cm kcr

ఫైస్లా హోగయా 

Updated By ManamThu, 09/06/2018 - 03:31

kcrహైదరాబాద్: అసెంబ్లీ రద్దు ఊహాగానాలకు గురువారం పొద్దున తెరపడింది. నాలుగు ఏండ్ల ఐదు నెలల తెరాస ప్రభుత్వాన్ని రద్దు చేయాలని ముఖ్యమంత్రి కేసీఆర్ నిర్ణయిం చుకున్నారు. ఈ మేరకు శరవేగంగా పావులు కదుపుతున్నారు. గురువారం మధ్యహ్నాం ఒంటి గంటలకు ప్రత్యేక మంత్రిమండలి సమావేశం ఏర్పాటు చేశారు. ఈ సమావేశంలో ఏక వాక్యంలో అసెంబ్లీ రద్దుకు తెలంగాణ మంత్రిమండలి  నిర్ణయం అనే తీర్మానం చేయబోతున్నారు. మంత్రివర్గ సమావేశం ముగిసిన వెంటనే గవర్నర్ నరసింహన్‌ను రాజ్ భవన్‌లో మధ్యాహ్నాం 1.30 గంటలకు కలుసుకొని మంత్రివర్గ నిర్ణయాన్ని తెలియచే స్తారు. ఇదే తీర్మానం ప్రతిని శాసనసభ కార్యదర్శికి పంపిస్తారు. స్పీకర్ మధుసూదనాచారి సంతకంతో కూడిన అసెంబ్లీ రద్దు నిర్ణయాన్ని గవర్నర్‌కు అందచేయడం జరుగుతుంది. దీంతో రద్దు ప్రక్రయ పూర్తవుతుంది. ఆ తర్వాత గవర్నర్ నరసింహన్ ముఖ్యమంత్రి కేసీఆర్‌ను అపధర్మ ముఖ్యమంత్రిగా కొనసాగాలని కోరతారు.  శాసనసభను రద్దు చేసి, ముందస్తు ఎన్నికలకు పోవడానికి గల కారణాలను తెలియచేయచేసేందుకు పార్టీ ముఖ్యులతో మధ్యహ్నం  తెలంగాణ భవన్‌లో సమావేశం ఏర్పాటు చేశారు.  అసెంబ్లీ రద్దుకు సంబంధించి ఇప్పటికే  పార్టీ అధిష్టానం నుండి  పలువురు ఎమ్మెల్యేలకు  సంకేతాలు అందాయి. అధికారిక కార్యక్రమాల్లో ఉన్న మంత్రులంతా  బుధవారం రాత్రికే  నగరానికి చేరుకోవాలని ముఖ్యమంత్రి కార్యాలయం సమాచారం పంపింది. 6న అసెంబ్లీ రద్దు, 7న హుస్నాబాద్‌లో బహిరంగ సభ అనే సందేశాలు కరీంనగర్ జిల్లా  పార్టీ ప్రజా ప్రతినిధులకు చేరాయి. రెండు రోజుల పాటు ఫామ్‌హౌజ్‌లో ఉన్న ముఖ్యమంత్రి కేసీఆర్ బుధవారం సాయంత్రం నగరానికి చేరుకున్నారు. ఆ వెంటనే ప్రభుత్వ ప్రధాన కార్యదర్శి డాక్టర్ ఎస్. కె. జోషి, శాసనసభ కార్యదర్శి నర్సింహ్మచార్యులు, సాధారణ పరిపానల శాఖ    ఉన్నతాధికారులతో సమావేశమయ్యారు. మంగళవారం గవర్నర్‌తో చర్చించిన అంశాలను ఈ సందర్భంగా ఎస్.కె. జోషీ ముఖ్యమంత్రికి వివరించారు. 

kcr

శాసనసభ రద్దుకు సంబంధించి తయారు చేసిన ఏక వాఖ్య తీర్మానం, దానికి మంత్రివర్గ ఆమోదం, గవర్నర్‌కు అందచేయడం తదితర అంశాలపైన చర్చించినట్టు తెలిసింది. శాసనసభను రద్దు చేయడంలో ఉత్పన్నం కానున్న రాజ్యాంగపరమైన అంశాలు, శాసనపరమైన సమస్యలు చర్చకు వచ్చినట్టు  తెలిసింది. దీంతో కేబినెట్ భేటీ, తీసుకోనున్న నిర్ణయాలపై ఉత్కంఠ నెలకొంది.  ముఖ్యమంత్రితో భేటీకి ముందే ప్రభుత్వ ప్రధాన కార్యదర్శి ఎస్. కె. జోషి సచివాలయంలో ప్రభుత్వ ముఖ్యకార్యదర్శులు, పోలీసు డైరెక్టర్ జనరల్ మహేందర్ రెడ్డితో పాటు పలువురు సీనియర్ ఐపిఎస్ అధికారులతో చర్చించారు. ఆపధర్మ ప్రభుత్వంలో తీసుకోవలసిన చర్యలు, అనుసరించవలసిన విధానాలు తదితర అంశాలపై ఈ భేటీలో చర్చించినట్లు తెలిసింది. గురువారం నుండి తెలంగాణలో అపధర్మ ప్రభుత్వం అమలులోకి రాబోతున్నందున మంత్రి వర్గం ఆమోదం పొందాల్సిన కీలకమైన ఫైళ్ల పై  చర్చ జరిగినట్లు తెలిసింది.  ముఖ్యమంత్రి కేసీఆర్ బుధవారం సాయంత్రం ప్రగతి భవన్‌లో అధికారులు, అనధికారులు, ఉద్యోగ సంఘాలతో సమావేశమై  వివిధ అంశాలపైన  మెరుపు వేగంతో నిర్ణయాలు తీసుకున్నారు.  మధ్యప్రదేశ్, రాజస్థాన్, ఛత్తీస్‌ఘడ్, మిజోరాం రాష్ట్రాల శాసనసభలకు ఎన్నికలు జరిపించడానికి ఈ నెల 10 తర్వాత నోటిఫికేషన్ వెలువడే  అవకాశం ఉన్నందున ఈ రాష్ట్రాలతో కలిపి తెలంగాణలో ఎన్నికలు జరిపించడానికి వీలుగా గురువారం అసెంబ్లీని రద్దు చేయాలని నిర్ణయించుకున్న ముఖ్య మంత్రి కేసీఆర్  ముందస్తు  రాజకీయ వ్మూహంతో పావులు కదిపారు. అసెంబ్లీ రద్దు, ఎన్నికల ప్రచారం పై పార్టీ ముఖ్యులతో సమాలోచనలు జరిపారు.  ముఖ్యమంత్రి కేసీఆర్ గురువారం ఉదయం మంత్రివర్గాన్ని సమావేశపరిచి అసెంబ్లీ రద్దుపై నిర్ణయం తీసుకున్న వెంటనే గవర్నర్‌ను రాజ్‌భవన్‌లో కలుసుకొని తీర్మానాన్ని అందచేయడం, తీర్మానం ప్రతిని శాసనసభ కార్యదర్శికి పంపించడం,  ఆ వెంటనే తెలంగాణ భవన్‌లో ముఖ్యులతో సమావేశం కావడం జరుగుతుందని పార్టీ వర్గాలు తెలిపాయి. ముఖ్యమంత్రి కేసీఆర్ బుధవారం  ఢిల్లీ పరిణామాలపై కూడా  అధికారు లు, అనధికారులతో సమాలోచనలు జరిపారు. ముందస్తు ఖాయంగా తెలడంతో కేసీఆర్‌కు కలిసొచ్చిన కోట కరీంనగర్  నుంచే ముందస్తు  సభలు నిర్వహించేందుకు నిర్ణయించారని కరీంనగర్‌కు జిల్లా ఎమ్మెల్యే  ఒకరు తెలియచేశారు. శుక్రవారం నాటికి మీరంతా మాజీలవుతారు అని ఐటి మంత్రి కేటీర్ తనను కలుసుకున్న ఎమ్మెల్యేలను ఉద్దేశించి చేసిన  వాఖ్యలు అసెంబ్లీ రద్దుకు సంకేతాలని పేర్కొన్నారు. గురువారం ఉదయం అసెంబ్లీని రద్దు చేసే ఆవకాశం ఉన్నందున పోలీసులు అప్రమత్తమయ్యారు.



అసెంబ్లీ రద్దు వరకే కేసీఆర్‌కు అధికారం

Updated By ManamThu, 09/06/2018 - 00:00
  • ఆ తర్వాత అధికారాలన్నీ రాజ్యాంగ సంస్థలకే..

  • అసెంబ్లీ రద్దు చేస్తే ముందస్తు ఎన్నికలే జరగాలా..?

imageహైదరాబాద్ : ప్రభుత్వం రద్దు చేసే వరకే సీఎం కేసీఆర్‌కు అధికారం ఉంటుందని, ఆ తర్వాత అధికారాలన్నీ రాజ్యాంగ సంస్థల చేతుల్లోకి వెళ్లిపోతాయని బీజేపీ రాష్ట్ర అధ్యక్షుడు డాక్టర్ కె. లక్ష్మణ్ స్ఫష్టం చేశారు. ఆ తర్వాత రాష్ట్రపతి పాలనా? ఆపద్ధర్మ ముఖ్యమంత్రా? వచ్చే ఏడాది ఎన్నికలా? అనేది రాజ్యాంగం ప్రకారం ఉంటుందన్నారు. అసెంబ్లీని రద్దు చేస్తే ముందస్తు ఎన్నికలే జరగాలనే నిబంధన   ఏమీలేదని చెప్పారు. అసెంబ్లీ రద్దు చేశాక అన్ని తాను అనుకున్నట్లే జరుగుతుందని సీఎం భావిస్తున్నట్టున్నారని వ్యాఖ్యానించారు.

అందరి హక్కులు ఒక్కరి చేతుల్లో ఉండవన్న విషయాన్ని సీఎం గుర్తుంచుకోవాలని హితవుపలికారు. ఇందిరాగాంధీ, ఎన్టీఆర్‌లాంటి వాళ్లనే తెలంగాణ ప్రజలు ఓడించిన విషయం గుర్తుంచుకోవాలన్నారు. సినీ నటి సత్యచౌదరి, టీఆర్‌ఎస్‌కు చెందిన పలువురు  బుధవారం హైదరాబాద్‌లో బీజేపీలో చేరారు. ఈ సందర్భంగా లక్ష్మణ్ వారికి కండువా కప్పి పార్టీలోకి ఆహ్వానించారు.

అనంతరం ఆయన విలేకరులతో మాట్లాడారు. టీఆర్‌ఎస్ ఏకపక్ష నిర్ణయాలతో రాష్ట్ర ప్రజలు విసిగిపోయి బీజేపీ వైపు ఆసక్తి కనబరుస్తున్నారని అన్నార ు.



6న రద్దు... 7న శంఖారావం

Updated By ManamWed, 09/05/2018 - 01:18
  • గవర్నర్‌ను కలిసిన సీఎస్, అసెంబ్లీ కార్యదర్శి

  • ఫామ్‌హౌజ్‌లో సీనియర్లతో సీఎం సమాలోచన

  • నేడు మరో సారి మంత్రివర్గ సమావేశం

  • గురువారం పొద్దున్న 6.45 గంటలకు రద్దు ప్రకటన

  • ఏకమయ్యే యత్నాల్లో విపక్షాలు

kcr హైదరాబాద్: శాసనసభ రద్దుకు వడివడిగా అడుగులు పడుతున్నాయి. అధికార యంత్రాంగమంతా రంగంలోకి దిగింది. రద్దు, అనంతర పరణామాల పైన రాజ్యాంగ నిపుణులతో చర్చలు జరుగుతున్నాయి. ప్రభుత్వ ప్రధాన కార్యదర్శి డాక్టర్. ఎస్. కె. జోషి,  ప్రభుత్వ ప్రత్యేక సలహాదారు రాజీవ్‌శర్మ, సీఎంవో ముఖ్య కార్యదర్శి నర్సింగ్‌రావు, శాసనసభ కార్యదర్శి నర్సింహ్మాచార్యులు, అడ్వకేట్ జనరల్ బి.ఎస్. ప్రసాద్ తదితరులు రాజ్‌భవన్‌లో గవర్నర్ నరసింహన్‌తో భేటీ అయ్యారు. శాసనసభ రద్దు తీర్మానానికి సంబంధించిన అంశాలపైన చర్చలు జరిపారు. ముఖ్యమంత్రి కె. చంద్రశేఖర్‌రావు ఎర్రవెల్లిలోని వ్యవసాయ క్షేత్రంలో అధికారులు, సన్నిహితులతో సమాలోచనలు జరుపుతున్నారు. ఇదే సమయంలో రాష్ట్ర ఎన్నికల ప్రధానాధికారి రజత్ కుమార్ సచివాలయంలో ప్రభుత్వ ప్రధాన కార్యదర్శితో భేటీ అయ్యారు. ముందస్తు ఎన్నికలు, ఓటరు నమోదు ప్రత్యేక కార్యాచరణపై చర్చించారు. ముందుగా నిర్ణయించుకున్నట్లుగానే 6వ తేదీన శాసనసభ రద్దు నిర్ణయం వెలువడుతుందని పార్టీ వర్గాలు మరోసారి స్పష్టం చేశాయి. సభ రద్దయిన మరుసటి రోజు 7వ తేదీన హుస్నాబాద్‌లో ప్రజల ఆశీర్వాద సభ ఏర్పాటు చేశారు. ఈ సభకు 65 వేల మంది జనాన్ని సమీకరించాలని లక్ష్యంగా పెట్టుకున్నారు. సెంటిమెంటు ప్రకారం కరీంనగర్ నుండే ముఖ్యమంత్రి ఎన్నికల ప్రచారం ప్రారంభించబోతున్నారని తెరాస వర్గాలు తెలిపాయి. బుధవారం మంత్రివర్గం సమావేశమవుతుందని, గురువారం 6వ తేదీన ఉదయం 6.50 గంటలకు మంత్రివర్గం మరోసారి సమావేశమై శాసనసభ రద్దు నిర్ణయం తీసుకుంటుందని తెలియచేశారు. ఆ వెంటనే గవర్నర్‌ను ముఖ్యమంత్రి కేసీఆర్ రాజ్ భవన్‌లో కలుసుకొని మంత్రివర్గ నిర్ణయాన్ని తెలియ చేస్తారని తెలిపారు. బుధవారం మధ్యాహ్నం 12 గంటలకు ముఖ్యమంత్రి కేసీఆర్ గవర్నర్ నరసింహన్‌ను కలుసుకొంటారు. బుధవారం జరిగే మంత్రివర్గ సమావేశంలో పెండింగ్ అంశాలపైన నిర్ణయాలు ఉంటాయని, గురువారం నాటి సమావేశంలో కేవలం శాసనసభ రద్దు అంశంపై చర్చించి నిర్ణయం తీసుకుంటారని పార్టీ వర్గాలు తెలిపాయి. ముఖ్యమంత్రి ముందస్తుకు సిద్దమైనందున తెలంగాణ అంతటా 50 రోజుల్లో 100 సభలు ఏర్పాటు చేస్తామని టీఆర్‌ఎస్ వర్గాలు పేర్కొన్నారు. మంగళవారం రాజ్‌భవన్‌లో గవర్నర్‌ను కలుసుకున్న అధికారులు సాయంత్రం ముఖ్యమంత్రి కేసీఆర్‌ను ఆయన వ్యవసాయ క్షేత్రంలో కలుసుకున్నారు. శాసనసభ రద్దు తీర్మానం తయారు చేయడంలో రాజ్యాంగపరమైన సమస్యలు ఉత్పన్నం కాని విధంగా చర్యలు తీసుకొనేందుకే ముందస్తుగా గవర్నర్‌ను కలుసుకోవడం, రాజ్‌భవన్ చర్చల వివరాలను ముఖ్యమంత్రికి తెలియచేయడం జరిగిందని అధికార వర్గాలు పేర్కొంటున్నాయి.

తెరాస పాలనలో జరిగిన అభివృద్ది, సంక్షేమ కార్యక్రమాలను వివరించి మరోసారి ప్రజా మద్దతు పొందడానికి హుస్నాబాద్‌లో సభ ఏర్పాటు చేశామని మంత్రి హరీష్‌రావు తెలిపారు. ఈ నెల 2వ తేదీన ప్రగతి నివేదన సభను ఏర్పాటు చేసిన తెరాస నాయకత్వం ప్రజాభిప్రాయం తమకు సానుకూలంగా ఉందనే నమ్మకాన్ని వ్యక్తం చేసింది. సోమవారం రోజంతా మేధోమథనం చేసిన ముఖ్యమంత్రి కేసీఆర్ మంగళవారం వడివడిగా అడుగులు వేశారు. అధికార యంత్రాంగాన్ని రంగంలోకి దించారు. పెండింగ్ ఫైళ్లు, ప్రభుత్వ పరంగా తీసుకోవలసిన నిర్ణయాలపై బుధవారం మంత్రివర్గాన్ని ఏర్పాటు చేశారు. అసెంబ్లీ రద్దు, అనంతర పరణామాలపై తుది నిర్ణయానికి రావడంతో హుస్నాబాద్‌లో బహిరంగ సభ ఏర్పాట కోసం ఆదేశాలు జారీ చేశారు. మంత్రులు హరీష్‌రావు, ఈటెల రాజేందర్ ఈ సభను విజయవంతం చేయడానికి ఆగమేఘాల మీద ఏర్పాట్లు చేస్తున్నారు. శాసనసభను రద్దు చేసిన తర్వాత జరిగే తొలి ఎన్నికల బహిరంగ సభ కావడంతో భారీగా జన సమీకరణకు చర్యలు తీసుకుంటున్నారు. 

ఎన్నికల సమరానికి ఏకమవుతున్న విపక్షాలు
శాసనసభను రద్దు చేసి ముందస్తు ఎన్నికలకు వెళ్లాలని ముఖ్యమంత్రి కేసీఆర్ తీసుకుంటున్న నిర్ణయాలతో రాష్ట్ర రాజకీయాలు ఒక్క సారిగా వేడెక్కాయి. అన్ని రాజకీయ పక్షాలు ఎన్నికలకు సిద్ధమవుతున్నాయి. ప్రతిపక్షాల ఓట్లు చీలకుండా నిర్ణయాలు తీసుకునేందుకు పావులు కదుపుతున్నాయి. భావసారూప్యత గలిగిన రాజకీయ పక్షాలతో ప్రధాన ప్రతిపక్షం కాంగ్రెస్ ఇప్పటికే తొలి విడత చర్చలు ముగించింది. మరో సారి చర్చలు జరపాలని నిర్ణయించింది. కాంగ్రెస్‌తో జత కట్టడానికి తెదేపా కూడా ముందుకొస్తున్నట్లు తెలుస్తోంది. ప్రభుత్వ నిర్ణయం వెలువడిన వెంటనే ఎన్నికల రంగంలోకి దిగేందుకు విపక్షాలు కార్యాచరణ రూపొందించుకుంటున్నాయి. సీట్ల పంపకం, జన సమీకరణ, ప్రచారం విషయంలో విపక్షాల మధ్య స్పష్టత ఉందని కాంగ్రెస్ నాయకులు తెలిపారు. పార్టీలు, వాటి బలాబలాల ఆధారంగా ఎన్నికల్లో కలిసి పని చేయడానికి విపక్షాలన్ని ఒక్కతాటిపైకి వస్తున్నాయని పేర్కొన్నారు.  సభలు, సమావేశాలతో ఇప్పటికే విమర్శలు గుప్పిస్తున్న విపక్షాలు మరింత దూకుడుగా ప్రచారం సాగించబోతున్నాయని కాంగ్రెస్  నాయకత్వం పేర్కొంది.

సభ బాధ్యత హరీశ్‌కు
harishపండితుల సూచన మేరకు రా్రష్ట్రంలోని ఈశాన్య ప్రాంతమైన హుస్నాబాద్‌లో తొలి బహిరంగ సభను ఈ నెల 7వ తేదీన నిర్వహించాలని సీఎం కేసీఆర్ నిర్ణయించినట్లు సమాచారం.  ఈ నేపథ్యంలో ఈ సభ నిర్వహణ బాధ్యతలను మంత్రులు హరీశ్‌రావు, ఈటల రాజేందర్‌లకు అప్పగించారు. దీంతో మంత్రులు సభ ఏర్పాట్లను ముమ్మరం చేశారు.హుస్నాబాద్‌లో సీఎం కేసీఆర్ అధ్యక్షతన జరుగనున్న బహిరంగ సభ పేరు ప్రజల ఆశీర్వాద సభ అని మంత్రి హరీశ్ రావు అన్నారు.  ఈ నెల 7న సీఎం కేసీఆర్ హుస్నాబాద్ పర్యటనపై మంత్రులు హరీశ్ రావు, ఈటల రాజేందర్ సమీక్ష నిర్వహించారు. హుస్నాబాద్ లో బహిరంగసభ ఏర్పాట్లు, సభాస్థలిని మంత్రులు హరీశ్ రావు, ఈటల, ఎంపీ వినోద్, ఎమ్మెల్యే సతీశ్ లతో కలిసి పరిశీలించారు. ఈ సందర్భంగా హరీశ్ రావు మాట్లాడుతూ..50 రోజుల్లో వంద బహిరంగసభలు నిర్వహించనున్నట్లు చెప్పారు. నాలుగేళ్లలో చేసిన అభివృద్ధిని ప్రజలకు తెలియజేయడమే ప్రధాన ఉద్దేశమని ఆయన పునరుద్ఘాటించారు.  సభ నిర్వహణపై స్పందించిన మంత్రి ఈటల.. 50వేల మందితో హుస్నాబాద్‌లో సభ నిర్వహిస్తున్నట్లు తెలిపారు. 50 రోజుల్లో రాష్ట్ర వ్యాప్తంగా 100 బహిరంగ సభలు నిర్వహిస్తామన్నారు.



అలరించిన ‘ప్రగతి నివేదన’

Updated By ManamTue, 09/04/2018 - 02:14

అనుకున్నట్టుగానే కొంగరకలాన్‌లో ముఖ్యమంత్రి కేసీఆర్ నిర్వహించిన ప్రగతి నివేదన సభ విజయవంతమైంది. ఈ నాలుగేళ్ల కాలంలో తన ప్రభుత్వం చేపట్టిన సంక్షేమ పథకాలను సంపూర్ణంగా వివరించారు. ఓటు అడిగే హక్కు మరొకరికిగానీ, మరో పార్టీకిగానీ లేదని, ఆ హక్కు తనకొక్కరికే ఉందని ఆయన అన్నారు. అరవై ఏళ్లలో జరగని అభివృద్ధిని తాము జరిపి చూపించామని ఆయన ఉద్ఘాటించారు. ఏదేమైనా ఈ సభ ద్వారా టీఆర్‌ఎస్ క్యాడర్‌కు నూతన ఉత్సాహాన్ని కలిగించారు. 

kcrఊహించినట్లుగానే కొంగరకలాన్‌లో ముఖ్యమంత్రి కేసీ ఆర్ నిర్వహించిన ప్రగతినివేదన సభ విజయవంతమైంది. వేలాది వాహనాల్లో లక్షలాదిగా ప్రజలు తరలిరావడంతో గులాబీ శ్రేణులు ఆనంద తరంగాల్లో తేలియాడారు. స్వయంగా కేసీఆర్ కూడా సభ విజయవంతం పట్ల సంతృప్తిని, ఆనందాన్ని వ్యక్తంచేశారు. దేశచరిత్రలో ఇలాం టి సభ ఎన్నడూ జరగలేదని హర్షం వెలిబుచ్చారు. నాలు గున్నర సంవత్సరాల తమ పాలనా కాలంలో ప్రజలకు ఏమేమి చేశారో, ఏమి చెయ్యలేదో ముఖ్యమంత్రి కేసీఆర్ ఏకరువు పెట్టారు. దేశచరిత్రలో ఏ పార్టీ చెయ్యనన్ని పనులు, చేపట్టని సంక్షేమ కార్యక్రమాలు టీఆర్‌ఎస్ చేసి చూపించిందని ముఖ్యమంత్రి ప్రకటించారు. మిషన్ భగీ రథ, మిషన్ కాకతీయ, రైతుబంధు, రైతుబీమా, కల్యాణ లక్ష్మి, షాదీముబారక్, ఆసరా పెన్షన్లు తదితర అనేక సంక్షే మ పథకాలను ముఖ్యమంత్రి వల్లెవేశారు. ఇరవై నాలుగు గంటల నాణ్యమైన కరెంటు, ఎస్సీ, ఎస్టీ, బీసీ, మైనారి టీలకు గురుకులాలు, గొర్రెలు, బర్రెలు, కోళ్ళు కుందేళ్ళు వంటి తాము చేపట్టిన సంక్షేమ కార్యక్రమాలను ముఖ్య మంత్రి వివరించారు. కృష్ణా, గోదావరి జలాలను ఇంటిం టికీ అందించే పనులు శరవేగంతో జరుగుతున్నాయని, ముందే చెప్పినట్లు ప్రతి ఇంటికీ నల్లానీళ్ళు ఇవ్వలేకపోతే ఓట్లు అడిగే ప్రసక్తే లేదని ప్రగతి నివేదన సభ సాక్షిగా మరోసారి ప్రకటించారు. తాను ముఖ్యమంత్రిగా ఉండ బట్టే ఉద్యోగ అవకాశాల్లో 95% సాధించగలిగానని, ఈ పని మరొకరి వల్ల కాగలదా.. అని ఆయన ప్రశ్నించారు. ఢిల్లీ పాలకులకు గులాములుగా ఉందామా.. ఆత్మగౌరవం తో బతుకుదామా.? అంటూ తనదైన శైలిలో ప్రజల భావోద్రేకాలను తట్టిలేపారు. అరవై ఏళ్ళలో జరగని అభి వృద్ధి నాలుగేళ్ళలో చేసి చూపించామని, ఓట్లడిగే హక్కు తమకూ, తమపార్టీ టీఆర్‌ఎస్‌కు తప్ప, మరొకరికి గాని, మరో పార్టీకి గాని లేదని కేసీఆర్ తేల్చి చెప్పారు. ప్రతిపనినీ విమర్శించడమే పనిగా పెట్టుకున్న ప్రతిపక్షాల అభిప్రాయం ఎలాగున్నా కొంగరకలాన్ సభ ద్వారా కేసీఆర్, ప్రజలకు తన ప్రోగ్రెస్ వివరించే ప్రయత్నం బలంగా చేశారన్నది నిర్వివాదాంశమే. తనకు ఎందుకు ఓటు అడిగేహక్కున్నదో ఆయన విడమరిచి ప్రజలకు అర్ధమయ్యేరీతిలో వివరించారు.

అయితే చాలామంది ఊహించినట్లుగా ముందస్తు ఎన్నికలకు, అసెంబ్లీ రద్దుకు సంబంధించి ముఖ్యమంత్రి కేసీఆర్ ఎలాంటి స్పష్టమైన ప్రకటనా చేయలేదు. కాకపోతే ముందస్తు ఉంటుందన్న విషయాన్ని నర్మగర్భంగా చెప్ప కనే చెబుతూ, తన సహజ స్వభావానికి భిన్నంగా ఆయన బాగా ఆలోచించి, ఆచితూచి మాట్లాడారు. ఉద్యమ నాయ కుడిగా ఉన్నా, రాజకీయనేతగా ఉన్నా, ముఖ్యమంత్రిగా ఉన్నా ముక్కుసూటిగా, కుండబద్దలు కొట్టడం ఆయన నైజం. కాని కొంగరకలాన్ ప్రగతి నివేదన సభలో ముంద స్తుకు సంబంధించి మాత్రమే కాదు, ఏ విషయంలోనూ ఆయన ఆ రేంజ్‌లో మాట్లాడలేదు. ఎంతగానో ఆచితూచి మాట్లాడారు. కేబినెట్ సమావేశంలో మంత్రివర్గం ఏక గ్రీవంగా తనకు సర్వాధికారాలూ కట్టబెట్టిందని, కనుక రాజకీయ నిర్ణయాలు తరువాత మాట్లాడతానని ఆయన స్పష్టం చేశారు. చెప్పినా చెప్పకపోయినా ముఖ్యమంత్రికి ముందస్తు ఆలోచనే ఉందని రాజకీయ విశ్లేషకులు చాలా బలంగా అంచనా వేస్తున్నారు. క్యాబినెట్ సమావేశం ఏక గ్రీవంగా సర్వనిర్ణయాధికారాన్ని ముఖ్యమంత్రికి వది లేయ డం, ప్రగతి నివేదన సభ ముగియకమునుపే ప్రిన్స్‌పల్ సెక్రెటరీ నుంచి ఐదు, ఆరు తేదీల్లో ఏదో ఒకరోజు మరో క్యాబినెట్ భేటీకి రంగం సిద్ధం కావడం, తమతమ శాఖ లకు సంబంధించి పూర్తి సమాచార నివేదికలతో హాజరు కావాలని మంత్రులకు సమాచారం అందడం దీనికి బలం చేకూరుస్తోంది. మొత్తానికి ఈ నెల ఆరవ తేదీనే అసెంబ్లీ రద్దు కావచ్చని కొందరు మంత్రుల మాటల ద్వారా అర్ధమవుతోంది. కొత్త పథకాల విషయానికి సంబంధించి మీడియాలో వచ్చిన వార్తల్ని ప్రస్తావిస్తూ, పార్టీ ప్రధాన కార్యదర్శి కే.కేశవరావు అధ్యక్షతన రూపుదిద్దుకొనే మ్యాని ఫెస్టోలో ఆ విషయాలు పెడతామని ప్రస్తుతం కొత్త పథ కాల ఆలోచన సరికాదన్నారు. 
యండి.ఉస్మాన్ ఖాన్ 
సీనియర్ జర్నలిస్టు



రణమే..!

Updated By ManamTue, 09/04/2018 - 01:40
  • 6న జరిగే కేబినెట్‌లో కీలక నిర్ణయాలు

  • అనూహ్యంగా ముందడుగేయనున్న అధినేత

  • టికెట్లపైనా జోరందుకుంటున్న ఊహాగానాలు

  • అందరి దృష్టీ ఆయన నిర్ణయంపైనే

  • తెరాస వ్యూహంతో అప్రమత్తమైన విపక్షాలు

  • ప్రభుత్వంపై దాడికి ప్రతిపక్షాల యత్నం

kcrహైదరాబాద్:  ప్రగతి నివేదన సభ విజయవంతం కావడంతో శాసనసభను రద్దు చేసి ముందస్తు ఎన్నికలకు పోవాలని ముఖ్యమంత్రి కె.చంద్ర శేఖర్ రావు నిర్ణయించుకున్నారని విశ్వసనీయ వర్గాలు ధృవీకరించాయి. ఈ నెల 6న మంత్రివర్గాన్ని సమావేశపరిచి ఈ మేరకు కీలక నిర్ణయం తీసుకొనే అవకాశం ఉందని ఆ వర్గాలు వెల్లడించాయి. ఆరోజే అసెంబ్లీ రద్దుకు సిఫార్సు చేసే ఆవకాశం ఉందన్నాయి. ఎన్ని కలకు సమరభేరీ మోగించాం, ఇక జనంలోకి వెళ్లడమే తరువాయి అని అగ్రనేతలు అంటున్నట్లు టీఆర్‌ఎస్ నాయకులంటున్నారు. ప్రగతి నివేదన సభ అనంతర పరిణామాలపైన పార్టీ ముఖ్యులు చర్చించుకున్నారు. ముఖ్యమంత్రి ఆలోచనలు విశ్లేషించుకున్నారు. ముందస్తు ఎన్నికలకు సిద్దం  కావడం ఖాయం అని వ్యాఖ్యానించారు. ప్రజలకు చేరువగా ఉండే వారికే మరో సారి టికెట్లు ఖాయమన్నారు. పలువురు ప్రముఖులకు కూడా ఎన్నికల్లో పోటీ చేసే అవకాశం ఇవ్వకపోవచ్చన్న అనుమానం వ్యక్తం చేశారు. సమర్ధులకే పట్టం కట్టాలి, అనుకూల వాతావరణంలో మార్పు రాకముందే ప్రజల మద్దతు కూడగట్టాలి అని ముఖ్యమంత్రి భావిస్తున్నందున ముందస్తుకు మొగ్గు చూపడం జరిగిందన్నారు. సర్వేలు సానుకూలంగా ఉం డటం. విపక్షాలు బలహీన పడటం. ప్రజలు తెరాస ప్రభుత్వాన్ని కోరుకోవడం లాంటి పరిణామాలు సానుకూల ఫలితాలు రాబట్టడానికి అనుకూల పరిణామాలు అని అన్నారు. తెలంగాణ ప్రభుత్వం చేపట్టిన సంక్షేమ కార్యక్రమాలు, అభివృద్ధి పథకాలు, సుపరి పాలన గురించి తెలిసిన ప్రజలంతా తెరాసను గెలిపించేందుకు ఇప్పటికే సిద్దపడ్డారని తెలియచేశారు. కఠోర శ్రమతో తెచ్చుకున్న తెలంగాణను అన్ని రంగాల్లో అభివృద్ది దిశగా పయనింప చేసే శక్తి ఒక్క తెరాసకే ఉందని భావించిన జనం మరోసారి పార్టీకి పట్టం కట్టేందుకు సిద్దపడ్డారన్నారు. మంత్రులు, ఎమ్మెల్యేలు భవిష్యత్ రాజకీయ పరిణామాలపై ఆసక్తికరమైన చర్చకు తెరలేపారు. ఎక్కడ ఇద్దరు ముగ్గురు కలుసుకున్నా ముందస్తు ఎన్నికల గురించే మాట్లాడుకుంటున్నారు. తిరిగి ఎవరికి టికెట్లు వస్తాయి, ఎవరికి రావు అనే విషయాలపై కూడా విళ్లేషణాత్మకమైన చర్చ జరుగుతుంది.  మంత్రివర్గంలోని ఒకరిద్దరికి  మరోసారి పోటీ చేసే అవకాశం ఉండకపోవచ్చని భావిస్తున్నారు. కొందరు యువ ఎమ్మెల్యేల పనితీరుపై కూడా ముఖ్యమంత్రి అసంతృప్తితో ఉన్నందుకు ఆయాస్థానాల్లో కొత్తవారిని బరిలోకి దించొచ్చని సమాచారం. 

kcr

కొందరు సీనియర్లను పార్లమెంటుకు పంపించే ఆలోచన ఉందనే గుసగుసలూ వినబడుతున్నాయి.  పార్టీ దృష్టం తా అసెంబ్లీని రద్దు చేసి ముందస్తు ఎన్నికలకు పోవడం పైనే ఉంది అని సీనియర్ మంత్రి ఒకరు వ్యాఖ్యానించడంతో ముందస్తు ప్రచారానికి బలం చేకూరినట్లయింది. త్వరలో జరగనున్న మంత్రివర్గ సమావేశంలో పలు కీలక నిర్ణయాలు ఉంటాయని, ఈ సమావేశంలోనే అసెంబ్లీ రద్దు సిఫార్సు నిర్ణయం జరిగే అవకాశం లేకపోలే దన్నారు. దాదాపు 27 మంది ఇతర పార్టీల ఎమ్మెల్యేలు, నాయకులు టికెట్‌ను ఆశించి తెరాసలో చేరారు. వారికి టికెట్లు ఇవ్వవలసి ఉం టుంది. గత ఎన్నికల్లో తెలంగాణ సెంటిమెం ట్‌లో పోటీచేసి 63 స్ధానాల్లో గెలిచాం, ఇప్పుడు 100 శాసనసభ స్ధానాలు కైవసం చేసుకోవాలని ముఖ్యమంత్రి వ్యూహ రచన చేశారు, దీంతో సమర్ధులు, గెలుపు గుర్రాలకే టికెట్లు ఇస్తారనే ప్రచారం జరుగుతుంది అని పార్టీ ముఖ్యులు తెలిపారు. కాంగ్రెస్, తెదేపా మధ్యన సీట్ల సర్దుబాటు జరుగుతుందనే ప్రచారం జరుగు తుంది, భాజపాతో ఎలాంటి పొత్తు ఉండబోదని ముఖ్యమంత్రి కేసీఆర్ ఇప్పటికే సంకేతాలిచ్చారు. కాంగ్రెస్ పార్టీతో మరి కొన్ని భావసారూప్యత గల పార్టీలు జత కట్టే అవకాశం లేకపోలేదు, ఈ పరిస్థితిలో తెరాస ఒంటరిగానే పోటీ చేయడం జరుగుతుంది అని తెలిపారు. తెరాస టికెట్లు రానివారు గోడ దూకడం ఖాయమని పార్టీ భావిస్తుంది. అలాంటి వారి కారణంగా పార్టీ నష్టపోని విధంగా చర్యలకు ఉపక్రమించేందుకు ముందస్తు కసరత్తు జరుపుతుంది అని సీనియర్లు తెలిపారు. హైదరాబాద్, రంగారెడ్డి జిల్లాల పరిధిలోనే అత్యధికంగా ఈ సమస్య ఉందన్నారు. టికెట్లు రావని భావిస్తున్నవారు ఇప్పటికే నిద్రలేని రాత్రులు గడుపుతున్నారని పేర్కొన్నారు. పార్టీ పిరాయింపులు సహజం అని వ్యాఖ్యనించారు. తెరాస వ్యూహంతో కాంగ్రెస్, భాజపాలు  అప్రమత్తమైయ్యాయి.  కేంద్ర పార్టీతో చర్చించాయి. ఎన్నికల వ్యూహరచనలో నిమగ్నమయ్యాయి. తెరాస వైఫల్యాలను ఎండగట్టేందుకు సిద్దపడ్డాయి. సెంటిమెంటుతో గెలిచిన తెరాస పాలనలో అభివృద్ది శూన్యమనే ప్రచారానికి తెరలేపాయి. ప్రజల మద్దతు కూడగట్టేందుకు రాయకీయ కార్యాచరణ రూపొందించుకుంటున్నాయి. 



మమ్మల్నే కోరుకుంటున్నారు

Updated By ManamSun, 09/02/2018 - 23:55
  • త్వరలోనే ప్రజల ముందుకు ఎన్నికల మేనిఫెస్టో

  • ప్రభుత్వం ఉన్నంత కాలం ‘సంక్షేమం’ అమలు

  • కేసీఆర్‌ను గద్దె దించడం కూడా ఒక లక్ష్యమా

  • ప్రగతి నివేదన సభలో ముఖ్యమంత్రి కేసీఆర్

kcrహైదరాబాద్: ‘తెలంగాణ ప్రజలు మరోసారి మమ్మల్నే కోరుకుంటున్నారు. తెరాసనే గెలిపిస్తామంటున్నారు. రాష్ట్రంలో ఏ ఊళ్లో అయినా ఇదే మాట వినబడుతుంది. ప్రజల సంక్షేమం అభివృద్ధి కోసం ఏలాంటి నిర్ణయాలైన తెరాస ప్రభుత్వం తీసుకుంటుందనే నమ్మకం ఏర్పడింది. అందుకే మా గెలుపును ఆకాంక్షిస్తున్నారు’ అని ముఖ్యమంత్రి కె. చంద్రశేఖర రావు అన్నారు. ఆదివారం కొంగరకలాన్‌లో టీఆర్‌ఎస్ ఆధ్వర్యంలో ఏర్పాటు చేసిన ప్రగతి నివేదన సభలో ఆయన ప్రసంగించారు. ఒకరి చేతిలో మనం బానిసలు కావొద్దు, నిర్ణయాధికారం మనమే ఉంచుకోవాలని ప్రజలకు చెబుతూ, చంచాగిరి చేసే గులాములం కారాదని ప్రజలు కూడా కోరుతున్నా రని ఆయన తెలిపారు. తెలంగాణ గులాబీలుగా ఆత్మ గౌరవంతో స్వపరిపాలన సాగాలని కోరుకుం టున్నారు, త్వరలోనే ప్రజల ముందుకు ఎన్నికల మేనిఫెస్టో రాబోతుంది. ఎన్నికల తర్వాత మేనిఫెస్టోలోని అన్ని అంశాలను అమలు చేసి తీరుతాము అని సీఎం తెలిపారు. అధికా రం మన దగ్గర ఉంటేనే ఆత్మగౌరవంతో బతుకుతాం...

మీ కళ్లముందుంది... చేసిన వాగ్ధానాలు, ఇచ్చిన హామీలు అమలు జరిపిన తర్వాతనే మరో సారి ప్రజా మద్దతు కోరుతాను...  ఢిల్లీకి గులాంగా ఉందామనే పార్టీలను నమ్మకండి,  పోరాడి సాధించుకున్న రాష్ట్రాన్ని ఆత్మగౌరవంతో  పాలించుకునే ఆలోచన చేయండి... ప్రగతి నిరోధక శక్తులు ఎప్పుడూ ఉంటాయి,  వాటికి మోసపోకండని తెరాస అధినేత, ముఖ్యమంత్రి కె. చంద్రశేఖర్ రావు తెలంగాణ సమాజానికి పిలుపునిచ్చారు. అధికారం మన దగ్గర ఉంటేనే అత్మగౌరవంతో బతుకుతామని అన్నారు. గత నాలుగున్నర సంవత్సరాల ప్రగతిని అవిష్కరించారు. కోటి ఎకరాలకు సాగునీరందించి ఆకుపచ్చ తెలంగాణను చూడాలనేదే తన ఆకాంక్ష అన్నారు. మిషన్ భగీరథ ద్వారా ఇంటింటికి నల్లా నీళ్లించిన తర్వాతనే ఓట్లడుగుతామనే వాగ్ధానానికి కట్టుబడి ఉన్నామని తెలియచేశారు. ఇప్పటికే 22 వేల గ్రామాలకు నల్లా నీళ్లు అందాయని మరో 1300ల గ్రామాలకు ఏడెనిమిది రోజుల్లో అందించడం జరుగుతుందన్నారు. ఇంటింటికి నల్లా కార్యక్రమం 46 శాతం పూర్తయిందన్నారు.  ఓట్లు అడగడానికి ముందే, దీపావళిలోపే ఇంటింటికి కృష్ణా, గోదావరి నీళ్లు వస్తాయన్నారు. రెండవ విడత రైతు బంధు చెక్కులను నవంబనర్‌లో అందచేస్తామన్నారు.  అన్ని వర్గాల సంక్షేమ, అన్ని రంగాల్లో ఆశించిన ప్రగతి సాధించేంత వరకు నిరంతర శ్రమ కొనసాగుతుందన్నారు. ఇప్పటికే 465 రకాల సంక్షేమ పథకాలు అమలవుతున్నాయని వివరించారు. 

kcrప్రభుత్వం సాధించిన ప్రగతి కళ్లముందు కనిపిస్తుందన్నారు.  తాను తెలంగాణ పిచ్చోడిని కాబట్టే ఇన్ని పథకాలు అమలవుతున్నాయని తెలిపారు.  తెరాస ప్రభుత్వం ఉన్నంత కాలం రైతు బంధు పథకం అమలవుతుందన్నారు. ఎన్నికలకు సంబంధించి సరైన సమయంలో  రాజకీయ నిర్ణయాలు తీసుకుంటామన్నారు. తిరిగి కేసీఆర్ రావాలి, తెరాస రావాలి అని ప్రజలు కోరుకుంటున్నారని తెలిపారు. అద్బుతమైన తెలంగాణ కావాలి, సంక్షేమం పెరగాలి, పెరిగిన ఆదాయం పేదలకు పంచుకుందాం, పింఛన్లు పెంచుకుందాం, నిరుద్యోగులను ఆదుకుందాం అని అన్నారు. భవిష్యత్ కార్యక్రమాలకు సంబంధించి  తెరాస ప్రధాన కార్యదర్శి   కేశవరావు అధ్యక్షతన మ్యానిఫెస్టో  కమిటీని ఏర్పాటు చేయబోతున్నామని వెల్లడించారు. ఎవరు అడ్డుకున్నా అభివృద్ధి ఆగదని, ప్రజలు ఆశీర్వదిస్తే అశించిన ప్రగతిని సాధించి తీరుతామన్నారు. తెలంగాణలో ఆశించిన అభివవృద్దిని సాధించడానికి తనకు మరోసారి అవకాశం ఇవ్వాలని కోరారు. తెలంగాణ ప్రజానీకం తనను ఆశీర్వదించాలని విన్నవించుకున్నారు. జోనల్ వ్యవస్ధను ప్రధానమంత్రి నరేంద్రమోదీ వద్ద పట్టుబట్టి సాధించుకున్నామని గుర్తు చేశారు. కేసీఆర్ లేకపోతే ఇది సాధించుకోవడం సాధ్యమయ్యేదా అని ప్రశ్నించారు. ముందస్తు ఎన్నికలపై మీడియా కథనాలను ముఖ్యమంత్రి ఈ సందర్భంగా  ప్రస్తావించారు. ఎన్నికలకు మరో ఆరు మాసాల సమయం ఉందని, సరైన సమయంలో నిర్ణయాలు ఉంటాయన్నారు.  
ముఖ్యమంత్రి హోదాలో కొత్త పథకాలు ప్రకటించడం అనైతికం అవుతుందన్నారు. తెలంగాణ ప్రజల ఆశలు, ఆకాంక్షలు నెరవేర్చే విధంగా ఇప్పటికే అనేక పథకాలు అమలు జరుపుతున్నామన్నారు. సాగునీటి విషయంలో ఎంతో పురోగతిని సాధించామన్నారు. విద్యుత్ సమస్యలను అధిగమించామన్నారు. కోటి ఎరకాల్లో ఆకుపచ్చ తెలంగాణను  చూపిస్తానన్నారు. కాంగ్రెస్ నాయకుల అవినీతి వల్ల తెలంగాణ ఎంతగా నష్టపోయిందో ప్రజలకు తెలియంది కాదన్నారు. రాజకీయ అవితీని నిర్మూలించి అన్ని రంగాల్లో అశించిన ఫలితాలను రాబడుతున్నామన్నారు. కేసీఆర్‌ను గద్దె దింపడం ఒక లక్ష్యమా అని విపక్షాలను ప్రశ్నించారు. అలవికాని విపక్షాల మాటలు విని మోసపోవద్దని ప్రజలను కోరారు. ఢిల్లీ చక్రవర్తులకు సామంతులం కారాదని, ఆత్మగౌరవంతో తెలంగాణలో పాలన సాగవలసి ఉందన్నారు. స్వతంత్ర జీవనం గడపడానికి గులాబీలుగా వికసించవలసి ఉందన్నారు. పేదరిక నిర్మూలన, నిరుద్యోగ సమస్య పరిష్కారం, ఆకుపచ్చ తెలంగాణ సాధించడంతో పాటుగా ఉద్యోగాల్లో 95 శాతం స్థానికులకు లభించే విధంగా జోనల్ వ్యవస్ధను సాధించుకున్నామని వివరించారు. తెలంగాణ స్వరాష్ట్రంగా ప్రజలు ఆలోచించాలన్నారు. సంక్షేమం, అభివృద్ధి కేసీఆర్ లక్ష్యం అని తెలియచేశారు.  రాష్ట్ర ఆర్థిక ప్రగతి 17.17 శాతానికి పెరిగిందన్నారు. ఆర్థిక పురోగతిని రాష్ట్రాభివృద్ది, పేదల సంక్షేమానికి ఖర్చు చేస్తామన్నారు. అన్ని వర్గాల ప్రయోజనాలు కాపాడుతామన్నారు.  పదేళ్ల కాంగ్రెస్ పాలనలో ఇసుకపై  రూ. 9.60కోట్లు రాగా తెరాస నాలుగున్నరేళ్ల పాలనలో రూ. 1980 కోట్ల ఆదాయం వచ్చిందన్నారు. తెలంగాణ సాధన కోసం సాగిన ఉద్యమం గురించి ఈ సందర్భంగ వివరించారు. ఉద్యమించి సాధించుకున్న తెలంగాణను అన్ని రంగాల్లో అభివృద్ది చేసుకోవలసిన అవసరం ఉందన్నారు. ఆత్మగౌరవంతో స్వీయపాలనతోనే అది సాధ్యమన్నారు. అందుకే మరో సారి పరిపాలనకు అవకాశం ఇవ్వండని కోరుతున్నామని కేసీఆర్ పేర్కొన్నారు.

విశేషాలు...
600 ఎకరాల్లో సభా ప్రాంగణం
వేదిక ముందు 16 గ్యాలరీలు
50 భారీ ఎల్‌ఈడీ తెరలు
15వేల ఎల్‌ఈడీ లైట్లు
24 ట్యాంకర్లు, 8 ట్రిప్పుల్లో నీటి సరఫరా
25 లక్షల మంచినీళ్ల బాటిళ్లు,  25లక్షల ప్యాకెట్లు
30 అంబులెన్స్‌లు, 8 మెడికల్ క్యాంపులు
1400 ఎకరాల్లో 9 పార్కింగ్ స్థలాలు
15 పార్కింగ్ లాట్లు
400 మంది వలంటీర్ల సేవలు
20 వేల మంది పోలీసుల మోహరింపు
డీజేపీ నేతృత్వంలో కంట్రోల్ కమాండ్
డ్రోన్ కెమెరాలతో పరిశీలన
300 సీసీ కెమెరాలతో నిఘా
ఆయుధాలతో ఆక్టోపస్ పహారా
సెల్ఫీలతో సందడి చేసిన కవిత

సభ సాగిందిలా.. సాయంత్రం
4.15: రెండు హెలికాప్టర్లలో ప్రగతి నివేదన సభాస్థలికి మంత్రలు చేరుకున్నారు.
5.45: బేగంపేట విమానశ్రయం నుంచి సీఎం కేసీఆర్ సభకు బయల్దేరారు. 
6.10: ప్రత్యేక హెలికాప్టర్‌లో సీఎం కొంగరకలాన్ చేరుకున్నారు. 
6.15: హెలీకాప్టర్ నుంచి సభా ప్రాంగణాన్ని కేసీఆర్ పరిశీలించారు.
6.25 : సీఎం కేసీఆర్ సభ వేదికపైకి వచ్చారు. సీఎంతో టీఎస్ ఎండీసీ కార్పొరేషన్ చైర్మన్ శేరి సుభాష్‌రెడ్డి ఉన్నారు.
6.26: తెలంగాణ అమరవీరుల స్థూపానికి, తెలంగాణ తల్లికి పూలమాల వేసి నివాళులర్పించారు.
6.27: రాష్ట్ర ఉపముఖ్యమంత్రి మహ్మద్ అలీ.. సీఎం కేసీఆర్‌కు దట్టీ కట్టారు.
6.30: రవాణశాఖ మంత్రి పట్నం మహేందర్‌రెడ్డి స్వాగతోపన్యాసం చేశారు. ఆ తర్వాత టీఆర్‌ఎస్ జనరల్ సెక్రటరీ, ఎంపీ కేశవరావు, మంత్రులు కడియం శ్రీహరి, మహ్మద్ అలీ ప్రసంగించారు.
6.40: జై భారత్ అని ప్రసంగాన్ని ప్రారంభించిన సీఎం కేసీఆర్
7.27: ముగిసిన సీఎం కేసీఆర్ ప్రసంగం
7.28: సభా వేదిక నుంచి వెనుదిరిగిన గులాబీ బాస్
7.30: ఎమ్మెల్యే మంచిరెడ్డి కిషన్‌రెడ్డి ధన్యవాద ప్రసంగం చేశారు.
ప్రజలకు అభివాదం చేస్తూ బస్సులో ప్రగతిభవన్‌కు చేరుకున్న సీఎం

కళాకారుల ధూంధాం..
ప్రగతి నివేదన సభా ప్రాంగణం కళాకారుల ఆటపాటలతో మార్మోగింది. వేదిక మీద టీఆర్‌ఎస్ ప్రభుత్వ సంక్షేమ పథకాలను ఎమ్మెల్యే రసమయి బాలకిషన్ నేతత్వంలోని సాంస్కృతిక సారథి బృందం పాటల రూపంలో వివరించింది. ఇప్పటి వరకు ప్రభు త్వం అమలు చేసిన అభివృద్ధి, సంక్షేమ పథకాలను ప్రజలకు విడ మరిచి చెప్పారు. గాయని మంగ్లీ తన ఆటపాటలతో అలరించింది.



త్వరలోనే నిర్ణయాలను ప్రకటిస్తాం: కేసీఆర్

Updated By ManamSun, 09/02/2018 - 19:52

TRS, Pragathi Nivedana Sabha, CM KCR, political decisionsరంగారెడ్డి: రాజకీయమైన నిర్ణయాలను త్వరలోనే ప్రకటిస్తామని కేసీఆర్ స్పష్టం చేశారు. శాసనసభ రద్దుపై మీడియాలో చాలా వార్తలు రాశారని విమర్శించారు. భవిష్యత్తులో నిర్ణయం తీసుకున్న రోజు అందరికి చెబుతానని స్పష్టం చేశారు.  సభలో కేసీఆర్ కొత్త పథకాలు ప్రకటిస్తాడని కూడా ప్రచారం చేశారని కేసీఆర్ అన్నారు. కొంగరకలాన్‌లో ఏర్పాటు చేసిన ప్రగతి నివేదన సభలో కేసీఆర్ ప్రసంగిస్తూ.. ప్రజలకు ఏది మంచిదైతే ఆ నిర్ణయం తీసుకోమని కేబినెట్ అభిప్రాయపడిందన్నారు. ఆ బాధ్యతే తనకు పూర్తిగా అప్పజెప్పిందన్నారు. రాబోయే రోజుల్లో ఆ నిర్ణయమేదో మీరే చూస్తారని తెలిపారు. త్వరలోనే ఎన్నికల మేనిఫెస్టోలో అన్ని అంశాలు వెల్లడిస్తామన్నారు. కేంద్రంతో మాట్లాడి కొత్త జోనల్ వ్యవస్థను ఆమోదింపజేశామని కేసీఆర్ స్పష్టం చేశారు.

ఢిల్లీకి మనం బానిసలు కావొద్దు..
కొత్త జోన్లపై ప్రధాని నరేంద్ర మోదీ తాత్సారం చేస్తుంటే పట్టుదలతో సాధించామని తెలిపారు. కొంతమంది కేసీఆర్‌ను గద్దె దించడమే లక్ష్యమని చెబుతున్నారని కేసీఆర్ చురకలంటించారు. కొన్ని పార్టీలు ఢిల్లీ చక్రవర్తులకు సామంతులుగా ఉందామని చెబుతున్నారని మండిపడ్డారు. నిర్ణయాలు తీసుకునే అధికారం తెలంగాణలో ఉండాలా? ఢిల్లీ ఉండాలా? అని ప్రశ్నించారు. ఢిల్లీకి మనం బానిసలు కావొద్దన్నారు. ప్రగతి నిరోధక శక్తులు ఎప్పుడూ ఉంటాయని, స్వప్రయోజనాలు కోసం కొన్ని అవాకులు చవాకులు వాగుతున్నాయని విమర్శించారు. మనం మోసపోతే గోసపోతామన్నారు. కొన్ని పార్టీలు ఢిల్లీకి బానిసలుగా ఉండాలనుకుంటున్నాయని ధ్వజమెత్తారు. ఢిల్లీకి చెంచాగిరి చేసే గులాములుగా ఉందామా? తెలంగాణ గులాబీలుగా ఉండాలా అనేది ఆలోచించుకోవాలన్నారు. 

దేశంలోనే తెలంగాణ నెంబర్‌వన్..
ఆర్థికంగా తెలంగాణ దూసుకెళ్లోతోందని, 17.17 శాతం ఆర్థికవృద్ధితో తెలంగాణ దేశంలోనే నెంబర్‌వన్‌గా ఉందని కేసీఆర్ స్పష్టం చేశారు. రాజకీయంగా తెలంగాణకు, టీఆర్ఎస్‌కు.. ఏది మంచిదో ఆ నిర్ణయం తీసుకుంటామన్నారు. ప్రజల దీవెనలతో జలదృశ్యంలో పార్టీ ఏర్పాటు చేశామని తెలిపారు. ఎన్ని ఎదురు దెబ్బలు తగిలినా తెలంగాణ వచ్చేవరకు మడమతిప్పలేదన్నారు. ఆరు నెలల వరకు అధికారులే లేని పరిస్థితి ఎదురైందని కేసీఆర్ చెప్పారు. తెలంగాణ వస్తే చీకట్లే అన్నారని, కానీ, ఆ స్థితి నుంచి 24 గంటల ఉచిత కరెంట్ ఇచ్చే స్థితికి చేరుకున్నామని గుర్తు చేశారు. ఆ నాటి సమైక్య పాలకులు గీత కార్మికుల పొట్టగొట్టారని ఆవేదన వ్యక్తం చేశారు. టీఆర్ఎస్ ప్రభుత్వం వచ్చాక గీత కార్మికులకు భరోసా ఇచ్చామని తెలిపారు.

కోటీ ఎకరాలకు నీళ్లు ఇస్తామన్న హామీకి కట్టుబడి ఉన్నా..
ఈ నాలుగేళ్ల పాలనలో 465 కార్యక్రమాలు చేపట్టామని కేసీఆర్ నొక్కివక్కాణించారు. తండాలను గ్రామపంచాయతీలుగా మార్చామన్నారు. కోటీ ఎకరాలకు నీళ్లు ఇస్తామన్న హామీకి కట్టుబడి ఉన్నానని స్పష్టం చేశారు. భూ రికార్డులు ప్రక్షాళన చేసి పాసుబుక్కులు ఇచ్చామని గుర్తు చేశారు. రైతుబంధం పథకం కింద రైతులకు డబ్బులిచ్చామన్నారు. వచ్చే ఎన్నికల లోపు నీళ్లివ్వకపోతే ఓట్లు అడగనని చెప్పానని, ఇప్పటికే 22వేల గ్రామాలకు నీళ్లు అందుతున్నాయని తెలిపారు. ఎన్నికల కన్నా ముందే ఇంటింటికి నీరు అందిస్తామని స్పష్టం చేశారు. పాలమూరు జిల్లాలో కొత్తగా 9 లక్షల ఎకరాల ఆయకట్టు తెచ్చామన్నారు. 



ప్రపంచమే నివ్వెరపోయేలా సభ: కేసీఆర్

Updated By ManamSun, 09/02/2018 - 18:56

KCR, CM KCR, Prgathi nivedhana sabha, TRS party leadersరంగారెడ్డి: కొంగరకలాన్ ప్రగతి నివేదనలో సభలో సీఎం కేసీఆర్ ప్రసంగాన్ని ప్రారంభించారు. ప్రపంచమే నివ్వెరపోయేలా ప్రగతి నివేదన సభకు జనం విచ్చేశారని ఆయన హర్షం వ్యక్తం చేశారు. ఇది జనమా? ప్రభంజనమా? అని కేసీఆర్ అన్నారు. 18ఏళ్ల నాటి జ్ఞాపకాల దొంతరలు తన కళ్ల ముందు ఇంకా తిరుగుతున్నాయని చెప్పారు. సమైక్య రాష్ట్రంలో తమ కష్టాలు తీరవని ఉద్యమం చేపట్టామని అన్నారు. ఆనాటి ప్రభుత్వం అధికార మదంతో కళ్లు ముసుకుందని విమర్శించారు. ధర్మం, న్యాయం ఉంటే తెలంగాణ ఏర్పడుతుందనే నమ్మకంతో ఉద్యమం చేపట్టినట్టు తెలిపారు.

కరెంట్ ఛార్జీలు పెంచినప్పుడే తెలంగాణ ఉద్యమం..
2000 సంవత్సరంలో కరెంట్ ఛార్జీలు పెంచినప్పుడు వ్యతిరేకించానని, అప్పటి సీఎంకు తాను బహిరంగ లేఖ రాసినట్టు కేసీఆర్ ఈ సందర్భంగా గుర్తు చేశారు. కానీ, తన మాటలు అప్పటి ముఖ్యమంత్రి పట్టించుకోలేదని వాపోయారు. కరెంట్ ఛార్జీలు పెంచినప్పటి నుంచే తెలంగాణ ఉద్యమం మొదలైందని అన్నారు. ఎన్నో రాజకీయాలు, ఉప ఎన్నికలు, ఇలా ఓ ఉప్పెన సృష్టించామన్నారు. తొలుత హామీలిచ్చిన ఢిల్లీ పెద్దలు, మళ్లీ ఉద్యమాన్ని అణిచివేశారని ఆవేదన వ్యక్తం చేశారు. 

అప్పటి ప్రభుత్వం అవమానించినా..
ఢిల్లీ పెద్దలు అహంకారంతో ఉద్యమాన్ని కాలరాసే కుట్రలు చేశారని చెప్పారు. తెలంగాణలోని నాటి ప్రభుత్వం తమను అవమానించారని తెలిపారు. కేంద్రంలో మంత్రిగా ఉన్న సమయంలో ఎన్నో పార్టీ నేతలను కలిశానని, ఓ కమ్యూనిస్టును ఒప్పించేందుకు కొన్నేళ్లు ఆయన చుట్టూ తిరిగానని గుర్తు చేశారు. తెలంగాణ ఉద్యమంలో 36 పార్టీలు మద్దతు కూడగట్టానని తెలిపారు. కొత్త రాష్ట్రం ఏర్పడ్డాక ఎన్నో కష్టాలు, మరెన్నో విపత్కర పరిస్థితులు ఎదురయ్యాయని, ఏది అత్యవసరమో గుండెలోతుల్లోంచి ఆలోచించి ప్రారంభించనట్టు కేసీఆర్ స్పష్టం చేశారు. తక్షణమే చెరువులు బాగు చేయాలని సంకల్పించామన్నారు.

జయశంకర్ మథనం నుంచి పుట్టిందే మిషన్ కాకతీయ..
ప్రొఫెసర్ జయశంకర్ మథనం నుంచి పుట్టిందే మిషన్ కాకతీయని కేసీఆర్ అన్నారు. 24 గంటల విద్యుత్‌తో తెలంగాణ వెలుగుజిలుగులు చిమ్ముతోందని చెప్పారు. రాబోయే రోజుల్లో మిగులు విద్యుత్ రాష్ట్రంగా తీర్చిదిద్దుతామన్నారు. నేతన్నల ఆత్మహత్యలు ఆపడానికి జోలెపట్టి భిక్షాటన చేశామని గుర్తు చేశారు. కల్లుగీత కార్మికులకు రాయితీలు పెంచామని, 70 లక్షల గొర్రెలు పంపిణీ చేశామని, వాటికి 30 లక్షల పిల్లలు పుట్టాయన్నారు. కోటి గొర్రెలతో గొల్లకుర్మలకు రూ.1,500 కోట్ల ఆదాయం వస్తోందని కేసీఆర్ చెప్పారు.  

కేజీ టూ పీజీ పథకాన్ని అమలు చేస్తాం..
నాయీబ్రాహ్మణులకు చౌకగా విద్యుత్ సరఫరా చేశామని, గిరిజనలు, దళితుల బాధల నుంచి పుట్టిన ఆలోచనే ‘కల్యాణ లక్ష్మి’ అన్నారు. ఎన్నికల మేనిఫెస్టోలో పేర్కొన్న వాటికి అదనంగా 76 సంక్షేమ పథకాలు ప్రవేశపెట్టినట్టు తెలిపారు. టీఆర్ఎస్ ప్రభుత్వం చేసిన అభివృద్ధి ప్రజల కళ్లముందుందన్నారు. రాబోయే రోజుల్లో కేజీ టూ పీజీ పథకాన్ని అమలు చేస్తామని స్పష్టం చేశారు. రాబోయే రెండేళ్లలో కోటి ఎకరాలకు సాగునీరందించి చూపిస్తామన్నారు. 

టీఆర్ఎస్ ఉన్నంత కాలం రైతు బంధు పథకం..
అప్పుల్లో ఉన్న రైతులను ఆదుకోవడానికి ‘రైతు బంధు పథకం’గా పేర్కొన్నారు. రూ.5,500 కోట్లు అందించి రైతుల్ని ఆదుకున్నామని గుర్తు చేశారు. నవంబర్‌లో రెండో విడత రైతు బంధుపథకం కింద సాయం చేశామన్నారు. టీఆర్ఎస్ ఉన్నంత కాలం రైతు బంధు పథకం కొనసాగుతోందని తెలిపారు. రైతు బీమా పథకంతో ఇప్పటివరకూ 365 మంది రైతులకు రూ.5 లక్షల చొప్పున పరిహారం అందించామన్నారు. తెలంగాణలో 22వేల గ్రామాలకు శుద్ధిచేసిన తాగునీరు అందించామని, ఇంకా మిగిలింది కేవలం 1300 గ్రామాలే ఉన్నాయన్నారు. 

పాలమూరు జిల్లాలో 9 లక్షల ఎకరాలకు నీరు అందించినట్టు తెలిపారు. పాలమూరులో వలసలు ఆగిపోయాయని సీఎం గుర్తు చేశారు. 17.1 శాతం వృద్ధితో ఆర్థికంగా ముందుకు దూసుకెళ్తోందని, నాలుగున్నరేళ్లలో ఇసుక మీద రూ.1,980 కోట్ల ఆదాయం ఉందని చెప్పారు. భవిష్యుత్తులో రాష్ట్ర ఆదాయం పెంచుతామన్నారు. వచ్చిన ఆదాయాన్ని పేదలకు పంచుతామని తెలిపారు. అన్ని వర్గాలు బాగుంటేనే రాష్ట్ర అభివృద్ధి బాగుంటుందని స్పష్టం చేశారు. తెలంగాణలో మైనార్టీ సంక్షేమానికి 2వేల కోట్ల బడ్జెట్ కేటాయించినట్టు కేసీఆర్ పునరద్ఘాటించారు. 



కొంగరకలాన్ చేరుకున్న కేసీఆర్

Updated By ManamSun, 09/02/2018 - 17:45

CM Kcr, Kangarakalan meeting, Pragathi Bhavan, Begumpet Airportకొంగరకలాన్: ప్రగతిభవన్ నుంచి బేగంపేట‌ విమానాశ్రయానికి బయల్దేరిన సీఎం కేసీఆర్.. అక్కడి నుంచి ప్రత్యేక హెలికాప్టర్‌లో కొంగరకలాన్‌కు సాయంత్రం 6.15 గంటలకు చేరుకున్నారు. ప్రగతి నివేదన సభావేదికపైకి ఆయన చేరుకున్నారు. టీఆర్ఎస్ పార్టీ ఎంతో ప్రతిష్ఠాత్మకంగా నిర్వహించ తలపెట్టిన ప్రగతి నివేదిన సభకు ఇప్పటికే లక్షలాది మంది ప్రజలు భారీగా తరలివచ్చారు.

ప్రతి నియోజకవర్గం నుంచి ప్రతి జిల్లా నుంచి ఈ సభకు పెద్దఎత్తునా తరలివచ్చేలా పార్టీ కేడర్‌ను సమీకరించారు. నాలుగేళ్లపాలనలో తెలంగాణ రాష్ట్రంలో ప్రభుత్వం అమలు పర్చిన పథకాలపై వివరణ ఇవ్వనున్నారు. ఇప్పటికే మిగతా కేబినెట్ మంత్రులంతా ప్రత్యేక హెలికాప్టర్‌లో కొంగరకలాన్‌కు చేరుకున్న సంగతి తెలిసిందే.



కేసీఆర్ హఠావ్.. తెలంగాణ బచావ్: ఉత్తమ్ 

Updated By ManamSun, 09/02/2018 - 13:01

Uttam Kumar reddy, CM Kcr, TRS, Pragathi Nivedhana sabhaహైదరాబాద్: కేసీఆర్ హఠావ్.. తెలంగాణ బచావ్ అనే నినాదంతో ముందుకెళ్తామని టీపీసీసీ అధ్యక్షులు ఉత్తమ్ కుమార్ రెడ్డి పిలుపునిచ్చారు. టీఆర్ఎస్ ప్రతిష్ఠాత్మకంగా నిర్వహించిన ‘ప్రగతి నివేదన సభ’ తుస్సుమందని ఆయన విమర్శించారు. ప్రగతి నివేదన సభలో సీఎం కేసీఆర్ ప్రసంగం అనంతరం ఉత్తమ్ మీడియాతో సమావేశమయ్యారు. ఈ సందర్భంగా ఉత్తమ్ మాట్లాడుతూ.. ‘ప్రగతి నివేదన సభ కాదు.. ప్రజల ఆవేదన సభ’ అని ఎద్దేవా చేశారు. సభ కోసం ఖర్చు చేసిన సొమ్ము ఎక్కడిది? దోచుకున్నది కాదా? అని ఉత్తమ్ ప్రశ్నించారు. సభ కోసం బస్సులను బలవంతంగా తరలించారని మండిపడ్డారు. మైనార్టీ రిజర్వేషన్లు, డబుల్ బెడ్ రూం ఇళ్ల ప్రస్తావనే లేదన్నారు.

జోన్లపై ప్రధాని నరేంద్ర మోదీని నిలదీశానని కేసీఆర్ చెబుతున్నారని, కరెంట్ విషయంలో మళ్లీ అవే అబద్ధాలు చెప్పారని దుయ్యబట్టారు. కాంగ్రెస్ విధానాలతోనే తెలంగాణ ధనిక రాష్ట్రంగా ఆవిర్భించిందని ఉత్తమ్ స్పష్టం చేశారు. కేసీఆర్ ప్రసంగం ప్రజలను తప్పుదోవ పట్టించేలా ఉందన్నారు. రాష్ట్రాన్ని మొత్తం ఆల్కహాల్‌లో ముంచి తేలుస్తున్నామన్నారు. ఆత్మహత్యలు, అప్పులు, అవినీతిలో రాష్ట్రం నెంబర్‌వన్‌గా ఉందని ఉత్తమ్ విమర్శించారు. రాష్ట్ర ప్రయోజనాలను కేంద్రం దగ్గర తాకట్టు పెట్టింది మీరేనని విమర్శించారు. కేసీఆర్ హమీలు నెరవేర్చడంలో విఫలమయ్యారని మండిపడ్డారు.'

టీఆర్‌ఎస్ పార్టీ నిర్వహించిన ప్రగతి నివేదన సభ అట్టర్ ప్లాప్ అయిందని టీపీసీసీ అధ్యక్షుడు ఎన్ ఉత్తమ్ కుమార్ రెడ్డి వ్యాఖ్యానించారు.  సభలో కేసీఆర్ దొంగ మాటలు మాట్లాడారని నిప్పులు చెరిగారు.  ప్రగతి నివేదన సభ ముగిసిన అనంతరం రాత్రి బంజారాహిల్స్ లోని తన నివాసంలో ఆయన మీడియాతో మాట్లాడారు. ఆదివా రం టీఆర్‌ఎస్ నిర్వహించిన సభ ప్రగతి నివేదన సభ కాదనీ, ప్రజల ఆవేదన సభ అని అన్నారు. సీఎం కేసీఆర్ స్పీచ్ తుస్సుమనిందని చెప్పారు. ఈ సభతో కేసీఆర్ అవినీతి బయట పడిందన్నారు. సభకు పెట్టిన ఖర్చు చూసి ప్రపంచం నివ్వెర పోయిందని తెలిపారు. ఈ సభ ధన,బల ప్రదర్శనగా మిగిలిందని చెప్పారు. ప్రైవేట్ విద్యాసంస్థల్లో చదివే పేద విద్యార్థులకు ఫీజు రీయింబర్స్ మెంట్ ఇచ్చేందుకు ఇష్టపడని కేసీఆర్ తాను పెట్టే సభలకు మాత్రం చట్టానికి విరుద్ధంగా ప్రైవేట్ పాఠశాలలు, కళాశాలల యాజమాన్యాలను బెదరించి సభకు బస్సులు వేసుకున్నారని ఆరోపించారు. హోర్డింగులు పెట్టుకోవద్దని ఇతరులకు చెప్పిన కేటీఆర్ సిగ్గు లేకుండా పెద్ద పెద్ద హోర్డింగులు తాను, తన తండ్రి పేర పెట్టుకున్నారని ఉత్తమ్ మండిపడ్డారు. ఎవడబ్బ సొమ్మని సభకు ఆర్టీసీ బస్సులు వాడుకున్నారని ప్రశ్నించారు.

అధికారులు వివక్ష చూపిస్తే గుర్తు పెట్టుకుంటామని హెచ్చరించారు. తన సుదీర్ఘ ప్రసంగంలో డబుల్ బెడ్ రూం ఇళ్లు, ముస్లింలు, గిరిజనులకు రిజర్వేషన్లుపెంపు, దళితులకు మూడెకరాల భూమి విషయం ప్రస్తావించలేదని విమర్శించారు. రైతులకు 24 గంటల ఉచిత విద్యుత్ అనేది కాంగ్రెస్ పార్టీ చేపట్టిన విద్యుత్ ప్రాజెక్టుల వల్లే సాధ్యమైందన్నారు. కేసీఆర్ సీఎంగా బాధ్యతలు చేపట్టిన తర్వాత ఒక్క విద్యుత్ ప్రాజెక్టునైనా చేపట్టారా ? అని ప్రశ్నించారు. మిషన్ భగీరథ కమిషన్  భగీరథగా మారిందని ఆరోపించారు. ఈ పథకం ద్వారా చెప్పిన సమయానికి కేసీఆర్ నీళ్లివ్వలేదని చెప్పారు. ప్రగతి నివేదన సభకు రూ.300 కోట్లు ఖర్చయినట్లు చెబుతున్నారని, ఆంత డబ్బు ఎక్కడి నుంచి వచ్చిందో చెప్పాలని ఉత్తమ్ డిమాండ్ చేశారు. కేసీఆర్ సీఎంగా బాధ్యతలు చేపట్టిన తర్వాత రాష్ట్రంలో రైతుల ఆత్మహత్యలు పెరిగాయని ఆరోపించారు. ఆత్మహత్యల్లో , అవినీతిలో దేశంలోనే నంబర్ 1 గా తెలంగాణ రాష్ట్రం నిలిచిందని, అందుకు సిగ్గుపడాలని ఉత్తమ్ వ్యాఖ్యానించారు. టీఆర్‌ఎస్ అధికారంలోకి వచ్చిన తర్వాత 4 వేల చిన్నతరహా పరిశ్రమలు మూతబడ్డాయని ఆరోపించారు. ప్రధానమంత్రి నరేంద్రమోడీకి చెంచాగా కేసీఆర్ వ్యవహరిస్తున్నారని చెప్పారు. ఇకపై కేసీఆర్ హఠావో....కాంగ్రెస్ బచావో....నినాదంతో ముందుకు వెళతామని ఉత్తమ్ వివరించారు.





Related News