ap cm chandrababu naidu

నాపైనా దాడులు?

Updated By ManamSun, 10/28/2018 - 11:12
  • వరుసపెట్టి మా పార్టీ వాళ్లపై దాడులు.. అన్నీ ఆపరేషన్ గరుడలో చెప్పినట్లే

  • పాలనలో గవర్నర్ జోక్యం ఏమిటి?.. కేంద్రం అదుపులో విమానాశ్రయాలు

  • జగన్‌పై దాడికి మా బాధ్యతేముంది.. అన్ని పదవుల్లోనూ గుజరాతీలేనా!

  • ఏకపార్టీ ఆధిపత్యం మంచిది కాదు.. ఢిల్లీలో మీడియాతో చంద్రబాబు

imageన్యూఢిల్లీ: ఎన్డీయే నుంచి, కేంద్ర ప్రభుత్వం నుంచి తాము బయటకు వచ్చిన తర్వాత వరుసపెట్టి టీడీపీ నేతలు, వారికి
సంబంధం ఉన్న సంస్థలపై ఆదాయపన్ను శాఖ దాడులు జరుగుతున్నాయని, రేపో మాపో తనపై కూడా దాడులు జరుగుతాయని తనకు తెలుసని ఏపీ ముఖ్యమంత్రి చంద్రబాబు నాయుడు అన్నారు. ఒక రోజు పర్యటన కోసం ఢిల్లీ వచ్చిన ఆయన.. తొలుత ఢిల్లీ ముఖ్యమంత్రి అరవింద్ కేజ్రీవాల్, శరద్‌యాదవ్, ఫరూక్ అబ్దుల్లా లాంటి సీనియర్ నాయకులను కలిసి ప్రస్తుత రాజకీయాలపై చర్చించారు. అనంతరం పలు అంశాలపై చంద్రబాబు ఢిల్లీలో మీడియాతో మాట్లాడారు. సినీనటుడు శివాజీ ఆపరేషన్ గరుడ గురించి చెబితే తాను నమ్మలేదని, కానీ పరిణామాలన్నీ అదే క్రమంలో జరుగుతున్నాయని చెప్పారు. బీజేపీని వ్యతిరేకించే రాజకీయ పార్టీల నేతలను కేసుల పేరుతో వేధిస్తున్నారని.. తమ పార్టీకి చెందిన బీద మస్తాన్ రావు, సీఎం రమేశ్, సుజనా చౌదరితో పాటు తెలంగాణ కాంగ్రెస్ నాయకుడు రేవంత్ రెడ్డి మీద కూడా ఐటీ దాడులు జరిగాయని తెలిపారు. బీజేపీతో స్నేహం చేసినన్ని రోజులు తమకు పన్ను ఎగవేత నోటీసులు రాలేదని, విడిపోగానే 19 బృందాలతో ఐటీ దాడులు చేయించారని మండిపడ్డారు. విభజన చట్టం అమలుపై విబేధించినంత మాత్రానా వేధిస్తారా అని ప్రశ్నించారు. ప్రతిపక్ష నేత జగన్‌పై దాడి జరగగానే డీజీపీకి గవర్నర్ ఫోన్ చేశారని.. అసలు గవర్నర్ జోక్యం చేసుకోవడమేంటని ప్రశ్నించారు. విశాఖ ఎయిర్ పోర్టులో ప్రతిపక్ష నేతపై ఓ యువకుడు కత్తితో దాడి చేశాడని, దాడి చేసిన వ్యక్తిని వెంటనే పోలీసులు అదుపులోకి తీసుకున్నారని చెప్పారు. దాడి జరిగిన వెంటనే బీజేపీ నేతలు టీడీపీపై విమర్శలు చేశారని, ఎయిర్‌పోర్టు కేంద్రం ఆధీనంలో ఉంటే తమది బాధ్యత ఎలా అవుతుందని నిలదీశారు. 

అంతా ఒక రాష్ట్రం నుంచేనా?
దేశంలో లౌకికవాదానికి ప్రమాదం వాటిల్లుతోందని చంద్రబాబు ఆందోళన వ్యక్తం చేశారు.  ప్రధాని, అధికార పార్టీ అధ్యక్షుడు ఒకే రాష్ట్రం వారు కాకూడదని, ఇప్పుడు కేంద్రంలో కూడా కీలక పదవుల్లో మొత్తం గుజరాతీలే ఉన్నారని చెప్పారు. తమకు నచ్చనివాళ్లను భయభ్రాంతులకు గురి చేస్తున్నారని, ఏపీలో అస్థిరత నెలకొనేలా చేస్తున్నారని అన్నారు. విమానాశ్రయంలో దాడి ఘటన కేంద్ర ప్రభుత్వ వైఫల్యమని ఆయన ఆరోపించారు. 

అంతా గుజరాతీలేనా?
సీబీఐ వివాదంలో మోదీ సమాధానం చెప్పాలని.. సీబీఐలో అధికార కేంద్రాలను మీరు ఎలా ప్రోత్సహిస్తారని ప్రశ్నించారు. సీబీఐ స్పెషల్ డైరెక్టర్ ఆస్థానా సహా అనేక మంది గుజరాతీలేనని వ్యక్తిగత ప్రయోజనాల కోసం వ్యవస్థలను నాశనం చేస్తున్నారని మండిపడ్డారు. దేశంలో తొలిసారి మోదీ పూర్తిస్థాయి మెజార్టీ సాధించారని, ఇలాంటి సందర్భంలో ప్రజలకు ప్రభుత్వం భరోసా కల్పించాలని అన్నారు. దేశానికి ఏకపార్టీ అధిపత్యం మంచిది కాదని.. మనమంతా ప్రజాస్వామ్య వ్యవస్థలో ఉన్నాం తప్ప నియంతృత్వ పాలనలో లేమని ఆయన చెప్పారు. కాంగ్రెస్సేతర అతిపెద్ద పార్టీగా అవతరించి ఉపయోగం ఏంటని.. ఏపీ ప్రభుత్వాన్ని కేంద్రప్రభుత్వం నిర్వీర్యం చేస్తోందని మండిపడ్డారు. తమిళనాడు ప్రభుత్వాన్ని కేంద్రం నియంత్రిస్తోందని, కేంద్ర ప్రభుత్వం ఎలాంటి విలువలు పాటించడం లేదని చంద్రబాబు ఆరోపించారు. 

టీడీపీని నష్టపరుస్తారా?
విభజన హామీలు అమలు చేయాలంటూ తాను 29సార్లు ఢిల్లీ వచ్చానని, కానీ టీడీపీని నష్టపరచాలని చూస్తున్నారని చంద్రబాబు ఆరోపించారు. తొలిసారి ఓ ప్రాంతీయ పార్టీ కేంద్రంపై అవిశ్వాస తీర్మానం పెడితే దానికి దేశంలో అన్ని పార్టీలు మద్దతిచ్చాయని గుర్తుచేశారు. తనకంటే తెలంగాణ సీఎం కేసీఆర్‌కు మెచ్యూరిటీ ఎక్కువని ప్రధాని మోదీ లోక్‌సభలో అన్నారని.. అసలు తన గురించి ఏమనుకుంటున్నారని ప్రశ్నించారు. 1995లోనే అభివృద్ధిని కొత్త పుంతలు తొక్కించానని, హైదరాబాద్‌ను ప్రపంచ పటంలో నిలబెట్టానని చెప్పారు. తెలంగాణకు నిధుల విడుదలను తాను సమర్థిస్తున్నానని, అదే సమయంలో ఏపీకి నిధులు ఇవ్వకపోవడం వివక్షేనని ఆయన మండిపడ్డారు.



ఉద్యోగం వీడి.. పొలం బాట

Updated By ManamFri, 10/05/2018 - 00:10
  • ప్రకృతి సాగు వైపు ఉన్నత విద్యావంతులు

  • బెజవాడలో జెడ్‌బీఎన్‌ఎఫ్ స్టాల్స్ ఏర్పాటు

  • ముఖ్యమంత్రి చంద్రబాబుకు రైతుల సత్కారం

imageవిజయవాడ: ఉన్నత విద్యను అభ్యసించి, ఉన్నత ఉద్యోగాలు చేస్తున్న వారు.. తమ వృత్తిని వీడి పొలం బాట పడుతున్నారు. తల్లిదండ్రుల స్ఫూర్తి, ప్రభుత్వం చేయూతతో ప్రకృతి వ్యవసాయం పట్ల మొగ్గు చూపుతున్నారు. రాష్ట్రంలో ఎంతో ఉన్నత విద్యావంతులు ప్రకృతి సాగు చేస్తున్నారు. తమ విజయగాథలను తోటి రైతులతో పంచుకున్నారు. తమ అనుభవాలు, మెళకువలు వివరించారు. విజయవాడలోని ఇందిరా గాంధీ స్టేడియంలో ఏర్పాటు చేసిన పెట్టుబడి లేని ప్రకృతి వ్యవసాయానికి (జెడ్‌బీఎన్‌ఎఫ్) సంబంధించిన స్టాల్స్‌ను ముఖ్యమంత్రి చంద్రబాబు నాయుడు పరిశీలించారు. ఈ కార్యక్రమంలో మంత్రులు సోమిరెడ్డి చంద్రమోహన్ రెడ్డి, దేవినేని ఉమామహేశ్వర రావు, కొల్లు రవీంద్ర పాల్గొన్నారు.

ఈ సందర్భంగా రైతులు తమ అనుభవాలను ముఖ్యమంత్రికి వివరించారు. ప్రకృతి వ్యవసాయ పద్ధతులతో తమకు, తమ కుటుంబాలతో పాటు భూమికి ఎంతో మేలు జరుగుతోందని తెలిపారు. పెట్టుబడులు చాలా వరకూ తగ్గుతాయని, భూమి సారం కోల్పోకుండా ఉంటుందని వివరించారు. తృణధాన్యాలతో చేసిన ఆహార పదార్థాలను ముఖ్యమంత్రి చంద్రబాబు రుచి చూశారు. అమెరికాలో ఇటీవల ప్రకృతి వ్యవసాయంపై జరిగిన సదస్సులో పాల్గొన్న ముఖ్యమంత్రిని రైతులు సత్కరించారు. ప్రకృతి వ్యవసాయానికి ప్రత్యేక గుర్తింపు తీసుకొచ్చిన సందర్భంగా తృణధాన్యాలతో చేసిన కేకును ముఖ్యమంత్రితో రైతులు కట్ చేయించారు.
 

image

 



మనదే బాధ్యత

Updated By ManamThu, 10/04/2018 - 00:59
  • గ్రామాల్లో మౌలిక సదుపాయాలు కల్పించాలి

  • మనం అందరం గ్రామాల నుంచే వచ్చాం

  • అభివృద్ధి ప్రణాళికలు పకడ్బందీగా చేయాలి

  • గ్రామదర్శనికి అధికారులు తప్పకుండా రావాలి

  • వారానికి 2 రోజులు అందరూ విధిగా పాల్గొనాలి

  • అధికారులతో సీఎం చంద్రబాబు టెలికాన్ఫరెన్స్ 

అమరావతి: ‘‘మనం అందరం గ్రామాల నుంచే వచ్చాం. గ్రామాలలో మౌలిక సదుపాయాల అభివృద్ధి మన బాధ్యత. అందరూ గ్రామదర్శనిని సీరియస్‌గా తీసుకోవాలి. పైనుంచి కిందిస్థాయి వరకు శ్రద్దగా పనిచేయాలి. ఈ 52 నెలల్లో మనం ఏం చేశామో ప్రజలకు వివరించాలి. ఇంకా చేయాల్సిన అంశాలపై దృష్టి పెట్టాలి. గ్రామ అభివృద్ధి ప్రణాళికలు, వార్డు అభివృద్ధి ప్రణాళికలు పకడ్బందీగా తయారు చేయాలి. గ్రామదర్శని చేపట్టి ఇప్పటికి రెండు నెలలు పూర్తి అయ్యింది. అధికారులు మూడింట రెండు వంతులే హాజరయ్యారు. రాష్ట్ర స్థాయి, జిల్లా స్థాయి అధికారుల హాజరు శాతం మరింత పెరగాలి. ఎంతమంది ఏ స్థాయిలో హాజరయ్యారు? ఎంతమంది నివేదికలు పంపారు? ఎప్పటికప్పుడు విశ్లేషిస్తున్నాం. గ్రామదర్శనికి అధికార యంత్రాంగం తప్పకుండా హాజరుకావాలి. వారానికి 2 రోజులు అధికారులు అందరూ విధిగా గ్రామదర్శనిలో పాల్గొనాలి’’ అని ముఖ్యమంత్రి చంద్రబాబు నాయుడు ఆదేశించారు. బుధవారం గ్రామదర్శనిపై అధికారులతో చంద్రబాబు టెలికాన్ఫరెన్స్ నిర్వహించారు.

image


ఈ సందర్భంగా ముఖ్యమంత్రి మాట్లాడుతూ.. మన రాష్ట్రానికి వచ్చిన ర్యాంకులే మన పురోగతికి గీటురాళ్లు అని అన్నారు. స్వచ్ఛ భారత్‌లో దేశంలో 5వ ర్యాంకులో ఉన్నామని, దక్షిణాదిన నెంబర్ వన్‌గా ఉన్నామని తెలిపారు. దేశవ్యాప్తంగా ప్రతి అంశంలో మన రాష్ట్రమే ముందుండాలని,  గ్రామీణాభివృద్ధి, ఉపాధి హామీ, జల వనరులు, ఇంధన శాఖలు, ఈజ్ ఆఫ్ డూయింగ్ బిజినెస్‌లో జాతీయ స్థాయిలో మనదే పైచేయిగా ఉందని అన్నారు.

ఇదే స్ఫూర్తిని అన్నింటిలో కొనసాగించాలని సూచించారు. గత నాలుగేళ్లుగా మన ర్యాంకులే మన పురోగతికి గీటురాళ్లని, తూతూమంత్రంగా పనిచేస్తే ఫలితాలు రావని, ప్రభుత్వంపై విశ్వాసాన్ని బట్టే ప్రజల్లో సంతృప్తి ఉంటుందని చంద్రబాబు పేర్కొన్నారు. గ్రామదర్శనికి ముందుకన్నా తరువాత 1% మాత్రమే ప్రజల్లో సంతృప్తి పెరిగిందని, హాజరుశాతం మరింత బాగా ఉంటే సంతృప్తి అధికంగా ఉండేదని అన్నారు. ప్రజల్లో సంతృప్తి 80% ప్లస్‌కు చేరాలని, ప్రభుత్వ సేవలపై 90% సంతృప్తి రావాలని ఆదేశించారు. ప్రజాప్రతినిధులు లేనప్పుడు సేవల్లో మందకొడితనం అనే భావన ఉంటుందని, ఈ అపవాదును తొలగించుకోవాల్సిన అవసరం అధికారులపై ఉందని సూచించారు. ప్రజల ఆకాంక్షలకు అనుగుణంగా పనిచేయాలని, లేకపోతే ప్రభుత్వంపై వ్యతిరేకత వస్తుందని పేర్కొన్నారు. ‘‘ప్రజలతో మమేకం ద్వారానే ప్రజాస్వామ్యానికి సార్ధకత. గత రెండు నెలల్లో మొత్తం 1,809 ఫిర్యాదులు వచ్చాయి. తూర్పుగోదావరి, పశ్చిమగోదావరి, చిత్తూరు, నెల్లూరు, కడప నుంచే అధిక ఫిర్యాదులు అందాయి. ప్రతి ఫిర్యాదుకు సరైన పరిష్కారం చూపాలి. ప్రజల నుంచి సంతృప్తిని రాబట్టాలి. ప్రకృతి సేద్యంవైపు ప్రపంచం మొత్తం చూస్తోంది. ప్రకృతి సేద్యంలో ఆంధ్రప్రదేశ్ నమూనాగా మారింది. దీని ద్వారా ప్రజల జీవన ప్రమాణాల పెంచాలి. అభివృ ద్ధి, సంక్షేమంలో మనమే ముందున్నాం. 

ఈజ్ ఆఫ్ డూయింగ్ బిజినెస్‌లో అగ్రగామిగా ఉన్నాం. అనేక పరిశ్రమలు నెలకొల్పాం. పెద్దఎత్తున ఉపాధి అవకాశాలు కల్పించాం. పెళ్లికానుకలు, పండుగ కానుకలు ఇస్తున్నాం. వైద్య సేవలు అందుబాటులోకి తెచ్చాం. కుటుంబ వికాసం ద్వారా సమాజ వికాసం చేస్తున్నాం. వీటన్నింటినీ ప్రజల్లోకి తీసుకెళ్లాలి. మన కష్టం వల్లనే ఇంత ప్రగతిని సాధించాం. కేంద్రం సహకారం లేకున్నా సమష్టి కృషితో పురోగతి. ప్రజల సహకారం ద్వారానే రాష్ట్ర సమగ్రాభివృద్ధి సాధ్యం’’ అని ముఖ్యమంత్రి చంద్రబాబు పేర్కొన్నారు. గ్రామదర్శని కార్యక్రమంలో గత 2 నెలల్లో గ్రామం, వార్డు, మండలం, నియోజకవర్గం, మున్సిపల్ స్థాయిలలో మొదటి 10 మంది, దిగువ 10 మంది పేర్లను ప్రస్తావించారు. పనితీరును మెరుగుపరుచుకోవాలని సూచించారు. వివిధ స్థాయిలలో అమలు చేస్తున్న మేలైన విధానాలను అధ్యయనం చేసి అందరూ అనుసరించాలని చంద్రబాబు ఆదేశించారు. ఈ టెలికాన్ఫరెన్స్‌లో ప్రభుత్వ ప్రధాన కార్యదర్శి అనిల్ చంద్ర పునేఠా, ప్రణాళికా శాఖ కార్యదర్శి సంజయ్ గుప్తా, రియల్ టైమ్ గవర్నెన్స్ సీఈవో అహ్మద్ బాబు, సమాచార శాఖ కార్యదర్శి రామాంజనేయులు, వివిధ జిల్లాల కలెక్టర్లు, నోడల్ అధికారులు పాల్గొన్నారు.



ప్రకృతి  సేద్యమే ఉత్తమం

Updated By ManamSat, 09/29/2018 - 01:47
  • ఉత్తమ సాగుగా ఐకరాజ్య సమితి గుర్తింపు.. ప్రపంచంలో అనేక ఏజెన్సీలదీ ఇదే మాట

  • భవిష్యత్‌లో సాగులో ఎన్నో మార్పులు.. క్రిమి సంహారకాలు వాడకపోతేనే ఆరోగ్యం 

  • ఎన్నో దేశాల నేతలు  అభినందించారు.. 2024 నాటికి 2 కోట్ల ఎకరాల్లో ప్రకృతి సేద్యం

  • ఏపీలో పెట్టుబడులకు సంస్థల సంసిద్ధత: చంద్రబాబు

imageఅమరావతి: వ్యవసాయ రంగంలో భవిష్యత్‌లో అనేక మార్పులు వస్తాయని ముఖ్యమంత్రి చంద్రబాబు నాయుడు పేర్కొన్నారు. ప్రకృతి సేద్యాన్ని ఐరాస ఉత్తమ సేద్యంగా గుర్తించిందని చెప్పా రు. ప్రపంచంలోని అనేక ఏజెన్సీలు మొదటిసారి ప్రకృతి సేద్యం ఉత్తమ మైనదని తెలిపాయని వెల్లడించారు. క్రిమి సంహారకాలు వాడకపోతే ఆరో గ్యంగా ఉంటామని, క్రిమి సంహార కాలు ఉంటే భూసారం నశించిపో తుందన్నారు. సాంకేతికతను, ప్రకృతి ని అనుసంధానం చేస్తే చాలా బాగుం టుందని, ప్రపంచంలో అనేక సమస్యల కు పరిష్కార మార్గం చూపిస్తుందని అభిప్రాయప్డడారు. శుక్రవారం అమరావతిలో చంద్రబాబు మీడియా సమావేశంలో మాట్లాడారు.

 తాజా అవెురికా పర్యటన విశేషాలు, ప్రకృతి సేద్యం లక్ష్యాలు, అరకు మావోయిస్టుల దాడి గురించి మాట్లాడారు. ఐక్యరాజ్య సమితి ఆధ్వర్యంలో నిర్వహించిన కార్యక్రమంలో ప్రకృతి సేద్యంపై ప్రసం గించానని తెలిపారు. ప్రపంచంలోని అన్ని దేశాలు మనల్ని అభినందించారని తెలిపారు. వివిధ దేశాల మంత్రులు కూడా మన రాష్ట్రానికి వచ్చి ప్రకృతి సేద్యాన్ని చూస్తామంటున్నారని వెల్లడించారు. 2024 నాటికి 60 లక్షల మంది రైతులు, 2 కోట్ల ఎకరాల్లో ప్రకృతి సేద్యానికి శ్రీకారం చుట్టనున్నారని చంద్రబాబు పేర్కొన్నారు. రాష్ట్రంలో 3 లక్షలా 50 వేలమంది రైతులు విజయవంతంగా వ్యవసాయం చేస్తున్నారని తెలిపారు. ఎటువంటి రసాయనాలు వాడకుండా సాగు చేస్తున్నారని తెలిపారు. వినూత్న కార్యక్రమాలతో ముందుకు వెళ్తున్నామని, కేవలం మన రాష్ట్రంలోనే పాలేకర్ విధానాలు అములవుతున్నాయని అన్నారు. 20 సంవత్సరాల ముందే డ్వాక్రా సంఘాలకు నాంది పలికానని గుర్తు చేశారు. 

అవెురికా పర్యటనలో ఒప్పందాలు
అమెరికా పర్యటనలో వివిధ సంస్థలతో అవగాహన ఒప్పందాలు కుదుర్చుకున్నట్లు చంద్రబాబు వెల్లడించారు. రాష్ట్రంలో టవర్ల ఏర్పాటు, ఫైబర్ గ్రిడ్‌తో అనుసంధానంపై చర్చలు జరిగాయని తెలిపారు. భూమిపై కంటే సముద్రంలో ఎక్కువ వనరులు ఉన్నాయని, సముద్రంలో మినరల్స్, ఆక్వా కల్చర్, నీటితో అనేక లాభాలు ఉన్నాయన్నారు. ఏపీలో పరిశోధన, సాంకేతిక కేంద్రం ఏర్పాటుకు డోయర్ సంస్థ అంగీకారం తెలిపిందని చంద్రబాబు వెల్లడించారు. రాష్ట్రంలో కంపెనీ స్థాపనకు, పెట్టుబడులు పెట్టేందుకు పలు సంస్థలు సంసిద్ధత వ్యక్తం చేశాయని చంద్రబాబు తెలిపారు. దీనివల్ల ప్రత్యక్షంగా, పరోక్షంగా వేలాదిమంది ఉపాధి అవకాశాలు రానున్నాయని చెప్పారు. 

గిరిజన ప్రాంతంలో అభివృద్ధి
గిరిజన ప్రాంతంలో ఇప్పుడిప్పుడే అభివృద్ధి జరు గుతోందని, ఆదాయం పెంచే మార్గాలతో ముందుకు వెళ్తున్నామనిimage చంద్రబాబు అన్నారు. అరకు కాఫీని పారీస్‌కు కూడా ఎగుమతి చేస్తున్నామని తెలిపారు. అరకు టూరిజం హబ్‌గా ఏర్పడిందని చెప్పారు. బలహీన వర్గాల నుంచి వచ్చిన వ్యక్తులు నాయకత్వాన్ని పెంచుకున్నారని అన్నారు. ఆ ప్రాంత అభివృద్ధికి గిరిజన నాయకులు ఎంతో కృషి చేస్తున్నారని అన్నారు. 

హింసకు తావు లేదు 
అరకు ఎమ్మెల్యే కిడారి సర్వేశ్వరరావును, మాజీ ఎమ్మెల్యే సివేరి సోమని మావోయిస్టులు చంపడం దారుణమని చంద్రబాబు ఆవేదన వ్యక్తం చేశారు. ప్రజాస్వామ్యంలో హింసకు తావులేదని అన్నారు. మాజీ ఎమ్మెల్యే అయినా సివేరి సోమకి సొంత ఇల్లు కూడా లేదని, తనతో ఎప్పుడు కలిసినా ప్రజా సమస్యలు మినహా వ్యక్తిగతంగా మాట్లాడలేదని అన్నారు. ప్రభుత్వ పరంగా, పార్టీ పరంగా కిడారి, సోమ కుటుంబాలకు అండగా ఉంటామని చెప్పారు. 

అవెురికా నుంచి తిరిగొచ్చిన చంద్రబాబు
ముఖ్య మంత్రి చంద్రబాబు నాయుడు విదేశీ పర్యటన ముగించుకుని తిరిగొచ్చారు. శుక్రవారం ఉదయం గన్నవరం విమానాశ్రయానికి చేరుకున్న చంద్రబాబుకు మంత్రులు దేవినేని ఉమామహేశ్వరరావు, కొల్లు రవీంద్ర తదితరులు స్వాగతం పలికారు. ఐక్యరాజ సమితిలో ప్రకృతి వ్యవసాయంపై ప్రసంగించేందుకు చంద్రబాబు అవెురికాకు వెళ్లిన సంగతి తెలిసిందే. పలువురు పారిశ్రామిక వేత్తలు, నిపుణులు, ఆర్థిక వేత్తలతో సమావేశం కావడంతో పాటు ప్రవాసాంధ్రులతో జరిగిన సమావేశంలో చంద్రబాబు పాల్గొన్నారు.



హోదా ఎందుకివ్వరు?

Updated By ManamWed, 09/19/2018 - 23:15
  • ఇది సమాఖ్య సూర్తికి విఘాతం.. నిధులపై విచారణ చేయండి

  • మీ జడ్జినే నియమించండి.. బీజేపీకి, బ్రిటీష్‌కు తేడా ఏమిటి?

  • అసెంబ్లీలో కేంద్రంపై చంద్రబాబు ఫైర్

Chandrababuఅమరావతి: ఆంధ్రప్రదేశ్‌కు ప్రత్యేక హోదా ఇవ్వొద్దని ఆర్థిక సంఘం చెప్పనప్పుడు, రాష్ట్రానికి హోదా ఎందుకివ్వరని రాష్ట్ర ముఖ్యమంత్రి చంద్రబాబు కేంద్రాన్ని నిలదీశారు. బుధవారం అసెంబ్లీలో ‘ఏపీకి రావాల్సిన నిధులపై కేంద్రం నిర్లక్ష ధోరణి’ అనే అంశంపై ఆయన ప్రసంగించారు. కేంద్రం, రాష్ట్రానికి చేస్తున్న నిర్లక్ష్య ధోరణి సమాఖ్య స్ఫూర్తికి  విఘాతం కలిగిస్తుందని ఆయన మండిపడ్డారు. దేశంలో 11 రాష్ట్రాలకు ఇస్తున్న విధంగా పన్ను రాయితీలతో కూడిన ప్రత్యేక హోదా ఏపీకి ఇవ్వాలని, అప్పటి ప్రధాని ఇచ్చిన హామీలను నెరవేర్చాలని శాసనసభ డిమాండ్ చేస్తోందన్నారు. ప్రత్యేక హోదా హామీని నెరవేర్చి పార్లమెంట్ వ్యవస్థ గొప్పతనాన్ని, రాజ్యాంగ స్ఫూర్తిని కేంద్రం గౌరవించాలన్నారు. కేంద్రం రాష్ట్రానికి ఇచ్చేశామని చెబుతున్న 90 శాతం నిధులపై, వాళ్ల జడ్జీనే నియమించి విచారణ జరిపించాలని చంద్రబాబు కేంద్రాన్ని డిమాండ్ చేశారు. రాష్ట్రానికి కేంద్రం నిధులు ఇచ్చిందని ఆ కమిషన్ తేల్చితే, తాను కేంద్రాన్ని ఏమీ అడగనని చంద్రబాబు స్పష్టం చేశారు. రాష్ట్ర ప్రజలు ప్రత్యేక హోదా కోరుతున్నారని, ప్రత్యేక హోదా ఇవ్వకపోతే, భవిష్యత్ తరాలు కూడ బీజేపీపై కోపంగా ఉంటారని చంద్రబాబు పేర్కొన్నారు. 

ఇలాంటి పార్టీలు చాలా చూశా..
‘‘నేను ఎప్పుడూ హైదరాబాద్‌కు వ్యతిరేకంగా మాట్లాడలేదు. అక్కడ గొప్ప వారసత్వ సంపద ఉంది. హైదరాబాద్ లాంటి సిటీని నిర్మించాలంటే రూ. 5 లక్షల కోట్లు ఖర్చవుతుంది. 20 ఏళ్లు పడుతుందని చెప్పాను. ఈ రోజు ఇంకో నగరాన్ని నిర్మిస్తానని చెప్పాను కానీ ఎప్పుడూ హైదరాబాద్‌కు వ్యతిరేకంగా మాట్లాడలేదు. ప్రతిపక్ష పార్టీ బీజేపీని ఒక్క మాట కూడా విమర్శించదు. రిమోట్ కంట్రోల్ మొత్తం మోదీ దగ్గరే ఉంది. అందుకే జగన్ మాట్లాడటంలేదు. మమ్మల్ని కూడా భయపెట్టాలని కేంద్రం చూస్తోంది. 40 ఏళ్లు రాజకీయ జీవితంలో ఉన్నా. ఇలాంటి పార్టీలను నేను చాలా చూశాను. బీజేపీ ఎమ్మెల్యే విష్ణుకుమార్‌రాజు ఈ గడ్డపై పుట్టుంటే.. నేను ప్రవేశ పెట్టిన తీర్మానాన్ని బలపరచాలి. కేంద్రాన్ని విమర్శించా లి’’అని చంద్రబాబు సవాల్ విసిరారు. 

బీజేపీకి బ్రిటీష్ వాళ్లకు తేడా ఏంటి?
కేంద్రానికి తాము ఎప్పుడూ పన్నులు కడుతూనే ఉండాలా? అని చంద్రబాబు కేంద్రాన్ని ప్రశ్నించారు. రాష్ట్ర ప్రభుత్వాలపై కక్ష పూరితంగా వ్యవహరించేటట్లు అయితే బీజేపీ వాళ్లకు, బ్రిటీష్ వాళ్లకు తేడా ఏముందని ఆయన నిలదీశారు. అన్ని రాజకీయ పార్టీలు ఆంధ్రాకి ప్రత్యేక హోదా ఇవ్వాలని కోరుతున్నప్పుడు  కేంద్రానికి ఏంటీ ఇబ్బంది అని ప్రశ్నించారు. కేంద్రం, ఏపీపై వివక్ష చూపిస్తోందని చంద్రబాబు మండిపడ్డారు.



ఏ నేరం చేయలేదు

Updated By ManamSat, 09/15/2018 - 00:14
  • ఉత్తర తెలంగాణ ఎడారి కారాదనే బాబ్లీ దగ్గర నిరసన దీక్ష చేపట్టా

  • అరెస్ట్ చేసి విమానంలో పంపారు.. 8 ఏళ్ల తర్వాత వారెంట్ జారీనా?

  • దేనైన్నా ఎదుర్కొనేందుకు సిద్ధం.. జలసిరికి హారతి పవిత్ర కార్యక్రమం

  • నీటి సంరక్షణ కోసం జలదీక్ష చేపట్టా.. రాష్ట్రాన్ని సస్యశ్యామలం చేస్తా: చంద్రబాబు

కర్నూలు: ‘‘బాబ్లీ ప్రాజెక్టు విషయంలో నేను ఏ నేరం కానీ.. ఘోరం కానీ చేయలేదు. ప్రాజెక్టుపైన మరోప్రాజెక్టు నిర్మాణం చేపట్టడం వల్ల ఉత్తర తెలంగాణ ఎడారిగా మారిపోతుందని ఆ రోజు నిరసన తెలియజేసేందుకు ఎమ్మెల్యేల బృందంతో వెళ్లాం. అప్పటి మహారాష్ట్ర ప్రభుత్వం మమ్మల్ని అరెస్ట్ చేయించింది. తాము ఏ తప్పు చేయలేదని, ఏం చేస్తారో చేయమని నిర్మొహమాటంగా చెప్పాం. బలవంతంగా విమానంలో ఎక్కించి హైదరాబాద్‌కు పంపించారు. 8 ఏళ్ల తర్వాత ఇప్పుడు బాబ్లీ విషయంలో నాన్‌బెయిలబుల్ అరెస్ట్ వారెంట్లు జారీ చేశారు. ఇన్ని రోజులు గుర్తుకు రానిది.. ఇప్పుడు ఎందుకు గుర్తుకు వచ్చిందో అర్థం కావడంలేదు. కార్యకర్తలు అన్నింటికి సిద్ధంగా ఉండాలి’’ అని సీఎం చంద్రబాబు పిలుపునిచ్చారు. జలసిరికి హారతికి కార్యక్రమంలో భాగంగా శుక్రవారం కర్నూలు జిల్లా శ్రీశైలానికి వచ్చారు. ముందుగా శ్రీశైల మల్లికార్జున, భ్రమరాంబిక దేవిలను దర్శించుకున్నారు. అనంతరం శ్రీశైలం ప్రాజెక్టు దగ్గరకు చేరుకుని కృష్ణమ్మకు ప్రత్యేక పూజలు నిర్వహించి పట్టు వస్త్రాలు సమర్పించారు. అనంతరం స్థానికంగా ఏర్పాటు చేసిన బహిరంగ సభాస్థలికి చేరుకుని పులకుర్తి ఎత్తిపోతల పథకాన్ని ప్రారంభించి జాతికి అంకితం చేశారు.

image


ఈ సందర్భంగా చంద్రబాబు నాయుడు మాట్లాడుతూ.. జలసిరికి హారతి ఎంతో పవిత్రమైన కార్యక్రమన్నారు. నీరు సమస్త మానవాళికి ప్రాణాధారమన్నారు. ఏ అభివృద్ధి జరగాలన్నా నీరే అవసరమని పేర్కొన్నారు. దేశంలో 12 నదులకు 12 సంవత్సరాలకు ఒక్కసారి పుష్కరాలు జరుగుతాయని, నీరు ఎక్కడ ఉంటే.. నాగరికత అక్కడ ఉంటుందన్నారు. సింధు, నైలు నదిలో నీరు ఉన్నందున నాగరికతలు వెలసిల్లాయన్నారు. ఎక్కడైతే ప్రకృతిని ఆరాధిస్తారో..  ఆ ప్రాంతం సస్యశ్యామలంగా ఉంటుందన్నారు. నీటిని ఒడిసిపట్టి వ్యవసాయం చేస్తే.. ఎన్నో అభివృద్ధి ఫలాలు సాధ్యమవుతాయన్నారు. కొంత మంది అయ్యప్ప దీక్ష.. మరికొంత మంది శివదీక్ష.. ఇంకొంత మంది భవాని దీక్ష చేస్తారని, కానీ తాను జలదీక్ష చేపట్టానని అన్నారు. ప్రతి ఒక్కరికి నీళ్లు ఇచ్చే ఈ దీక్ష చేస్తున్నానన్నారు.

రాష్ట్రంలో 57 ప్రాజెక్టులు పూర్తి చేయాలని, నదులు అనుసంధానం చేసి రాష్ట్రానికి సస్యశ్యామలం చేస్తామని చెప్పారు. imageపోలవరం ప్రాజెక్టులో ఇప్పటి వరకు 58శాతం పూర్తి చేశామన్నారు. పోలవరానికి రూ.16వేలు కోట్లు ఖర్చు చేశామని, కానీ కేంద్రం రూ.2,800 కోట్లు ఇంకా ఇవ్వాల్సి ఉందని చెప్పారు. పూల సుబ్బయ్య వెలిగొండ ప్రాజెక్టు 81 శాతం పనులు పూర్తి అయ్యాయని, ప్రాజెక్టు పూర్తి చేసి ప్రకాశం జిల్లాకు నీరు అందిస్తామన్నారు. వచ్చే సంవత్సరం నాటికి 46 ప్రాజెక్టులు పూర్తి చేస్తామని అన్నారు. ఇప్పటికే 10 ప్రాజెక్టులు పూర్తి చేశామని, మిగిలిన ప్రాజెక్టులను త్వరలో పూర్తిచేస్తామని తెలిపారు. కేంద్రం సహకరించినా.. సహకరించకపోయినా నదుల అనుసందాన కార్యక్రమం జరుగుతుందన్నారు. వ్యవసాయ రంగంలో ఏపీ దేశంలోనే నెంబర్ వన్‌గా నిలిచిందన్నారు. దేశంలో 16 జాతీయ ప్రాజెక్టులు ఉన్నాయని, వీటిలో ఏవీ కూడా పూర్తికాలేదన్నారు. ముందు చూపుతోనే పట్టిసీమ తీసుకురావడంతో నేడు కృష్ణా జలాలు రాయలసీమకు అందుతున్నాయన్నారు. పట్టిసీమ నిర్మాణంలో ఎన్నో సమస్యలు ఉన్నాయని, డబ్బు వృధా అవుతుందని విమర్శలు చేయడంతో పాటు కొందరు కోర్టుకు వెళ్లారని తెలిపారు.

30 సంవత్సరాల నుంచి రాజకీయాల్లో ఉన్నానని, ఎంతో మంది ఎన్నో ఆరోపణలు చేశారని, ఏ ఒక్కటి నిరూపణ కాలేదన్నారు. గుండ్రేవుల ప్రాజెక్టుకు నిర్మాణానికి అంతరాష్ట్ర సమస్య ఉందని, త్వరలోనే సమస్య పరిష్కరించి ప్రాజెక్టు నిర్మాణానికి పూనుకుంటామన్నారు. నీటి సంరక్షణ బాధ్యత ప్రతి ఒక్కరు తీసుకోవాలన్నారు. తిరుమల తిరుపతి దేవస్థానం తరహాలో శ్రీశైలాన్ని అభివృద్ధి చేస్తామన్నారు. ఈ కార్యక్రమంలో డిప్యూటీ సీఎం కేఈ కృష్ణమూర్తి, శాసనమండలి చైర్మన్ ఎన్‌ఎండీ ఫరూక్, మంత్రులు దేవినేని ఉమా, కాల్వ శ్రీనివాసులు, అఖిల ప్రియ, ఎంపీ ఎస్పీవై రెడ్డి, కేఈ ప్రభాకర్, బుడ్డా రాజశేఖర్ రెడ్డి, మణిగాంధీ, సోమిశెట్టి వెంకటేశ్వర్లు, తిక్కారెడ్డి, వీరభద్రగౌడ్, ఏవీ సుబ్బారెడ్డి, నాగేశ్వర రావు యాదవ్ తదితరులు పాల్గొన్నారు. 
 



చంద్రబాబుకు వారెంట్!

Updated By ManamThu, 09/13/2018 - 21:53
  •  బాబ్లీ కేసులో చంద్రబాబుకు నాన్ బెయిల్‌బుల్ వారెంట్

Non Bailable Warrant to AP CM Chandrababu Naidu

అమరావతి : ముఖ్యమంత్రి చంద్రబాబు నాయుడుపై నాన్ బెయిల్‌బుల్ వారెంట్ జారీ అయింది. 2010లో బాబ్లీ ప్రాజెక్ట్‌కు వ్యతిరేకంగా ధర్నా చేసేందుకు వెళ్లిన చంద్రబాబు నాయుడుతో పాటు మరో 15మందిపై కేసు నమోదు అయిన విషయం తెలిసిందే.

ఈ కేసుకు సంబంధించి ఈ నెల 21న చంద్రబాబుతో పాటు మిగతావారంతా కోర్టుకు హాజరు కావాలని మహారాష్ట్రలోని ధర్మాబాద్ కోర్టు ఆదేశాలు జారీ చేసింది. అనుమతిల లేకుండా ప్రాజెక్ట్ వద్దకు వచ్చారని పోలీసులు కేసు నమోదు చేశారు.  అయితే ఎనిమిదేళ్లుగా ఒక్క నోటీసు కూడా లేకుండా ఒకేసారి నాన్ బెయిల్‌బుల్ వారెంట్ జారీ చేయడం పట్ల తెలుగుదేశం పార్టీ నేతలు తప్పుబడుతున్నారు. 

కాగా తిరుమల బ్రహ్మోత్సవాలు సందర్భంగా చంద్రబాబు ప్రస్తుతం తిరుమలలో ఉన్నారు. శ్రీవారి సేవలో వుండగానే నోటీసులు వచ్చినట్లు తెలుసుకున్న ముఖ్యమంత్రి న్యాయనిపుణులతో చర్చిస్తున్నట్లు తెలుస్తోంది. మరోవైపు సీఎం స్థాయిలో ఉన్న వ్యక్తిపై వారెంట్ జారీ కావడంతో ఆంధ్రప్రదేశ్‌లో రాజకీయాలు ఒక్కసారిగా వేడెక్కాయి. 



భవితకు అస్త్రం

Updated By ManamMon, 09/10/2018 - 22:32

Chandrababuఅమరావతి: ఏ దేశానికైనా యువతరమే వెన్నెముక. విద్యావంతులైన యువతరానికి ఉపాధి అవకాశాలు అందించగలిగితే సమాజ  భవిష్యత్తు ఉజ్వలంగా ఉంటుంది. నైపుణ్య సాధనకు యువతకు ఆర్థిక చేయూతనిచ్చి, వారిని ఉద్యోగార్ధులను చేయాలనే లక్ష్యంలో ముఖ్యమంత్రి చంద్రబాబునాయుడు ‘ముఖ్యమంత్రి యువనేస్తం’ పథకానికి శ్రీకారం చుట్టారు. ఈ పథకం ద్వారా అర్హులైన నిరుద్యోగ యువతకు ప్రతి నెలా వెయ్యి రూపాయలు నిరుద్యోగ భృతి అందిస్తారు. యువనేస్తం వెబ్‌సైట్‌లో ఆధార్ కార్డ్ నెంబర్ ఎంటర్ చేసి పథకానికి అర్హులా కాదా అనే విషయాన్ని తెలుసుకోవచ్చు. తర్వాత అర్హులకు నైపుణ్యాభివద్ది, అప్రెంటిస్ ఆన్‌జాబ్ ట్రైనింగ్ అన్ని ఆన్‌లైన్‌లో జరిగిపోతాయి. యువనేస్తం వెబ్‌సైట్ ఓ రకంగా ఎంప్లాయ్‌మెంట్ ఎక్స్చేంజ్‌లా పనిచేస్తుంది. దేశంలోని వివిధ కంపెనీలు ఈ వెబ్‌సైట్ లో రిజిస్టర్ అయ్యి తమకు కావాల్సిన అభ్యర్థులను ఎంపిక చేసుకొని ఇంటర్వ్యూకి పిలుచుకునే అవకాశం కూడా ఉంది. ముఖ్యమంత్రి యువనేస్తం వెబ్ సైట్ ని సెప్టెంబర్ 14న ముఖ్యమంత్రి ప్రారంభిస్తారు. అక్టోబర్ 2 నుంచి యువత బ్యాంకు ఖాతాల్లో భృతి జమ అవుతుంది.   

పథకం ముఖ్య అంశాలు...

  • ఉచిత నైపుణ్యాభివృద్ధి శిక్షణ

  • స్వయం ఉపాధి శిక్షణ, స్వయం ఉపాధి కల్పన

  • అప్రెంటిస్ కార్యక్రమం. ఆన్ జాబ్ ట్రైనింగ్

  • కాంపిటేటివ్ పరీక్షల కోసం శిక్షణ

 నిరుద్యోగ భృతికి అర్హతలు  

  • 22 నుంచి 35 సంవత్సరాల మధ్య వయస్సు

  • పీజీ లేదా గ్రాడ్యుయేషన్ లేదా డిప్లొమా పూర్తి చేసి ఏడాది పూర్తి కావాలి.  

  • తెల్ల రేషన్ కార్డు కలిగి ఉండాలి 

  • ప్రజా సాధికార సర్వేలో నమోదై ఉండాలి 

  • కుటుంబంలో ఏ ఒక్కరు ప్రభుత్వ ఉద్యోగి అయ్యి ఉండకూడదు 

  • ఆంధ్రప్రదేశ్‌లో నివసిస్తున్న నిరుద్యోగులై ఉండాలి 

  • కుటుంబంలో నాలుగు చక్రాల వాహనం ఉండకూడదు 

  • ప్రభుత్వం నుంచి లోన్ /సబ్సిడీ రూ 50,000 మించి పొంది ఉండకూడదు.

  • గరిష్ఠంగా 2.5 ఎకరాల మాగాణి, 5 ఎకరాల మెట్ట భూమిని మించి ఉండకూడదు 

  • అనంతపురం జిల్లాకు సంబంధించి గరిష్టంగా 5 ఎకరాల మాగాణి, 10 ఎకరాల మెట్ట భూమిని మించి ఉండకూడదు 

  • ఈపీఎఫ్, ఈఎస్‌ఐసీ కింద నమోదుకాబడిన ప్రైవేటు సంస్థల్లో ఉద్యోగులై ఉండకూడదు

  • బ్యాంకు ఖాతా, మొబైల్ నంబర్, ఆధార్ కార్డుకు జతచేసి ఉండాలి. 

  • తల్లిదండ్రులు/ కుటుంబ సభ్యులకు సామాజిక పింఛన్లు లభిస్తున్నప్పటికీ, నిరుద్యోగ భృతికి అర్హులుగానే పరిగణించబడతారు. 

  • శారీరక వికలాంగుల కోటా కింద పెన్షన్ పొందే వారు అనర్హులు

  • కుల, మత ప్రాధాన్యాలు నిబంధనల ప్రకారం అమలుచేస్తారు

  • ప్రభుత్వ ఉద్యోగం చేస్తూ తొలగించిన వారు అనర్హులు  

  • నేరస్థుడిగా శిక్షింపబడినవారు అనర్హులు

  • ఇతర రాష్ట్రాల విశ్వ విద్యాలయాల నుండి డిగ్రీలను పొందిన అర్హులే

నమోదు చేసుకోవడం ఎలా ? 
ముఖ్యమంత్రి యువనేస్తం పథకం ద్వారా నిరుద్యోగ భృతి పొందాలనుకునే వారు ‘యువనేస్త్తం.ఏపీ.జీవోవి.ఇన్’ వెబ్‌సైట్ లోకి వెళ్లి దరఖాస్తు చేసుకోవాలి. వెబ్‌సైట్‌లోని అప్లై నౌ బటన్‌ను నొక్కి ఆధార్ కార్డు నెంబరు ఆధారంగా దరఖాస్తు ప్రక్రియ పూర్తి చేయాలి. విద్యార్హతకు సంబంధించిన పత్రాల కాపీలను వెబ్‌సైట్‌లో అప్‌లోడ్ చేయాల్సి ఉంటుంది. దరఖాస్తు ప్రక్రియలో ఎదురైన సమస్యలను పరిష్కరించుకోవడానికి కాల్ సెంటర్ నెంబర్ 1100ని సంప్రదించవచ్చు. 

నిరుద్యోగులకు వివిధ రంగాల్లో శిక్షణ... 
ఈ పథకం ద్వారా నిరుద్యోగులు తమకు ఇష్టమైన మూడు రంగాలలో ఉద్యోగం పొందేందుకు అవసరమైన శిక్షణను రాష్ట్ర ప్రభుత్వం ఉచితంగా ఇస్తుంది. కేంద్ర ప్రభుత్వం అమలు చేస్తున్న అప్రెంటిస్ కార్యక్రమాన్ని దీనికి అనుసంధానం చెయ్యడం ద్వారా నిరుద్యోగులకు ఆన్ జాబ్ ట్రైనింగ్ ఇప్పిస్తున్నది. ఇందుకోసమే దేశ వ్యాప్తంగా ఉన్న అనేక కంపెనీలను యువనేస్తంలో భాగస్వామ్యం చేస్తుంది. ఆన్ జాబ్ ట్రైనింగ్ ద్వారా నిరుద్యోగులకు ఉద్యోగాలు వచ్చే అవకాశాలు ఎక్కువుగా ఉంటాయి యువనేస్తం కార్యక్రమాన్ని ప్రతిష్టాత్మకంగా తీసుకున్న ఐటీ శాఖ మంత్రి నారా లోకేష్ రెండు నెలల్లోనే 36 సమీక్షా సమావేశాలు నిర్వహించారు. యువత ఆఫీసుల చుట్టూ తిరగాల్సిన అవసరం లేకుండా ముఖ్యమంత్రి యువనేస్తం కార్యక్రమం కోసం దరఖాస్తు చేసుకోవడం, నైపుణ్యాభివద్ది, అప్రెంటిస్ ఇలా అన్ని మాడ్యూల్స్ ఆన్ లైన్ ద్వారా చేసుకునే విధంగా ఈ వెబ్‌సైట్ ని రూపొందించారు. ఇతర రాష్ట్రాల్లో కేవలం సరైన సమాచారం లేకపోవడం వలనే ఇటువంటి కార్యక్రమం విఫలం అయ్యిందని గుర్తించిన మంత్రి నారా లోకేష్ అన్ని శాఖలను అనుసంధానం చేశారు. అన్ని శాఖల అధికారులతో సమీక్షలు నిర్వహించి వారి నుండి సమాచారం సేకరించారు. వివిధ విశ్వవిద్యాలయాల వైస్ ఛాన్స్‌లర్లతో సమావేశమై అందరిని సహకరించాలి అని కోరారు. ఈ కార్యక్రమం అమలులో కీలకం అయిన అంశం పిఎఫ్, ఈఎస్‌ఐ డేటా ని కేంద్రం నుండి తీసుకురావడానికి ఢిల్లీ నుంచి త్వరితగతిన వచ్చేందుకు బాగా శ్రమించారు. కేవలం ముఖ్యమంత్రి యువనేస్తం వెయ్యి రూపాయలు భృతి ఇచ్చి చేతులు దులుపుకునే కార్యక్రమం కాదని..యువత సరైన మార్గంలో నడిపించాలనే ఉద్దేశంతో ప్రవేశపెడుతున్నామని మంత్రి నారా లోకేష్ అంటున్నారు. 



స్పాట్‌లో సస్పెన్షన్

Updated By ManamSun, 09/09/2018 - 05:44
  • సోమవారానికల్లా మార్పు రావాలి.. లేకపోతే అధికారులపై కఠినచర్యలు 

  • మానవ తప్పిదాలు క్షమార్హం కావు.. డెంగ్యూ.. మలేరియా తీవ్రతపై సీఎం

  • ఎందుకు నియంత్రించలేదని నిలదీత.. ప్రజాప్రతినిధులు క్షేత్రస్థాయికి వెళ్లాలి

  • ముఖ్యమంత్రి చంద్రబాబు ఆదేశాలు


imageఅమరావతి: డెంగ్యూ..మలేరియా లాంటి జ్వరాలు ప్రబలుతున్నా వాటిని నియంత్రణలోకి తేవడంలో అధికారుల వైఫల్యంపై ముఖ్యమంత్రి చంద్రబాబు నాయుడు తీవ్రంగా మండిపడ్డారు. ఈ పరిస్థితిలో సోమవారానికల్లా మార్పు రాకపోతే అధికారులను స్పాట్‌లోనే సస్పెండ్ చేస్తానని హెచ్చరించారు. డెంగ్యూ, మలేరియా ప్రబలడంపై ముఖ్యమంత్రి చంద్రబాబు టెలికాన్ఫరెన్స్ నిర్వహించారు. ‘ఎందుకు నియంత్రించలేక పోతున్నారు..? మీరు ఎక్కడ విఫలం అయ్యారు..? అక్కడే ఎందుకని మకాం వేసి సకాలంలో చర్యలు తీసుకోలేదు..?’’ అంటూ అధికారులను నిలదీశారు.

కొందరు చేసిన తప్పులకు అందరికీ చెడ్డపేరు రావడాన్ని సహించనని చెప్పారు. విధి నిర్వహణలో అలక్ష్యాన్ని సహించేది లేదని.. హుద్‌హుద్ సమయంలో లాగానే విశాఖలో వచ్చి మకాం ఉంటానని చెప్పారు. అవసరమైతే వారం రోజులు అక్కడే మకాం వేస్తాననన్నారు. మానవ తప్పిదాలు క్షమార్హం కాదంటూ వివరించారు. ప్రతి స్థాయిలో సమన్వయం, సమర్థ నాయకత్వం ఉండాలన్నారు. ఎమ్మెల్యేలు, ఎంపీలు క్షేత్రస్థాయిలో పర్యటించాలని.. ప్రజల యోగక్షేమాలు విచారించాలని చెప్పారు. వ్యాధిగ్రస్తులకు వైద్యసేవలు అందేలా శ్రద్ధ వహించాలన్నారు. అసెంబ్లీకి సెలవులు ఉన్నప్పుడు ఈ పని చేయాలని ప్రజాప్రతినిధులకు చెప్పారు. ఎంపీలకు కూడా పార్లమెంటు లేదు కాబట్టి ప్రజాప్రతినిధులంతా క్షేత్రస్థాయిలో పర్యటించాలన్నారు. అసమర్ధతను, నిర్లక్ష్యాన్ని సహించే ప్రసక్తేలేదని.. బాధ్యతారాహిత్యాన్ని ఉపేక్షించనని సీఎం తేల్చిచెప్పారు. కిందిస్థాయి నుంచి పై స్థాయి వరకు పూర్తి బాధ్యతగా వ్యవహరించాలన్నారు. 

ఇక్కడే ఎందుకు?
మనం ఉన్నది ప్రజల కోసమే, వారికి సేవలు అందించడం కోసమేనని అందరూ గుర్తించుకోవాలన్నారు. రాష్ట్రంలో ఎక్కడా అంటువ్యాధుల బెడదలేదు. ఒక్క విశాఖలోనే ఎందుకని ప్రబలాయని సీఎం ప్రశ్నించారు. వివరణలు, సంజాయిషీలు కాదు కార్యాచరణ ప్రజల కళ్లకు కనిపించాలన్నారు. మెడికల్ అండ్ హెల్త్ డైరెక్టర్ ఎందుకని వెళ్లలేదు..? వైద్యశాఖ సలహాదారు ఎందుకని వెళ్లలేదు..? నువ్వు వెళ్లాలా..? నేను వెళ్లాలా..? అనుకోవడం బాధాకరమని, తలదించుకోవాల్సిన పరిస్థితి తెస్తున్నారని సీఎం మండిపడ్డారు. ప్రతిరోజూ హెల్త్ బులెటిన్లు, శానిటేషన్ బులిటెన్లు విడుదల చేయాలన్నారు. ఆర్టీజికి ఎన్ని ఫిర్యాదులు వచ్చాయి, ఏవిధంగా స్పందనలు వచ్చాయి, ఏయే చర్యలు తీసుకున్నారు అనేది రోజువారీ బులెటిన్లలో వెల్లడించాలన్నారు. విశాఖలో 72 వార్డులలో ఒక్కో వార్డుకు ఒక్కొక్క సీనియర్ అధికారిని నియమించి వారికి వార్డు పర్యవేక్షణ బాధ్యత అప్పగించాలన్నారు. అధికారులు, సిబ్బంది ఇంటింటికీ తిరుగుతూ ప్రజల యోగక్షేమాలు విచారించాలన్నారు. ఎక్కడెక్కడ మురుగునిల్వలు ఉన్నాయో పరిశీలించాలన్నారు.

యాంటీ లార్వా ఆపరేషన్లు ముమ్మరం చేయాలని.. దోమల ఉత్పత్తి కేంద్రాలను (మస్కిటో బ్రీడింగ్ సోర్స్) ధ్వంసం చేయాలని సూచించారు. మురుగు నిల్వలపై ఆయిల్ బామ్‌లు విడుదల చేయాలన్నారు. బ్లీచింగ్, క్లోరినేషన్, ఫాగింగ్ యుద్ధ ప్రాతిపదికన అన్నిచోట్ల చేపట్టాలన్నారు. క్లోరిన్ టాబ్లెట్లు పంపిణీ చేయాలని.. కాచి చల్లార్చిన నీటినే తాగేలా ప్రజలను చైతన్యపరచాలన్నారు. ఎక్కడెక్కడ మురుగు నిల్వ చేరిందో ఫొటోలు తీసి పంపాలని ఆదేశించారు. డ్రోన్ల ద్వారా అన్ని చోట్ల ప్రత్యేక పర్యవేక్షణలు జరపాలన్నారు. ఆసుపత్రికి ఈ రోజు ఎన్ని కేసులు వచ్చాయనేది నమోదు చేయాలని, ఆయా కేసులను జియో ట్యాగింగ్ చేయాలని చెప్పారు. వ్యాధి సోకిన ప్రతి ఇంటి చుట్టుపక్కల వందఇళ్ల వారిని అప్రమత్తం చేయాలన్నారు. సమాచారం తీసుకోవడం ఎంత ముఖ్యమో దానికి అనుగుణంగా స్పందించి చర్యలు తీసుకోవడం అంతే ముఖ్యమన్నారు.

‘‘అంటువ్యాధులు తీవ్రమయ్యాక నివారణ చర్యలు చేపట్టడం కాదు. ముందస్తు నివారణ చర్యలు చేపట్టాలి. అసలు అంటువ్యాధులను జీరో చేయాల’’ని ముఖ్యమంత్రి స్పష్టం చేశారు. వైద్య, ఆరోగ్యశాఖ, మున్సిపల్, పంచాయతీరాజ్ శాఖలదే ప్రధాన బాధ్యతన్నారు. ఈ మూడు శాఖలు సమన్వయంతో పనిచేయాలన్నారు. పరిస్థితి అదుపులోకి వచ్చేదాకా సెలవులు రద్దు చేసుకోవాలన్నారు. సమర్ధంగా విధులు నిర్వహించేవారిని అభినందించాలని..నిర్లక్ష్యంగా వ్యవహరించే వారిపై కఠినంగా వ్యవహరిస్తామని ముఖ్యమంత్రి తేల్చిచెప్పారు. జిల్లాల కలెక్టర్లు, మున్సిపల్ కమిషనర్లు, డిఎంహెచ్‌వోలు, ఎమ్మెల్యేలు, ఉన్నతాధికారులు పాల్గొన్నారు.



ప్రజలను మెప్పించాలి

Updated By ManamFri, 09/07/2018 - 22:43
  • అందుకు తగ్గ వ్యూహాలు కావాలి

  • సభలో చర్చలు అర్ధవంతంగా జరగాలి

  • సభకు హాజరు కాని సభ్యత్వం వృథా

  • అసెంబ్లీ వ్యూహా కమిటీ సభ్యులతో ముఖ్యమంత్రి చంద్రబాబు

imageఅమరావతి: ప్రతిపక్షం ఉన్నప్పుడే వ్యూహాల గురించి యోచన చేయడం కాదని.. ఎల్లప్పుడూ ప్రజలను మెప్పించే వ్యూహాలు ఉండాలని అసెంబ్లీ వ్యూహ కమిటీ సభ్యులకు టీడీపీ అధినేత, ముఖ్యమంత్రి చంద్రబాబు సూచించారు. అసెంబ్లీ వ్యూహ కమిటీ సభ్యులతో ముఖ్యమంత్రి చంద్రబాబు శుక్రవారం ఉదయం టెలీ కాన్ఫరెన్స్ నిర్వహించారు. ఇందులో మంత్రులు, విప్‌లు, పార్టీ బాధ్యులు, ఇతర టీడీపీ ముఖ్యులు పాల్గొన్నారు. ఈ సందర్భంగా సీఎం చంద్రబాబు మాట్లాడుతూ.. ప్రతిపక్షం లేకపోయినా అసెంబ్లీ బాగా జరిగిందనే పేరు రావాలని ఆకాక్షించారు. ప్రజలు అన్నింటిని నిశితంగా గమనిస్తున్నారని వారంతా సానుకూల దృక్ఫథం గలవారన్నారని సీఎం చంద్రబాబు చెప్పుకొచ్చారు. ప్రతికూల స్వభావాన్ని ప్రజలు సహించరని.. ఇక బాధ్యతా రాహిత్యాన్ని అయితే అసలే సహించరని చంద్రబాబు విశ్లేషించారు. ప్రభుత్వం పనిచేసేది ప్రతిపక్షం కోసం కాదని..ప్రజల కోసమని అన్నారు.

కాగా అసెంబ్లీకి ఎందుకు వెళ్లడం లేదని ప్రతిపక్షాన్ని ఇటీవల ఉపాధ్యాయులు నిలదీశారని దానికి సమాధానం చెప్పలేని స్థితిలో ైవె సీపీ నేతలు ఉన్నారని సీఎం వ్యాఖ్యానించారు. అన్నివర్గాల ప్రజల్లో ప్రతిపక్షంపై తీవ్ర వ్యతిరేకత ఉందన్నారు. ప్రాథమిక బాధ్యతల నుంచి ప్రతిపక్షం విస్మరించడమేనని చంద్రబాబు విశ్లేషించారు. సభకు హాజరుగాని సభ్యత్వం వృథా అని.. ప్రతి సమావేశానికి హాజరుకావడం శాసన సభ్యుడి ప్రాథమిక బాధ్యత అని సీఎం హితవు పలికారు. సభ్యులు ఎల్లప్పుడూ ప్రశ్నలు వేయడమే కాదని, స్వల్పకాలిక, దీర్ఘకాలిక చర్చలు అర్ధవంతంగా జరిగేలా చూడాలని ముఖ్యమంత్రి చంద్రబాబు అభిప్రాయపడ్డారు. శాసన మండలిలో, రాజధాని నిర్మాణంపై జరిగే చర్చలో అందరూ పాల్గొనాలని సీఎం చంద్రబాబు టీడీపీ ప్రజాప్రతినిధులకు సూచించారు. అనుబంధ ప్రశ్నల ద్వారా లోతైన చర్చ జరిగేలా శ్రద్ధ చూపడం, విషయ పరిజ్ఞానంతో వాస్తవాలను ప్రజల్లోకి పంపడం చేయాలని చంద్రబాబు పార్టీ నేతలకు సూచించారు.





Related News