tdp

కర్ణాటకలో కమలానికి పంచ్

Updated By ManamWed, 11/07/2018 - 01:58
  • కేంద్ర వ్యవస్థను పతనం చేశారు

  • 10న నెల్లూరులో హోదా కోసం ధర్మపోరాట సభ

  • రాజధానిలో భారీ ఎత్తున చివరి పోరాట సభ 

  • జాతీయ పార్టీల నేతలు పాల్గొనే అవకాశం

  • 12న ఆదరణ-2 పనిముట్లు పంపిణీ

  • టీడీపీ సమన్వయ కమిటీ సమావేశంలో చంద్రబాబు

babuఅమరావతి: కర్ణాటక ఉప ఎన్నికల ఫలితాలు బీజేపీకి శరాఘాతంగా మారాయని టీడీపీ అధినేత, రాష్ట్ర ముఖ్యమంత్రి చంద్రబాబు విమర్శించారు. ప్రజల్లో బీజేపీపై ఉన్న వ్యతిరేకతకు నిదర్శనమన్నారు. ఉప ఎన్నికల్లో బీజేపీ దారుణంగా దెబ్బతిన్నదని ఒక అభ్యర్థి పోటీ చేయకుండానే తప్పుకున్నారని, పోటీ చేసిన అభ్యర్థులు ఘోరంగా ఓడిపోయారని చంద్రబాబు విమర్శించారు. మోదీ పాలనపై ఉన్న వ్యతిరేకతకు ఈ ఫలితాలే సాక్ష్యమని, ప్రజలకు బీజేపీ ఎంత దూరమైందో ఇదే స్పష్టమైన సంకేతమన్నారు. రాజకీయం రోజురోజుకూమారుతోందని, అహంభావంతో ఉంటే ప్రజలే కళ్లు తెరిపిస్తారని చంద్రబాబు పేర్కొన్నారు. మంగళవారం రాత్రి చంద్రబాబు అధ్యక్షతన తెలుగుదేశం పార్టీ ముఖ్యనేతలతో సమన్వయ కమిటీ సమావేశం జరిగింది. కేంద్రంలో బీజేపీ పోకడలతో జనం బేజారెత్తుతున్నారని ఆయన ఆరోపించారు. దేశంలో రూపాయి విలువ  ఎప్పుడూ లేనంతగా దిగజారిందని, పెట్రోల్, డీజిల్ ధరలు విపరీతంగా పెంచేశారని విమర్శించారు. కేంద్ర వ్యవస్థలను దారుణంగా పతనం చే శారని మండిపడ్డారు. సీబీఐని భ్రష్టు పట్టించి, ఈడీని దుర్వినియోగం చేశారని, ఆర్‌బీఐ స్వయం ప్రతిపత్తిని దెబ్బతీశారని పేర్కొన్నారు. దేశంలోని రైతుల్లో తీవ్ర అశాంతి నెలకొందని,మహిళలు, యువత నిరాశలో మునిగారని చంద్రబాబు మండిపడ్డారు.

రాజకీయ పార్టీల్లో బీజేపీ చిచ్చు...
దేశంలో రాజకీయ పార్టీల్లో బీజేపీ చిచ్చుపెడుతోందని చంద్రబాబు విమర్శించారు. ప్రతిపక్ష నేతల కుటుంబాల్లోనూ కేసులతో భయపెడుతున్నారని ఆరోపించారు. దేశంలోని అన్ని వ్యవస్థలను డబ్బుతో ప్రలోభపెట్టాలని చూస్తున్నారన్నారు. బీజేపీ చేస్తున్న చేష్టల వల్లే ప్రజల్లో తీవ్ర వ్యతిరేకత  వచ్చిందని చంద్రబాబు విశ్లేషించారు. విజయానికి అడ్డదారులు లేవని, నిరంతర శ్రమతోనే విజయాలు సాధ్యమవుతాయని పేర్కొన్నారు. నేతలు నిరంతరం ప్రజలతో ఉండాలని, ఎప్పటికప్పుడు కార్యకర్తలను, నాయకులను సమన్వయం చేసుకుంటూ ముందుకు పోవాలని సూచించారు. రాష్ట్రంలోని అన్ని నియోజకవర్గాల్లో ఈ నెల 12న ఆదరణ-2 పేరిట 8లక్షల యూనిట్ల పంపిణీ చేస్తున్నామని ఆయన వెల్లడించారు. దానిలో బీసీలకు 4లక్షలు, ఇతరవర్గాలకు మరో 4లక్షల యూనిట్లు పంపిణీ చేయనున్నామని తెలిపారు. ఒక్కో నియోజకవర్గంలో 4500 కుటుంబాలకు లబ్ది చేకూరుతుందన్నారు. ఉబరైజేషన్ కింద 15వేల ట్రైసైకిళ్లు, ఆటోలు ఇస్తున్నామని, వీటిద్వారా కుటుంబానికి రూ.10వేల రాబడి వస్తుందన్నారు. రాష్ట్రంలో ప్రతి కుటుంబం ఆదాయం నెలకు కనీసం రూ.10వేలు ఉండేలా చర్యలు తీసుకుంటామని ఆయన పేర్కొన్నారు. రాబోయే రెండేళ్లలో ప్రతిఇంటికి నాణ్యమైన తాగునీరు అందించాలనే లక్ష్యంతో పనిచేస్తున్నామని చెప్పారు. 

10న నెల్లూరులో ధర్మపోరాట సభ...
ఈ నెల 10వ తేదీన నెల్లూరులో ప్రత్యేకహోదాను కాంక్షిస్తూ, కేంద్ర ప్రభుత్వానికి వ్యతిరేకంగా 8వ ధర్మపోరాట సదస్సు నిర్వహించనున్నామని చంద్రబాబు వెల్లడించారు. రాష్ట్రంలో ఇప్పటికే 7 ధర్మ పోరాట సదస్సులు జరిగాయన్నారు. 9వ సదస్సు విజయనగరంలో ఈ నెల 27న  జరుగుతుందని, తరువాత అనంతపురం, శ్రీకాకుళంలో ధర్మపోరాట సభలు ఉంటాయన్నారు. రాజధాని ప్రాంతంలో (గుంటూరు, కృష్ణా జిల్లాల) చివరి సభ భారీ ఎత్తున నిర్వహిస్తామని చెప్పారు. రాజధానిలో జరిగే ధర్మపోరాట సభకు, పలు  జాతీయ పార్టీల నేతలు పాల్గొంటారని చంద్రబాబు వెల్లడించారు.



అలా అయితే జగన్ ఓడిపోయేవాళ్లు కాదు..

Updated By ManamTue, 11/06/2018 - 16:26
  • త‌రం మారుతోంది.. ఆలోచ‌నా విధానం మార్చుకోండి

  • నా బ‌లం చూసి మీ బ‌లం అనుకోకండి

  • ప‌ని చేస్తేనే ఓట్లు ప‌డ‌తాయి 

  • ​​​​​​​నాయ‌కుల‌కు జ‌న‌సేన అధ్యక్షుడు పవన్ కల్యాణ్ దిశానిర్దేశం

JanaSena Chief PawanKalyan Meeting with Kakinada SEZ Sufferers

కాకినాడ : న‌మ్మిన సిద్ధాంతం కోసం చ‌చ్చిపోవ‌డానికి తాను సిద్ధంగా ఉన్ననని అయితే, జనసేన పార్టీలో కొంతమంది నాయ‌కులు అలా లేర‌ని జ‌న‌సేన పార్టీ అధ్యక్షుడు పవన్ కల్యాణ్ అన్నారు. విశాఖ‌ప‌ట్నంలోని అంబేద్క‌ర్ భ‌వ‌న్‌లో ప‌డుకుంటే మీ కోసం చ‌చ్చిపోతాం అన్న నాయ‌కుడు ఒక్క‌రూ తన చుట్టు లేరని, తనతో ఉన్న‌ది జ‌న‌ సైనికులేన‌ని అన్నారు. అలాంటి నాయ‌కులు తన బ‌లాన్ని చూసి మీ బ‌లం అనుకుంటే త‌ప్పు చేసిన వాళ్లు అవుతార‌ని హెచ్చ‌రించారు. జ‌న‌సేన పార్టీ ప‌వ‌న్ క‌ల్యాణ్‌ను ఇష్ట‌ప‌డే కోట్లాది మంది అభిమానుల‌ద‌ని అన్నారు.  

మంగ‌ళ‌వారం కాకినాడ‌లోని జీ క‌న్వెన్ష‌న్ ఫంక్ష‌న్ హాల్లో పెద్దాపురం కార్య‌క‌ర్త‌ల‌తో స‌మావేశ‌మ‌య్యారు. ఈ సంద‌ర్భంగా పవన్ మాట్లాడుతూ..  ‘ఒక పార్టీ దెబ్బ తిన్నాక  సామాన్యుడు ఎవ‌డూ పార్టీ పెట్ట‌లేడు. అలాంటి ప‌రిస్థితుల్లో అదే కుటుంబం నుంచి ఒక‌డు వ‌చ్చి మంది మార్బ‌లం, అండ‌దండ‌లు లేకుండా వేల‌ కోట్ల‌కు పెరిగిపోయిన రాజ‌కీయ వ్య‌వ‌స్థ‌ను ఎదుర్కొవ‌డానికి సిద్ధ‌మ‌య్యాడు అంటే ఎంత నిబ‌ద్ధ‌త ఉండాలో ఊహించ‌గ‌ల‌రా..? ఇంటి నుంచి చొక్క‌, పంచెతో బ‌య‌ట‌కు వ‌చ్చానంటే మ‌ళ్లీ ఇంటికి వెళ్తానో లేదో తెలియ‌దు అంత నిబ‌ద్ధ‌తో ప‌ని చేస్తాను.  నేను చేయ‌ని త‌ప్పుల‌కు 9 నెల‌లు న‌న్ను టీవీల్లో బూతులు తిడితే భ‌రించాను. 

భ‌యంతో కాదు స‌హ‌నం అనే గుణంతో భ‌రించాను. కొద్దిమంది నాయ‌కులు ఒక్క మాట కూడా ప‌డ‌లేరు. వాళ్ల‌కు ఎందుకింత అహంభావం, ఈగో, ఏం సాధించార‌ని. ఇన్ని కోట్లాది మంది ప్రేమ‌ను సంపాదించాలంటే భ‌గ‌వంతుడు నాకు ఎన్ని ప‌రీక్ష‌లు పెట్టుంటాడు, ఎంత‌ క‌ష్టం ప‌డుంటాను.  నియోజ‌క‌వ‌ర్గానికి 100 ఓట్లు కూడా తెప్పించుకోని నాయ‌కులు జ‌న‌సైనికుల‌ను ఎందుకు ఇబ్బందిపెడ‌తారు. వ్య‌వ‌స్థ మారుతోంది, స‌మాజం మారుతోంది, యువ‌త మారుతోంది... మీరు ఎప్పుడు అర్థం చేసుకుంటారు. గతంలో కులాలు, వ‌ర్గాల‌తో రాజ‌కీయం చేయ‌డం కుద‌ర‌దు. వేల‌కోట్లే రాజ‌కీయాల‌కు అవ‌స‌ర‌మైతే తెలుగుదేశం పార్టీకి జ‌న‌సేన అవ‌స‌రం ఉండేది కాదు. జగన్ మోహన్  రెడ్డి ఓడిపోయి ఉండేవారు కాదు.  

పాతత‌రం ఆలోచ‌నల్లో కూరుకు పోయినవాళ్లు దాని నుంచి బ‌య‌ట‌కు రండి. ఎన్టీఆర్ స‌మ‌యంలో అలా జ‌రిగింది, ఇలా జ‌రిగింది అని చెప్పొద్దు. ఎన్టీఆర్ వ‌చ్చి 30 ఏళ్లు దాటింది. ఆ శ‌కం ముగిసింది.  ప్ర‌తి మూడు ద‌శాబ్ధాల‌కు ఒక కొత్త ఆలోచ‌నతో కూడిన‌ రాజ‌కీయ విధానం వ‌స్తుంది. దానిని దృష్టిలో పెట్టుకుని నాయ‌కులు మార‌క‌పోతే వాళ్లే న‌ష్ట‌పోతారు. ఒకసారి నాయ‌క‌త్వం మార‌డం ప్రారంభం అయితే వ‌ర‌ద‌లా మారిపోతుంది. మార్పు అనే ల‌క్ష్యం త‌ప్ప నాకు ఓట‌మి భ‌యాలు లేవు. నీరు ప‌ల్లం వైపే వ‌స్తుంది. ఓట్లు ఆశ‌యం ఉన్న వైపే వ‌స్తాయి.  ప‌నిచేయ‌కుండా ప్ర‌భుత్వాన్ని స్థాపిద్దాం, నాయ‌కులుగా ఎదుగుదాం అంటే జ‌ర‌గ‌దు. నాయ‌క‌త్వానికి ముఖ్యంగా కావాల్సింది.

సామ‌ర‌స్య‌పూర్వ‌క ధోర‌ణి. జ‌గ్గంపేట, పెద్దాపురం స‌భ‌ల్లో పెద్ద పెద్ద ఫ్లెక్సీలు పెట్టి బాగా ఖ‌ర్చు చేశారు.. కాద‌న‌డం లేదు. కానీ అంత పెద్ద ఫ్లెక్సీలు అడ్డంగా ఉండ‌టం వ‌ల్ల అభిమానులు, కార్య‌క‌ర్త‌లు న‌న్ను చూడ‌లేక‌పోతున్నారు. వాళ్లను చూడ‌నివ్వండి. ప్ర‌జాస్వామ్యం అంటే తెల్ల‌బ‌ట్ట‌లు వేసుకుని అంద‌రిని ప‌ల‌క‌రించ‌డం కాదు.  అవ‌స‌ర‌మైన చోట‌ త‌ట్ట‌పార ప‌ట్టుకుని రంగంలోకి దిగాలి. మ‌నం పెద్ద కులం అని చెప్పుకోవ‌డానికి ఇష్ట‌ప‌డ‌తాం కానీ మ‌నం ప‌డుకుండిపోయాక మ‌నం ప‌డేసే చెత్త‌ను రాత్రులు తొల‌గిస్తూ ప‌రిస‌రాల‌ను శుభ్రంగా ఉంచుతున్నారు కాబ‌ట్టే రెల్లి కులాన్ని స్వీక‌రించా.  రాజ‌కీయాల్లో పేరుకుపోయిన చెత్త‌ను తొల‌గించ‌డానికి మ‌నం అంద‌రం కూడా రెల్లి కులాన్ని స్వీక‌రించాలి.

జ‌న‌సైనికులు ప‌ట్ల పార్టీలో పైస్థాయి నాయ‌కులు అంద‌రూ నిబ‌ద్ధ‌త‌గా ఉన్నాం. మ‌ధ్య‌లో ఉండి అనుసంధానం చేయాల్సిన నాయ‌కులు ఎంత బ‌ల‌ప‌డ‌తారు అనేది వారి విలువ‌లు, సమర్థత బ‌ట్టి ఉంటుంది. పార్టీలో నాయ‌కులు లేర‌ని బేలప‌డిపోకండి. ఫ్రెంచ్, ఈజిప్ట్ విప్ల‌వాల‌ను న‌డిపింది చిన్న చిన్న గ్రూపులే అని గుర్తుంచుకోండి. నేను చిత్త‌శుద్దిగా ఉన్నా.. మీరు చిత్త‌శుద్ధిగా ఉన్నారు.. మ‌న మ‌ధ్య‌లో ఎవ‌రున్నా మారాల్సిందే’ అని చెప్పారు.



‘పచ్చ’ నేతలు.. శవాలపై పేలాలు ఏరుకుంటున్నారు'

Updated By ManamMon, 11/05/2018 - 15:44
  • ట్విట్టర్ వేదికగా విజయసాయి రెడ్డి ధ్వజం

TDP leaders, Vijayasai Reddy, TDP, Chandrababu Naidu, YSRCP MP, TDP Ruleఅమరావతి: వైఎస్సార్ కాంగ్రెస్ ఎంపీ విజయసాయి రెడ్డి ఏపీలో టీడీపీ పాలన తీరుపై తీవ్రస్థాయిలో ధ్వజమెత్తారు. ఈ మేరకు సోమవారం ట్విట్టర్ వేదికగా విజయసాయి తెలుగు తమ్ముళ్లపై విమర్శలు గుప్పించారు. రాష్ట్రంలో తిత్లీ తుపాను విధ్వంసంతో కొబ్బరి, జీడి, వరి రైతులు తమ జీవనాధారాన్ని కోల్పోయి సాయం కోసం దీనంగా ఎదురుచూస్తుంటే.. ఎన్యూమరేషన్‌ను పచ్చ చొక్కా నేతలు హైజాక్ చేశారని మండిపడ్డారు. హైజాక్ చేసిన ఎన్యూమరేషన్‌ను పచ్చ చొక్కాలు గుటకాయ స్వాహా చేసి రైతుల నోట్లో మన్ను కొట్టారని దుయ్యబట్టారు. శవాలపై పచ్చ చొక్కా నేతుల పేలాలు ఏరుకుంటున్నారని ధ్వజమెత్తారు. సెంటు భూమి లేని వారు సైతం 150 నుంచి 200 కొబ్బరి చెట్లు కోల్పోయినట్టు రాయించుకున్న ఘటనలు కొకల్లలని విమర్శించారు.

0.30 సెంట్లు భూమి ఉంటే 3 ఎకరాలని నమోదు చేసుకున్నారని విజయసాయి విమర్శించారు. ఎకరాకి 60 కొబ్బరి చెట్లు చొప్పున 3 ఎకరాలకు 180 చెట్లు ఉంటే.. పరిహారం 2.70 లక్షలని ట్వీట్‌లో పేర్కొన్నారు. కాకి లెక్కలతో పచ్చ చొక్కాలు పరిహారాన్ని హాంఫట్ చేసిన తీరిదని ఎండగట్టారు. ఎన్టీఆర్ విద్యోన్నతి కోచింగ్ సెంటర్లలో సీట్ల కేటాయింపు విషయంలో చంద్రబాబు పరిపాలన విభాగం పనితీరు హాస్యాస్పదమైన రీతిలో ఉందని ఎద్దేవా చేశారు. చాలామంది అభ్యర్థులంతా తమకు సమీప ప్రాంతాలైన విజయవాడ, హైదరాబాద్‌లో సీట్లను ఎంచుకుంటే వాటికి బదులుగా ఎక్కడో దూరంగా ఢిల్లీలో తెలుగు మీడియం లేని చోట సీట్లను కేటాయించారని విజయసాయి మండిపడ్డారు. 



చిత్తూరు జిల్లాలో కాంగ్రెస్ కనుమరుగు!

Updated By ManamMon, 11/05/2018 - 12:26
  •     కాంగ్రెస్ పార్టీ దాదాపు కనుమరుగు

  •     ఇప్పటికే పార్టీలు మారిన నాయకులు

  •     పొత్తుతో తమకు మేలేనన్న కాంగ్రెస్

  •     స్నేహ‘హస్తా’నికి ఎన్టీఆర్ సుముఖం!

  •     మాజీ ఎంపీ చింతా మోహన్ వ్యాఖ్య

congress party in chittoor district

తిరుపతి :టీడీపీ - కాంగ్రెస్ పొత్తుపై చిత్తూరు జిల్లాలో సానుకూల పవనాలు వీస్తున్నాయి. రెండు పార్టీల నాయుకులలో పొత్తుపై పెద్దగా వ్యతిరేకత కనిపించడం లేదు. కాంగ్రెస్, టీడీపీ నేతలతో పాటు సీపీఐ జాతీయ నాయుకుడు నారాయణ కూడా దీన్ని శుభపరిణామంగానే చెబుతున్నారు. ఇక మాజీ ఎంపీ చింతా మోహన్ అయితే దీన్ని తాను ఎప్పుడో ఊహించానన్నారు. ఎన్టీఆర్ మరణించక ముందు.. ఆయన కూడా కాంగ్రెస్‌కు స్నేహహస్తం అందించాలని భావించారని, ఆ విషయాన్ని సాక్షాత్తు ఎన్టీఆరే తనతో చెప్పారని చింతా మోహన్ పేర్కొన్నారు. 

ఉనికి లేని కాంగ్రెస్ 
చిత్తూరు జిల్లాలో కాంగ్రెస్ పార్టీ ఒక రకంగా చెప్పాలంటే దాదాపు ఉనికి కోల్పోయింది. ఒకరిద్దరు తప్ప పెద్దగా చెప్పుకోదగ్గ నాయకులు కూడా లేరు. ఇంతకుముందు పార్టీకి పెద్దదిక్కుగా ఉండే పెద్దిరెడ్డి రావుచంద్రారెడ్డి.. వైఎస్‌ఆర్‌ సీపీలో చేరారు. అలాగే వైఎస్ హయాంలో మంత్రిగా పనిచేసిన గల్లా అరుణకుమారి టీడీపీలో చేరిపోయారు. నగరి నియోజకవర్గంలోని సీనియర్ నాయకుడు రెడ్డివారి చెంగారెడ్డి కొంతకాలంగా రాజకీయాలకు దూరంగా ఉంటున్నారు. చిత్తూరు నియోజకవర్గం నుంచి పోటీచేసే సీకే బాబు ప్రస్తుతం తటస్థంగా ఉన్నారు. ఇటీవల ఆయన బీజేపీలో చేరినా.. ఆ పార్టీలో కొనసాగడం లేదని తెలిసింది. మరో మాజీ మంత్రి కుతూహలమ్మ కూడా తెలుగుదేశం పార్టీలో ఉన్నారు. 

ఇలా దాదాపుగా చిత్తూరు జిల్లాలో కాంగ్రెస్ పార్టీ కనుమరుగయిందని చెప్పక తప్పదు. తెలుగుదేశం పార్టీతో పొత్తు పెట్టుకోవడంతో చింతా మోహన్‌తో పాటు, ద్వితీయశ్రేణి కాంగ్రెస్ నాయకులు కూడా సంతోషం వ్యక్తంచేస్తున్నారు. తమకు ఒకటో రెండో సీట్లు కేటాయించకపోతారా, అక్కడ గెలవకపోతామా అనే ధీమాతో ఉన్నారు. మాజీ ఎంపీ చింతా మోహన్ కూడా ఇదే విషయంపై ఆలోచనలో ఉన్నట్లు తెలుస్తోంది.

గతంలో తెలుగుదేశం పార్టీ తిరుపతి పార్లమెంటరీ నియోజకవర్గాన్ని పొత్తు పెట్టుకున్న పార్టీలకే ఇస్తూ వచ్చింది. 2009 ఎన్నికల్లో మాత్రమే టీడీపీ అభ్యర్థిగా వర్ల రామయ్య పోటీ చేసి, చింతా మోహన్ చేతిలో పరాజయం పొందారు. 2014 ఎన్నికల్లో తిరుపతిని బీజేపీకి కేటాయించారు. అదే తరహాలో రానున్న ఎన్నికల్లో కూడా తిరుపతి పార్లమెంటరీ నియోజకవర్గాన్ని కాంగ్రెస్‌కు కేటాయించవచ్చుననే ధీమాతో చింతా మోహన్ ఉన్నట్లు తెలుస్తోంది. 

చిత్తూరు జిల్లాలో సీట్ల సర్దుబాటు కు సంబంధించి సమస్యలు రాకపోవచ్చునని టీడీపీ అధిష్ఠానం భావిస్తోంది. చిత్తూరు, నగరి నియోజకవర్గాలను కాంగ్రెస్ పార్టీకి కేటాయించే అవకాశాలున్నట్లు కాంగ్రెస్ పార్టీ కూడా భావిస్తోంది. చిత్తూరు జిల్లాలో రెండు లేదా మూడు శాసన సభా నియోజకవర్గాలతో పాటు, తిరుపతి పార్లమెంటరీ నియోజకవర్గం కేటాయిస్తా రని సమాచారం. తెలుగుదేశం, కాంగ్రెస్ పార్టీల మధ్య పొత్తు పెట్టుకోవడంతో, తమ పార్టీ తుడిచిపెట్టుకుని పోతుందనే భయంతో ప్రధాని మోదీలో గుబులు పుట్టుకుందని టీడీపీ చిత్తూరు జిల్లా అధ్యక్షుడు పులివర్తి నాని అభిప్రాయపడ్డారు.

శుభపరిణామం అంటున్న సీపీఐ నారాయణ
తెలుగుదేశం, కాంగ్రెస్ పార్టీల కలయిక శుభపరిణామం అని రెండు రోజుల పర్యటనకు చిత్తూరు జిల్లాకు వచ్చిన సీపీఐ జాతీయ నాయకుడు నారాయణ అన్నారు. దీని ద్వారా ప్రజాస్వామ్యాన్ని రక్షించుకునే వేదిక ఏర్పడిందని తెలిపారు. తిరుపతి ఎమ్మెల్యే సుగుణమ్మ వద్దకు వెళ్లి మళ్లీ నువ్వే ఎమ్మెల్యేవు అవుతావని ఆశీర్వదించి వచ్చారు. చంద్రగిరి అభ్యర్థిత్వాన్ని ఆశిస్తున్న పులివర్తి నాని వద్దకు కూడా వెళ్లి, 2019లో ఎమ్మెల్యేగా నానిని చూస్తామని బహిరంగ ప్రకటన చేశారు.

బీజేపీ నాయకుల విమర్శలు 
తెలుగుదేశం, కాంగ్రెస్ పార్టీల పొత్తుకు సంబంధించి చిత్తూరు జిల్లాలో వైసీపీ నాయకులు పెద్దగా స్పందించడం లేదు. మాజీ మంత్రి పెద్దిరెడ్డి రామచంద్రారెడ్డి మాత్రమే ఈరెండు పార్టీల పొత్తును విమర్శించారు. రాజ్యసభ సభ్యుడు, బీజేపీ నాయకుడు జీవీఎల్ నరసింహరావు జిల్లా పర్యటనకు వచ్చి రెండుపార్టీల పొత్తును విమర్శించారు. ఆంధ్రప్రదేశ్‌కు లక్షల కోట్ల రూపాయలు ఇచ్చామని, వాటికి ఇంతవరకు లెక్కలు చెప్పలేదని అన్నారు. ఈ రెండు పార్టీలు ఒక ఒరలో ఇమడవన్నారు. ముఖ్యమంత్రి చంద్రబాబు తన సొంత జిల్లాకు కూడా ఏమీ చేయలేకపోయారని, ఇక రాష్ట్రానికి, దేశానికి ఏమి చేస్తారని ఎద్దేవా చేశారు.



'దొంగలు, గజదొంగలు కలిసినట్టుగా ఉంది'

Updated By ManamSun, 11/04/2018 - 13:39

Botsa Satyanarayana, TDP, Congress, Chandrababu naidu, Ys jagan mohan reddy, Pawan Kalyanవిశాఖపట్నం: టీడీపీని కాపాడుకోవడం కోసమే కాంగ్రెస్‌తో కలిసారని వైఎస్సార్ కాంగ్రెస్ సీనియర్ నేత బొత్స సత్యనారాయణ విమర్శించారు. దొంగలు, గజ దొంగలు కలిసినట్లుగా ఉంది వారి కలయిక అని బొత్స మండిపడ్డారు. ఆదివారం విశాఖలో వైఎస్ఆర్ కాంగ్రెస్ పార్టీ కార్యాలయంలో ఆయన మీడియాతో మాట్లాడారు. చంద్రబాబు రాష్ట్రంలో వ్యవస్థలను చిన్నాభిన్నం చేశారని ధ్వజమెత్తారు. 

మీరా.. దేశంలోని వ్యవస్థలపై మాట్లాడేదని బొత్స దుయ్యబట్టారు. బీజేపీ కన్నా ఎక్కువ చంద్రబాబే వ్యవస్థలను నాశనం చేశారన్నారు. ఇచ్చిన మాటనిలబెట్టుకోవడం కోసం పుట్టిన పార్టీ వైసీపీగా అభివర్ణించారు. జగన్‌పై హత్యాయత్న ఘటనపై థర్డ్ పార్టీ విచారణ జరపాలని డిమాండ్ చేశారు. జగన్‌, పవన్‌ను ఆడించే స్క్రిప్ట్‌ ఢిల్లీలో తయారువుతోందన్నారు. శ్రీనివాస్ కాల్‌డేటాను తీస్తే అసలు సూత్రధారులు బయటకొస్తారని బొత్స తెలిపారు. 



‘తమ్ముళ్ల’ రోషం, పౌరుషం ఏమైంది?

Updated By ManamSat, 11/03/2018 - 15:50
YSRCP MP Vijay Sai Reddy Tweet Irks Telugudesam party

హైదరాబాద్ : ముఖ్యమంత్రి చంద్రబాబు నాయుడుపై వైఎస్సార్ కాంగ్రెస్ పార్టీ రాజ్యసభ సభ్యుడు విజయసాయి రెడ్డి మరోసారి విరుచుకుపడ్డారు. ‘తెలుగు తమ్ముళ్ల రోషం, పౌరుషం ఏమైంది? మీ ఆరాధ్య దైవం ఎన్టీఆర్ ఆత్మ ఘోష వినపడలేదా? నాడు వెన్నుపోటు పొడిచిన బాబు నేడు ఆయన ఆత్మక్షోభకు గురిచేస్తే తిరగబడరా? ఏ సిద్ధాంతంతో ఎన్టీఆర్ పార్టీ పెట్టారో దానిని చంద్రబాబు కాంగ్రెస్ కాళ్ల దగ్గర పెట్టి కళ్లకద్దుకుంటుంటే మీ రక్తం మరిగిపోవడం లేదా? అని ప్రశ్నించారు. ఈ మేరకు విజయసాయి రెడ్డి శనివారం ట్వీట్ చేశారు.



మా పోరాటాన్ని సినిమాతో పోలుస్తారా: లోకేశ్

Updated By ManamSat, 11/03/2018 - 11:57

Nara Lokeshఅమరావతి: కాంగ్రెస్‌తో టీడీపీ పొత్తు పెట్టుకోవడంపై విమర్శించిన జనసేన అధినేత పవన్ కల్యాణ్‌ వ్యాఖ్యలపై ఏపీ మంత్రి నారా లోకేశ్ స్పందించారు. ప్రజాస్వామ్యాన్ని, దేశ వ్యవస్థలను నిర్వీర్యం చేస్తున్న బీజేపీకి వ్యతిరేకంగా జాతీయ స్థాయిలో కూటమిని ఏర్పాటు చేస్తే.. దాన్ని ఫ్లాప్‌షో అనడం బాధాకరమని అన్నారు. ప్రత్యేకహోదా కోసం చంద్రబాబు ఢిల్లీ స్థాయిలో చేస్తున్న పోరాటాన్ని సినిమాతో పోల్చడం సరికాదని లోకేశ్ పేర్కొన్నారు. కాగా టీడీపీ, కాంగ్రెస్ కలవడాన్ని విమర్శించిన పవన్.. అది ఒక ట్రైలర్ లాంటిది మాత్రమేనని, ఆ సినిమా కచ్చితంగా ఫ్లాప్ అవుతుందంటూ వ్యాఖ్యలు చేసిన విషయం తెలిసిందే.



కాంగ్రెస్‌కు రామచంద్రయ్య గుడ్‌బై..?

Updated By ManamSat, 11/03/2018 - 10:48

Ramachandraiahఅమరావతి: టీడీపీతో కాంగ్రెస్‌ పార్టీ పొత్తు పెట్టుకోవడం ఆ పార్టీ సీనియర్ నేతలతో కలకలం సృష్టిస్తోంది. దశాబ్దాల శత్రువు టీడీపీతో పొత్తు పెట్టుకోవడంతో అసహనం వ్యక్తం చేస్తున్న నేతలు కాంగ్రెస్ పార్టీని వీడేందుకు సిద్ధమవుతున్నారు. ఈ క్రమంలో శుక్రవారం కాంగ్రెస్ సీనియర్ నేత వట్టి వసంతకుమార్ రాజీనామా చేయగా.. తాజాగా మరో సీనియర్ నేత సి.రామచంద్రయ్య గుడ్‌బై చెప్పేందుకు సిద్ధమైనట్లు తెలుస్తోంది. దీనిపై ఇప్పటికే నిర్ణయం తీసుకున్న రామచంద్రయ్య కాసేపట్లో అధికారికంగా తన ప్రకటనను తెలపనున్నట్లు సమాచారం.

అయితే సీనియర్ నేతలు పార్టీని వీడటంపై పీసీసీ చీఫ్ రఘువీరా స్పందించారు. పార్టీలో రకరకాల అభిప్రాయాలు ఉండటం సహజమని, రాహుల్ నిర్ణయమే మాకు శిరోధార్యం అని రఘువీరా తెలిపారు. రాహుల్ ప్రధాని అవుతారని, ప్రత్యేక హోదా, విభజన హామీలు అమలవుతాయని, తొందరపడి ఎవరూ నిర్ణయాలు తీసుకోవద్దని సూచించారు.



జగన్‌తో కూడా బాబు చేతులు కలుపుతారు

Updated By ManamSat, 11/03/2018 - 10:29

Pawan Kalyanఅమరావతి: కాంగ్రెస్-టీడీపీ పొత్తు కేవలం ట్రైలర్ మాత్రమేనని.. ఆ సినిమా ఆడే అవకాశం లేదని జనసేన అధినేత పవన్ కల్యాణ్ అన్నారు. చంద్రబాబు రాజకీయ ప్రయాణం ఎక్కడ మొదలైందో, చివరకు అక్కడకే చేరుకుందని పవన్ చెప్పారు. 2014లో కూడా చంద్రబాబును పూర్తిగా నమ్మలేదని.. కానీ రాష్ట్ర విభజన నేపథ్యంలో ఆయనకు మద్దతు ఇచ్చానని పవన్ అన్నారు.

తాను అడ్డంకిగా అనిపిస్తే.. జగన్‌తో కూడా చేతులు కలపడానికి చంద్రబాబు సిద్ధపడతారని పవన్ ఎద్దేవా చేశారు. జనసేన ఏ పార్టీతో పొత్తు పెట్టుకోదని, ప్రజలతోనే పొత్తు పెట్టుకుంటుందని ఈ సందర్భంగా పవన్ తెలిపారు. జగన్‌లా లక్షల కోట్లు తన వద్ద లేవని, అలాగే చంద్రబాబులా హెరిటేజ్ ఫ్యాక్టరీలు లేవని పవన్ అన్నారు.



ఏ పార్టీలో చేరను: వట్టి వసంతకుమార్

Updated By ManamSat, 11/03/2018 - 09:28

Vatti Vasantha Kumarఅమరావతి: టీడీపీతో కాంగ్రెస్ చేతులు కలపడాన్ని నిరసిస్తూ కాంగ్రెస్‌కు రాజీనామా చేసిన వట్టి వసంతకుమార్ తనపై వస్తున్న రూమర్లపై స్పందించారు. కాంగ్రెస్‌కు రాజీనామా చేసిన ఆయన వైసీపీ గానీ జనసేనలో గానీ చేరబోతున్నట్లు ప్రచారం జరిగింది. దీంతో ఈ వార్తలపై స్పందించిన వసంతకుమార్ తాను ఏ పార్టీలోనూ చేరబోవడం లేదని స్పష్టం చేశారు. 

దీనిపై ఆయన మాట్లాడుతూ.. నైతిక విలువలు లేని చంద్రబాబు కాంగ్రెస్‌తో కలవడం తనను తీవ్రంగా బాధించిందని, ఈ కారణంగానే తాను కాంగ్రెస్‌ను వీడానని చెప్పుకొచ్చారు. ప్రస్తుతానికి ఏ పార్టీలోనూ చేరే ఉద్దేశం తనకు లేదని., కానీ కొన్నాళ్ల తర్వాత మళ్లీ కాంగ్రెస్‌లోనే చేరుతానని చెప్పారు. అయితే ఏపీ కాంగ్రెస్ ఉపాధ్యక్షుడు అయిన వట్టి వసంతకుమార్ ఆ పార్టీకి, పార్టీ ప్రాథమిక సభ్యత్వానికి రాజీనామా చేయడం ఆ పార్టీలో కలకలం రేపిన విషయం తెలిసిందే.





Related News