Tirumala Temple

సప్తవర్ణ శోభితం

Updated By ManamWed, 11/14/2018 - 22:47
  • తిరుమలలో స్వామికి పుష్పయాగం

  • 14 రకాల పూలు.. 6 రకాల పత్రాలు

  • మొత్తం 9 టన్నుల పుష్పాలతో పూజ

  • స్వామికి వైభవంగా స్నపన తిరుమంజనం

tirumalaతిరుమల: పవిత్రమైన కార్తీకమాసం లో శ్రవణా నక్షత్రాన్ని పురస్కరించుకుని తిరుమల శ్రీవారి ఆలయంలో బుధవారం పుష్పయాగ మహోత్సవం అంగరంగ వైభవంగా జరిగింది. సువాసనలు వెదజల్లే 14 రకాల పుష్పాలు, 6 రకాల పత్రాలతో శ్రీదేవి, భూదేవి సమేత మలయప్పస్వామికి వేడుకగా పుష్పార్చన నిర్వహించారు. రంగురంగుల పుష్పాలు, పత్రాల మధ్య స్వామి, అమ్మవార్ల వైభవం మరింత ఇనుమడించింది. శ్రీవారి బ్రహ్మోత్సవాల్లో అర్చకుల వల్ల గానీ, ఉద్యోగుల వల్ల గానీ, భక్తుల వల్ల గానీ జరిగిన దోషాల నివారణకు పుష్ప యాగం నిర్వహిస్తారు. శ్రీవారి ఆలయంలోని సంపంగి ప్రాకారంలో గల కల్యాణమండపంలో శ్రీదేవి, భూదేవి సమేత మలయప్పస్వామికి మధ్యా హ్నం 1.00 నుంచి సాయంత్రం 5.00 గంటల వరకు పుష్పయాగం కన్నుల పండుగగా జరిగింది. స్వామి, అమ్మవార్ల ఉత్సవర్లను పట్టువస్త్రాభరణాలతో అలంకరించి వేదమంత్రాల నడుమ పుష్పకైంకర్యం చేశారు. చామంతి, సంపంగి, నూరు వరహాలు, రోజా, గన్నేరు, మల్లె, మొల్లలు, కనకాంబరం, తామర, కలువ, మొగలిరేకులు, మానసంపంగి పుష్పాలు, తులసి, మరు వం, ధవనం, బిల్వం, పన్నీరు, కదిరిపచ్చ పత్రాలతో స్వామి, అమ్మవార్లను అర్చించారు. ఈ సందర్భంగా వేదపండితులు రుగ్వేదం, శుక్లయజుర్వేదం, కృష్ణ యజుర్వేదం, సామవేదం, అధర్వణ వేదాలను పఠించారు.

పుష్పాధిదేవుడు ‘పుల్లుడు’ ఆవాహన
పుష్పాలకు అధిపతి అయిన దేవుడు పుల్లుడిని ఆవాహన చేసి 20 సార్లు వివిధ రకాల పుష్పాలతో అర్చించారు. ఉత్సవమూర్తుల నిలువెత్తు వరకు ఉండేలా పుష్ప నివేదన చేపట్టారు. అనంతరం స్వామివారు తన దేవేరులతో కలిసి బంగారు తిరుచ్చిని అధిరోహించి ఆలయ నాలుగు మాడ వీధులలో ఊరేగి భక్తులను అనుగ్రహించారు. అనంతరం ఆలయంలోకి ప్రవేశించడంతో శ్రీవారి పుష్పయాగం నేత్రపర్వంగా ముగిసింది. అనంతరం టీటీడీ ఈవో అనిల్‌కుమార్ సింఘాల్ మాట్లాడుతూ శ్రీవారి బ్రహ్మోత్సవాలు ముగిసిన తరువాత కార్తీక మాసంలో శ్రీవారి జన్మనక్షత్రమైన శ్రవణా నక్షత్రం రోజున పుష్పయాగం నిర్వహించడం ఆనవాయితీగా వస్తుందన్నారు. లోక కళ్యాణార్థం 15వ శతాబ్దం నుంచి పుష్పయాగం నిర్వహిస్తున్నట్లు తెలిపారు. పుష్పయాగానికి మొత్తం 9 టన్నుల పుష్పాలు, పత్రాలను 20 మంది దాతలు అందించారు. తమిళనాడు నుంచి 5 టన్నులు, కర్ణాటక నుంచి 2 టన్నులు, ఆంధ్రప్రదేశ్, తెలంగాణ నుంచి 2 టన్నుల పుష్పాలను దాతలు విరాళంగా అందించారు. 

వేడుకగా స్నపన తిరుమంజనం
పుష్పయాగం సందర్భంగా ఉదయం 9.00 నుంచి 11.00 గంటల వరకు స్వామి, అమ్మవార్ల ఉత్సవమూర్తులకు స్నపన తిరుమంజనం నిర్వహించారు. ఈ సందర్భంగా పాలు, పెరుగు, తేనె, కొబ్బరినీళ్లు, పసుపుతో అభిషేకం చేసి చివరగా చందనలేపనాన్ని అలంకరించారు. ఆ తరువాత తులసిమాలలను ధరింపజేసి నక్షత్రహారతి నివేదించారు. ఈ కార్యక్రమాలలో టీటీడీ సీవీఎస్వో గోపినాధ్ జెట్టి, అదనపు సీవీఎస్వో శివకుమార్‌రెడ్డి, ఆలయ డిప్యూటీ ఈవో హరీంద్రనాధ్, ప్రముఖ పారిశ్రామికవేత్త బొట్ట పర్వతయ్య దంపతులు, ఇతర అధికారులు, విశేష సంఖ్యలో భక్తులు పాల్గొన్నారు.



తిరుమలలో వైభవంగా పుష్పాల ఊరేగింపు 

Updated By ManamWed, 11/14/2018 - 17:17

Flowers procession, Tirumala temple, Deputy EO Harindranathతిరుమ‌ల‌: తిరుమల శ్రీవారి ఆలయంలో కారీక్త మాసం శ్రవణా నక్షత్రాన్ని పురస్కరించుకుని నిర్వహించే పుష్పయాగ మహోత్సవానికి అవసరమైన పుష్పాల ఊరేగింపు బుధవారం తిరుమలలో ఘనంగా జరిగింది. తిరుమలలోని కల్యాణవేదిక వద్దగల ఉద్యానవన విభాగంలో ముందుగా పుష్పాలకు ప్రత్యేక పూజలు నిర్వహించారు. టిటిడి తిరుమల జెఈవో కె.ఎస్‌.శ్రీనివాసరాజు, శ్రీవారి ఆలయ డిప్యూటీ ఈవో హరీంద్రనాధ్‌, ఉద్యానవన విభాగం డిప్యూటీ డైరెక్టర్‌ శ్రీనివాసులు కలిసి పుష్పాలను ఊరేగింపుగా శ్రీవారి ఆలయం వరకు తీసుకువచ్చారు. శ్రీవారి ఆలయం వద్ద టిటిడి ఈవో శ్రీఅనిల్‌కుమార్‌ సింఘాల్‌, ఆలయ అర్చకులు పుష్పాలను స్వీకరించారు. 

పుష్పాల ఊరేగింపులో శ్రీవారి సేవకులు, ఉద్యానవన విభాగం సిబ్బంది పాల్గొన్నారు. ఈ సందర్భంగా తిరుమల జెఈవో కె.ఎస్‌.శ్రీనివాసరాజు మాట్లాడుతూ దేశం సుభిక్షంగా, సస్యశ్యామలంగా ఉండాలని 15వ శతాబ్దం నుంచి పుష్పయాగం నిర్వహిస్తున్నట్లు తెలిపారు. ఆ తరువాత నిలిచిపోయిన ఈ మహోత్సవాన్ని, 1980, నవంబరు 14వ తేదీన పునరుద్ధరించి, అటుతరువాత ప్రతి ఏడాది క్రమం తప్పకుండా నిర్వహిస్తోందన్నారు. శ్రీవారి పుష్పయాగానికి మొత్తం 9 టన్నుల పుష్పాలు, పత్రాలను వినియోగిస్తున్నామని పేర్కొన్నారు. ఇందులో సువాసనలు వెదజల్లే 14 రకాల పుష్పాలు, 6 రకాల పత్రాలతో స్వామి, అమ్మవార్లకు వేడుకగా పుష్పార్చన నిర్వహించనున్నట్లు తెలిపారు.



సూర్య.. చంద్రులపై స్వామి

Updated By ManamTue, 10/16/2018 - 22:50
  • వైభవంగా తిరుమాడవీధుల్లో ఊరేగింపు

  • సూర్యప్రభ వాహనంపై పగలు.. చంద్రప్రభపై రాత్రి విహారం

  • తిరుమలలో బ్రహ్మోత్సవాలు.. హాజరైన అశేష భక్తజనం

TIRUMALAతిరుమల: తిరుమలలో జరుగుతున్న శ్రీవేంకటేశ్వర స్వామి వారి బ్రహ్మోత్సవాలలో ఏడోరోజున ఉదయం సూర్యప్రభ వాహనంపైన, రాత్రి చంద్ర ప్రభ వాహనంలోను మలయప్పస్వామి తిరు మాడ వీధుల్లో కనువిందు చేశారు. తన చల్లని కిరణాలతో భక్తులను అమృత స్వరూపలను చేశారు. నక్షత్రాలకు చంద్రుడు అధిపతి అయితే, శ్రీవారు సమస్త విశ్వానికి అధిపతిగా చంద్ర వాహనంలో భక్తులను కటాక్షించారు. సర్వకళా సమాహారాత్మకుడైన ఆది నారాయ ణుడు తన కళల నుంచి 16 కళలు చంద్రు నిపై ప్రసరింప చేసినందున చంద్రుడు కళానిధి అయ్యాడు. చంద్రప్రభ వాహనంలో శ్రీవారిని దర్శించడం సకల తాపహరం, పాపహరం అవుతుందని భక్తుల నమ్మకం. అదే విధంగా ఉదయం సూర్యప్రభ వాహనంపై బద్రీ నారాయణుడి అవతారంలో యోగముద్రలో తిరుమాడ వీధుల్లో విహరించారు. సూర్యప్రభ వాహనంపై గద, కమలం ధరించిన శ్రీ మహావిష్ణువు అలంకారంలో తిరుమాడ వీధుల్లో భక్తులను కటాక్షించారు. సూర్యనారాయణుడు సప్త అశ్వాలతో రథాన్ని నడుపుతూ స్వామి వారిని తీసుకెళుతున్నట్లుగా సూర్యప్రభ వాహనాన్ని రూపొందించారు.  భక్తజన బృందాల చెక్క భజనలు, కోలాటాలతో స్వామివారిని కీర్తిస్తుండగా, మంగళ వాయిద్యాల నడుమ స్వామివారి ఉత్సవం కోలాహలంగా జరిగింది. భక్తులు అడుగడుగునా కర్పూర హారతులు సమర్పించి, స్వామివారిని దర్శించుకున్నారు. సూర్యనారాయణుడు సూర్యప్రభా మధ్యస్తుడై దివ్యకిరణ కాంతులతో ప్రకాశిస్తూ, భక్తులను ఆరోగ్యవంతులను చేస్తూ సూర్యప్రభ వాహనంలో దర్శనమిచ్చాడు. సూర్యుడు సకల రోగ నివారకుడు, ఆరోగ్యకారకుడు, ప్రకృతి చైతన్య ప్రదాత, ఔషధీపతి అయిన చంద్రుడు కూడా సూర్యతేజం వల్లనే ప్రకాశిస్తూ వృద్ది పొందుతున్నారు. ఈ ఉత్సవంలో శ్రీవారి చుట్టూ ఉన్న సూర్యప్రభ సకలజీవుల చైతన్యప్రభ, సూర్య మండల మధ్యవర్తి శ్రీమన్నారాయణుడే, అందుకే సూర్యుని సూర్యనారాయణుడు అని కొలుస్తున్నాం. ఇంతటి మహాతేజో పూర్ణమైన సూర్యప్రభ వాహనంలో ఉండే సూర్యనారాయణుడిని దర్శించి భక్తులకు ఇతోధిక భోగభాగ్యాలు, సత్సంతాన సంపదలు, ఆయురారోగ్యాలు సిద్ధిస్తాయని భక్తుల నమ్మకం. కార్యక్రమంలో పెద్దజీయర్ స్వామి, చిన్నజీయర్ స్వామి, ఈఓ అనిల్ కుమార్ సింఘాల్, జేఈఓ శ్రీనివాసరాజు తదితరులు పాల్గొన్నారు.



వైభవంగా గరుడసేవ

Updated By ManamMon, 10/15/2018 - 07:10
  • వేంకటేశునికి ప్రియమైన వాహనం.. స్వామికి అత్యంత విశేష అలంకారం

  • 5 పేటల సహస్రనామ కాసులమాల..  గరుడసేవకు ముందు భారీ వర్షం

  • గొడుగులు వేసుకుని చూసిన భక్తులు.. ఉదయం మోహినీరూపంలో స్వామి

garudaతిరుమల: తిరమలలో అంగరంగ వైభవంగా జరుగుతున్న నవరాత్రి బ్రహ్మోత్సవాలలో ఐదో రోజైన ఆదివారం రాత్రి.. మలయప్ప స్వామి తనకు అత్యంత ప్రియమైన గరుడవాహనంపై భక్తులకు దర్శనమిచ్చారు. ఈ సందర్భంగా స్వామివారిని 5 పేటల సహస్రనామ కాసులమాల, చతుర్భుజ లక్ష్మీహారం, మైసూర్ మహారాజు శ్రీవారికి కానుకగా సమర్పించిన మకర కంటి తదితర ఆభరణాలతో అలంకరించారు. సహస్రనామ కాసులమాలలో గల 1008 కాసులపై విష్ణుసహస్ర నామాలు ఉంటాయి. చతుర్భుజ లక్ష్మీహారంలో గల కాసులపై శ్రీవారి దేవేరి అయిన లక్ష్మీదేవి ప్రతిమలుంటాయి. సహస్రనామ కాసులమాల, చతుర్భుజ లక్ష్మీహారం ఆభరణాలను నిత్యం శ్రీవారి మూలమూర్తికి అలంకరిస్తారు. గరుడవాహన సేవ ఉన్న ఒక్కరోజు మాత్రం వీటిని ఉత్సవ మూర్తి అయిన మలయప్ప స్వామికి అలంకరించడం విశేషం. గరుడ వాహన సేవకు కొద్ది నిమిషాల ముందు నుంచి తిరుమలలో హోరున వర్షం మొదలైంది. అంత జోరు వర్షంలోనూ భక్తులు భక్తిభావంతో వాహనసేవను తిలకించారు. పౌరాణిక నేపథ్యంలో 108 వైష్ణవ దివ్య దేశాలలోనూ గరుడసేవ అత్యంత ప్రాముఖ్యతను సంతరించుకుంది. గరుడవాహనం ద్వారా స్వామి వారు దాసానుదాస ప్రపత్తికి తాను దాసుడని తెలియజెబుతారు. అంతేగాక జ్ఞానవైరాగ్య ప్రాప్తికోరే మానవులు జ్ఞానవైరాగ్య రూపాలైన రెక్కలతో విహరించే భగవదిష్టుడైన గరుడుని దర్శిస్తే సర్వపాపాలు తొలగుతాయని భక్తకోటికి తెలియజెబుతున్నారు. ఉదయం శ్రీవారు మోహినీ రూపంలో శృంగార రసాధిదేవతగా సర్వాలంకార భూషితుడై భక్తులకు దర్శనమిచ్చాడు. పక్కనే మరో తిరుచ్చిపై శ్రీకృష్ణుడు అలంకృతుడై భక్తులకు అభయమిచ్చాడు.



ముత్యాల పందిరిపై మలయప్ప 

Updated By ManamSat, 10/13/2018 - 01:40
  • నవరాత్రి బ్రహ్మోత్సవాలలో శ్రీవారి దర్శనం

  • రాత్రి నాలుగు మాడవీధుల్లో స్వామి విహారం

  • ఉదయం సింహ వాహనంపై భక్తులకు అభయం

  • యోగ నరసింహుడి అవతారంలో దర్శనభాగ్యం

  • సింహ వాహనం పోస్టల్ కవర్ ఆవిష్కరణ 

TIRUMALAతిరుమల: ముత్యాల నిర్మలకాంతులు వ్యాపించడానికి, ఆ కాంతులు దర్శించి భక్తులు ముక్తులు కావడానికి రాత్రి వేళ అనుకూలం. అందుకే శ్రీమలయప్పకు బ్రహ్మోత్సవాలలో మూడో రోజు శుక్రవారం రాత్రి మొదటియామంలో ముత్యాల పందిరిలో కూర్చొని విహరించే కైంకర్యాన్ని పెద్దలు నిర్ణయించారు. ముత్యం స్వచ్ఛతకు సంకేతం. మనిషి ఆత్మ ఎన్నో జన్మల అనంతరం విశ్వలోకాల నుంచి రాలి, దుర్లభమైన మానవజన్మను సంతరించుకుంటుంది. శరీరాన్ని ఆధ్యాత్మిక సంపదతో శుద్ధి చేసుకుంటే బుద్ధి ముత్యంలాగా మారి, జనన, మరణ చక్రం నుంచి విడుదలై మోక్షాన్ని పొందుతుంది. ఇలా స్వామివారికి మిక్కిలి ప్రీతిపాత్రమైన ముత్యాలహారాలు - రత్నాల వల్ల కలిగే వేడిమిని, పుష్పాల వల్ల కలిగే సుగంధాన్ని తమలో ఇముడ్చుకుని, స్వామివారి వక్షస్థలానికి, అక్కడి లక్ష్మీదే వికి సమశీతోష్ణస్థితిని చేకూరుస్తూ, తాపగుణాన్ని హరిస్తూ, ఉత్సాహాన్ని, ప్రశాంతతను చేకూరుస్తున్నాయి. తిరుమల శ్రీ వేంకటేశ్వరస్వామివారి నవరాత్రి బ్రహ్మోత్సవాల్లో మూడో రోజైన శుక్రవారం ఉదయం అనంతతేజో మూర్తి అయిన శ్రీమలయప్ప సింహ వాహనంపై యోగ నరసింహుడి అవతారంలో భక్తులకు అభయమిచ్చారు. రాత్రి ముత్యాల పందిరిపై నాలుగు మాడవీధుల్లోను విహరించారు. ఉదయం సింహవాహనంపై స్వామివారు నాలుగు మాడ వీధుల్లో విహరించి భక్తులకు దర్శనభాగ్యం కల్పించారు. వాహనం ముందు గజరాజులు నడుస్తుండగా, భక్తజన బృందాలు భజనలు, కోలాటలు, జీయ్యంగార్ల ఘోషి ్టతో స్వామివారిని కీర్తిస్తుండగా, మంగళవాయిద్యాల నడుమ స్వామివారి వాహనసేవ కోలాహలంగా జరిగింది. భక్తులు అడుగడుగునా కర్పూరహారతులు సమర్పించి శ్రీవారిని దర్శించుకున్నారు. ఈ సందర్భంగా భారత పోస్టల్ శాఖ రూపొందించిన సింహ వాహనం పోస్టల్ కవర్‌ను టీటీడీ కార్యనిర్వహణాధికారి అనిల్‌కుమార్ సింఘాల్ ఆవిష్కరించా రు. మూడో రోజు ఉదయం శ్రీవారు దుష్టశిక్షణ, శిష్టరక్షణ కోసం సింహంపై అధిరోహించి అభయ మిచ్చారు. సింహం పరాక్రమానికి, ధైర్యానికి, తేజస్సుకు, ఆధిపత్యానికి, మహాధ్వ నికి సంకేతం. ఉదయం నిద్ర లేవగానే దర్శించే వస్తువుల్లో ‘సింహదర్శనం’ అతి ముఖ్యమైంది. సింహ రూప దర్శనంతో పైన పేర్కొన్న శక్తులన్నీ చైతన్యవంతాలవుతాయి. సోమరితనం నశించి పట్టుదలతో ప్రవర్తించి సర్వత్రా విజయలమై ఆధిపత్యంతో రాణించే స్ఫూర్తి సిద్ధిస్తుంది. అజ్ఞానంతో ప్రవర్తించే దుష్టులను హరించడంలో నేను, నా వాహనమైన సింహమూ సమాన ప్రయత్నంతో ఉంటామని ఈ సింహ వాహనోత్సవం ద్వారా శ్రీవారు భక్తులకు తెలియజేస్తున్నారు. దీంతో పాటు సాయంత్రం 6 నుంచి 7 గంటల వరకు ఊంజల్‌సేవ వైభవంగా జరగింది. రాత్రి 8 నుండి 10 గంటల వరకు ముత్యపుపందిరి వాహనంపై శ్రీవారు భక్తులకు దర్శనమిచ్చారు. 

భక్తుల రద్దీకి తగ్గట్టు ఏర్పాట్లు: జేఈఓ 
శ్రీవారి నవరాత్రి బ్రహ్మోత్సవాలు, దసరా సెలవులు, పెరటాశి మాసం నేపథ్యంలో భక్తుల రద్దీకి తగ్గట్లు ఏర్పాట్లు చేపట్టాలని టీటీడీ జెఈవో కె.ఎస్.శ్రీనివాసరాజు అధికారులను ఆదేశించారు. తిరుమలలోని రాంభగీచా వసతి గృహం ఎదురుగా ఉన్న సమావేశ మందిరంలో ఆయన సమీక్ష నిర్వహించారు. తరువాత మాట్లాడుతూ వరుస సెలవులు, పెరటాశి మాసం సందర్భంగా తిరుమలలో భక్తుల రద్దీ అధికమవుతుందని, అందుకు తగ్గట్లు ముందస్తు ఏర్పాట్లు చేసుకోవాలన్నారు. భక్తులకు దర్శనం, వసతి, లడ్డూ ప్రసాదాలు, అన్నప్రసాదం, తాగునీరు, వైద్యం, తదితర సౌకర్యాలను ప్రణాళికాబద్ధంగా ఏర్పాట్లు చేయాలన్నారు. భక్తులకు వసతి కేటాయింపులో అధికారులు మరింత పారదర్శకత పాటించాలని, ముందు వచ్చిన వారికి ముందు వసతి అనే నియమావళి ప్రకారం గదులు కేటాయించాలన్నారు. విజిలెన్స్ అధికారులు తరచూ తనిఖీలు చేపట్టాలని సూచించారు. 14వ తేది గరుడసేవ రోజున భక్తులకు అవసరమైన సౌకర్యాలను ముందస్తుగా సిద్ధం చేసుకోవాలన్నారు.



హంసవాహనాధీశా.. గోవిందా

Updated By ManamFri, 10/12/2018 - 01:24
  • హంసవాహనంపై మలయప్ప విహారం

  • తిరుమలలో వైభవంగా బ్రహ్మోత్సవాలు

  • ఉదయం చిన్నవాహనంపై ఊరేగింపు

  • సాయంత్రం వైభవంగా ఊంజల్ సేవ

  • 40 టన్నుల పూలతో అలంకరణలు

tpt-vahanamతిరుమల: తిరుమల శ్రీ వేంకటేశ్వర స్వామివారి నవరాత్రి బ్రహ్మోత్సవాల్లో రెండో రోజైన గురువారం రాత్రి మలయప్పస్వామి హంస వాహనసేవలో  జ్ఞానమూర్తిగా ప్రకాశించారు. ఇతిహాసాల ప్రకారం.. బ్రహ్మ వాహనమైన హంస జ్ఞానానికి ప్రతీక. పాలను, నీళ్లను వేరుచేసే విచక్షణ దీని స్వభావం. ఇది ఆత్మానాత్మ వివేకానికి సూచకం. అందుకే ఉపనిషత్తులు పరమాత్మతో సంయోగం చెందిన మహనీయులను పరమహంసగా అభివర్ణిస్తున్నాయి. శ్రీవారు భక్తులలో అహంభావాన్ని తొలగించి జ్ఞానసిద్ధి కలిగించేందుకే హంస వాహనాన్ని అధిరోహిస్తారని పురాణాలు చెబుతున్నాయి.

ఉదయం చిన్నశేషునిపై...
గురువారం ఉదయం ఐదు తలల చిన్నశేష వాహనంపై మురళీకృష్ణుడి అలంకారంలో ఊరేగుతూ వులయప్ప స్వామి భక్తులకు దర్శనమిచ్చారు. వాహనం ముందు గజరాజులు, అశ్వాలు ఠీవిగా నడుస్తుండగా, భక్తజన బృందాలు చెక్కభజనలు, కోలాటాలతో స్వామివారిని కీర్తిస్తుండగా, మంగళవాయిద్యాలు, డ్రమ్స్ వాయిద్యాలు, ఇతర కళాప్రదర్శనల నడుమ స్వామివారి వాహనసేవ అత్యంత వైభవంగా జరిగింది. ఐదుతలలు గల చిన్నశేష వాహనంపై శ్రీనివాసుడు ఒక్కరే ఊరేగారు. చిన్నశేష వాహనం శ్రీవారి వ్యక్తరూపమైన పాంచభౌతిక ్రపకృతికి సంకేతం. కనుక ఈ వాహనం పంచభూతాత్మకమైన విశ్వానికి, అందులో నివసించే జీవునికి వరాలిస్తుంది. విశ్వం కన్పించే శ్రీవారి ప్రకృతి. విష్ణువు ఈ ప్రకృతికి ఆధారమై దాన్ని నడిపించేశక్తి. స్వామి విశ్వాన్ని రక్షించేవాడు కనుక శేషునిపై తానొక్కడే విహరించాడు. పంచశిరస్సుల చిన్నశేషుని దర్శనం మహాశ్రేయప్రదం. శేషవాహనోత్సవాన్ని దర్శిస్తే దుష్టశక్తుల వల్ల కలిగే దుష్ఫలాలు తొలగి, భక్తులు కుండలినీయోగ సిద్ధించి, సుఖశాంతులతో ఆనందజీవులతారు. అనంతరం సాయంత్రం 6 నుంచి 7 గంటల వకు ఊంజల్‌సేవ వైభవంగా జరిగింది. 

40 టన్నుల పూలు..
నవరాత్రి బ్రహ్మోత్సవాలకు దాదాపు 40 టన్నుల సాంప్రదాయ పుష్పాలతో అలంకరణలు చేపట్టామని టీటీడీ గార్డెన్ విభాగం డైరెక్టర్ శ్రీనివాసులు తెలిపారు. కట్ ఫ్లవర్స్ రెండు లక్షలు, సీజనల్ ఫ్లవర్స్ 60 వేలు, పౌరాణిక విగ్రహాలు, సైకత శిల్పాలు, కూరగాయలతో మలయప్ప స్వామి, లక్ష్మీదేవి విగ్రహాలను ఏర్పాటు చేశామన్నారు. బ్రహ్మోత్సవాలకు వచ్చిన భక్తులకు ఉచితంగా ఆయుర్వేద మందులను అందజేస్తున్నామని ఎస్.వి. ఆయుర్వేద వైద్య కళాశాల సూపరిటెండెంట్ డాక్టర్ పార్వతీదేవి తెలిపారు. చిన్న శేషవాహనం సేవా కార్యక్రమంలో ఇతిహాస కాలంలో మానవ సంబంధాలు, ఉషా కల్యాణం అనే పుస్తకాలను ఈఓ అనిల్ కుమార్ సింఘాల్ ఆవిష్కరించారు.



నేడు అంకురార్పణ 

Updated By ManamTue, 10/09/2018 - 07:54
  • రేపటి నుంచి నవరాత్రి బ్రహ్మోత్సవాలు

  • తిరుమలలో 9 రోజుల సందడి.. బ్రహ్మదేవుడు చేసే ఉత్సవాలు

  • రథోత్సవానికి బంగారు రథం.. ఈసారి రెండు బ్రహ్మోత్సవాలు

  • అధికమాసం రావడమే కారణం.. ఉత్సవాలకు ఏర్పాట్లు పూర్తి

TIRUMALAతిరుపతి: కలియుగ వైకుంఠమైన తిరుమలలో శ్రీ వేంకటేశ్వర స్వామివారి నవరాత్రి బ్రహ్మోత్సవాలకు మంగళవారం అంకురార్పణ జరగనుంది. రాత్రి 7 నుంచి 8 గంటల వరకు సేనాధిపతి ఉత్సవం, శ్రీవారి ఆలయంలోని యాగశాలలో అంకురార్పణ ఘట్టాన్ని శాస్త్రోక్తంగా నిర్వహిస్తారు. ఆగమశాస్త్రం ప్రకారం ప్రతి వైదిక ఉత్సవానికి ముందు అంకురార్పణ చేపడతారు. నవధాన్యా లను మొలకెత్తించి ఈ భూమండలమంతా పాడిపంటలతో, పశుపక్ష్యాదు లతో సుభిక్షంగా, సస్యశ్యామలంగా ఉండాలని భగవంతుడిని ప్రార్ధిస్తారని శ్రీవారి ఆలయ ప్రధానార్చకులు వేణుగోపాల దీక్షితులు తెలిపారు. వేంకటేశ్వరస్వామి ఆనందనిలయం మధ్యలో ఆవిర్భవించిన కన్యామాసం (ఆశ్వయజం)లోని శ్రవణ నక్షత్రానికి ముగిసేలా 9 రోజుల పాటు సాక్షా త్తు బ్రహ్మదేవుడు ఈ ఉత్సవాలు నిర్వహించారని పురాణాల ద్వారా తెలు స్తోంది. అందువల్లే ఇవి బ్రహ్మోత్సవాలుగా ప్రసిద్ధి పొందాయి. ఈ ఉత్స వాల్లో రోజూ ఉదయం, సాయంత్రం వాహనసేవల్లో మొదట బ్రహ్మరథం ఉంటుంది. రథోత్సవంనాడు మాత్రమే బ్రహ్మరథం ఉండదు. నవరాత్రి బ్రహ్మోత్సవాల్లో చెక్క రథోత్సవం ఉండదు. బంగారు రథాన్ని ఊరేగిస్తారు.



శ్రీవారి బ్రహ్మోత్సవాలకు ఏర్పాట్లు

Updated By ManamSun, 09/30/2018 - 23:17
  • 10 నుంచి 18 వరకూ నవరాత్రి ఉత్సవాలు 

  • భక్తజనులకు సేవలందించడంలో రాజీపడేదిలేదు 

  • అసౌకర్యం లేకుండా చర్యలు: టీటీటీ జేఈవో 

TIRUMALAతిరుమల: దసరా సెలవుల్లో, అక్టోబరు 10 నుంచి 18వ తేదీ వరకు జరగనున్న తిరుమల శ్రీవారి నవరాత్రి బ్రహ్మోత్స వాలలో భక్తులకు ఎలాంటి అసౌకర్యాం కలుగకుండా ముందస్తు చర్యలు తీసుకుంటున్నట్లు టీటీడీ జేఈవో కె.ఎస్.శ్రీనివాసరాజు పేర్కొన్నారు. భక్తులకు టీటీడీ అన్నప్రసాదం, విజిలెన్స్, ఆరోగ్య విభాగాలు విశేష సేవలందిస్తున్నాయని తెలిపారు. భక్తులు సంయమనంతో టీటీడీకి సహకరించి, స్వామివారిని దర్శించుకోవాలని జేఈవో కోరారు. తిరుమల శ్రీవారి దర్శనార్థం విచ్చేసే లక్షలాదిమంది సామాన్య భక్తజనులకు సేవలందించడంలో రాజీపడేదిలేదని పేర్కొన్నారు. తిరుమలలో ఆదివా రం ఆయన మీడియాతో మాట్లాడుతూ.. సామాన్య భక్తులకు దర్శనం, వసతి, లడ్డూ ప్రసాదాలు, అన్నప్రసాద సౌకర్యాలను కల్పించడంలో రాజీకి తామలేకుండా సేవలందిస్తున్నామ న్నారు. పెరటాశి నెల సందర్భంగా సాధారణ రోజులలో కూడా వైకుంఠం క్యూ కాంప్లెక్స్ 1, 2లు నిండిపోవడంతో పాటు బయట దాదాపు 2 కిలోమీటర్లు వరకు భక్తులు క్యూ లైన్లలో వేచి ఉంటున్నట్లు తెలిపారు. అధిక రద్దీ కారణంగా అక్టోబరు 6, 7, 13, 14, 20, 21వ తేదీలలో, వచ్చే శని, ఆదివారాలలో దివ్యదర్శనం, సర్వదర్శనం టోకెన్లను రద్దు చేశామని, రూ.300 ప్రత్యేక ప్రవేశ దర్శనం టికెట్లు పరిమిత సంఖ్యలో కేటాయించామన్నారు. తద్వారా సామాన్య భక్తులను వైకుంఠం క్యూ కాంప్లెక్స్ 1, 2ల ద్వారా అధిక సంఖ్యలో సర్వదర్శనానికి అనుమతిస్తున్నట్లు వివరించారు. అదేవిధంగా శని, ఆదివారాలలో వి.ఐ.పి. బ్రేక్ దర్శనాలను ప్రొటోకాల్ ప్రముఖులకు మాత్రమే ఇస్తున్నట్లు తెలిపారు. టీటీడీ ఈవో అనిల్ కుమార్ సింఘాల్ ఆదేశాల మేరకు తిరుమలలో పెరటాశి నెల శని, ఆదివారాలలో క్యూలైన్ల నిర్వహణకు అదనంగా 120 మంది సిబ్బందిని డెప్యూటేషన్‌పై నియమించినట్లు తెలియజేశారు. వీరు తమకు కేటాయిం చిన ప్రాంతంలోని క్యూలైన్లలోని భక్తులకు అవసరమైన తాగునీరు, అన్నప్రసాదాలు, మెడికల్, మరుగుదొడ్లు, పారిశుద్ధ్యం, ఇతర సౌకర్యాల ను పర్యవేక్షిస్తారని వివరించారు.



వెంకన్న సేవలో వెంకయ్య

Updated By ManamTue, 09/25/2018 - 23:21
  • కుటుంబ సభ్యులతో కలసి దర్శనం

  • ప్రజలు సిరిసంపదలు, సుఖ సంతోషాలతో ఉండాలని శ్రీవారికి ఉప రాష్ట్రపతి ప్రార్థన

venkaiah-naiduతిరుమల: దేశ ప్రజలందరూ సిరి సంపదలతో, సుఖశాంతులతో ఉండేలా అశీర్వదించాలని శ్రీవేంకటేశ్వరస్వామి వారిని ప్రార్థించానని భారత ఉప రాష్ట్రపతి వెంకయ్య నాయుడు తెలిపారు. మంగళవారం ఉదయం తిరుమల శ్రీవారిని ఉప రాష్ట్రపతి తన కుటుంబ సభ్యులతో కలిసి  దర్శించుకున్నారు. సామాన్య భక్తుడి లాగా వైకుంఠం క్యూ కాంప్లెక్స్ నుంచి మహాద్వారం వద్దకు చేరుకున్న ఉప రాష్ర్టపతికి టీటీడీ ఈవో అనిల్ కుమార్ సింఘాల్, తిరుమల జేఈవో కె.ఎస్.శ్రీనివాసరాజు, అర్చకులు కలిసి ఇస్తికఫాల్ స్వాగతం పలికారు. వెంకయ్య కుటుంబ సభ్యులతో కలిసి శ్రీవారిని దర్శించుకున్నారు. ఆ తరువాత శ్రీవకుళామాత, విమాన వేంకటేశ్వర స్వామి, భాష్యకార్లు, శ్రీ యోగ నరసింహస్వామివారిని దర్శించుకున్నారు. అనంతరం రంగనాయకుల మంటపంలో వేదపండితులు వారికి వేదాశీర్వచనం చేశారు. ఈ సందర్భంగా ఉప రాష్ట్రపతికి ఈవో అనిల్‌కుమార్ సింఘాల్, జేఈవో కె.ఎస్.శ్రీనివాసరాజు కలిసి శ్రీవారి తీర్థప్రసాదాలు, చిత్రపటం, 2019 టీటీడీ డైరీ, క్యాలెండర్‌ను అందజేశారు.శ్రీవారి దర్శనానంతరం ఆలయం వెలుపల వెంకయ్య నాయుడు మీడియాతో మాట్లాడుతూ.. తన ఇష్టదైవమైన శ్రీ వేంకటేశ్వరస్వామి వారి దర్శనం సంతోషాన్ని, ఆనందాన్ని ఇస్తుందన్నారు. ఉప రాష్ట్రపతిగా బాధ్యతలు స్వీకరించి ఏడాది పూర్తయిన సందర్భంగా తిరుమలకు వచ్చి శ్రీవారిని దర్శించుకున్నట్టు చెప్పారు. భారత ప్రజలకు సేవలందించేందుకు మరింత శక్తిని, సామర్థ్యాన్ని, ఓర్పును ప్రసాదించాలని స్వామివారిని కోరుకున్నానన్నారు. అనేక సంవత్సరాలుగా సామాన్య భక్తుడిలాగా తిరుమలకు వచ్చి స్వామివారిని దర్శించుకుంటున్నానని తెలిపారు. ప్రపంచది వ్యాప్తంగా నానాటికీ శ్రీవేంకటేశ్వరస్వామివారి దర్శనం కోసం ఆసక్తి పెరుగుతోందన్నారు. ప్రముఖులు, నాయకులు, ప్రజాప్రతినిధులు తమ రాకపోకలను కొంత తగ్గించుకొని సామాన్య ప్రజలకు ఎక్కువ అవకాశం కల్పించేలా చర్యలు తీసుకోవాలని టీటీడీ యాజమాన్యానికి, అధికారులకు సూచించానని తెలిపారు. ఈ కార్యక్రమంలో మంత్రి  ఎన్.అమరనాథరెడ్డి, జిల్లా కలెక్టర్ పి.ఎస్.ప్రద్యుమ్న, తిరుపతి అర్బన్ ఎస్పీ అభిషేక్ మహంతి, టీటీడీ ఇన్‌చార్జి సీవీఎస్‌వో శివకుమార్‌రెడ్డి ఇతర అధికారులు పాల్గొన్నారు.



చక్రస్నానంతో సంపూర్ణం

Updated By ManamSat, 09/22/2018 - 02:14
  • ధ్వజావరోహణంతో ముగిసిన బ్రహ్మోత్సవాలు 

  • పుష్కరిణిలో ఘనంగా చక్రస్నానం.. దీక్షాంత స్నానంగా అవభృథం

  • బ్రహ్మోత్సవ యజ్ఞం పరిపూర్ణం.. సమష్టి కృషితో విజయవంతం

  • భక్తుల సహకారానికి ధన్యవాదాలు.. టీటీడీ ఈవో అనిల్‌కుమార్ సింఘాల్

CHAKRASNANAMతిరుపతి:  కలియుగ వైకుంఠం తిరుమలలో ప్రత్యక్ష నారాయుణుడైన శ్రీ వేంకటేశ్వర స్వామికి తొమ్మిది రోజుల పాటు జరిగిన వార్షిక బ్రహ్మోత్సవాలు శుక్రవారంతో ముగిశాయి. శుక్రవారం రాత్రి ధ్వజావరోహణం చేయడంతో బ్రహ్మోత్సవ యజ్ఞం మంగళాంతం అయ్యింది. దీనికిముందు ఉదయం శ్రీవారి పుష్కరణిలో చక్రస్నానం జరిగింది. భక్తులు అధికసంఖ్యలో పాల్గొని, సుదర్శన చక్రత్తాళ్వారుకు స్నపన తిరుమంజనం  చేశారు. తొమ్మిది రోజుల ఉత్సవాలలో జరిగిన సేవలన్నీ సఫలమై లోకం క్షేమంగా ఉండటానికి, భక్తులు సుఖశాంతులతో ఉండటానికి చక్రస్నానం నిర్వహించారు. ఉత్సవాలు ఒక యజ్ఞమే కనుక, యజ్ఞాంతంలో అవభృథస్నానం చేస్తారు. యజ్ఞ నిర్వహణలో జరిగిన చిన్న చిన్న లోపాల వల్ల ఏర్పడే దుష్పరిణామాలు తొలగి, సంపూర్ణ ఫలాలు చేకూరడానికి చేసే దీక్షాంతస్నానం అవభృథం. దీనికిముందు శ్రీ భూదేవి సమేతుడైన మలయప్పమూర్తికి స్నపన తిరుమంజనం నిర్వహించారు. తరువాత సుదర్శనచక్రాన్ని పవిత్ర పుష్కరిణీ జలంలో ముంచి, స్నానం చేయించారు. అదే సమయంలో అనేకమంది భక్తులు పుష్కరిణిలో స్నానం చేశారు. చక్రస్నానం నాటి సాయంత్రం యథావిధిగా ధ్వజావరోహణం చేశారు. 

సమిష్టి కృషితో విజయవంతం: ఈఓ సింఘాల్
టీటీడీలోని అన్ని విభాగాల అధికారులు, సిబ్బంది, జిల్లా యంత్రాంగం సమిష్టి కృషితో శ్రీవారి వార్షిక బ్రహ్మోత్సవాలను విజయవంతం చేశారని కార్యనిర్వహణాధికారి అనిల్ కుమార్ సింఘాల్ తెలిపారు. ఆయన శుక్రవారం విలేకరులతో మాట్లాడుతూ లక్షలాది మంది భక్తులు సంయమనంతో వ్యవహరించి, క్యూలైన్లు, గ్యాలరీలలో వేచి ఉన్నారని, భక్తిభావంతో టీటీడీకి సహకరించారని, వారికి ధన్యవాదాలని తెలిపారు. జేఈఓ శ్రీనివాసరాజు ఎప్పటికప్పుడు అధికారులతో సమీక్షలు నిర్వహిస్తూ పకడ్బందీగా ప్రణాళికలు చేపట్టి, బ్రహ్మోత్సవాలు విజవంతం కావడానికి కృషిచేశారని తెలిపారు. తిరుపతి అర్బన్ ఎస్పీ అభిషేక్ మహంతి కట్టుదిట్టమైన భద్రతా ఏర్పాట్లు చేపట్టారన్నారు. బ్రహ్మోత్సవ సమయాల్లో ఉదయం 8 గంటల నుంచి రాత్రి 12 గంటల వరకు అన్నప్రసాదాల వితరణ చేసినట్లు తెలిపారు. వచ్చేనెల పదోతేదీ నుంచి జరగనున్న నవరాత్రి బ్రహ్మోత్సవాలకు సెలవులు ఉండటంతో ఎక్కువ సంఖ్యలో భక్తులు పాల్గొనే అవకాశం ఉందని, దీనికి తగ్గట్లు ఏర్పాట్లు చేపడతామన్నారు. చక్రస్నానం కార్యక్రమంలో టీటీడీ ట్రస్టు బోర్డు చైర్మన్ పుట్టా సుధాకర్ యాదవ్, ఈఓ అనిల్ కుమార్ సింఘాల్, తిరుమల, తిరుపతి జేఈఓలు శ్రీనివాసరాజు, పోలా భాస్కర్, బోర్డు సభ్యులు సుధా నారాయణమూర్తి, శివాజీ, శ్రీకృష్ణ తదితరులు పాల్గొన్నారు.





Related News