడలోని తన క్యాంప్ కార్యాలయంలో యూనివర్సిటీ ఆఫ్ సిన్సినాటీ ప్రతినిధులతో మంత్రి భేటీ అయ్యారు. ఈ యూనివర్సిటీలో చదువుకునే ఏపీ విద్యార్థులకు ఫీజు రాయితీ అందేలా చర్యలు తీసుకొనున్నట్లు తెలిపారు. ఇప్పటికే పలు వర్సిటీలతో భాగస్వామ్య ఒప్పందాలు చేసుకున్నామని, తద్వారా ఏపీ విద్యారంగంలో మరింతగా విద్యా ప్రమాణాలు పెంచేలా చర్యలు తీసుకున్నామని తెలిపారు. నవ్యాంధ్రలోని ఆచార్య నాగార్జున, ఎస్వీయూ, కేఎల్ యూనివర్సిటీలను యూనివర్సిటీ ఆఫ్ సిన్సినాటీ ప్రతినిధుల బృందం సందర్శించింది. సందర్శన, అధ్యయనానికి సంబంధించిన వివరాలను వారు మంత్రి గంటాకు వివరించారు. ఏయే అంశాల్లో తాము ఆసక్తిగా ఉన్నామో వివరించారు. ఏపీలో పరిశోధన కేంద్రంపై ఆసక్తిగా ఉన్నామని, సైబర్ సెక్యూరిటీ, ఐఓటీ అంశాలపై భాగస్వామ్యం చేసుకుంటామని వారు మంత్రి గంటాకు తెలిపారు. మంత్రి గంటా శ్రీనివాసరావు ఆదేశాల మేరకు ఉన్నత విద్యాశాఖ సలహాదారు డాక్టర్ ఈదర వెంకట్ ఆధ్వర్యంలో ఈ బృందం 24, 25, 26 తేదీల్లో ఏఎన్‌యూ, ఎస్వీయూ, కేఎల్ వర్సిటీలను సందర్శించింది. అక్కడి విద్యార్థులు, ఫ్యాకల్టీలతో చర్చించింది. ఇక్కడి కోర్సులు, అవసరాలను అధ్యయనం చేసింది. మారుతున్న పరిస్థితులకు అనుగుణంగా వర్సిటీలకు అనుసంధానించిన సాంకేతిక వ్యవస్థ, డిజిటల్ లైబ్రరీలు, ల్యాబ్‌లు, పరిశోధన వ్యవస్థలను పరిశీలించింది. విదేశీ విద్యార్థులు ఇక్కడ ఏయే కోర్సులు ప్రత్యేకించి ఫైన్ కోర్ట్స్‌లు నేర్చుకునే అవకాశాలను అధ్యయనం చేసింది. వర్సిటీ ప్రతినిధి బృందంలో వర్సిటీ వైస్ ప్రొకొస్ట్ ప్రొఫెసర్ డాక్టర్ రాజ్ మెహతా, పొలిటికల్ సైన్స్ లీడ్ ప్రొఫెసర్ లౌరా జన్ కిన్స్, డాక్టర్ అవిసుత్ రాతౌరీ, డైరక్టర్ ఆఫ్ ఇంటర్నేషన్ స్ట్రాటజిక్ పార్టనర్స్ గౌరీబాలన్ ఉన్నారు.



డీఎస్సీ నోటిఫికేషన్

Updated By ManamSat, 10/27/2018 - 02:09
  • విడుదల చేసిన మంత్రి గంటా శ్రీనివాసరావు

gantaఅమరావతి: ఆంధ్రప్రదేశ్‌లో ఉపాధ్యాయ ఉద్యోగాల నియామకాలకు నోటిఫికేషన్ విడుదలైంది. గురువారం షెడ్యూల్ విడుదల చేసిన రాష్ట్ర ప్రభుత్వం, శుక్రవారం నోటిఫికేషన్ జారీ చేసింది. 7729 ఉపాధ్యాయ ఉద్యోగాల భర్తీకి మంత్రి గంటా శ్రీనివాసరావు నోటిఫికేషన్ విడుదల చేశారు. డీఎస్సీలో అత్యధికంగా ఎస్జీటీ పోస్టులు భర్తీ చేయనున్నారు. రాష్ట్ర ప్రభుత్వం జీవో నం. 67, 68లను జారీ చేసింది. ప్రభుత్వ, జడ్పీ, ఎంపీ, పురపాలక, గిరిజన, బీసీ సంక్షేమశాఖ, ఆదర్శ పాఠశాలల పోస్టులను భర్తీ చేయనున్నారు. వయోపరిమితి ఎస్సీ, ఎస్టీ, బీసీ కేటగిరికి 47 ఏళ్ల నుంచి 49 ఏళ్లకు పెంచామని, అలాగే జనరల్ కేటగిరిలో వయోపరిమితి 42 ఏళ్లనుంచి 44 ఏళ్లకు పెంచామని మంత్రి గంటా తెలిపారు. ఈ ఏడాది మార్చి వరకు ఉన్న ఖాళీలను పరిగణనలోకి తీసుకుని పోస్టులను ప్రకటించినట్లు వెల్లడించారు. మూడు పర్యాయాలు షెడ్యూల్ విడుదల చేసి ప్రకటన విడుదల చేయనందుకు నిరుద్యోగులు క్షమించాలని మంత్రి మరోసారి కోరారు. గురువారం విడుదల చేసిన షెడ్యూల్ ప్రకారం ఆన్‌లైన్‌లో పరీక్షలు ఉంటాయి. నవంబర్ 1నుంచి 16 వరకు ఆన్‌లైన్ దరఖాస్తులు స్వీకరించి, నవంబర్ 17నుంచి ఆన్‌లైన్ మాక్ టెస్టులు ఉంటాయి. డిసెంబర్ 12, 13న పీజీ టీచర్స్ పరీక్ష, స్కూల్ అసిస్టెంట్స్ (నాన్ లాంగ్వేజెస్)లకు డిసెంబర్ 6న పరీక్ష, నవంబర్ 19 నుంచి సెంటర్ ఆప్షన్ల ఎంపిక ఉంటాయి. డిసెంబరు 6 నుంచి జనవరి 2 వరకు వివిధ కేటగిరీలలో అభ్యర్థులకు రాత పరీక్షలు ఉంటాయి.



ఏపీలో ఉపాధ్యాయ ఉద్యోగాలకు నోటిఫికేషన్

Updated By ManamThu, 10/25/2018 - 09:53

Ganta Srinivasa Raoఅమరావతి: ఏపీలో టీచర్ పోస్టులకు సంబంధించిన డీఎస్సీ నోటిఫికేషన్‌ను మంత్రి గంటా శ్రీనివాసరావు విడుదల చేశారు. సాంకేతిక కారణాల వలన ఈ నోటిఫికేషన్ ఆలస్యమవుతూ వచ్చిందన్న గంటా శ్రీనివాసరావు ఈ సారి మాత్రం ప్రకటించిన తేదీలలోనే పరీక్షలు జరుగుతాయని తెలిపారు. ఈ నేపథ్యంలో నవంబర్ 1వ తేది నుంచి 16వ తేది వరకు డీఎస్సీ దరఖాస్తులు అందుబాటులో ఉండనున్నట్లు గంటా తెలిపారు.

ఈ క్రమంలో స్కూల్ అసిస్టెంట్ (నాన్ లాంగ్వేజస్)కు డిసెంబర్ 6 నుంచి 10 వరకు, స్కూల్ అసిస్టెంట్ (లాంగ్వేజస్)కు డిసెంబర్ 11న పరీక్ష ఉంటుందని తెలిపారు. అలాగే 12, 13 తేదీల్లో పీజీ టీచర్స్ రాతపరీక్ష ఉంటుందని అన్నారు. టెట్ కట్ టీఆర్టీ ద్వారా 7,675 ఉద్యోగాలను, ప్రభుత్వ, జెడ్పీ పోస్టులు 4,341 ఉద్యోగాలను, మునిసిపల్ పోస్టులు 1,100, మోడల్ స్కూల్స్ లో 909 పోస్టులు, బీసీ వెల్ఫేర్ లో 300 పోస్టులు, ఎస్జీటీ 3,666 పోస్టులు, స్కూల్ అసిస్టెంట్ 1,625 పోస్టులు, లాంగ్వేజ్ పండిట్స్ 452 పోస్టులు భర్తీ చేయనున్నామని గంటా వెల్లడించారు. నవంబర్ 19 నుంచి సెంటర్ ఆప్షన్లను ఎంపిక చేసుకోవచ్చని.. నవంబర్ 17 నుంచి ఆన్‌లైన్ మాక్ టెస్టులు నిర్వహిస్తామని, 20 తరువాత హాల్ టికెట్లను డౌన్ లోడ్ చేసుకోవచ్చని మంత్రి పేర్కొన్నారు. ఇందుకు సంబంధించిన నోటిఫికేషన్‌ను రేపు విడుదల చేయనున్నామని ఆయన అన్నారు.



ఆర్ సెట్ ఫలితాలు విడుదల

Updated By ManamMon, 10/08/2018 - 22:51
  • 1116 మంది విద్యార్థులు అర్హత 

  • 30కి ఇంటర్వ్యూలు పూర్తి: గంటా

gantaవిశాఖపట్నం: ఆర్ సెట్ ఫలితాలను మంత్రి గంటా శ్రీనివాసరావు విడుదల చేశారు. సోమవారం విశాఖ ఆంధ్ర విశ్వవిద్యాలయంలో ఫలితాలను ప్రకటించారు. 9 నగరాల్లో 15 సెంటర్లలో 70 సబ్జెక్టులలో పరీక్షలు జరిగాయని వివరించారు. 24,082 మంది రిజిస్టరు చేసుకోగా, 20,082 మంది హాజరయ్యారని, 1116 మంది మాత్రమే అర్హత పొందారని తెలిపారు.  మొదట ఇంకా తక్కువమంది అర్హత సాధించినందున కనీస మార్కులు అయిదు శాతం తగ్గించారన్నారు. ఈనెల 30 నాటికి ఇంటర్వ్యూలు పూర్తి చేసి, నవంబరు 20 నాటికి అడ్మిషన్లు జరుగుతాయని తెలిపారు. అన్ని యూనివర్సిటీల్లో కలిపి 2000 ఖాళీలు ఉన్నాయని, మరో టెస్టు త్వరలో నిర్వహిస్తారని చెప్పారు. ఆరోపణలకు అవకాశంలేకుండా ఈ ప్రక్రియ ఉందని భావిస్తున్నామని గంటా స్పష్టం చేశారు. ద్రవిడ యూనివర్సిటీలో రీసెర్చి అడ్మిషన్లు వివాదాస్పదమైనందున  వాటిని రద్దు చేయాల్సి వచ్చిందని చెప్పారు. అపుడే ఏపీలోని 14 యూనివర్సిటీలకూ కామన్‌గా రీసెర్చి ఎంట్రన్స్ టెస్టు నిర్వహించాలని నిర్ణయించామన్నారు. 



ఇటుక కూడా వేయలేదు

Updated By ManamFri, 10/05/2018 - 23:05
  • కేంద్ర కొత్త విద్యా సంస్థల ఏర్పాటు ఎక్కడ..

  • జవదేకర్ మాటలన్నీ అబద్ధాలు: మంత్రి గంటా

  • కేంద్రీయ విద్యా సంస్థలపై ఏపీ శ్వేతప్రతం

gantaఅమరావతి: రాష్ట్రంలో విద్యారంగ అభివృద్ధికి కేంద్ర ప్రభుత్వం ఇచ్చిన నిధులపై మంత్రి గంటా శ్రీనివాసరావు శ్వేతపత్రం విడుదల చేశారు. శుక్రవారం సచివాలయంలోని నాలుగో బ్లాక్‌లో మంత్రి కార్యాలయంలో మీడియా సమావేశంలో విడుదల చేశారు. ఇచ్చిన హామీల కంటే ఏపీకి ఎక్కువ నిధులిచ్చామని కేంద్ర మానవ వనరుల అభివృద్ధి శాఖ మంత్రి ప్రకాశ్ జవదేకర్ పేర్కొన్న నేపథ్యంలో మంత్రి పూర్తి వివరాలు వెల్లడించారు. శ్వేత పత్రం విడుదల చేయాలని కేంద్రాన్ని డిమాండ్ చేయగా, ఇప్పటికీ స్పందించలేదని, ప్రజల్లో ఉన్న అపోహాలను తొలగించేందుకు తామే విడుదల చేశామని తెలిపారు. ఏపీకి చాలా చేశామని కేంద్ర మంత్రులు అబద్ధాలు చెబుతున్నారని విమర్శించారు. కేంద్రం కొత్తగా ఏర్పాటు చేస్తామన్న విద్యా సంస్థలకు ఒక్క ఇటుక కూడా పడలేద న్నారు. ఏపీలోని జాతీ య విద్యా సంస్థల్లో కాంట్రాక్ట్ బోధన సిబ్బందే ఉన్నారని, పర్మినెంట్ ఫ్యాకల్టీ నియామకానికి కేంద్రం చొరవ చూపడం లేదని మంత్రి ఆవేదన వ్యక్తంచేశారు. ఏపీ ప్రభుత్వం విద్యాశాఖకు రూ.25 వేల కోట్లు ఖర్చు పెట్టిందని, 3,508 ఎకరాల ప్రభుత్వ భూమిని 17 కేంద్ర విద్యా సంస్థలకు కేటాయించిందని మంత్రి గంటా వెల్లడించారు. పునర్విభజన చట్టాన్ని, 2014 ఎన్నికల్లో బీజేపీ మేనిఫెస్టోను అమలు చేయకుండా, రాష్ట్ర ఆశయాలకు వ్యతిరేకంగా కేంద్రం వ్యవహరిస్తోందని మంత్రి ఆవేదన వ్యక్తం చేశారు. గిరిజన యూనివర్శిటీ ఏర్పాటుపై ఇంతవరకూ కేంద్ర ప్రభుత్వం తన నిర్ణయం ప్రకటించలేదన్నారు. ఏపీలో 11 కేంద్రీయ విద్యా సంస్థల స్థాపనకు 12,746.38 కోట్లు కేటాయిస్తామని కేంద్ర ప్రభుత్వం ప్రకటించిందన్నారు. నేటి వరకూ కేవలం రూ.746 కోట్లు విడుదల చేసిందన్నారు. ఇప్పటికైనా యాక్షన్ ప్లాన్ రూపొందించుకుని, పూర్తిస్థాయిలో విద్యా సంస్థలు పనిచేసేలా చర్యలు తీసుకోవాలని కేంద్ర ప్రభుత్వాన్ని గంటా శ్రీనివాసరావు కోరారు.



నేను కూలీ నెంబర్ వన్

Updated By ManamWed, 09/05/2018 - 22:59
  • రాష్ట్రాన్ని ఎడ్యుకేషన్ హబ్ చేయడమే లక్ష్యం  

  • మానవవనరుల అభివృద్ధి బాధ్యత టీచర్లదే

  • గురుపూజోత్సవ సభలో ముఖ్యమంత్రి చంద్రబాబు 

chandrababuగుంటూరు: ఆకాశమే హద్దుగా ఎదిగే అవకాశం విద్యార్థులకు ఉందని, వారిని ఆ దిశగా నడిపించే దిక్సూచిలా ఉపాధ్యాయులు ఉండాలని ముఖ్యమంత్రి నారా చంద్రబాబు నాయుడు పిలుపునిచ్చారు. విద్యార్థులను  ఉత్తమ పౌరులుగా తీర్చిదిద్దడం ద్వారా రాష్ట్రాన్ని మేలైన మానవ వనరులకు గమ్యస్థానంగా మలచాలని, ఈ బాధ్యతను ఉపాధ్యాయులందరూ తీసుకోవాలని కోరారు. మానవ వనరుల అభివృద్ధికే బడ్జెట్‌లో ఎక్కువ నిధులు ఖర్చు చేస్తున్నామని ముఖ్యమంత్రి వెల్లడించారు. బుధవారం మంగళగిరిలో జరిగిన గురుపూజోత్సవ వేడుకల్లో ముఖ్యమంత్రి పాల్గొన్నారు. సాధారణ కుటుంబంలో పుట్టిన సర్వేపల్లి రాధాకృష్ణన్ రాష్ట్రపతిగా ఎదగడం ఆయన పట్టుదలకు నిదర్శనమని అన్నారు. అదే పట్టుదల, స్ఫూర్తి ఇప్పుడు అందరికీ కావాలన్నారు. chandrababuరాధాకృష్ణన్ వంటి వ్యక్తి తెలుగు గడ్డపై పెరగడం మనకు గర్వకారణమన్నారు. ఆంధ్రప్రదేశ్‌ను విజ్ఞానాంధ్రప్రదేశ్‌గా, ఎడ్యుకేషన్ హబ్‌గా తీర్చిదిద్దడమే తన లక్ష్యమని ముఖ్యమంత్రి వివరించారు. తాను రాష్ట్రంలో నెంబర్‌వన్ కూలీలా కష్టపడుతున్నానని, అందరం అదేస్థాయిలో శ్రమిస్తే అత్యుతమ ఫలితాలు సాధించవచ్చని చెప్పారు. తనను జీవితంలో ఎక్కువ ప్రభావితం చేసింది గురువులేనని, తనకు వారిపై అంచంచల విశ్వాసం, నమ్మకం ఉందన్నారు.

ఉపాధ్యాయుల సమస్యలు పరిష్కరిస్తా...
ఉపాధ్యాయుల సమస్యలను పరిష్కరించేందుకు కృషి చేస్తానని ముఖ్యమంత్రి చంద్రబాబు చెప్పారు. సమాజంలో సమస్యలకు పరిష్కారం చూపేదిగా చదువు ఉండాలని ఆయన ఆకాంక్షించారు. ఒత్తిడి నడుమ విద్యను అభ్యసించే పరిస్థితి ఉండకూడదని, ఆహ్లాదంగా-ఆనందంగా విద్యను అర్జించేలా చూడాలని చెప్పారు. ఉపాధ్యాయులు 24 గంటలు తరగతి గదుల్లోనే గడపకుండా ప్రకృతిని ప్రేమిస్తూ సేద తీరాలని, ఒత్తిడి తగ్గించుకోవాలని సూచించారు. రాష్ట్రంలోని ప్రభుత్వ పాఠశాలలు, కళాశాలలకు నరేగా నిధులతో ప్రహరీ గోడలు నిర్మించడంతో సహా 2022 నాటికి అన్ని జూనియర్ కళాశాలలకు సొంత భవనాలు సిద్ధం చేయాలని సంకల్పించామని ముఖ్యమంత్రి తెలిపారు. రాష్ట్రంలో కొత్తగా మరికొన్ని ప్రభుత్వ కళాశాలలు, పాఠశాలలు ప్రారంభిస్తున్నామని, అలాగే ఉపాధ్యాయుల నియామకాలు చేపడతామని చెప్పారు. డ్రాప్ అవుట్స్ భారీగా తగ్గించగలగడం, 2014కు ముందు విద్యారంగంలో వెనుకబడిన రాష్ట్రాన్ని ప్రస్తుతం దేశంలోనే 3వ ర్యాంకులో నిలబెట్టడం ప్రభుత్వ విజయాలుగా పేర్కొన్నారు.

ముఖ్యమంత్రి నిత్య విద్యార్థి: గంటా  
విద్య, విజ్ఞానం అంటే ఎంతో ఆసక్తి చూపే ముఖ్యమంత్రి గతంలో ఏ ప్రభుత్వం చేయనంతగా విద్యాభివృద్ధికి రూ.25 వేల కోట్లు ఖర్చు పెట్టారని మానవ వనరుల శాఖ మంత్రి గంటా శ్రీనివాసరావు అన్నారు. సుదీర్ఘ రాజకీయ అనుభవం, ఎంతో జ్ఞానం వున్నా కొత్త విషయాలు నేర్చుకునేందుకు ముఖ్యమంత్రి నిత్య విద్యార్ధిలా ముందుంటారని చెప్పారు. కార్యక్రమంలో ముందుగా జ్యోతిని వెలిగించి, సర్వేపల్లి రాధాకృష్ణన్ విగ్రహానికి పూలమాల వేసి సభను ప్రారంభించిన ముఖ్యమంత్రి, చివరిగా రాష్ట్ర ఉత్తమ ఉపాధ్యాయులుగా ఎంపికైన వారికి పురస్కారాలు ప్రదానం చేశారు.

పీవీ సింధుకు సత్కారం
ఉపాధ్యాయ దినోత్సవ వేడుకకు హాజరైన బ్యాడ్మింటన్ క్రీడాకారిణి పీవీ సింధును సభా వేదిక మీద ముఖ్యమంత్రిchandrababu గౌరవించి, సత్కరించారు. దేశం గర్వించదగిన క్రీడాకారిణి పీవీ సింధూ ఈ కార్యక్రమానికి రావడం ఆనందంగా ఉందని, ఆంధ్రప్రదేశ్‌కు ఖ్యాతిని, గౌరవాన్ని తీసుకువచ్చారని చెప్పారు. కామన్వల్త్ క్రీడలు, వరల్డ్ చాంపియన్ షిప్, ఆసియా క్రీడల్లో పతకాలు సాధించిన సింధుకు ముఖ్యమంత్రి అభినందనలు తెలిపారు. ఒలంపిక్స్‌లో స్వర్ణ పతకం సాధించాలని ఆకాంక్షించారు.   పీవీ సింధు 23 ఏళ్ల వయసులోనే ఇన్ని విజయాలు సాధించడం వెనుక ఆమె ఎంతో కఠోరంగా శ్రమించారని చెప్పారు. సింధు మాదిరిగా ఎందరినో తయారుచేయాలని ఉపాధ్యాయులను ముఖ్యమంత్రి కోరారు.

తల్లిదండ్రులే తొలి గురువులు: సింధు
ఈ సందర్భంగా పీవీ సింధు మాట్లాడుతూ తన తల్లిదండ్రులు తన కు మొదటి ఉపాధ్యాయులని, తనను ఈస్థానంలో గురువులే నిలిపారని అన్నారు. రాష్ట్రానికి, దేశానికి మరింత పేరు తెస్తానని, ప్రజల ఆశీస్సులు కావాలని ఈ సందర్భంగా ఆమె కోరారు. ఈ కార్యక్రమంలో మంత్రులు ప్రత్తిపాటి పుల్లారావు, నక్కా ఆనంద్ బాబు, పలువురు ప్రజా ప్రతినిధులు, విద్యాశాఖ ఉన్నతాధికారులు పాల్గొన్నారు.



'డీఎస్సీపై త్వరలో నిర్ణయం తీసుకుంటాం' 

Updated By ManamTue, 09/04/2018 - 20:44

Ganta Srinivasa rao, DSC Posts, AP cabinet meetingవిజయవాడ: డీఎస్సీ పరీక్షపై త్వరలో నిర్ణయం తీసుకుంటామని ఏపీ మానవ వనరులశాఖ మంత్రి గంటా శ్రీనివాసరావు చెప్పారు. మంగళవారం ఆయన మీడియాతో మాట్లాడుతూ.. డీఎస్సీ పోస్టులకు సంబంధించి వివరాలను సిద్ధం చేశామన్నారు. ఈనెల 6న జరిగే ఏపీ కేబినెట్ సమావేశంలో డీఎస్సీపై ఓ నిర్ణయానికి వస్తామని పేర్కొన్నారు. ట్రిపుల్‌ ఐటీలకు సంబంధించి సంబంధిత అధికారులు, డైరెక్టర్లతో ప్రత్యేక సమావేశం ఏర్పాటు చేసినట్లు తెలిపారు.

ఇందులో పనిచేస్తున్న ఒప్పంద అధ్యాపకులు, మెంటార్లు, బోధనేతర సిబ్బంది సమ్మె నోటీసు అంశంపై చర్చిస్తామన్నారు. అదేవిధంగా నూజివీడు ట్రిపుల్‌ ఐటీపై వస్తోన్న అనేక విమర్శలపైనా సమీక్షించి నిర్ణయం తీసుకుంటామని మంత్రి గంటా స్పష్టం చేశారు. 



ఏపీ సెట్ ఫలితాలు విడుదల

Updated By ManamSun, 08/19/2018 - 00:55
  • పరీక్షకు 33,320 మంది హాజరు

  • 2,481 మంది అభ్యర్థుల అర్హత.. 7.4 శాతం ఉత్తీర్ణత: మంత్రి గంటా

  • 20న జరగాల్సిన జ్ఞానభేరి వాయిదా.. వాజ్‌పేయి మృతితో మంత్రి నిర్ణయం

ganta srinivashవిశాఖపట్నం: రాష్ట్ర స్థాయి అర్హత పరీక్ష (ఏపీసెట్) ఫలితాలను మానవ వనరుల శాఖ మంత్రి గంటా శ్రీనివాసరావు విడుదల చేశారు. శనివారం విశాఖపట్నంలోని ఏయూ కాన్వకేషన్ హాల్‌లో ఫలితాలను ప్రకటించారు. ఏపీ సెట్‌కు 42,663 మంది దరఖాస్తు చేసుకోగా 33,320 మంది పరీక్షకు హాజరయ్యారని తెలిపారు. 31 సబ్జెక్టుల్లో జరిగిన పరీక్షలో పురుషుల్లో 17,471 మంది హాజరవగా 1553 మంది అర్హత సాధించారన్నారు. అలాగే మహిళల్లో 15,489 మంది హాజరవగా 928 మంది అర్హత సాధించారని తెలిపారు. మొత్తం 2,481 మంది అర్హత పొందారని వెల్లడించారు. 7.4 శాతం ఉత్తీర్ణత సాధించారని తెలిపారు. గతేడాది కన్నా ఈ ఏడాది ఉత్తీర్ణత శాతం పెరిగిందని మంత్రి గంటా వెల్లడించారు. ఏపీ సెట్‌ను ఏయూ వరుసగా మూడో సంవత్సరం సమర్థంగా నిర్వహించిందన్నారు.

జ్ఞానభేరి వాయిదా
ఏయూ ఇంజనీరింగ్ గ్రౌండ్స్‌లో ఈ నెల 20న నిర్వహించాల్సిన జ్ఞానభేరి కార్యక్రమాన్ని వాయిదా వేసినట్టు మంత్రి గంటా శ్రీనివాసరావు వెల్లడించారు. మాజీ ప్రధాని వాజ్‌పేయి మృతి కారణంగా వాయిదా వేసినట్టు తెలిపారు. ఈ కార్యక్రమాన్ని ఈ నెల 27న నిర్వహించాలని భావిస్తున్నామన్నారు. త్వరలోనే ముఖ్యమంత్రి చంద్రబాబుతో చర్చించి తేదీని ఖరారు చేస్తామన్నారు. ఈ కార్యక్రమంలో వీసీ ఆచార్య జి.నాగేశ్వరరావు, రెక్టార్ ఆచార్య కె.గాయిత్రి దేవి, రిజిస్ట్రార్ ఆచార్య కె.నిరంజన్, ఏపీసెట్ మెంబర్ సెక్రటరీ ఆచార్య కె.శ్రీనివాసరావు తదితరులు పాల్గొన్నారు.



మంత్రి గంటా ఇంటి వద్ద ఉద్రిక్తత

Updated By ManamMon, 07/30/2018 - 14:29

ganta విశాఖపట్నం: మధ్యాహ్న భోజన పథకాన్ని ప్రైవేటీకరణ చేయడాన్ని నిరసిస్తూ విశాఖలోని ఏపీ మంత్రి గంటా శ్రీనివాసరావు ఇంటి వద్ద కార్మికులు బైఠాయించారు. ఏళ్లుగా పనిచేస్తున్న వారికి కనీస వేతనం ఇవ్వని ప్రభుత్వం, ఇప్పుడు ప్రైవేట్ సంస్థలకు అప్పగించడం ఎంతవరకు సమంజసం అంటూ కార్మికులు ప్రశ్నిస్తున్నారు. ఈ నేపథ్యంలో గంటా ఇంటి వద్ద ఉద్రిక్త పరిస్థితులు నెలకొనగా.. అక్కడికి చేరుకున్న పోలీసులను కార్మికులను అదుపులోకి తీసుకున్నారు. ఈ క్రమంలో హైవేను దిగ్బంధించేందుకు కార్మికులు ప్రయత్నించగా.. భారీ ట్రాఫిక్ జామ్ నెలకొంది.





Related News